ಒಂದೇ ಫೋನ್‌ನಲ್ಲಿ ಎರಡು WhatsApp ಖಾತೆ ಬಳಸುವ ಸರಳ ವಿಧಾನ ಇದು!

ಅತಿ ಹೆಚ್ಚು ಬಳಸಲಾಗುವ ಜನಪ್ರಿಯ ಇನ್‌ಸ್ಟಂಟ್ ಅಪ್ಲಿಕೇಶನ್ WhatsApp ದಿನದಿನಕ್ಕೂ ಸರಳ ಮತ್ತು ಉಪಯುಕ್ತ ವೈಶಿಷ್ಟ್ಯಗಳನ್ನು ಹೊಂದುತ್ತಿದೆ. ಇವುಗಳಲ್ಲಿ ಒಂದು ಇತ್ತೀಚಿನ ಅತ್ಯುತ್ತಮ ವೈಶಿಷ್ಟ್ಯವೆಂದರೆ, ಒಂದೇ ಫೋನ್‌ನಲ್ಲಿ ಎರಡು WhatsApp ಖಾತೆ ಬಳಸುವುದು. ವೈಯಕ್ತಿಕ ಜೀವನ ಮತ್ತು ಕೆಲಸದ ಸಲುವಾಗಿ ಬೇರೆ ಬೇರೆ ಫೋನ್ ಸಂಖ್ಯೆಗಳು ಇರುವವರು ಈಗ ಒಂದೇ ಫೋನ್‌ನಲ್ಲಿ ಎರಡೂ WhatsApp ಖಾತೆಗಳನ್ನು ಸುಲಭವಾಗಿ ಬಳಸಬಹುದು. ಈ ಹೊಸ ವೈಶಿಷ್ಟ್ಯವು ಬಹುಜನರಿಗೆ ತುಂಬಾ ಉಪಯುಕ್ತವಾಗುತ್ತದೆ. ಹಾಗಾದರೆ, ಒಂದೇ ಫೋನ್‌ನಲ್ಲಿ ಎರಡು WhatsApp ಖಾತೆ ಬಳಸುವುದು ಹೇಗೆ ಎಂಬುದನ್ನು ನೋಡೋಣ ಬನ್ನಿ.

ಒಂದೇ ಫೋನ್‌ನಲ್ಲಿ ಎರಡು WhatsApp ಖಾತೆಗಳನ್ನು ತೆರೆಯವುದು ಹೇಗೆ?
ಒಂದೇ ಫೋನ್‌ನಲ್ಲಿ ಎರಡು WhatsApp ಖಾತೆಗಳನ್ನು ತೆರೆಯಲು ಯಾವುದೇ ತಾಂತ್ರಿಕ ಜ್ಞಾನ ಅಗತ್ಯವಿಲ್ಲ. ಕೆಳಗಿನ ಸರಳ ಹಂತಗಳನ್ನು ಅನುಸರಿಸಿದರೆ ಸಾಕು

ಮೊದಲು ನಿಮ್ಮ ಫೋನ್‌ನಲ್ಲಿ WhatsApp‌ನ ಇತ್ತೀಚಿನ ಆವೃತ್ತಿ ಇರಬೇಕೆಂದು ಖಚಿತಪಡಿಸಿಕೊಳ್ಳಿ. ನಂತರ, ಆ್ಯಪ್ ತೆರೆಯಿರಿ ಮತ್ತು ಮೇಲ್ಭಾಗದ ಬಲಬದಿಯಲ್ಲಿ ಇರುವ ಮೂರು ಬಿಂದುಗಳ (ಮೆನು) ಐಕಾನ್‌ ಮೇಲೆ ಟ್ಯಾಪ್ ಮಾಡಿ. ಅಲ್ಲಿಂದ Settings (ಸೆಟ್ಟಿಂಗ್ಸ್) ಆಯ್ಕೆಮಾಡಿ.
ಸೆಟ್ಟಿಂಗ್ಸ್ ಪುಟದಲ್ಲಿ ನಿಮ್ಮ ಹೆಸರು ಮತ್ತು ಪ್ರೊಫೈಲ್ ಚಿತ್ರ ಕಾಣುತ್ತದೆ. ಅದೇ ಭಾಗದ ಪಕ್ಕದಲ್ಲಿ ಇರುವ "+" ಚಿಹ್ನೆಯ ಮೇಲೆ ಕ್ಲಿಕ್ ಮಾಡಿ.

