ಭಾರತದಲ್ಲಿ ಒಪ್ಪೋ Enco Buds 3 Pro ಇಯರ್‌ಬಡ್ ಬಿಡುಗಡೆಗೆ ಸಜ್ಜು?!

ಒಪ್ಪೋ ಶೀಘ್ರದಲ್ಲೇ ಭಾರತದಲ್ಲಿ ಹೊಸ TWS ಇಯರ್‌ಬಡ್‌ಗಳನ್ನು ಪರಿಚಯಿಸಲು ಯೋಜಿಸುತ್ತಿದೆ ಎಂದು ವರದಿಯಾಗಿದೆ. ಜನಪ್ರಿಯ ಟಿಪ್‌ಸ್ಟರ್ @heyitsyogesh ಅವರ ಪ್ರಕಾರ, ಒಪ್ಪೊ ದೇಶದಲ್ಲಿ ಹೊಸ ಎನ್‌ಕೋ ಇಯರ್‌ಬಡ್‌ಗಳನ್ನು ಅನಾವರಣಗೊಳಿಸಲು ಸಜ್ಜಾಗಿದೆ. ಈ ಮಾದರಿಯ ಹೆಸರು ಇನ್ನೂ ಬಹಿರಂಗವಾಗಿಲ್ಲ, ಆದರೆ ಇದು ಇತ್ತೀಚೆಗೆ ಜಾಗತಿಕ ಮಾರುಕಟ್ಟೆಯಲ್ಲಿ ಬಿಡುಗಡೆ ಮಾಡಲಾದ ಒಪ್ಪೋ Enco Buds 3 Pro ಆಗಿರಬಹುದು ಎಂದು ಹೇಳಿದ್ದಾರೆ. ಈ ಮೂಲಕ ದೇಶದಲ್ಲಿ ಮತ್ತೊಂದು ಬಜೆಟ್ ಬೆಲೆಯ ಇಯರ್‌ಬಡ್ ಸಾಧನವು ಬರುವ ಸೂಚನೆ ದೊರೆತಿದೆ.

ಟಿಪ್‌ಸ್ಟರ್ @heyitsyogesh ಅವರ ಪೋಸ್ಟ್‌ನಲ್ಲಿ ಹೀಗೆ ವಿವರಿಸಲಾಗಿದೆ, :"ಒಪ್ಪೋ ಕಂಪನಿಯು ದೇಶದಲ್ಲಿ ಹೆಚ್ಚಿನ TWS ಬಡ್‌ಗಳನ್ನು ಬಿಡುಗಡೆ ಮಾಡದಿರುವ ತನ್ನ ಹಿಂದಿನ ನಿರ್ಧಾರವನ್ನು ಹಿಂತೆಗೆದುಕೊಂಡಿದ್ದು, ದೇಶದಲ್ಲಿ ಹೊಸ ಎನ್‌ಕೋ ಇಯರ್‌ಬಡ್‌ಗಳನ್ನು ಅನಾವರಣಗೊಳಿಸಲು ಸಜ್ಜಾಗಿದೆ. ಈ ಮಾದರಿಯ ಹೆಸರು ಇನ್ನೂ ಬಹಿರಂಗವಾಗಿಲ್ಲ, ಆದರೆ ಈ ಕ್ರಮವು ಇತ್ತೀಚೆಗೆ ಮಲೇಷ್ಯಾದಲ್ಲಿ ಬಿಡುಗಡೆ ಮಾಡಲಾದ ಒಪ್ಪೋ Enco Buds 3 Pro ಆಗಿರಬಹುದು" ಎಂದು ಹೇಳಿದ್ದಾರೆ. ಆದರೆ, ಕಂಪೆನಿಯಿಂದ ಈ ಕುರಿತು ಯಾವುದೇ ಅಧಿಕೃತ ಮಾಹಿತಿ ಈ ವರೆಗೂ ಹೊರಬಿದ್ದಿಲ್ಲ.

ಒಪ್ಪೋ Enco Buds 3 Pro: ನಾವು ಏನನ್ನು ನಿರೀಕ್ಷಿಸಬಹುದು?

