ರೇ-ಬ್ಯಾನ್ ಮೆಟಾ AI ಸ್ಮಾರ್ಟ್‌ಗ್ಲಾಸ್ ಈಗ 'ಟೈಟಾನ್ ಐ+' ನಲ್ಲಿ ಲಭ್ಯ!

ವಾಚ್, ಗ್ಲಾಸ್ ಮತ್ತು ಇತರೆ ಎಲ್ಲಾ ಸ್ಟೈಲಿಶ್ ಉತ್ಪನ್ನಗಳ ಮಾರಾಟಕ್ಕೆ ಹೆಸರಾಗಿರುವ 'ಟೈಟಾನ್ ಐ+' ಭಾರತದಲ್ಲಿ ರೇ-ಬ್ಯಾನ್ ಮೆಟಾ AI ಸ್ಮಾರ್ಟ್ ಗ್ಲಾಸ್‌ಗಳ ಮಾರಾಟವನ್ನು ಆರಂಭಿಸಿದೆ. ರೇ-ಬ್ಯಾನ್ ಮೆಟಾ AI ಸ್ಮಾರ್ಟ್ ಗ್ಲಾಸ್‌ಗಳು ದೇಶಾದ್ಯಂತ 50ಕ್ಕೂ ಹೆಚ್ಚು ಟೈಟಾನ್ ಐ+ ಮಳಿಗೆಗಳಲ್ಲಿ ಮತ್ತು ಆನ್‌ಲೈನ್‌ನಲ್ಲಿ titaneyeplus.com ನಲ್ಲಿ ಲಭ್ಯವಿದ್ದು, ಗ್ರಾಹಕರು ಟಾಟಾ ನ್ಯೂ ರಿವಾರ್ಡ್ ಪಾಯಿಂಟ್‌ಗಳನ್ನು ಬಳಸಿ ಹೆಚ್ಚುವರಿ ರಿಯಾಯಿತಿಗಳನ್ನು ಸಹ ಪಡೆಯಬಹುದು ಎಂದು ಟೈಟಾನ್ ಐ+ ಹೇಳಿದೆ. ಭಾರತದಲ್ಲಿ ಸ್ಮಾರ್ಟ್ ಧರಿಸಬಹುದಾದ ಸಾಧನಗಳ ಬಳಕೆ ಹೆಚ್ಚುತ್ತಿದ್ದು, ಡಿಜಿಟಲ್ ಬಳಕೆ, ಜೀವನಶೈಲಿ ಜಾಗೃತಿ ಮತ್ತು ಅನುಕೂಲಕರ ತಂತ್ರಜ್ಞಾನದ ಬೇಡಿಕೆ ಸ್ಮಾರ್ಟ್ ಐವೇರ್ ವಿಭಾಗದಲ್ಲಿ ಬೆಳವಣಿಗೆಗೆ ಕಾರಣವಾಗುತ್ತಿದೆ ಎಂದು ಟೈಟಾನ್ ಕಂಪನಿ ಲಿಮಿಟೆಡ್‌ನ ಐಕೇರ್ ವಿಭಾಗದ ಸಿಇಒ ಎನ್.ಎಸ್. ರಾಘವನ್ ಅವರು ತಿಳಿಸಿದ್ದಾರೆ.

