ಫೆರಾರಿ, ರೋಲ್ಸ್‌ರಾಯ್‌ ಕಾರುಗಳನ್ನು ಬಾಡಿಗೆಗೆ ನೀಡುವ 'ಹೈಪ್' ಆಪ್!!

ಯಾವುದಿದು ಹೈಪ್ ಸಂಸ್ಥೆ!

ಓಲಾ, ಉಬರ್ ಮತ್ತಿತರ ಟ್ಯಾಕ್ಸಿಗಳು ಸುಲಭವಾಗಿ ಬಾಡಿಗೆಗೆ ದೊರೆಯುವಾಗ ವಿಲಾಸಿ ಕಾರ್‌ಗಳಿಗೆ ಮೀಸಲಾದ ಬೆಂಗಳೂರು ಮೂಲದ ಸ್ಟಾರ್ಟ್‌ಅಪ್‌ ಇದಾಗಗಿದೆ. ಕೃತಕ ಬುದ್ಧಿಮತ್ತೆ ಆಧರಿಸಿದ ವಿಮೆ ವಹಿವಾಟಿಗೆ ಸ್ವಿಟ್ಜರ್ಲೆಂಡ್‌ನಲ್ಲಿ ಚಾಲನೆ ನೀಡಿದ ಮೊದಲ ಭಾರತೀಯ ರಾಘವ್ ಬೆಳವಡಿ ಅವರು ಇಂತಹದೊಂದು ನವೋಧ್ಯಮವನ್ನು ಸ್ಥಾಪಿಸಿದ್ದಾರೆ.

ಯಾವ ಯಾವ ಕಾರುಗಳು ಲಭ್ಯ?

ಬುಗಾಟಿ ಹೊರತುಪಡಿಸಿ, ಫೆರಾರಿ, ರೋಲ್ಸ್‌ರಾಯ್‌ ಸೇರಿದಂತೆ ವಿಶ್ವದಲ್ಲಿ ಲಭ್ಯ ಇರುವ ಎಲ್ಲ ವಿಲಾಸಿ ಕಾರ್‌ಗಳು ಹೈಪ್‌ನಲ್ಲಿ ಬಾಡಿಗೆಗೆ ಲಭ್ಯ ಇವೆ. ‘ಬಿಲೇನಿಯರ್ ಬಾರ್ಬರ್' ಖ್ಯಾತಿಯ ರಮೇಶ್‌ ಬಾಬು ಅವರ ಬಳಿ ಇರುವ ಎಲ್ಲ ವಿಲಾಸಿ ಕಾರ್‌ಗಳೂ ಇಲ್ಲಿವೆ. ರಮೇಶ್‌ ಅವರು ಈ ‘ಹೈಪ್'ನ ವಹಿವಾಟು ಸಲಹೆಗಾರರೂ ಆಗಿದ್ದಾರೆ ಎಂದು ಹೈಪ್ ಸಂಸ್ಥೆ ತಿಳಿಸಿದೆ.

ಕಾರ್‌ ಬಾಡಿಗೆ ಪಡೆಯುವುದು ಹೇಗೆ?

ನೀವು ಹೈಪ್ ಆಪ್ ಹಾಕಿಕೊಂಡು, (Hype) ಆಪ್‌ ಮೂಲಕವೇ ಕಾರ್‌ ಬಾಡಿಗೆ ಪಡೆಯಬಹುದಾಗಿದೆ. ಯಾವುದೇ ವಿಲಾಸಿ ಕಾರ್‌ಗಳನ್ನು ಬಾಡಿಗೆಗೆ ಪಡೆಯಲು ಕೇವಲ 50 ಸಾವಿರ ಠೇವಣಿ ಇರಿಸುವುದು ಕಡ್ಡಾಯವಾಗಿದ್ದು, ಹಣ ಪಾವತಿ ನಂತರ ಮನೆ ಬಾಗಿಲಿಗೆ ಕಾರ್ ತಲುಪಿಸಲಾಗುತ್ತದೆ. ಸ್ವಯಂ ಚಾಲನೆಗೆ ಕಾರ್‌ಗಳನ್ನು ಬಾಡಿಗೆ ನೀಡುವ ಸೌಲಭ್ಯ ಕೂಡ ಇಲ್ಲಿದೆ.

ಕಾರುಗಳ ಬಾಡಿಗೆ ಎಷ್ಟು?

ಬಿಎಂಡಬ್ಲ್ಯು ಕಾರ್‌ನ ಬಾಡಿಗೆ 8 ಗಂಟೆಗೆ 7 ಸಾವಿರ ಇದ್ದರೆ, ರೋಲ್ಸ್‌ರಾಯ್‌ ಕಾರ್‌ಗೆ 8 ಗಂಟೆ 70 ಸಾವಿರದವರೆಗೆ ಬಾಡಿಗೆ ಇದೆ. ನಗರದಿಂದ ನಗರಕ್ಕೆ ದರ ಬದಲಾಗಲಿದ್ದು, ಗ್ರಾಹಕರನ್ನು ಒದಗಿಸಿಕೊಟ್ಟಿದ್ದಕ್ಕೆ ಕಾರ್‌ ಬಾಡಿಗೆ ಸಂಸ್ಥೆಗಳು ನೀಡುವ ಕಮಿಷನ್‌ ‘ಹೈಪ್‌'ನ ವರಮಾನದ ಮೂಲವಾಗಿದೆ. ವಹಿವಾಟಿನ ಸ್ವರೂಪ ಆಧರಿಸಿ ಶೇ 10 ರಿಂದ 25ರವರೆಗೆ ಕಮಿಷನ್ ಇರಲಿದೆ.

ಕಾರಿನ ಮೇಲೆ ಸಂಪೂರ್ಣ ನಿಗಾ!

ಪ್ರತಿಯೊಂದು ಐಶಾರಾಮಿ ಕಾರಿಗೂ ವಿಶೇಷ ಸಾಫ್ಟ್‌ವೇರ್‌ ಒಳಗೊಂಡ ಜಿಪಿಎಸ್ ಸಾಧನ ಜೋಡಿಸಲಾಗಿರುತ್ತದೆ. ಹೀಗಾಗಿ ಕಾರ್‌ ಓಡುವ ವೇಗ, ಇರುವ ತಾಣ, ವಾಹನದಲ್ಲಿ ಇರುವ ಪ್ರಯಾಣಿಕರ ಸಂಖ್ಯೆ ಎಲ್ಲದರ ಮೇಲೆ ಕೇಂದ್ರ ಸ್ಥಾನದಲ್ಲಿ ಇದ್ದುಕೊಂಡೇ ನಿಗಾ ಇರಿಸಬಹುದಾಗಿದ್ದು, ಇದು ಗ್ರಾಹಕರ ಸುರಕ್ಷತೆಗೂ ಕೂಡ ಸಹಾಯವಾಗಲಿದೆ.