ವೈ-ಫೈ ಹೆಚ್ಚಿಸಲು ಬೋಯಿಂಗ್ ತನ್ನ ವಿಮಾನಕ್ಕೆ ಆಲೂಗಡ್ಡೆ ತುಂಬಿಸಿದ್ದು ಏಕೆ?

ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಬೋಯಿಂಗ್ ವಿಮಾನದ ಸೀಟ್‌ಗಳಲ್ಲಿ ಆಲೂಗಡ್ಡೆಗಳನ್ನು ಬಳಸಿ ಪರೀಕ್ಷೆ ನಡೆಸಿದ ಚಿತ್ರಗಳು ಮತ್ತ ವಿಡಿಯೋಗಳು ವೈರಲ್ ಆಗಿದೆ. ಆದರೆ, ಇದೀಗ ವೈರಲ್ ಆಗಿರುವ ಈ ಸುದ್ದಿ ಹೊಸದೇನಲ್ಲ.! ಬೋಯಿಂಗ್ ಎಂಜಿನಿಯರ್‌ಗಳು 2012ರಲ್ಲಿ ವೈ-ಫೈ ಸೇವೆ ಒದಗಿಸಲು ಈ ವಿಶಿಷ್ಟ ಪ್ರಯೋಗವನ್ನು ನಡೆಸಿದ್ದರು.! ಇದು ಈ ಸಮಯದಲ್ಲಿ ವೈರಲ್ ಆಗಿದೆ. ಹಾಗಾದರೆ, ಬೋಯಿಂಗ್ ವಿಮಾನಗಳಲ್ಲಿ ಆಲೂಗಡ್ಡೆಗಳನ್ನು ಬಳಸಿದ ಈ ವಿಶಿಷ್ಟ ಪ್ರಯೋಗದ ಹಿಂದಿನ ಕಾರಣವೇನು ಮತ್ತು ಇದು ವಿಮಾನಯಾನದಲ್ಲಿ ವೈ-ಫೈ ಅನುಭವವನ್ನು ಹೇಗೆ ಸುಧಾರಿಸಿತು ಎಂಬುದನ್ನು ಈ ಲೇಖನದಲ್ಲಿ ತಿಳಿಯೋಣ ಬನ್ನಿ.

2010ರ ದಶಕದ ಆರಂಭದಲ್ಲಿ, ಹಲವು ವಿಮಾನಯಾನ ಕಂಪನಿಗಳು ವಿಮಾನಗಳಲ್ಲಿ ವೈ-ಫೈ ವ್ಯವಸ್ಥೆಯನ್ನು ಅಳವಡಿಸಲು ಪ್ರಾರಂಭಿಸಿದವು. ಆದರೆ, ಬೋಯಿಂಗ್ ಕಂಪೆನಿಗೆ ಒಂದು ಪ್ರಮುಖ ಸಮಸ್ಯೆ ಎದುರಾಯಿತು. ವೈ-ಫೈ ಸಿಗ್ನಲ್‌ಗಳ ವಿತರಣೆಯು ಹತ್ತಿರದಲ್ಲಿ ಕುಳಿತಿರುವ ಪ್ರಯಾಣಿಕರಿಂದ ಪ್ರಭಾವಿತವಾಗುತ್ತಿತ್ತು, ಇದರಿಂದ ಸಂಪರ್ಕವು ಸಮರ್ಪಕವಾಗಿ ಇರುತ್ತಿರಲಿಲ್ಲ. ಪ್ರಯಾಣಿಕರ ದೇಹಗಳು ಮತ್ತು ಅವರ ಚಲನೆಗಳು ವೈ-ಫೈ ಸಿಗ್ನಲ್‌ಗಳ ಮೇಲೆ ಹೇಗೆ ಪರಿಣಾಮ ಬೀರುತ್ತವೆ ಎಂಬುದನ್ನು ವಿಶ್ಲೇಷಿಸುವುದು ಅಗತ್ಯವಾಗಿತ್ತು. ಆದರೆ, ಗಂಟೆಗಟ್ಟಲೆ ಪ್ರಯಾಣಿಕರನ್ನು ವಿಮಾನದಲ್ಲಿ ಸ್ಥಿರವಾಗಿ ಕುಳ್ಳಿರಿಸುವುದು ಕಾರ್ಯಸಾಧ್ಯವಾದ ಪರಿಹಾರವಾಗಿರಲಿಲ್ಲ.

