ಹೊಸದಾಗಿ ಬಿಡುಗಡೆಯಾಗುವ ಐಫೋನ್‌ನಲ್ಲಿ ಆಂಡ್ರಾಯ್ಡ್ ಮೀರಿಸುವ ಬ್ಯಾಟರಿ...!

ನಾವಿನ್ನೂ ಈ ವರ್ಷ ಬಿಡುಗಡೆಯಾದ ಆಪಲ್ ಐಫೋನ್ ಗಳ ಗುಂಗಿನಲ್ಲೇ ಇದ್ದೇವೆ. ಆದರೆ 2018 ರಲ್ಲಿ ಬಿಡುಗಡೆಯಾಗಲಿರುವ ಆಪಲ್ ಐಫೋನ್ ಗಳ ಬಗ್ಗೆ ಈಗಾಗಲೇ ಹಲವು ವದಂತಿಗಳು ಕೇಳಿಬರುತ್ತಿವೆ.

ಈವರೆಗೆ ನಮಗೆ ದೊರೆತಿರುವ ಮಾಹಿತಿಗಳ ಅನುಸಾರ ಆಪಲ್ ಸಂಸ್ಥೆಯು 2018 ರಲ್ಲಿ 3 ವಿಭಿನ್ನ ಐಫೋನ್ ಗಳನ್ನು ಲಾಂಚ್ ಮಾಡಲಿದೆ. ಅವುಗಳ ಪೈಕಿ ಎರಡು ಐಫೋನ್ ಗಳು OLED ಡಿಸ್ಪ್ಲೇ ಹೊಂದಿದ್ದರೆ, ಇನ್ನುಳಿದ ಒಂದು ಮಾಡೆಲ್ ಐಫೋನ್ X ನ ಅಗ್ಗದ ಆವೃತ್ತಿಯಾಗಿರಲಿದ್ದು LCD ಡಿಸ್ಪ್ಲೇ ಹೊಂದಿರಲಿದೆ. ಇನ್ನು ಕೆಜಿಐ ಸೆಕ್ಯುರಿಟೀಸ್ ನ ಖ್ಯಾತ ವಿಶ್ಲೇಷಕರಾದ ಮಿಂಗ್-ಚಿ ಕ್ಯೋ ಅವರು ಮುಂಬರಲಿರುವ ಆಪಲ್ ಐಫೋನ್ಗಳ ಕುರಿತು ಮತ್ತಷ್ಟು ಕುತೂಹಲಕಾರಿ ಅಂಶಗಳನ್ನು ತಿಳಿಸಿದ್ದಾರೆ.

ಅವರ ಅನುಸಾರ 2018 ರಲ್ಲಿ ಬರಲಿರುವ ಎಲ್ಲಾ ಐಫೋನ್ ಮಾಡೆಲ್ ಗಳು ದೊಡ್ಡ ಗಾತ್ರದ ಬ್ಯಾಟರಿಯೊಂದಿಗೆ ಬರಲಿವೆ. ಈ ಸುದ್ದಿ ಕೇಳಿ ನೀವು ಸಂತೋಷಪಡುವುದು ಸಹಜ. ಆದರೆ ಸಂಭ್ರಮಿಸುವ ಮೊದಲು ನೀವು ತಿಳಿಯಬೇಕಾದ ವಿಷಯವೇನೆಂದರೆ ಬ್ಯಾಟರಿಯ ಗಾತ್ರ ಹಿರಿದಾದ ಮಾತ್ರಕ್ಕೆ ಅದರ ಬ್ಯಾಟರಿ ಲೈಫ್ ಹೆಚ್ಚಾಗಬೇಕೆಂದೇನಿಲ್ಲ.ಮಿಂಗ್-ಚಿ ಕ್ಯೋ ರ ಪ್ರಕಾರ ಮುಂದೆ ಬರಲಿರುವ ಸುಧಾರಿತ 3ಡಿ ಸೆನ್ಸಿಂಗ್ ಸಾಮರ್ಥ್ಯ ಮತ್ತು AR ಗೆ ಸಂಬಂಧಿಸಿದ ಫೀಚರ್ಗಳಿಗೆ ಅಗತ್ಯ ಬೆಂಬಲ ನೀಡುವ ಸಲುವಾಗಿ ಆಪಲ್ ದೊಡ್ಡ ಗಾತ್ರದ ಬ್ಯಾಟರಿಗಳನ್ನು ಈ ಮೊಬೈಲ್ಗಳಲ್ಲಿ ಅಳವಡಿಸಲಿದೆ.

