ಏ.15 ರಂದು ಭಾರತಕ್ಕೆ ಬರುತ್ತಿವೆ ಏಸರ್ 'ಸೂಪರ್‌ಕಂಪ್ಯೂಟರ್' ಸ್ಮಾರ್ಟ್‌ಫೋನ್ಸ್!

ತೈವಾನಿನ ಪ್ರಖ್ಯಾತ ಕಂಪ್ಯೂಟರ್ ಬ್ರ್ಯಾಂಡ್ 'ಏಸರ್' ಶೀಘ್ರದಲ್ಲೇ ಭಾರತೀಯ ಸ್ಮಾರ್ಟ್‌ಫೋನ್ ಮಾರುಕಟ್ಟೆಗೆ ಮರಳಲು ಸಜ್ಜಾಗಿದೆ. ಇದೇ ಏಪ್ರಿಲ್ 15 ರಂದು (ಮಂಗಳವಾರ) ನಡೆಯಲಿರುವ ಕಾರ್ಯಕ್ರಮದಲ್ಲಿ, ಏಸರ್ ಕಂಪೆನಿಯು ತನ್ನ ಎರಡು ಹೊಸ ಸ್ಮಾರ್ಟ್‌ಫೋನ್ ಮಾದರಿಗಳನ್ನು ಬಿಡುಗಡೆ ಮಾಡಲು ಸಿದ್ಧತೆ ನಡೆಸಿದ್ದು, ಈ ಕುರಿತಾದ ಅಧಿಕೃತ ಮಾಹಿತಿಯನ್ನು ಅಮೆಜಾನ್ ಇಂಡಿಯಾದಲ್ಲಿನ ಮೀಸಲಾದ ಲ್ಯಾಂಡಿಂಗ್ ಪುಟವು ಬಹಿರಂಗಪಡಿಸಿದೆ. ಈ ಪುಟದಲ್ಲಿ ನಿಮ್ಮ ಕೈಯಲ್ಲಿ ಸೂಪರ್‌ಕಂಪ್ಯೂಟರ್ ಕೋರ್ ಎಂದು ಹೇಳುವ ಮೂಲಕ ತಾನು ಬಹುದೊಡ್ಡ ಯೋಜನೆಯಲ್ಲಿರುವುದನ್ನು ಏಸರ್ ಕಂಪೆನಿ ಬಹಿರಂಗಪಡಿಸಿದೆ.

ಈಗಾಗಲೇ ಅಮೆಜಾನ್‌ನಲ್ಲಿ ಸೃಷ್ಟಿಸಲಾಗಿರುವ ಪುಟವು ಹೊಸ ಫೋನ್‌ಗಳ ಕುರಿತು ಕೆಲವು ಕುತೂಹಲಕಾರಿ ಹೇಳಿಕೆಗಳನ್ನು ನೀಡಿದೆ. "ನಿಮ್ಮ ಕೈಯಲ್ಲಿ ಸೂಪರ್‌ಕಂಪ್ಯೂಟರ್ ಕೋರ್" ಮತ್ತು "AI-ಚಾಲಿತ ಸ್ಟಾರ್‌ಲೈಟ್ ನಿಖರತೆ" ಎಂಬ ಟ್ಯಾಗ್‌ಲೈನ್‌ಗಳು ಫೋನ್‌ಗಳ ಸಾಮರ್ಥ್ಯಗಳ ಬಗ್ಗೆ ನಿರೀಕ್ಷೆಗಳನ್ನು ಹೆಚ್ಚಿಸಿವೆ. ವಿಶೇಷವೆಂದರೆ, ಈ ಎರಡು ಫೋನ್‌ಗಳ ವಿನ್ಯಾಸ ಮತ್ತು ವೈಶಿಷ್ಟ್ಯಗಳ ಕುರಿತು ಈಗಾಗಲೇ ಸಾಕಷ್ಟು ಮಾಹಿತಿ ಲಭ್ಯವಿದ್ದು, ಈ ಹೇಳಿಕೆಗಳು ಇನ್ನಷ್ಟು ಕುತೂಹಲ ಕೆರಳಿಸುತ್ತವೆ. ಬಹುಶಃ ಬಿಡುಗಡೆಯಾಗಲಿರುವ ಎರಡು ಮಾದರಿಗಳಲ್ಲದೆ, ಬೇರೆ ಯಾವುದೇ ಹೊಸ ಫೋನ್‌ಗಳು ಸದ್ಯಕ್ಕೆ ಬಿಡುಗಡೆಯಾಗುವ ಸಾಧ್ಯತೆ ಇಲ್ಲ.

