ನಿಮ್ಮ ಮೊಬೈಲ್ ಹ್ಯಾಕ್ ಆಗಿದೆಯೇ ಎಂಬುದನ್ನು ಹೀಗೆ ಚೆಕ್ ಮಾಡಿ!

ಗೂಗಲ್, ಆಪಲ್, ಮೈಕ್ರೋಸಾಫ್ಟ್‌ನಂತಹ ದೊಡ್ಡ ಟೆಕ್ ಕಂಪನಿಗಳು ಎಷ್ಟೇ ಭದ್ರತಾ ವ್ಯವಸ್ಥೆಗಳನ್ನು ಹೊಂದಿದ್ದರೂ, ಸೈಬರ್ ಕ್ರಿಮಿನಲ್‌ಗಳು ಯಾವಾಗಲೂ ಹೊಸ ತಂತ್ರಗಳನ್ನು ಕಂಡುಕೊಳ್ಳುತ್ತಾರೆ. ನಿಮ್ಮ ಸ್ಮಾರ್ಟ್‌ಫೋನ್ ಹ್ಯಾಕ್ ಆಗಿದ್ದರೆ, ನಿಮ್ಮ ವೈಯಕ್ತಿಕ ಮಾಹಿತಿಯನ್ನು ಕದಿಯಬಹುದು.ಹ್ಯಾಕರ್‌ಗಳು ನಿಮ್ಮ ಫೋನ್‌ಗೆ ಪ್ರವೇಶಿಸಲು ಹಲವು ಮಾರ್ಗಗಳಿವೆ. ಫಿಶಿಂಗ್ ಇಮೇಲ್‌ಗಳ ಮೂಲಕ ನಕಲಿ ಲಿಂಕ್‌ಗಳನ್ನು ಕಳುಹಿಸಿ, ಅವುಗಳ ಮೇಲೆ ಕ್ಲಿಕ್ ಮಾಡುವಂತೆ ನಿಮ್ಮನ್ನು ಮೋಸಗೊಳಿಸಬಹುದು. ನಕಲಿ ಆಪ್ ಸ್ಟೋರ್‌ಗಳಿಂದ ಆಪ್‌ಗಳನ್ನು ಡೌನ್‌ಲೋಡ್ ಮಾಡುವಂತೆ ಮಾಡಬಹುದು. ಸಾರ್ವಜನಿಕ ವೈಫೈ ನೆಟ್‌ವರ್ಕ್‌ಗಳನ್ನು ಬಳಸಿ ನಿಮ್ಮ ಮಾಹಿತಿಯನ್ನು ಕದಿಯಬಹುದು. ಸಿಮ್ ಸ್ವಾಪ್ ಮೂಲಕ ನಿಮ್ಮ ಸಿಮ್ ಕಾರ್ಡ್ ಅನ್ನು ತಮ್ಮ ನಿಯಂತ್ರಣಕ್ಕೆ ತೆಗೆದುಕೊಳ್ಳಬಹುದು. ಯುಎಸ್‌ಬಿ ಕೇಬಲ್‌ಗಳು ಅಥವಾ ಚಾರ್ಜರ್ ಕೇಬಲ್‌ಗಳ ಮೂಲಕವೂ ನಿಮ್ಮ ಫೋನ್‌ಗೆ ಪ್ರವೇಶಿಸಬಹುದು. ಹಾಗಾದರೆ, ನಿಮ್ಮ ಫೋನ್ ಹ್ಯಾಕ್ ಆಗಿದೆಯೇ ಎಂದು ತಿಳಿಯುವುದು ಹೇಗೆ?, ಇಂದಿನ ಲೇಖನದಲ್ಲಿ ಈ ಕುರಿತು ನೋಡೋಣ ಬನ್ನಿ.

