ವಾಟ್ಸಾಪ್‌ ಚಾಟ್‌ ಹಿಸ್ಟರಿಯನ್ನು ಟೆಲಿಗ್ರಾಮ್‌ಗೆ ಸೇರಿಸುವುದು ಹೇಗೆ?

ಹೌದು, ವಾಟ್ಸಾಪ್‌ನಿಂದ ಟೆಲಿಗ್ರಾಮ್‌ಗೆ ಹೋಗುತ್ತೀರಾ? ವಾಟ್ಸಾಪ್‌ನ ಚಾಟ್‌ಗಳನ್ನು ಕಳೆದುಕೊಳ್ಳುವ ಆತಂಕದಲ್ಲಿದ್ದೀರಾ? ಚಿಂತೆ ಬೇಡ ಏಕೆಂದರೆ ವಾಟ್ಸಾಪ್ ಬಳಕೆದಾರರು ವಾಟ್ಸಾಪ್‌ನಲ್ಲಿರುವ ಚಾಟ್‌ ಹಿಸ್ಟರಿಯನ್ನು ಟೆಲಿಗ್ರಾಮ್‌ಗೆ ಸರಿಸಬಹುದಾಗಿದೆ. ವಾಟ್ಸಾಪ್‌ ಚಾಟ್ ಅನ್ನು ಸೇರಿಸಿಕೊಳ್ಳುವ ಹೊಸ ಫಿಚರ್ಸ್‌ ಅನ್ನು ಟೆಲಿಗ್ರಾಮ್‌ ತನ್ನ ಆವೃತ್ತಿ 7.4 ರಲ್ಲಿ ಪರಿಚಯಿಸಿದೆ. ಹಾಗಾದ್ರೆ ವಾಟ್ಸಾಪ್‌ ಚಾಟ್‌ ಅನ್ನು ಟೆಲಿಗ್ರಾಮ್‌ಗೆ ಸೇರಿಸುವುದು ಹೇಗೆ ಅನ್ನೊದನ್ನ ಈ ಲೇಖನದಲ್ಲಿ ತಿಳಿಸಿಕೊಡ್ತೀವಿ ಓದಿರಿ.

ಟೆಲಿಗ್ರಾಮ್‌ನ ಹೊಸ ಅಪ್ಡೇಟ್‌ ವಾಟ್ಸಾಪ್‌ ಚಾಟ್‌ ಹಿಸ್ಟರಿಯನ್ನು Import ಅನ್ನು ಮಾಡಿಕೊಳ್ಳುವ ಅವಕಾಶವನ್ನು ನೀಡಿದೆ. ಈ ಅಪ್ಡೇಟ್‌ ಹೆಚ್ಚಿನ ಗೌಪ್ಯತೆ ಫೀಚರ್ಸ್‌ಗಳನ್ನು ಸಹ ತರುತ್ತದೆ. ನಿಮ್ಮ ಚಾಟ್‌ ಹಿಸ್ಟರಿಯನ್ನು ವಾಟ್ಸಾಪ್, ಲೈನ್ ಮತ್ತು ಕಾಕಾವೊಟಾಕ್‌ನಂತಹ ಇತರ ಅಪ್ಲಿಕೇಶನ್‌ಗಳಿಂದ ಟೆಲಿಗ್ರಾಮ್‌ಗೆ ಸೇರಿಸಿ ಎಂದು ಈ ಅಪ್ಡೇಟ್‌ನಲ್ಲಿ ಹೇಳಲಾಗಿದೆ. ಇನ್ನು ಈ ಫೀಚರ್ಸ್‌ ಈಗಿನಂತೆ ಐಒಎಸ್ ಬಳಕೆದಾರರಿಗೆ ಮಾತ್ರ ಲಭ್ಯವಿದೆ ಮತ್ತು ಆಂಡ್ರಾಯ್ಡ್ ಅಪ್ಡೇಟ್‌ ನಂತರದ ಹಂತದಲ್ಲಿ ಬರಲಿದೆ ಎಂದು ಹೇಳಲಾಗಿದೆ.

