ಎರಡರ ಜೊತೆ ಆಟ ಸಾಕೇ? ಇದೆ ಇನ್ನೊಂದು! ಪ್ಲೇ ವಿತ್ ಥ್ರೀ

ಬೆಂಗಳೂರು, ಜು. 11: ಈಗ ಮೊಬೈಲ್ ಅನ್ನೋದು ಪ್ರತಿಯೊಬ್ಬರ ಪ್ರತಿನಿತ್ಯದ ಅಗತ್ಯ ವಸ್ತುಗಳಲ್ಲೊಂದು. ಮಾರುಕಟ್ಟೆಯಲ್ಲಿ ದಿನನಿತ್ಯ ಹೊಸ ಹೊಸ ರೀತಿಯ ಮೊಬೈಲ್ ದೊರೆಯುವಂತಾಗಿದೆ. ಮೊಬೈಲ್ ವಿತ್ ಮ್ಯೂಸಿಕ್ ಪ್ಲೇಯರ್, ಕೆಮರಾ, ಸಿಂಬಿಯನ್, ವಿಂಡೋಸ್ ಮೊಬೈಲ್, ಕೊನೆಗೆ ಅಂಡ್ರಾಯ್ಡ್ ವರೆಗೂ ಅದರಲ್ಲೂ ಅತ್ಯಾಧುನಿಕ ಅಂತೆಲ್ಲಾ ಬಂದು ಎಲ್ಲ ಒಂದೇ ಒಂದು ಸ್ಮಾರ್ಟ್ ಫೋನಿನಲ್ಲೇ ನೋಡಿದ್ದಾಯ್ತು, ಕೊಂಡದ್ದೂ ಆಯ್ತು. ಒಂದು ಸಿಮ್ ನಿಂದ ಎರಡು ಸಿಮ್ ಸೌಲಭ್ಯ ಪಡೆದದ್ದೂ ಆಯ್ತು.

ಇದೀಗ ಬರೋಬ್ಬರಿ 3 ಸಿಮ್ ಇರುವ ಮೊಬೈಲ್ ಬಿಡುಗಡೆಗೆ ಹೊರಟಿದೆ ಪ್ರಖ್ಯಾತ ಮ್ಯೂಸಿಕ್ ಕಂಪೆನಿ ಟಿ ಸಿರೀಸ್. ತನ್ನ ಬರಲಿರುವ ಈ ಹೊಸ ಮೊಬೈಲ್ ಗೆ ಅದು ಇಟ್ಟಿರುವ ಹೆಸರು ಪ್ಲೇ 333.
ಈ ಮೊಬೈಲ್ ನಲ್ಲಿರುವ ವಿಶೇಷತೆಗಳು:
* 2.0 ಇಂಚಸ್ ಡಿಸ್ ಪ್ಲೇ
* ಎಫ್ ಎಂ ರೇಡಿಯೋ
* 3.5 mm ಆಡಿಯೋ ಜ್ಯಾಕ್
* 8 GB ವಿಸ್ತರಿಸಬಹುದಾದ ಮೆಮೊರಿ
* ಡ್ಯುಯಲ್ ಲೆಡ್ ಟಾರ್ಚ್
* ಇಂಗ್ಲಿಷ್ & ಹಿಂದಿ ಭಾಷೆಯ ಸಪೋರ್ಟ್
* 1.3 ಮೆಗಾ ಪಿಕ್ಸೆಲ್ ಕೆಮರಾ

ಇಷ್ಟೇ ಅಲ್ಲದೇ ಹೆಚ್ಚಿನ ಬ್ಯಾಟರಿ ಬ್ಯಾಕಪ್ ಹಾಗೂ ಜಾವಾ ಆಧಾರಿತ OS ನೊಂದಿಗೆ ಇದು ಬರಲಿದೆ. ಬೆಲೆ ಅತೀ ಕಡಿಮೆ ಎನ್ನಬಹುದಾದ ರು. 2250. ಮೊದಲಿಗೆ ಭಕ್ತಿ ಆಧಾರಿತ ಮೊಬೈಲ್ ಮಾರುಕಟ್ಟೆಗೆ ಬಿಡುಗಡೆಮಾಡಿದ್ದ ಟಿ ಸಿರೀಸ್ ಇದೀಗ ಪ್ಲೇ 333 ಹೊರತರುತ್ತಿರುವುದು ಎಲ್ಲರಿಗೂ ಅದರಲ್ಲೂ ವಿಶೇಷವಾಗಿ ಮಧ್ಯಮ, ಕೆಳ ವರ್ಗದ ಜನರಿಗೆ ತುಂಬಾ ಸಂತೋಷವನ್ನುಂಟುಮಾಡಿದೆ.