ಇದೇ ಸಂದರ್ಭದಲ್ಲಿ, ಬೋಯಿಂಗ್‌ನ ಎಂಜಿನಿಯರ್‌ಗಳು ನಿರೀಕ್ಷೆಯಲ್ಲದ ಆದರೆ ಪರಿಣಾಮಕಾರಿ ಪರಿಹಾರವನ್ನು ಕಂಡುಕೊಂಡರು. ವಿಮಾನದಲ್ಲಿ ಪ್ರಯಾಣಿಕರ ಬದಲಿಗೆ ಆಲೂಗಡ್ಡೆಗಳನ್ನು ಬಳಸಿ ಪ್ರಯೋಗ ನಡೆಸಲು ನಿರ್ಧರಿಸಿದರು. ಇದು ಅಚ್ಚರಿ ಎನಿಸಿದರೂ, ವೈಜ್ಞಾನಿಕವಾಗಿ ಇದಕ್ಕೆ ಕಾರಣವಿತ್ತು. ಎಂಜಿನಿಯರ್‌ಗಳು ಆಲೂಗಡ್ಡೆಗಳ ನೀರಿನ ಅಂಶ ಮತ್ತು ಅವುಗಳ ವಿದ್ಯುತ್ಕಾಂತೀಯ ಗುಣಲಕ್ಷಣಗಳು ಮಾನವ ದೇಹವನ್ನು ನಿಕಟವಾಗಿ ಅನುಕರಿಸುತ್ತವೆ ಎಂಬುದನ್ನು ಕಂಡುಕೊಂಡರು.

ಆಲೂಗಡ್ಡೆಗಳು ಶೇ. 80ರಷ್ಟು ನೀರಿನ ಅಂಶವನ್ನು ಹೊಂದಿದ್ದು, ಈ ನೀರು ಮತ್ತು ಇತರ ರಾಸಾಯನಿಕಗಳ ಕಾರಣದಿಂದ ಅವು ಮಾನವ ದೇಹದಂತೆ ರೇಡಿಯೋ ತರಂಗಗಳನ್ನು ಹೀರಿಕೊಳ್ಳುತ್ತವೆ ಅಥವಾ ಪ್ರತಿಬಿಂಬಿಸುತ್ತವೆ. ವೈ-ಫೈ ತರಂಗಗಳು ಸಾಮಾನ್ಯವಾಗಿ 2.4 GHz ಮತ್ತು 5 GHz ಆವರ್ತನಗಳಲ್ಲಿ ಕಾರ್ಯನಿರ್ವಹಿಸುತ್ತವೆ, ಅಂದರೆ ಆಲೂಗಡ್ಡೆಗಳು ಸಿಗ್ನಲ್‌ಗಳ ಮಾರ್ಗದಲ್ಲಿ ಮಾನವ ದೇಹದಂತೆಯೇ ವರ್ತಿಸುತ್ತವೆ. ಈ ಕಾರಣಕ್ಕಾಗಿಯೇ, ಸಿಗ್ನಲ್‌ಗಳಿಗಾಗಿ ಆಂಟೆನಾ ನಿಯೋಜನೆಯನ್ನು ಉತ್ತಮಗೊಳಿಸಲು ಅವು ಮಾನವ ಪರೀಕ್ಷಾ ವಿಷಯಗಳಿಗೆ ಸೂಕ್ತ ಪರ್ಯಾಯವಾಗಿ ನಿಂತವು.

ಪ್ರಾಜೆಕ್ಟ್ SPUDS: ಒಂದು ವಿಶಿಷ್ಟ ವೈ-ಫೈ ಪರೀಕ್ಷೆ
ಬೋಯಿಂಗ್ ತನ್ನ ಈ ವಿಶಿಷ್ಟ ಪ್ರಯೋಗಕ್ಕೆ Project SPUDS (Synthetic Personnel Using Dielectric Substitution) ಎಂದು ಹೆಸರಿಸಿತು. ಈ ಪ್ರಯೋಗಕ್ಕಾಗಿ, ಬೋಯಿಂಗ್ ಸುಮಾರು 20,000 ಪೌಂಡ್‌ಗಳಷ್ಟು ಆಲೂಗಡ್ಡೆಗಳನ್ನು ಖರೀದಿಸಿತು. ಈ ಆಲೂಗಡ್ಡೆಗಳನ್ನು ನಿಷ್ಕ್ರಿಯಗೊಳಿಸಿದ ವಿಮಾನದ ಸೀಟುಗಳಲ್ಲಿ ಪ್ರಯಾಣಿಕರನ್ನು ಅನುಕರಿಸುವಂತೆ ತುಂಬಿಸಲಾಯಿತು. ಆಲೂಗಡ್ಡೆಯ ಚೀಲಗಳಿಂದ ವಿಮಾನದ ಸೀಟುಗಳನ್ನು ತುಂಬಿಸುವ ಮೂಲಕ, ಪ್ರಯಾಣಿಕರಿಂದ ತುಂಬಿದ ಕ್ಯಾಬಿನ್‌ನಲ್ಲಿ ವೈ-ಫೈ ಸಿಗ್ನಲ್‌ಗಳು ಹೇಗೆ ಹರಡುತ್ತವೆ ಎಂಬುದನ್ನು ಅವರು ಅನುಕರಿಸಲು ಸಾಧ್ಯವಾಯಿತು.