ಭಾರತದಲ್ಲಿ ರೇ-ಬ್ಯಾನ್ ಮೆಟಾ AI ಸ್ಮಾರ್ಟ್ ಗ್ಲಾಸ್‌ಗಳು ಕಳೆದ ವಾರವಷ್ಟೇ ಬಿಡುಗಡೆಯಾಗಿವೆ. ಈ ರೇ-ಬ್ಯಾನ್ ಮೆಟಾ AI ಸ್ಮಾರ್ಟ್ ಗ್ಲಾಸ್‌ಗಳು ಸ್ಮಾರ್ಟ್ ಐವೇರ್‌ಗಳಲ್ಲಿ ಮುಂಚೂಣಿಯಲ್ಲಿವೆ. ಇವು 12-ಮೆಗಾಪಿಕ್ಸೆಲ್ ಅಲ್ಟ್ರಾ-ವೈಡ್ ಕ್ಯಾಮೆರಾ, ಓಪನ್-ಇಯರ್ ಸ್ಪೀಕರ್‌ಗಳು ಮತ್ತು ಮೈಕ್ರೊಫೋನ್‌ಗಳನ್ನು ಹೊಂದಿವೆ. ಇವುಗಳ ಮೂಲಕ ಬಳಕೆದಾರರು ಪ್ರಯಾಣದಲ್ಲಿರುವಾಗಲೂ ಚಿತ್ರಗಳು ಮತ್ತು ವೀಡಿಯೊಗಳನ್ನು ಸೆರೆಹಿಡಿಯಬಹುದು, ಸಂಗೀತ ಕೇಳಬಹುದು ಮತ್ತು ಸಂವಹನ ನಡೆಸಬಹುದು. ಜೊತೆಗೆ, ಮೆಟಾ AI ಸಹಾಯಕವು ಹ್ಯಾಂಡ್ಸ್-ಫ್ರೀ ಸಂಗೀತ, ನೇರ ಭಾಷಾಂತರ ಮತ್ತು ಧ್ವನಿ ಆಧಾರಿತ ಪ್ರಶ್ನೆಗಳಿಗೆ ಅನುವು ಮಾಡಿಕೊಡುತ್ತದೆ. ಹಾಗಾದರೆ, ರೇ-ಬ್ಯಾನ್ ಮೆಟಾ AI ಸ್ಮಾರ್ಟ್ ಗ್ಲಾಸ್‌ಗಳು ಹೊಂದಿರುವ ಸಂಪೂರ್ಣ ತಾಂತ್ರಿಕ ವೈಶಿಷ್ಟ್ಯಗಳು ಯಾವುವು ಮತ್ತು ಬೆಲೆ ಎಷ್ಟು ಎಂಬುದನ್ನು ಈ ಮುಂದೆ ಓದಿ ತಿಳಿಯೋಣ ಬನ್ನಿ.

ರೇ-ಬ್ಯಾನ್ ಮೆಟಾ ಗ್ಲಾಸ್‌ಗಳು 12-ಮೆಗಾಪಿಕ್ಸೆಲ್ ಕ್ಯಾಮೆರಾ ಮತ್ತು ಫ್ರೇಮ್‌ನ ಎರಡೂ ಬದಿಗಳಲ್ಲಿ LED ಲೈಟ್‌ಗಳನ್ನು ಹೊಂದಿವೆ. ವೀಡಿಯೊ ರೆಕಾರ್ಡಿಂಗ್ ಸಮಯದಲ್ಲಿ ಈ LED ಲೈಟ್ ಸೂಚಕವಾಗಿ ಕಾರ್ಯನಿರ್ವಹಿಸುತ್ತದೆ. 3,024 x 4,032 ಪಿಕ್ಸೆಲ್‌ಗಳ ರೆಸಲ್ಯೂಶನ್‌ನಲ್ಲಿ ಫೋಟೋಗಳನ್ನು ಸೆರೆಹಿಡಿಯಬಹುದು ಮತ್ತು 60 ಸೆಕೆಂಡುಗಳವರೆಗೆ 1080p ವೀಡಿಯೊಗಳನ್ನು ರೆಕಾರ್ಡ್ ಮಾಡಬಹುದು. ಈ ಮಾಧ್ಯಮವನ್ನು ನೇರವಾಗಿ ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಮ್‌ಗೆ ಹಂಚಿಕೊಳ್ಳಬಹುದು, ಅಥವಾ ಮೆಟಾ ವ್ಯೂ ಅಪ್ಲಿಕೇಶನ್ ಮೂಲಕ ಇತರ ಪ್ಲಾಟ್‌ಫಾರ್ಮ್‌ಗಳಲ್ಲಿ ಹಂಚಿಕೊಳ್ಳಬಹುದು. ಐದು ಮೈಕ್ರೊಫೋನ್‌ಗಳ ವ್ಯವಸ್ಥೆಯು ಬಳಕೆದಾರರಿಗೆ ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಮ್‌ನಲ್ಲಿ ಲೈವ್‌ಸ್ಟ್ರೀಮ್ ಮಾಡಲು ಸಹ ಅನುವು ಮಾಡಿಕೊಡುತ್ತದೆ. ಕ್ವಾಲ್ಕಾಮ್‌ನ ಸ್ನಾಪ್‌ಡ್ರಾಗನ್ AR1 Gen1 ಪ್ಲಾಟ್‌ಫಾರ್ಮ್ SoC ನಿಂದ ಚಾಲಿತವಾಗಿರುವ ಈ ಗ್ಲಾಸ್‌ಗಳು 32GB ಆಂತರಿಕ ಸಂಗ್ರಹಣೆಯನ್ನು ಹೊಂದಿವೆ. ಮೆಟಾ ಪ್ರಕಾರ, ಇವು ಒಂದೇ ಚಾರ್ಜ್‌ನಲ್ಲಿ ನಾಲ್ಕು ಗಂಟೆಗಳ ಬ್ಯಾಟರಿ ಬಾಳಿಕೆ ನೀಡುತ್ತವೆ ಮತ್ತು ಚಾರ್ಜಿಂಗ್ ಕೇಸ್‌ನೊಂದಿಗೆ ಹೆಚ್ಚುವರಿ 32 ಗಂಟೆಗಳವರೆಗೆ ಕಾರ್ಯನಿರ್ವಹಿಸಬಲ್ಲವು. ಇವು IPX4 ರೇಟಿಂಗ್‌ ಅನ್ನು ಸಹ ಹೊಂದಿದ್ದು, ತುಂತುರು ಮಳೆಯನ್ನು ತಡೆದುಕೊಳ್ಳಬಲ್ಲವು.