ಇನ್ನು ನೀವು ವಾಟ್ಸಾಪ್ ಚಾಟ್‌ ಹಿಸ್ಟರಿಯನ್ನು ಟೆಲಿಗ್ರಾಮ್‌ಗೆ ಸೇರಿಸಬೇಕಾದರೆ ಇತ್ತೀಚಿನ ವಾಟ್ಸಾಪ್‌ ಮತ್ತು ಟೆಲಿಗ್ರಾಮ್ ಅಪ್ಲಿಕೇಶನ್‌ ಆವೃತ್ತಿಯನ್ನು ಹೊಂದಿರಬೇಕಾಗುತ್ತದೆ. ಅಲ್ಲದೆ, ಈಗಿನಂತೆ ವೈಯಕ್ತಿಕ ಚಾಟ್‌ಗಳನ್ನು ಮಾತ್ರ ಟೆಲಿಗ್ರಾಮ್‌ಗೆ ಸೇರಿಸಿಕೊಳ್ಳಬಹುದು. ಆದರೆ ಬ್ಯಾಚ್‌ನಲ್ಲಿ ಸಂಭಾಷಣೆಗಳನ್ನು ಆಮದು ಮಾಡಿಕೊಳ್ಳಲು ಯಾವುದೇ ಆಯ್ಕೆಗಳಿಲ್ಲ, ಆದ್ದರಿಂದ ಇದು ಸ್ವಲ್ಪ ಸಮಯ ತೆಗೆದುಕೊಳ್ಳುತ್ತದೆ. ಇನ್ನು ನಿಮ್ಮ ವಾಟ್ಸಾಪ್ ಚಾಟ್ ಹಿಸ್ಟರಿಯನ್ನು ಟೆಲಿಗ್ರಾಮ್‌ಗೆ ಹೇಗೆ ಆಮದು ಮಾಡಿಕೊಳ್ಳಬೇಕು ಅನ್ನೊದನ್ನ ಕೆಳಗಿನ ಹಂತಗಳಲ್ಲಿ ತಿಳಿಯಿರಿ.

ವಾಟ್ಸಾಪ್‌ ಚಾಟ್‌ ಹಿಸ್ಟರಿಯನ್ನು ಟೆಲಿಗ್ರಾಮ್‌ಗೆ ಆಮದು ಮಾಡುವುದು ಹೇಗೆ?

ಹಂತ 1: ನೀವು ಟೆಲಿಗ್ರಾಮ್‌ಗೆ ಆಮದು ಮಾಡಲು ಬಯಸುವ ವಾಟ್ಸಾಪ್‌ನಲ್ಲಿ ಚಾಟ್ ತೆರೆಯಿರಿ.

ಹಂತ 2: ಸಂಪರ್ಕ ಮಾಹಿತಿ ಮೆನುವಿನಿಂದ, "Export ಚಾಟ್" ಆಯ್ಕೆಮಾಡಿ.

ಹಂತ 3: ಇಲ್ಲಿ, ಬಳಕೆದಾರರಿಗೆ ಎರಡು ಆಯ್ಕೆಗಳನ್ನು ನೀಡಲಾಗುವುದು: "Attach Media" ಅಥವಾ "Without Media" ಯಾವ ಚಾಟ್‌ಗೆ ಸಂಬಂಧಿಸಿದ ಮೀಡಿಯಾವನ್ನು ಅವರು ಬಯಸುತ್ತಾರೋ ಇಲ್ಲವೋ ಎಂಬುದನ್ನು ಅವಲಂಬಿಸಿ ಅವರು ಆಯ್ಕೆ ಮಾಡಬಹುದು.

ಹಂತ 4: ಈಗ ಐಒಎಸ್ ಶೇರ್ ಶೀಟ್‌ನಿಂದ ಟೆಲಿಗ್ರಾಮ್ ಆಯ್ಕೆಮಾಡಿ

ಹಂತ 5: ಬಳಕೆದಾರರು ಆಮದು ಮಾಡಿದ ವಾಟ್ಸಾಪ್ ಚಾಟ್ ಅನ್ನು ನಿಯೋಜಿಸಲು ಬಯಸುವ ಸಂಪರ್ಕವನ್ನು ಆಯ್ಕೆ ಮಾಡಬಹುದು.

ಹಂತ 6: ಅಂತಿಮವಾಗಿ, "Import" ಆಯ್ಕೆಮಾಡಿ.