ಹೊಸ ಸೂಪರ್‌ಮೈಕ್‌ನೊಂದಿಗೆ Nothing Ear 3 ಇಯರ್‌ಫೋನ್‌ ಬಿಡುಗಡೆ!

ವಿಶ್ವ ಮೊಬೈಲ್ ಮಾರುಕಟ್ಟೆಯು ಬಹುನಿರೀಕ್ಷೆಯಿಂದ ಎದುರುನೋಡುತ್ತಿದ್ದ ನಥಿಂಗ್ ಕಂಪನಿಯ ಹೊಸ Nothing Ear 3 TWS ಇಯರ್‌ಫೋನ್‌ಗಳು ಜಾಗತಿಕ ಮಾರುಕಟ್ಟೆಯಲ್ಲಿ ಬಿಡುಗಡೆಯಾಗಿವೆ. ಈ ಇಯರ್‌ಫೋನ್‌ಗಳು ಹಲವು ಹೊಸ ವೈಶಿಷ್ಟ್ಯಗಳೊಂದಿಗೆ ಬಂದಿದ್ದು, ಅವುಗಳಲ್ಲಿ ಚಾರ್ಜಿಂಗ್ ಕೇಸ್‌ನಲ್ಲಿರುವ ಸೂಪರ್ ಮೈಕ್ ಪ್ರಮುಖ ಆಕರ್ಷಣೆಯಾಗಿದೆ. ಸ್ಪಷ್ಟವಾದ ಕರೆಗಳನ್ನು ಮಾಡಲು ಈ ಮೈಕ್ 95dB ವರೆಗಿನ ಶಬ್ದವನ್ನು ಕಡಿಮೆ ಮಾಡುತ್ತದೆ ಮತ್ತು ಟಾಕ್ ಬಟನ್ ಬಳಸಿ ಇದನ್ನು ಸುಲಭವಾಗಿ ಆಕ್ಟಿವೇಟ್ ಮಾಡಬಹುದು. ಈ ಹೊಸ ಇಯರ್‌ಫೋನ್‌ ಸಾಧನದ ಕುರಿತು ಎಲ್ಲಾ ಮಾಹಿತಿ ಇಲ್ಲಿದೆ.

Nothing Ear 3 ಬೆಲೆ ಮತ್ತು ಲಭ್ಯತೆ:
Nothing Ear 3 ಪ್ರಸ್ತುತ ಯುರೋಪ್, ಯುಕೆ, ಮತ್ತು ಯುಎಸ್‌ನಲ್ಲಿ ಲಭ್ಯವಿದೆ. ಯುಕೆ ನಲ್ಲಿ GBP 179 (ಸುಮಾರು ರೂ. 21,500), ಯುರೋಪಿಯನ್ ಮಾರುಕಟ್ಟೆಗಳಲ್ಲಿ EUR 179 (ಸುಮಾರು ರೂ. 18,700), ಮತ್ತು ಯುಎಸ್‌ನಲ್ಲಿ $179 (ಸುಮಾರು ರೂ. 15,800) ಬೆಲೆಗೆ ಬಿಡುಗಡೆಯಾಗಿದ್ದು, ಕಪ್ಪು ಮತ್ತು ಬಿಳಿ ಬಣ್ಣಗಳಲ್ಲಿ ಲಭ್ಯವಿದೆ. ಸೆಪ್ಟೆಂಬರ್ 18 ರಿಂದಲೇ ಜಾಗತಿಕವಾಗಿ ಮುಂಗಡ-ಆರ್ಡರ್‌ಗಳು ಪ್ರಾರಂಭವಾಗಿದ್ದು, ಸೆಪ್ಟೆಂಬರ್ 25 ರಿಂದ ಕೆಲವು ಪ್ರದೇಶಗಳಲ್ಲಿ ಮುಕ್ತ ಮಾರಾಟಕ್ಕೆ ಬರಲಿದೆ. ಭಾರತದಲ್ಲಿ ಇದರ ಬಿಡುಗಡೆ ದಿನಾಂಕ ಮತ್ತು ಬೆಲೆಯನ್ನು ಕಂಪನಿ ಇನ್ನೂ ಅಧಿಕೃತವಾಗಿ ಘೋಷಿಸಿಲ್ಲ, ಆದರೆ ಶೀಘ್ರದಲ್ಲೇ ಭಾರತೀಯ ಮಾರುಕಟ್ಟೆಗೆ ಬರುವ ನಿರೀಕ್ಷೆಯಿದೆ.

Nothing Ear 3 ನ ವಿಶೇಷತೆಗಳು:
ಹೊಸ Nothing Ear 3 ಇಯರ್‌ಬಡ್‌ಗಳು ನೈಜ-ಸಮಯದ ಅಡಾಪ್ಟಿವ್ ಆಕ್ಟಿವ್ ನಾಯ್ಸ್ ಕ್ಯಾನ್ಸಲೇಷನ್ (ANC) ವೈಶಿಷ್ಟ್ಯವನ್ನು ಹೊಂದಿದ್ದು, ಇದು 45dB ವರೆಗಿನ ಶಬ್ದವನ್ನು ತಡೆಯುತ್ತದೆ. ಇದರ ಚಾರ್ಜಿಂಗ್ ಕೇಸ್ ಹೊಸ ಸೂಪರ್‌ಮೈಕ್ ಅನ್ನು ಒಳಗೊಂಡಿದ್ದು, ಬಳಕೆದಾರರು ಟಾಕ್ ಬಟನ್ ಒತ್ತಿ ಧ್ವನಿ ಟಿಪ್ಪಣಿಗಳನ್ನು ನೇರವಾಗಿ ರೆಕಾರ್ಡ್ ಮಾಡಬಹುದು.

