ಅನಪೇಕ್ಷಿತ ಕರೆಗಳು ಹಾಗೂ ಎಸ್ ಎಂ ಎಸ್ ಗಳ ಕಿರಕಿರಿಯಿಂದ ಇನ್ನು ಮುಂದೆ ಮೊಬೈಲ್ ಬಳಕೆದಾರರು ಮುಕ್ತಿ ಹೊಂದಲಿದ್ದಾರೆ. ಮಧ್ಯರಾತ್ರಿ ವೇಳಗೆ ಎಸ್ ಎಂ ಎಸ್ ಬಂದು ಎಚ್ಚರವಾಗಿ ಕಳುಹಿಸಿದ ಕಂಪೆನಿಯ ಜೊತೆ ನಮ್ಮ ಮೊಬೈಲಿಗೂ ಶಾಪ ಹಾಕುವ ಅನಿವಾರ್ಯತೆ ಇನ್ನಿಲ್ಲ.

ಈ ಸೌಲಭ್ಯ ದೊರೆತಿದ್ದೇ ತಡ, ಗ್ರಾಹಕರ ದಿಲ್ ಫುಲ್ ಖುಷ್ ಆಗಿದೆ. ಈಗಾಗಲೇ 130 ದಶಲಕ್ಷಗಳಿಗೂ ಮಿಗಿಲಾಗಿ ಗ್ರಾಹಕರು ಈಗಾಗಲೇ ಈ ಸೌಲಭ್ಯದಡಿ ನೊಂದಾಯಿಸಿಕೊಂಡಿದ್ದಾರೆ.

ಯಾವುದೀ ಹೊಸ ಸೌಲಭ್ಯ ಎಂದರೆ "1909" ಕ್ಕೆ ಡಯಲ್ ಮಾಡುವ ಅಥವಾ ಎಸ್ ಎಂ ಎಸ್ ಕಳುಹಿಸುವ ಮೂಲಕ ಮೊಬೈಲ್ ಬಳಕೆದಾರರು ಅನಪೇಕ್ಷಿತ ಕರೆ ಹಾಗೂ ಎಸ್ ಎಂ ಎಸ್ ಗಳಿಂದ ಮುಕ್ತಿ ಹೊಂದುವುದು. ಈ ಸೌಲಭ್ಯ ಇಂದಿನಿಂದಲೇ (ಸೆ. 27) ಜಾರಿಗೆ ಬರಲಿದೆ.

ಸೌಲಭ್ಯದ ವಿವರಣೆ:
* ನೋಂದಣಿ ಮಾಡಿಸಲು, ನೋಂದಣಿ ರದ್ದುಪಡಿಸಲು ಮತ್ತು ದೂರು ಸಲ್ಲಿಸಲು ಸಿಂಗಲ್ ಟೋಲ್ ಫ್ರೀ ಸಂಖ್ಯೆ
* ನಿಮ್ಮ ಆಯ್ಕೆಯ ಮೇರೆಗೆ ಬೇಕಾಗಿರುವ ಕರೆ ಹಾಗೂ ಮೆಸೇಜ್ ಗಳನ್ನು ಸ್ವೀಕರಿಸುವ ಆಯ್ಕೆ
* ನಿಮ್ಮ ಆಯ್ಕೆಯ ನೋಂದಣಿ, ಆಯ್ಕೆಯ ನಂತರದ ಬದಲಾವಣೆ, ಆಯ್ಕೆಯ ನಂತರ ರದ್ದುಗೊಳಿಸುವ ಕೋರಿಕೆ 7 ದಿನಗಳಲ್ಲಿ ಕಾರ್ಯಗತವಾಗುವುದು

ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ ವರ್ಗೀಕರಿಸಿರುವ ಗುಂಪುಗಳ ಮಾಹಿತಿ. ಅದು ಹೀಗಿದೆ:
*** ಪೂರ್ಣವಾಗಿ ತಡೆಯಲ್ಪಟ್ಟ ವರ್ಗ- ಟೆಲಿಮಾರ್ಕೆಟಿಂಗ್ / ಎಸ್ ಎಂ ಎಸ್ ಬಾರದಂತೆ

*** ಭಾಗಶಃ ತಡೆಯಲ್ಪಟ್ಟ ವರ್ಗ-
1. ಬ್ಯಾಂಕಿಂಗ್/ ವಿಮೆ/ ಹಣಕಾಸಿನ ಯೋಜನೆ/ ಕ್ರೆಡಿಟ್ ಕಾರ್ಡ್ ಗಳು
2. ರಿಯಲ್ ಎಸ್ಟೇಟ್
3. ಶಿಕ್ಷಣ
4. ಆರೋಗ್ಯ
5. ಗ್ರಾಹಕರ ಬಳಕೆಯ ಸರಕುಗಳು ಮತ್ತು ಆಟೋಮೊಬೈಲ್ಸ್
6. ಸಂಪರ್ಕ ಮಾಧ್ಯಮ/ ಪ್ರಸಾರ/ ಮನರಂಜನೆ/ ಐಟಿ
7. ಪ್ರವಾಸೋದ್ಯಮ ಮತ್ತು ಬಿಡುವಿನ ಸಮಯ(ವಿರಾಮ)