ಈಗ ಕೆಳಭಾಗದಲ್ಲಿ "Add Account" ಎಂಬ ಆಯ್ಕೆ ಕಾಣುತ್ತದೆ, ಅದನ್ನು ಆರಿಸಿ. ಮುಂದಿನ ಪುಟದಲ್ಲಿ "Agree and Continue" ಎಂಬ ಬಟನ್ ಮೇಲೆ ಟ್ಯಾಪ್ ಮಾಡಿ, ನಂತರ ನಿಮ್ಮ ಎರಡನೇ WhatsApp ಸಂಖ್ಯೆಯನ್ನು ನಮೂದಿಸಿ. ಅದನ್ನು SMS ಅಥವಾ ಕರೆ ಮೂಲಕ ದೃಢೀಕರಿಸಲು ಸೂಚನೆ ಬರುತ್ತದೆ. ದೃಢೀಕರಣದ ನಂತರ ನಿಮ್ಮ ಹೆಸರನ್ನು ಮತ್ತು ಪ್ರೊಫೈಲ್ ಚಿತ್ರವನ್ನು ಸೇರಿಸಿ, ಬಳಿಕ "Next" ಬಟನ್ ಒತ್ತಿ. ಇದೀಗ ನಿಮ್ಮ ಎರಡನೇ WhatsApp ಖಾತೆ ಸಿದ್ಧವಾಗಿದೆ.

ಈಗ, ಎರಡು ಖಾತೆಗಳ ನಡುವಿನಲ್ಲಿ ಬದಲಾಯಿಸಲು ಮತ್ತೆ WhatsApp ತೆರೆಯಿರಿ ಮತ್ತು ಮೂರು ಬಿಂದುಗಳ ಮೆನು ಆಯ್ಕೆ ಮಾಡಿ. ಅಲ್ಲಿಂದ "Switch accounts" ಮೇಲೆ ಟ್ಯಾಪ್ ಮಾಡಿ, ನಂತರ ಬೇರೆ ಖಾತೆಯನ್ನು ಆಯ್ಕೆಮಾಡಿ. ತಕ್ಷಣವೇ ನೀವು ಆ ಖಾತೆಗೆ ಬದಲಾಯಿಸಬಹುದು.

ಈ ಸರಳ ಕ್ರಮದ ಮೂಲಕ ನೀವು ಎರಡು WhatsApp ಖಾತೆಗಳನ್ನು ಒಂದೇ ಫೋನ್‌ನಲ್ಲಿ ಸುಗಮವಾಗಿ ಬಳಸಬಹುದು. ಈ ವೈಶಿಷ್ಟ್ಯದಿಂದ ಬಳಕೆದಾರರಿಗೆ ದಿನನಿತ್ಯದ ಸಂವಹನ ಹೆಚ್ಚು ಸುಲಭವಾಗುತ್ತದೆ. ಕೆಲಸ ಮತ್ತು ವೈಯಕ್ತಿಕ ಜೀವನದ ನಡುವೆ ಸಮತೋಲನ ಸಾಧಿಸಲು ಇದು ಸಹಾಯಕವಾಗಿದೆ. ಇಬ್ಬರು ಬೇರೆ ಫೋನ್‌ಗಳನ್ನು ತೆಗೆದುಕೊಂಡು ಹೋಗುವ ಅವಶ್ಯಕತೆ ಇಲ್ಲದೆ, ಒಂದೇ ಸಾಧನದಲ್ಲಿ ಎಲ್ಲ ಸಂದೇಶಗಳನ್ನು ನಿಭಾಯಿಸಬಹುದು.