ಬ್ಯಾಟರಿ ಪರಿಶೀಲನೆ: ನಿಮ್ಮ ಫೋನ್‌ನ ಬ್ಯಾಟರಿ ಬೇಗ ಖಾಲಿಯಾಗುತ್ತಿದ್ದರೆ ಮತ್ತು ಫೋನ್ ಅತಿಯಾಗಿ ಬಿಸಿಯಾಗುತ್ತಿದ್ದರೆ ಅದು ಹ್ಯಾಕ್ ಆಗಿರುವ ಸಂಕೇತವಾಗಿರಬಹುದು. ಏಕೆಂದರೆ, ನಿಮ್ಮ ಸ್ಮಾರ್ಟ್‌ಫೋನಿನಲ್ಲಿ ನಿಮಗೆ ತಿಳಿಯದೇ ಇರುವ ಸಾಫ್‌ವೇರ್ ಒಂದು ರನ್ ಆಗುತ್ತಿರಬಹುದು. ಇದನ್ನು ಸೈಬರ್‌ ಕ್ರಿಮಿನಲ್‌ಗಳು ಯಾವುದೇ ಒಂದು ಮಾರ್ಗದಿಂದ ನಿಮ್ಮ ಫೋನಿನಲ್ಲಿ ತೂರಿಸಿರಬಹುದು. ಈ ಸಾಫ್ಟ್‌ವೇರ್ ಹೆಚ್ಚು ಬ್ಯಾಟರಿ ಬಳಸುವುದಿಂದ ನಿಮ್ಮ ಸ್ಮಾರ್ಟ್‌ಫೋನ್ ಬಹುಬೇಗ ಬಿಸಿಯಾಗುವ ಸಾಧ್ಯತೆ ಇರುತ್ತದೆ.

ಅಪ್ಲಿಕೇಶನ್‌ಗಳ ಪರಿಶೀಲನೆ:ನಿಮ್ಮ ಫೋನ್‌ನಲ್ಲಿ ಹೊಸ ಅಪ್ಲಿಕೇಶನ್‌ಗಳು ಕಾಣಿಸಿಕೊಂಡರೆ, ಅಪ್ಲಿಕೇಶನ್‌ಗಳು ಲೋಡ್ ಆಗಲು ಹೆಚ್ಚು ಸಮಯ ತೆಗೆದುಕೊಂಡರೆ ಅಥವಾ ಅಪ್ಲಿಕೇಶನ್‌ಗಳು ತಾನಾಗಿಯೇ ತೆರೆದರೆ ಅಥವಾ ಮುಚ್ಚಿದರೆ, ನಿಮ್ಮ ಫೋನ್ ಹ್ಯಾಕ್ ಆಗಿರುವ ಸಾಧ್ಯತೆ ಇದೆ. ಓಪನ್ ಸೋರ್ಸ್ ಮೂಲಕ ನೀವು ಡೌನ್‌ಲೋಡ್ ಮಾಡಿರಬಹುದಾದ ಮೊಬೈಲ್ ಅಪ್ಲಿಕೇಶನ್‌ಗಳು ಅಪರಾಧ ಎಸಗುವಲ್ಲಿ ಮೊದಲ ಸ್ಥಾನದಲ್ಲಿರುತ್ತವೆ.

ನೋಟಿಫಿಕೇಷನ್‌ಗಳು ಮತ್ತು ಸೆಟ್ಟಿಂಗ್‌ಗಳು: ಅನಿರೀಕ್ಷಿತ ನೋಟಿಫಿಕೇಷನ್‌ಗಳು, ಎರಡು ಅಂಶದ ದೃಢೀಕರಣ ಕೋಡ್‌ಗಳು ಅಥವಾ ಪಾಪ್-ಅಪ್‌ಗಳು ಕಾಣಿಸಿಕೊಂಡರೆ ಮತ್ತು ಕ್ಯಾಮೆರಾ ಅಥವಾ ಮೈಕ್ರೊಫೋನ್ ಅನುಮತಿಗಳಂತಹ ಸೆಟ್ಟಿಂಗ್‌ಗಳು ಬದಲಾದರೆ, ನಿಮ್ಮ ಫೋನ್ ಹ್ಯಾಕ್ ಆಗಿರುವ ಸಾಧ್ಯತೆ ಇದೆ. ಈ ಸಮಯದಲ್ಲಿ ನಿಮ್ಮ ಫೋನ್ ಹ್ಯಾಂಗ್ ಆಗುವ ಸಾಧ್ಯತೆ ಕೂಡ ಹೆಚ್ಚಿರುತ್ತದೆ. ಇದನ್ನು ಕೂಡ ನಾವು ಗಮನಿಸಬೇಕಾಗುತ್ತದೆ.