ಸೌಲಭ್ಯವನ್ನು ಬಳಸಿಕೊಳ್ಳುವ ಬಗೆ ಹೀಗೆ:
1. ಕರೆ ಮಾಡುವುದರ ಮೂಲಕ
ಟೋಲ್ ಫ್ರೀ ಸಂಖ್ಯೆ "1909" ಕ್ಕೆ ನೇರವಾಗಿ ಡಯಲ್ ಮಾಡುವುದು

2. ಎಸ್ ಎಂ ಎಸ್ ಮೂಲಕ
* ನಿಮ್ಮ ಆಯ್ಕೆ ಕಾರ್ಯಗತಗೊಳಿಸಲು "START" ಎಂದು ಟೈಪ್ ಮಾಡಿ "1909" ಕ್ಕೆ ಎಸ್ ಎಂ ಎಸ್ ಕಳುಹಿಸಿ.
ಉದಾ: ಆಯ್ಕೆ 'ರಿಯಲ್ ಎಸ್ಟೇಟ್' ನಿಂದ ಎಸ್ ಎಂ ಎಸ್ ಗಳನ್ನು ಸ್ವೀಕರಿಸಲು "START 2" ಎಂದು ಟೈಪ್ ಮಾಡಿ "1909" ಕ್ಕೆ ಎಸ್ ಎಂ ಎಸ್ ಕಳುಹಿಸಬೇಕು
* ಆಯ್ಕೆಯ ಬದಲಾವಣೆಗಾಗಿ, ಈಗಿರುವ ಆಯ್ಕೆಯನ್ನು ತಡೆಹಿಡಿಯಲು "STOP" ಎಂದು ಟೈಪ್ ಮಾಡಿ "1909" ಕ್ಕೆ ಎಸ್ ಎಂ ಎಸ್ ಕಳುಹಿಸಬೇಕು
* ಆಯ್ಕೆಯ ರದ್ದತಿಗಾಗಿ "STOP" ಎಂದು ಟೈಪ್ ಮಾಡಿ "1909" ಕ್ಕೆ ಎಸ್ ಎಂ ಎಸ್ ಕಳುಹಿಸಬೇಕು
* ಮೊಬೈಲ್ ಬಳಕೆದಾರರು ವಿವಿಧ ಆಯ್ಕೆಗಳಿಂದ ಎಸ್ ಎಂ ಎಸ್ ಪಡೆಯಲು ಹೀಗೆ ಮಾಡಬೇಕು- "START" ಎಂದು ಟೈಪ್ ಮಾಡಿ, ಭಾಗಶಃ ವರ್ಗದಲ್ಲಿರುವ ಅಂಕೆಯನ್ನು ಮುಂದೆ ಸೇರಿಸಬೇಕು. ಉದಾ: ಶಿಕ್ಷಣ ಮತ್ತು ಆರೋಗ್ಯ ಕ್ಷೇತ್ರಗಳಿಂದ ಎಸ್ ಎಂ ಎಸ್ ಪಡೆಯಲು "START 3,4" ಸೇರಿಸಿ 1909 ಕ್ಕೆ ಕಳುಹಿಸಬೇಕು
* ಯಾವುದೇ ಆಯ್ಕೆಗಳ ಜೊತೆಗೆ ಮೊದಲು "0" (ಝೀರೊ)ವನ್ನು ಕಳುಹಿಸಿದರೆ ಅದನ್ನು ಪೂರ್ಣವಾಗಿ ತಡೆಹಿಡಿಯಲಾಗುವುದು. ಉದಾ: "START 0, 2,3" ಎಂದು 1909 ಗೆ ಎಸ್ ಎಂ ಎಸ್ ಕಳುಹಿಸಿದರೆ ಆ ಕ್ಷೇತ್ರದವುಗಳನ್ನು ತಡೆಹಿಡಿಯಲಾಗುವುದು
* ಎನ್ ಡಿ ಎನ್ ಸಿ ಯಲ್ಲಿ ಈಗಾಗಲೇ ರಜಿಸ್ಟರ್ ಮಾಡಿಕೊಂಡಿರುವವರು ಮತ್ತೆ ಮಾಡುವ ಅಗತ್ಯವಿಲ್ಲ.

ಹೀಗೆ, ಈ ಸೌಲಭ್ಯವನ್ನು ಉಪಯೋಗಿಸಿಕೊಂಡು ಮೊಬೈಲ್ ಬಳಕೆದಾರರು ತಮ್ಮ ನೆಮ್ಮದಿ ಕಾಯ್ದುಕೊಳ್ಳಬಹುದು. ರಜಿಸ್ಟರ್ ಮಾಡಿದ ನಂತರ ಏಳು ದಿನಗಳಲ್ಲಿ ಈ ಸೌಲಭ್ಯ ಜಾರಿಯಾಗಲಿದೆ.