ಹೊಸದಾಗಿ "ಕ್ವಿಕ್ ಸ್ಟೋರೇಜ್ ಮ್ಯಾನೇಜ್‌ಮೆಂಟ್" ಎಂಬ ವೈಶಿಷ್ಟ್ಯ
ವಾಟ್ಸಾಪ್ ತನ್ನ ಆಂಡ್ರಾಯ್ಡ್ ಅಪ್ಲಿಕೇಶನ್‌ಗೆ ಹೊಸದಾಗಿ "ಕ್ವಿಕ್ ಸ್ಟೋರೇಜ್ ಮ್ಯಾನೇಜ್‌ಮೆಂಟ್" ಎಂಬ ವೈಶಿಷ್ಟ್ಯವನ್ನು ಪರೀಕ್ಷಿಸುತ್ತಿದೆ ಎಂದು ವರದಿಯಾಗಿದೆ. ಇದು ಸಾಧನದ ಸಂಗ್ರಹಣೆಯನ್ನು (storage) ನಿರ್ವಹಿಸುವುದನ್ನು ಇನ್ನಷ್ಟು ಸುಲಭಗೊಳಿಸುತ್ತದೆ. ಈ ವೈಶಿಷ್ಟ್ಯದ ಮೂಲಕ ಬಳಕೆದಾರರು ಸಂಭಾಷಣೆ ವಿಂಡೋದಲ್ಲೇ ನೇರವಾಗಿ ಸಂಗ್ರಹಣೆಯನ್ನು ಮೇಲ್ವಿಚಾರಣೆ ಮಾಡಬಹುದು ಹಾಗೂ ಅವಶ್ಯಕತೆ ಇದ್ದರೆ ಸ್ಥಳವನ್ನು ಮುಕ್ತಗೊಳಿಸಬಹುದು. ಅಂದರೆ, ಅಪ್ಲಿಕೇಶನ್‌ನ ಸೆಟ್ಟಿಂಗ್‌ಗಳೊಳಗೆ ಹೋಗಬೇಕಾದ ಅಗತ್ಯವಿಲ್ಲ.

ಫೀಚರ್ ಟ್ರ್ಯಾಕರ್ WABetaInfo ಪ್ರಕಾರ, ಇತ್ತೀಚಿನ WhatsApp ಬೀಟಾ ಅಪ್ಡೇಟ್‌ನಲ್ಲಿ ಕೆಲವು ಬಳಕೆದಾರರು ಈ ಹೊಸ ಸಾಧನ ಸಂಗ್ರಹಣಾ ನಿರ್ವಹಣಾ ವೈಶಿಷ್ಟ್ಯವನ್ನು ಗಮನಿಸಿದ್ದಾರೆ. ಇದನ್ನು ಆಂಡ್ರಾಯ್ಡ್ ಬೀಟಾ ಆವೃತ್ತಿ 2.25.31.13 ನಲ್ಲಿ ಪತ್ತೆಹಚ್ಚಲಾಗಿದೆ. ಪ್ರಸ್ತುತ ಈ ಆಯ್ಕೆ ಎಲ್ಲರಿಗೂ ಲಭ್ಯವಿಲ್ಲದಿದ್ದರೂ, ಶಾರ್ಟ್‌ಕಟ್ ಇನ್ನೂ ಅಭಿವೃದ್ಧಿಯ ಹಂತದಲ್ಲಿದ್ದು, ಮುಂದಿನ ಅಪ್ಡೇಟ್‌ಗಳಲ್ಲಿ ಬಳಕೆದಾರರಿಗೆ ಲಭ್ಯವಾಗುವ ಸಾಧ್ಯತೆ ಇದೆ. ಈ ವೈಶಿಷ್ಟ್ಯದಿಂದ ಬಳಕೆದಾರರು WhatsApp‌ನಲ್ಲಿ ಹೆಚ್ಚು ಸ್ಥಳವನ್ನು ಆಕ್ರಮಿಸಿಕೊಂಡಿರುವ ದೊಡ್ಡ ಫೈಲ್‌ಗಳು ಅಥವಾ ಮೀಡಿಯಾ ಅಂಶಗಳನ್ನು ಸುಲಭವಾಗಿ ಗುರುತಿಸಿ ಅಳಿಸಬಹುದು.