ಈ ಸ್ಮಾರ್ಟ್ ಗ್ಲಾಸ್‌ಗಳಲ್ಲಿ ಕೃತಕ ಬುದ್ಧಿಮತ್ತೆ (AI) ಪ್ರಮುಖ ಪಾತ್ರ ವಹಿಸುತ್ತದೆ. "ಹೇ ಮೆಟಾ AI" ಎಂಬ ಧ್ವನಿ ಆಜ್ಞೆಯ ಮೂಲಕ ವಿವಿಧ ಹ್ಯಾಂಡ್ಸ್-ಫ್ರೀ ಕಾರ್ಯಗಳನ್ನು ನಿರ್ವಹಿಸಬಹುದು. ಉದಾಹರಣೆಗೆ, "ಹೇ ಮೆಟಾ, ಈ ಹಾಡು ಯಾವುದು?" ಎಂದು ಕೇಳಿದಾಗ, ಗ್ಲಾಸ್‌ಗಳು ಶಾಜಮ್‌ನ ಸಹಾಯದಿಂದ ಹಾಡನ್ನು ಗುರುತಿಸುತ್ತವೆ. ಇದಲ್ಲದೆ, "ಹೇ ಮೆಟಾ, ಲೈವ್ ಅನುವಾದವನ್ನು ಪ್ರಾರಂಭಿಸಿ" ಎಂಬ ಆಜ್ಞೆಯ ಮೂಲಕ ಇಂಗ್ಲಿಷ್‌ನಿಂದ ಸ್ಪ್ಯಾನಿಷ್, ಫ್ರೆಂಚ್ ಅಥವಾ ಇಟಾಲಿಯನ್ ಭಾಷೆಗಳಿಗೆ ನೈಜ-ಸಮಯದ ಭಾಷಾಂತರವನ್ನು ಪಡೆಯಬಹುದು. ಅನುವಾದಿತ ಆಡಿಯೊವನ್ನು ಓಪನ್-ಇಯರ್ ಸ್ಪೀಕರ್‌ಗಳ ಮೂಲಕ ಕೇಳಬಹುದು ಮತ್ತು ಅದರ ಲಿಖಿತ ರೂಪವನ್ನು ಸಹ ಪಡೆಯುವ ಆಯ್ಕೆಯಿದೆ.