ನಂತರ, ವೈ-ಫೈ ರೌಟರ್‌ಗಳನ್ನು ವಿಮಾನದ ವಿವಿಧ ಸ್ಥಳಗಳಲ್ಲಿ ಇರಿಸಿ, ವಿಭಿನ್ನ ಸಿಗ್ನಲ್ ಸಾಮರ್ಥ್ಯಗಳನ್ನು ಪರೀಕ್ಷಿಸಲಾಯಿತು. ಈ ಪರೀಕ್ಷೆಯ ಮೂಲಕ, ವೈ-ಫೈ ತರಂಗಗಳು ಹೇಗೆ ಹರಡುತ್ತವೆ, ಎಲ್ಲಿ ಸಿಗ್ನಲ್ ನಿರ್ಬಂಧಗಳಿವೆ, ಮತ್ತು ಎಲ್ಲಿ ತಡೆಗಳು ಎದುರಾಗುತ್ತವೆ ಎಂಬಂತಹ ಪ್ರಮುಖ ಮಾಹಿತಿಯನ್ನು ಸಂಗ್ರಹಿಸಲಾಯಿತು. ಈ ಡೇಟಾವನ್ನು ವಿಶ್ಲೇಷಿಸುವ ಮೂಲಕ, ಬೋಯಿಂಗ್ ವಿಮಾನದೊಳಗಿನ ವೈ-ಫೈ ಅನುಭವವನ್ನು ಸುಧಾರಿಸಲು ಆಂಟೆನಾ ನಿಯೋಜನೆ ಮತ್ತು ಸಿಗ್ನಲ್ ಸಾಮರ್ಥ್ಯವನ್ನು ಉತ್ತಮಗೊಳಿಸಲು ಸಾಧ್ಯವಾಯಿತು. ಈ ಹೊಸ ವಿಧಾನವು ಸ್ವಯಸೇವಕ ಮಾನವರು ದೀರ್ಘಕಾಲದವರೆಗೆ ಸ್ಥಿರವಾಗಿ ಕುಳಿತುಕೊಳ್ಳುವ ಅಗತ್ಯವಿಲ್ಲದೆ ವೈ-ಫೈ ವ್ಯವಸ್ಥೆಗಳನ್ನು ಸುಧಾರಿಸಲು ಅವರಿಗೆ ಅವಕಾಶ ಕಲ್ಪಿಸಿತು.

ಒಟ್ಟಾರೆಯಾಗಿ, ಬೋಯಿಂಗ್‌ನ ಆಲೂಗಡ್ಡೆ ಬಳಕೆಯ ಈ ವಿಶಿಷ್ಟ ಪ್ರಯೋಗವು ವೈ-ಫೈ ಸಿಗ್ನಲ್ ವಿತರಣೆಯ ಸವಾಲಿಗೆ ಸೃಜನಾತ್ಮಕ ಮತ್ತು ಪರಿಣಾಮಕಾರಿ ಪರಿಹಾರವನ್ನು ಒದಗಿಸಿತು. ಇದು ವಿಮಾನಯಾನದಲ್ಲಿ ಪ್ರಯಾಣಿಕರಿಗೆ ಉತ್ತಮ ವೈ-ಫೈ ಸಂಪರ್ಕ ಒದಗಿಸಲು ಒಂದು ಮಹತ್ವದ ಹೆಜ್ಜೆಯಾಯಿತು ಎನ್ನಬಹುದು. ಅಲ್ಲವೆ?. ಈ ಬಗ್ಗ ನಿಮ್ಮ ಅನಿಸಿಕೆ ಏನು ಎಂಬುದನ್ನು ಈ ಕೆಳಗೆ ಕಾಮೆಂಟ್ ಮಾಡಿ ತಿಳಿಸಿ.