ಈ ವರ್ಷವೂ ಕೂಡ ಆಪಲ್ ತನ್ನ ಐಫೋನ್ X ನಲ್ಲಿ ನೂತನ್ ಬ್ಯಾಟರಿ ವಿನ್ಯಾಸವನ್ನು ಅಳವಡಿಸಿದ್ದು, ಬ್ಯಾಟರಿಯ 2 ಭಾಗಗಳನ್ನು ಒಂದಕ್ಕೊಂದು ಜೋಡಿಸಿ L-ಆಕಾರವನ್ನು ಹೊಂದಿತ್ತು.ಹಾಗಾಗಿ 2018 ರಲ್ಲಿ ಮತ್ತೆ ಆಪಲ್ ಬ್ಯಾಟರಿಯ ವಿನ್ಯಾಸದಲ್ಲಿ ಬದಲಾವಣೆಗಳನ್ನು ತಂದರೆ ಆಶ್ಚರ್ಯವೇನಿಲ್ಲ.

ಅಲ್ಲದೆ ಈಗಿರುವ ಫ್ಲೆಕ್ಸ್ ಪಿಸಿಬಿ ಯ ಬದಲಾಗಿ ಹೊಸ ಐಫೋನ್ಗಳ ಬ್ಯಾಟರಿಗೆ ರಿಜಿಡ್-ಫ್ಲೆಕ್ಸ್ ಪಿಸಿಬಿ ಯನ್ನು ಬಳಸಲಾಗುವುದು. ಹಾಗೆಯೇ ಬ್ಯಾಟರಿ ಗಾತ್ರ ದೊಡ್ಡದಾದಂತೆ ಐಫೋನಿನ ಪ್ರಾಸೆಸರ್ ಮೊದಲಾದ ಭಾಗಗಳ ಗಾತ್ರ ಕಿರಿದಾಗುವ ಸಾಧ್ಯತೆಯಿದೆ.

ಇನ್ನು ಮಿಂಗ್-ಚಿ ಕ್ಯೋ ಅವರು ಆಪಲ್ 2018ರಲ್ಲಿ ಐಫೋನ್ X ನ ಉತ್ತರಾಧಿಕಾರಿಯಾಗಿ ಹೊಸ ಫೋನ್ ಒಂದನ್ನು ಲಾಂಚ್ ಮಾಡಲಿರುವುದಾಗಿ ಭವಿಷ್ಯ ನುಡಿದಿದ್ದಾರೆ. ಅಲ್ಲದೆ ಆಪಲ್ ಸಂಸ್ಥೆಯು ಪ್ಲಸ್-ಸೈಜ್ ನ ಅಂದರೆ ದೊಡ್ಡ ಗಾತ್ರದ ಫೋನ್ ಒಂದನ್ನು ಬಿಡುಗಡೆ ಮಾಡಲಿದ್ದು, ಅದು 6.5 ಇಂಚ್ ನ OLED ಡಿಸ್ಪ್ಲೇ ಹೊಂದಿರಲಿದೆ. ಇನ್ನು ಮೂರನೆಯ ಐಫೋನ್ ಮಾಡೆಲ್ 6.1 ಇಂಚ್ ನ LCD ಡಿಸ್ಪ್ಲೇಯೊಂದಿಗೆ ಬರಲಿದೆ.

2018ರಲ್ಲಿ ಬರಲಿರುವ ಐಫೋನ್ಗಳ ಕುರಿತು ಇಷ್ಟೆಲ್ಲಾ ಮಾಹಿತಿ ಇಲ್ಲಿ ನೀಡಿದ್ದರೂ ಈ ಮಾಹಿತಿಯನ್ನು ಸಂಪೂರ್ಣವಾಗಿ ನಂಬಬೇಡಿ ಎಂಬ ಕಿವಿಮಾತು ನಿಮಗೆ ನೀಡಲು ಬಯಸುತ್ತೇವೆ. ಆಪಲ್ ಕುರಿತು ಏನೇ ವದಂತಿ ಅಥವಾ ಮಾಹಿತಿ ಕೇಳಿಬಂದರೂ ಅದನ್ನು ಕೊನೆವರೆಗೂ ವದಂತಿಯಾಗಿಯೇ ಪರಿಗಣಿಸಬೇಕು. ಏಕೆಂದರೆ ಆಪಲ್ ಸದಾ ಕೊನೆ ಘಳಿಗೆಯಲ್ಲಿ ಏನಾದರೂ ಆಶ್ಚರ್ಯಗಳನ್ನು ನೀಡುವುದರಲ್ಲಿ ಹೆಸರು ಗಳಿಸಿದೆ.