ಬೆಂಗಳೂರಿನಂತಹ ಮಹಾಗರಗಳಲ್ಲಿ ಪಾರ್ಕಿಂಗ್ನದ್ದೇ ದೊಡ್ಡ ಸಮಸ್ಯೆ. ಶಾಪಿಂಗ್ಗಾಗಿ ಹೋದಾಗ ಹೆಚ್ಚಿನವರು ಈ ಸಮಸ್ಯೆಯನ್ನು ಎದುರಿಸಿರುತ್ತಾರೆ. ಈ ಕಿರಿಕಿರಿಯನ್ನು ತಪ್ಪಿಸಲು ಗೂಗಲ್ ಮ್ಯಾಪ್ಸ್ ಒಂದು ವಿಶಿಷ್ಟ ಫೀಚರ್ ಒಂದನ್ನು ಬಿಡುಗಡೆ ಮಾಡಿದೆ. ನಿಮಗೆ ಪಾರ್ಕಿಂಗ್ ಸ್ಥಳ ಸಿಗದ ಪರಿಸ್ಥಿತಿಯಲ್ಲಿದ್ದರೆ, ಅಥವಾ ನೀವು ಹೋಗಲು ಪ್ಲಾನ್ ಮಾಡಿಕೊಂಡಿರುವ ಸ್ಥಳದಲ್ಲಿ ಪಾರ್ಕಿಂಗ್ ಸುಲಭವಾಗಿ ಲಭ್ಯವಿದೆಯೇ ಎಂಬುದನ್ನು ಖಚಿತಪಡಿಸಲು ಗೂಗಲ್ ಮ್ಯಾಪ್ಸ್ನ ಈ ಫೀಚರ್ ನಿಮಗೆ ಸಹಾಯ ಮಾಡುತ್ತದೆ.
ಹೊಸ ಫೀಚರ್ ಬಗ್ಗೆ ಒಂದಿಷ್ಟು ಕುತೂಹಲ ಸೃಷ್ಟಿಯಾಯಿತಲ್ಲ. ಈ ಕೌತುಕವನ್ನು ತಣಿಸಲು ಮುಂದೆ ನಾವು ನೀಡಿರುವ ಹಂತ ಹಂತದ ಮಾರ್ಗದರ್ಶಿ ಅನುಸರಿಸಿ. ನಾವು ನೀಡಿರುವ ವಿಧಾನ ಅನುಸರಿಸುವ ಮೊದಲು ಪ್ರಸ್ತುತ ಪಾರ್ಕಿಂಗ್ ಎಲ್ಲಿ ಲಭ್ಯವಿದೆ ಎಂದು ಮ್ಯಾಪ್ಸ್ ನಿಮಗೆ ನಿಖರವಾಗಿ ತಿಳಿಸುವುದಿಲ್ಲ ಎಂಬುದನ್ನು ನೆನಪಿನಲ್ಲಿಡಿ. ಆದರೆ, ಆ ಸ್ಥಳದಲ್ಲಿ, ಪಾರ್ಕಿಂಗ್ ಕಂಡುಹಿಡಿಯುವುದು ಕಠಿಣ ಕಾರ್ಯ ಎಂದು ಮ್ಯಾಪ್ಸ್ ಸೂಚಿಸುತ್ತದೆ.
ಈ ಫೀಚರ್ ಬಳಸಲು ನಿಮ್ಮ ಬಳಿ ಇತ್ತೀಚಿನ ಗೂಗಲ್ ಮ್ಯಾಪ್ಸ್ ಆವೃತ್ತಿ ಅವಶ್ಯವಾಗಿ ಇರಬೇಕು. ನಂತರ, ಲೊಕೇಷನ್ ಸೇವೆಗಳು ಸಕ್ರಿಯವಾಗಿರಬೇಕು. ನಿಮ್ಮ ಫೋನ್ ಅಥವಾ ಡಿವೈಸ್ನಲ್ಲಿ ಇಂಟರ್ನೆಟ್ ಸಂಪರ್ಕ ಅಗತ್ಯವಾಗಿ ಬೇಕು.
ಮೊದಲು, ನಿಮ್ಮ ಸ್ಮಾರ್ಟ್ಫೋನ್ ಅಥವಾ ಡಿವೈಸ್ನಲ್ಲಿ ಗೂಗಲ್ ಮ್ಯಾಪ್ಸ್ ಆಪ್ ಒಪನ್ ಮಾಡಿ. ಮತ್ತು ನೀವು ಹೋಗಬೇಕಾದ ಸ್ಥಳವನ್ನು ನಮೂದಿಸಿ.
ಹಂತ 2
ಗಮ್ಯಸ್ಥಾನವನ್ನು ನಮೂದಿಸಿದ ನಂತರ, ಕೆಳಗೆ ಇರುವ "ಡೈರೆಕ್ಷನ್" ಗುಂಡಿಯನ್ನು ಟ್ಯಾಪ್ ಮಾಡಿ. ನ್ಯಾವಿಗೇಷನ್ ಪ್ರಾರಂಭಿಸಿ.
ಹಂತ 3
ನಂತರ ನಿಮಗೆ ಅಂದಾಜು ಸಮಯ ಮತ್ತು ದಟ್ಟಣೆಯ ವಿವರಗಳೊಂದಿಗೆ ನಿಮ್ಮ ಪ್ರಸ್ತುತ ಸ್ಥಳ ಮತ್ತು ಗುರಿಯನ್ನು ತೋರಿಸುವ ನಿರ್ದೇಶನಗಳ ಪುಟ ತೆರೆಯುತ್ತದೆ. "ಸ್ಟಾರ್ಟ್" ಗುಂಡಿ ಬರುವವರೆಗೆ ಕೆಳಗಿರುವ ಪಟ್ಟಿಯನ್ನು ಸ್ಲೈಡ್ ಮಾಡಿ.
ನಂತರ ಅಲ್ಲಿ, "ಪಿ" ಗುರುತಿನ ಚಿಹ್ನೆ ನಿಮಗೆ ಕಾಣುತ್ತದೆ. ಅದು, "ಈ ಸ್ಥಳದ ಬಳಿ ಸಾಮಾನ್ಯವಾಗಿ ಪಾರ್ಕಿಂಗ್ ಸುಲಭವಲ್ಲ" ಎಂದು ಉಲ್ಲೇಖಿಸುತ್ತದೆ.