ಖಾತೆಗಳ ಪರಿಶೀಲನೆ:ನಿಮ್ಮ ಆಪಲ್ ಐಡಿ, ಗೂಗಲ್ ಅಕೌಂಟ್ ಇತರ ಆನ್‌ಲೈನ್ ಖಾತೆಗಳಿಂದ ಅನಿರೀಕ್ಷಿತವಾಗಿ ಲಾಗ್ ಇನ್ ಆಗಿದ್ದರೆ, ನಿಮ್ಮ ಸ್ಮಾರ್ಟ್‌ಫೋನ್ ಹ್ಯಾಕ್ ಆಗಿರುವ ಸಾಧ್ಯತೆ ಇದೆ. ನಿಮ್ಮ ಮಾಹಿತಿಯನ್ನು ಆಪಲ್ ಐಡಿ ಮತ್ತು ಗೂಗಲ್ ಅಕೌಂಟ್ ಎರಡೂ ನಿಮ್ಮ ಬಹುತೇಕ ಮಾಹಿತಿಯನ್ನು ಒಳಗೊಂಡಿರುತ್ತವೆ. ಹಾಗಾಗಿ, ಸೈಬರ್ ಕ್ರಿಮಿನಲ್‌ಗಳು ಇವುಗಳನ್ನು ಹ್ಯಾಕ್ ಮಾಡುವ ಮೂಲಕ ನಿಮ್ಮ ಸ್ಮಾರ್ಟ್‌ಪೋನಿನ ನಿಯಂತ್ರಣಕ್ಕೆ ಬೇಕಿರುವ ಮಾಹಿತಿಗಳನ್ನು ಪಡೆದಿರಬಹುದು

ನಿಮ್ಮ ಫೋನ್ ಹ್ಯಾಕ್ ಆಗಿದೆ ಎಂದು ನೀವು ಅನುಮಾನಿಸಿದರೆ, ತಕ್ಷಣ ನಿಮ್ಮ ಪಾಸ್‌ವರ್ಡ್‌ಗಳನ್ನು ಬದಲಾಯಿಸಿ ಮತ್ತು ನಿಮ್ಮ ಆಂಟಿವೈರಸ್ ಸಾಫ್ಟ್‌ವೇರ್ ಅನ್ನು ರನ್ ಮಾಡಿ. ಪ್ರಸಿದ್ಧ ಆಂಟಿವೈರಸ್ ಸಾಫ್ಟ್‌ವೇರ್ ಅನ್ನು ಸ್ಥಾಪಿಸಿ ಮತ್ತು ರನ್ ಮಾಡಿ. ಇದು ನಿಮ್ಮ ಫೋನ್‌ನಲ್ಲಿ ಮಾಲ್‌ವೇರ್ ಅಥವಾ ಸ್ಪೈವೇರ್ ಇದ್ದರೆ ಪತ್ತೆ ಮಾಡುತ್ತದೆ ಮತ್ತು ತೆಗೆದುಹಾಕುತ್ತದೆ. ಬಿಟ್‌ಡೆಫೆಂಡರ್, ನಾರ್ಟನ್, ಕ್ಯಾಸ್ಪರ್ಸ್ಕಿ ಮತ್ತು ಮ್ಯಾಕ್‌ಅಫೀ ಜನಪ್ರಿಯ ಆಂಟಿವೈರಸ್ ಸಾಫ್ಟ್‌ವೇರ್‌ಗಳಾಗಿವೆ. ಕೆಲವೊಮ್ಮೆ ಅನಿರೀಕ್ಷಿತ ಅಧಿಸೂಚನೆಗಳು, ವಿನಂತಿಸದ ಎರಡು ಅಂಶ ದೃಢೀಕರಣ ಕೋಡ್‌ಗಳು ಅಥವಾ ಪಾಪ್-ಅಪ್‌ಗಳು ಕಾಣಿಸಿಕೊಳ್ಳಲು ಪ್ರಾರಂಭಿಸಬಹುದು ಮತ್ತು ಕ್ಯಾಮೆರಾ ಅಥವಾ ಮೈಕ್ರೊಫೋನ್ ಅನುಮತಿಗಳಂತಹ ಸೆಟ್ಟಿಂಗ್‌ಗಳು ಬದಲಾಗಬಹುದು ಇವುಗಳನ್ನು ಗಮನಿಸಿ. ಎಲ್ಲಕ್ಕಿಂತ ದೊಡ್ಡ ಅಪಾಯವೆಂದರೆ ನಿಮ್ಮ ಆಪಲ್ ಐಡಿ ಅಥವಾ ಗೂಗಲ್ ಖಾತೆಯಿಂದ ಅಥವಾ ಇತರ ಆನ್‌ಲೈನ್ ಖಾತೆಗಳಿಂದ ಅನಿರೀಕ್ಷಿತವಾಗಿ ಲಾಗ್ ಇನ್ ಆಗಿದ್ದರೆ ಅವುಗಳ ಪಾಸ್‌ವರ್ಡ್‌ ಅನ್ನು ಕೂಡಲೇ ಬದಲಾಯಿಸಿ ಮತ್ತು ಇತರೆ ಖಾತೆಗಳಲ್ಲಿ ಅವು ಸಕ್ರೀಯವಾಗದಂತೆ ನೋಡಿಕೊಳ್ಳಿ.