ನಥಿಂಗ್ ಓಎಸ್ ಫೋನ್‌ಗಳಲ್ಲಿ, ಈ ಟಿಪ್ಪಣಿಗಳು ಎಸೆನ್ಷಿಯಲ್ ಸ್ಪೇಸ್‌ನಲ್ಲಿ ಸ್ವಯಂಚಾಲಿತವಾಗಿ ಪ್ರತಿಲೇಖನಗೊಳ್ಳುತ್ತವೆ. ಪ್ರತಿ ಇಯರ್‌ಬಡ್‌ನಲ್ಲಿ ಮೂರು ದಿಕ್ಕಿನ ಮೈಕ್ರೊಫೋನ್‌ಗಳು ಮತ್ತು ಧ್ವನಿ ಪಿಕ್-ಅಪ್ ಘಟಕವಿದೆ, ಇದು ಧ್ವನಿಯನ್ನು ನಿಖರವಾಗಿ ಸೆರೆಹಿಡಿಯಲು ಸಹಾಯ ಮಾಡುತ್ತದೆ. ಅಲ್ಲದೆ, AI ಶಬ್ದ ರದ್ದತಿಯು 25dB ವರೆಗಿನ ಗಾಳಿಯ ಶಬ್ದವನ್ನು ಕಡಿಮೆ ಮಾಡುತ್ತದೆ.

ಇದರಲ್ಲಿನ ಪ್ರತಿ ಇಯರ್‌ಬಡ್ 55mAh ಬ್ಯಾಟರಿಯನ್ನು ಹೊಂದಿದ್ದು, ಒಂದೇ ಚಾರ್ಜ್‌ನಲ್ಲಿ 10 ಗಂಟೆಗಳವರೆಗೆ ಸಂಗೀತ ಕೇಳಲು ಅನುವು ಮಾಡಿಕೊಡುತ್ತದೆ. ಚಾರ್ಜಿಂಗ್ ಕೇಸ್ ಸೇರಿ ಒಟ್ಟು ಪ್ಲೇಬ್ಯಾಕ್ ಸಮಯ 38 ಗಂಟೆಗಳವರೆಗೆ ವಿಸ್ತರಿಸುತ್ತದೆ. 10 ನಿಮಿಷಗಳ ಯುಎಸ್‌ಬಿ ಟೈಪ್-ಸಿ ಚಾರ್ಜ್‌ನಿಂದ 10 ಗಂಟೆಗಳವರೆಗೆ ಬಳಕೆಯನ್ನು ಪಡೆಯಬಹುದು. ವೈರ್‌ಲೆಸ್ ಚಾರ್ಜಿಂಗ್ ಆಯ್ಕೆಯೂ ಇದೆ.

Nothing Ear 3 ವಿಶಿಷ್ಟ ಪಾರದರ್ಶಕ ವಿನ್ಯಾಸವನ್ನು ಹೊಂದಿದೆ. ಚಾರ್ಜಿಂಗ್ ಕೇಸ್ 100% ಮರುಬಳಕೆಯ ಅಲ್ಯೂಮಿನಿಯಂನಿಂದ ಮಾಡಲ್ಪಟ್ಟಿದೆ. ಈ ಇಯರ್‌ಬಡ್‌ಗಳು ಮತ್ತು ಕೇಸ್ ಎರಡೂ IP54 ರೇಟಿಂಗ್ ಹೊಂದಿದ್ದು, ಧೂಳು ಮತ್ತು ನೀರಿನಿಂದ ರಕ್ಷಿಸಲ್ಪಟ್ಟಿವೆ ಎಂದು ಕಂಪೆನಿಯು ತಿಳಿಸಿದೆ.

Nothing Ear 3 ತನ್ನ ವಿಶಿಷ್ಟ ವೈಶಿಷ್ಟ್ಯಗಳಾದ ಸೂಪರ್‌ಮೈಕ್, ಸುಧಾರಿತ ANC, ಮತ್ತು ಸುಲಭವಾದ ಬಳಕೆಯೊಂದಿಗೆ ಗಮನ ಸೆಳೆಯುತ್ತಿದೆ. ಭಾರತೀಯ ಮಾರುಕಟ್ಟೆಯಲ್ಲಿ ಇದರ ಬಿಡುಗಡೆಗಾಗಿ ಗ್ರಾಹಕರು ಕಾತರದಿಂದ ಕಾಯುತ್ತಿದ್ದಾರೆ. ಭಾರತದಲ್ಲಿನ ಬೆಲೆ ಮತ್ತು ಲಭ್ಯತೆಯ ಕುರಿತು ಮತ್ತಷ್ಟು ಮಾಹಿತಿ ಶೀಘ್ರದಲ್ಲೇ ಹೊರಬೀಳುವ ನಿರೀಕ್ಷೆಯಿದೆ. ಅಲ್ಲಿಯವರೆಗೂ ನೀವು ನಿಮ್ಮ ಕನ್ನಡ ಗಿಜ್‌ಬಾಟ್‌ನಲ್ಲಿ ಆಕ್ಟಿವ್ ಆಗಿರಿ.