ನಾವು ತಿಳಿದಂತೆ, Enco Buds 3 Pro ಇಯರ್‌ಬಡ್‌ಗಳ ವೈಶಿಷ್ಟ್ಯಗಳನ್ನು ಜಾಗತಿಕ ವೆಬ್‌ಸೈಟ್‌ನಲ್ಲಿ ಅಧಿಕೃತವಾಗಿ ಪ್ರಕಟಿಸಲಾಗಿದೆ. ಈ Enco Buds 3 Pro ಇಯರ್‌ಬಡ್‌ಗಳು 12.4mm ಟೈಟಾನಿಯಂ-ಲೇಪಿತ ಡೈನಾಮಿಕ್ ಡ್ರೈವರ್‌ಗಳನ್ನು ಹೊಂದಿದ್ದು, ಆಳವಾದ ಬಾಸ್ ಮತ್ತು ಸ್ಪಷ್ಟ ಧ್ವನಿ ಗುಣಮಟ್ಟವನ್ನು ಒದಗಿಸುತ್ತವೆ. ಹಾಗೆಯೇ, ಇವು AAC ಮತ್ತು SBC ಆಡಿಯೊ ಕೋಡೆಕ್‌ಗಳನ್ನು ಬೆಂಬಲಿಸುತ್ತವೆ ಮತ್ತು ಕಡಿಮೆ ಸುಪ್ತತೆಯೊಂದಿಗೆ ಸ್ಥಿರ ಸಂಪರ್ಕಕ್ಕಾಗಿ ಬ್ಲೂಟೂತ್ 5.4 ಅನ್ನು ಬಳಸುತ್ತವೆ ಎಂದು ವೆಬ್‌ಸೈಟ್‌ನಲ್ಲಿ ವಿವರಿಸಲಾಗಿದೆ.

Enco Buds 3 Pro ಇಯರ್‌ಬಡ್‌ಗಳ ಬ್ಯಾಟರಿ ಶಕ್ತಿ ಅತ್ಯುತ್ತಮವಾಗಿದೆ ಎನ್ನಬಹುದು. ಏಕೆಂದರೆ, ಒಪ್ಪೋ ಕಂಪನಿಯ ಪ್ರಕಾರ, ಈ Enco Buds 3 Pro ಇಯರ್‌ಬಡ್‌ಗಳು ಒಂದೇ ಚಾರ್ಜ್‌ನಲ್ಲಿ 12 ಗಂಟೆಗಳ ಕಾಲ ಮತ್ತು ಚಾರ್ಜಿಂಗ್ ಕೇಸ್‌ನೊಂದಿಗೆ 54 ಗಂಟೆಗಳ ಕಾಲ ಬ್ಯಾಟರಿ ಶಕ್ತಿಯನ್ನು ಒದಗಿಸುತ್ತದೆ. ಕೇವಲ 10 ನಿಮಿಷಗಳ ತ್ವರಿತ ಚಾರ್ಜ್‌ನಲ್ಲಿ ನಾಲ್ಕು ಗಂಟೆಗಳ ಪ್ಲೇಬ್ಯಾಕ್ ಸಮಯವನ್ನು ನೀಡುತ್ತದೆ. TÜV ರೈನ್‌ಲ್ಯಾಂಡ್ ಪ್ರಮಾಣೀಕರಣ ಹೊಂದಿರುವ ಈ ಸಾಧನವು ವಿಸ್ತೃತ ಬಳಕೆಯ ನಂತರವೂ ಉತ್ತಮ ಕಾರ್ಯಕ್ಷಮತೆಯನ್ನು ಖಚಿತಪಡಿಸುತ್ತದೆ ಎಂದು ಹೇಳಲಾಗಿದೆ.

ಇತರ ವೈಶಿಷ್ಟ್ಯಗಳಲ್ಲಿ, Enco Buds 3 Pro ಇಯರ್‌ಬಡ್‌ಗಳು ಡ್ಯುಯಲ್-ಡಿವೈಸ್ ಸಂಪರ್ಕ, ಬಳಕೆದಾರರಿಗೆ ಜೋಡಿಯಾದ ಸಾಧನಗಳ ನಡುವೆ ಸುಲಭವಾಗಿ ಬದಲಾಯಿಸಲು ಅನುಕೂಲ, ಸ್ಪರ್ಶ ನಿಯಂತ್ರಣಗಳು, ಧ್ವನಿಯನ್ನು ಕಸ್ಟಮೈಸ್ ಮಾಡಲು HeyMelody ಅಪ್ಲಿಕೇಶನ್, Google Fast Pair ಮತ್ತು IP55 ರೇಟಿಂಗ್ ಅನ್ನು ಒಳಗೊಂಡಿವೆ. ಈ ಹೊಸ ಇಯರ್‌ಬಡ್‌ಗಳ ನಿಖರ ಬಿಡುಗಡೆ ದಿನಾಂಕ ಇನ್ನೂ ತಿಳಿದಿಲ್ಲ, ಆದರೆ ಒಪ್ಪೋ ತನ್ನ F29 ಸರಣಿಯನ್ನು ಮಾರ್ಚ್ 20 ರಂದು ಭಾರತದಲ್ಲಿ ಬಿಡುಗಡೆ ಮಾಡಲು ಸಜ್ಜಾಗಿದೆ. ಅದೇ ದಿನ ಹೊಸ ಇಯರ್‌ಬಡ್‌ಗಳನ್ನು ಪರಿಚಯಿಸುವ ಸಾಧ್ಯತೆಯಿದೆ.