ಮೆಟಾ ತನ್ನ ಸ್ಮಾರ್ಟ್ ಗ್ಲಾಸ್‌ಗಳನ್ನು ಲೈವ್ AI ವೈಶಿಷ್ಟ್ಯದೊಂದಿಗೆ ಸಜ್ಜುಗೊಳಿಸಿದ್ದು, ಇದು 12-ಮೆಗಾಪಿಕ್ಸೆಲ್ ಕ್ಯಾಮೆರಾವನ್ನು ಬಳಸಿಕೊಂಡು ನೈಜ ಸಮಯದಲ್ಲಿ ವೀಡಿಯೊ ಫೀಡ್ ಅನ್ನು ವಿಶ್ಲೇಷಿಸುತ್ತದೆ. ಬಳಕೆದಾರರು "ಹೇ ಮೆಟಾ" ಆಜ್ಞೆಯಿಲ್ಲದೆಯೂ ಮೆಟಾ AI ಅನ್ನು ಕರೆಯಬಹುದು ಮತ್ತು ತಮ್ಮ ಸುತ್ತಮುತ್ತಲಿನ ಬಗ್ಗೆ ಪ್ರಶ್ನೆಗಳನ್ನು ಕೇಳಬಹುದು. ಗ್ಲಾಸ್‌ನಲ್ಲಿರುವ ಅಪ್ಲಿಕೇಶನ್‌ನಿಂದ ನೇರ ಸಂದೇಶಗಳು (DM ಗಳು), ಫೋಟೋಗಳು, ಆಡಿಯೊ ಕರೆಗಳು ಮತ್ತು ವೀಡಿಯೊ ಕರೆಗಳನ್ನು ಕಳುಹಿಸುವ ಮತ್ತು ಸ್ವೀಕರಿಸುವ ಸಾಮರ್ಥ್ಯವೂ ಇದೆ. ಉದಾಹರಣೆಗೆ, "ಹೇ ಮೆಟಾ, Instagram ನಲ್ಲಿ ಲಿಸಾಗೆ ಸಂದೇಶ ಕಳುಹಿಸಿ" ಎಂದು ಹೇಳುವ ಮೂಲಕ Instagram ನಲ್ಲಿ ನೇರವಾಗಿ ಸಂದೇಶವನ್ನು ಕಳುಹಿಸಬಹುದು. ಸಂಗೀತ ಪ್ರಿಯರಿಗಾಗಿ, Spotify, Amazon Music ಮತ್ತು Apple Music ನಂತಹ ಅಪ್ಲಿಕೇಶನ್‌ಗಳ ಮೂಲಕ ಸಂಗೀತವನ್ನು ಪ್ಲೇ ಮಾಡಬಹುದು ಮತ್ತು ಧ್ವನಿ ಆಧಾರಿತ ಹುಡುಕಾಟದ ಮೂಲಕ ಹಾಡುಗಳನ್ನು ಆಯ್ಕೆ ಮಾಡಬಹುದು.

ಬೆಲೆ ಮತ್ತು ಲಭ್ಯತೆ
ಭಾರತದಲ್ಲಿ ರೇ-ಬ್ಯಾನ್ ಮೆಟಾ ಗ್ಲಾಸ್‌ಗಳ ಬೆಲೆಯು ವಿನ್ಯಾಸ ಮತ್ತು ಬಣ್ಣವನ್ನು ಅವಲಂಬಿಸಿದೆ. ಶೈನಿ ಬ್ಲ್ಯಾಕ್ ಬಣ್ಣದಲ್ಲಿ ಲಭ್ಯವಿರುವ ಸ್ಕೈಲರ್ ಮತ್ತು ವೇಫೇರರ್ ಶೈಲಿಗಳ ಆರಂಭಿಕ ಬೆಲೆ ರೂ. 29,900. ವೇಫೇರರ್ ಶೈಲಿಯ ಮ್ಯಾಟ್ ಬ್ಲ್ಯಾಕ್ ಆಯ್ಕೆಯು ರೂ. 32,100 ಕ್ಕೆ ಲಭ್ಯವಿದೆ. ಇನ್ನು ಸ್ಕೈಲರ್ ಚಾಕ್ ಗ್ರೇ ಮತ್ತು ವೇಫೇರರ್ ಮ್ಯಾಟ್ ಬ್ಲ್ಯಾಕ್ ವಿನ್ಯಾಸಗಳ ಬೆಲೆ ರೂ. 35,700. ಈ ಸ್ಮಾರ್ಟ್ ಗ್ಲಾಸ್‌ಗಳನ್ನು ಈಗಾಗಲೇ ಪೂರ್ವ-ಆರ್ಡರ್ ಮಾಡಬಹುದು. ಅಧಿಕೃತ ಮಾರಾಟವು ಮೇ 19 ರಿಂದ'ಟೈಟಾನ್ ಐ+', Ray-Ban.com ಮತ್ತು ಭಾರತದಾದ್ಯಂತದ ಪ್ರಮುಖ ಆಪ್ಟಿಕಲ್ ಹಾಗೂ ಸನ್‌ಗ್ಲಾಸ್ ಮಳಿಗೆಗಳಲ್ಲಿ ಆರಂಭವಾಗಿದೆ.