ಏಸರ್ ಕಂಪೆನಿಯು ಅಧಿಕೃತವಾಗಿ ಈ ಸಾಧನಗಳ ಹೆಸರುಗಳನ್ನು ಬಹಿರಂಗಪಡಿಸದಿದ್ದರೂ, ಹಿಂದಿನ ವದಂತಿಗಳ ಪ್ರಕಾರ ಇವು ಏಸರ್‌ರೋನ್ ಲಿಕ್ವಿಡ್ S162E4 ಮತ್ತು ಏಸರ್‌ರೋನ್ ಲಿಕ್ವಿಡ್ S272E4 ಸ್ಮಾರ್ಟ್‌ಫೋನ್‌ಗಳಾಗಿರಬಹುದು ಎಂದು ಅಂದಾಜಿಸಲಾಗಿದೆ. ಈ ಫೋನ್‌ಗಳು ಕೃತಕ ಬುದ್ಧಿಮತ್ತೆ (AI) ಆಧಾರಿತ ವೈಶಿಷ್ಟ್ಯಗಳು ಮತ್ತು ಉತ್ತಮ ಕಾರ್ಯಕ್ಷಮತೆಯನ್ನು ಹೊಂದಿರಲಿವೆ ಎಂದು ನಿರೀಕ್ಷಿಸಲಾಗಿದೆ. ಇವು ಮುಖ್ಯವಾಗಿ ಬಜೆಟ್ ಮತ್ತು ಮಧ್ಯಮ ಶ್ರೇಣಿಯ ಸ್ಮಾರ್ಟ್‌ಫೋನ್ ಬಳಕೆದಾರರನ್ನು ಗುರಿಯಾಗಿಸಿಕೊಂಡಿವೆ.

ಅಮೆಜಾನ್ ಇಂಡಿಯಾದಲ್ಲಿರುವ ವಿಶೇಷ ಪುಟವು ಮುಂಬರುವ ಏಸರ್ ಸ್ಮಾರ್ಟ್‌ಫೋನ್‌ಗಳ ವಿನ್ಯಾಸದ ಬಗ್ಗೆಯೂ ಸುಳಿವು ನೀಡಿದೆ. ಫೋನ್‌ಗಳು ದೊಡ್ಡ ಕ್ಯಾಮೆರಾ ಮಾಡ್ಯೂಲ್ ಅನ್ನು ಹೊಂದಿರಲಿದ್ದು, "ಮುಂದಿನ ಹಾರಿಜಾನ್" ಎಂಬ ಟ್ಯಾಗ್‌ಲೈನ್ ಇದನ್ನು ಮತ್ತಷ್ಟು ಪುಷ್ಟೀಕರಿಸುತ್ತದೆ. ಇದರ ಜೊತೆಗೆ, ಈ ಸಾಧನಗಳು ಬಳಕೆದಾರರ ಅನುಭವವನ್ನು ಉತ್ತಮಗೊಳಿಸಲು ಹಲವಾರು AI-ಚಾಲಿತ ವೈಶಿಷ್ಟ್ಯಗಳನ್ನು ಒಳಗೊಂಡಿರುತ್ತವೆ ಎಂದು ಕಂಪನಿ ತಿಳಿಸಿದೆ.

ಫೋನ್‌ಗಳ ತಾಂತ್ರಿಕ ವಿವರಗಳ ಕುರಿತು ಹೇಳುವುದಾದರೆ, ಇವು ಆಂಡ್ರಾಯ್ಡ್ 14 ಆಪರೇಟಿಂಗ್ ಸಿಸ್ಟಮ್‌ನಲ್ಲಿ ಕಾರ್ಯನಿರ್ವಹಿಸುವ ನಿರೀಕ್ಷೆಯಿದೆ. ಹಾಗೆಯೇ, 4GB RAM ಮತ್ತು 64GB ಆಂತರಿಕ ಸಂಗ್ರಹಣೆಯನ್ನು ಹೊಂದಿರಬಹುದು. ಬ್ಯಾಟರಿ ಸಾಮರ್ಥ್ಯದ ಬಗ್ಗೆ ಮಾಹಿತಿ ಲಭ್ಯವಿಲ್ಲದಿದ್ದರೂ, 5,000mAh ಬ್ಯಾಟರಿಯನ್ನು ಅಳವಡಿಸುವ ಸಾಧ್ಯತೆ ಇದೆ. ಕ್ಯಾಮೆರಾ ವಿಭಾಗದಲ್ಲಿ, Acerone Liquid S162E4 16MP ಮುಖ್ಯ ಕ್ಯಾಮೆರಾ ಮತ್ತು 0.08MP ಸೆಕೆಂಡರಿ ಸೆನ್ಸರ್ ಅನ್ನು ಹೊಂದಿರಬಹುದು. ಮತ್ತೊಂದೆಡೆ, Liquid S272E4 20MP ಮುಖ್ಯ ಕ್ಯಾಮೆರಾ ಮತ್ತು 0.3MP ಸೆಕೆಂಡರಿ ಸೆನ್ಸರ್‌ನೊಂದಿಗೆ ಬರಬಹುದು. ಎರಡೂ ಫೋನ್‌ಗಳು 5MP ಸೆಲ್ಫಿ ಕ್ಯಾಮೆರಾಗಳನ್ನು ಹೊಂದಿರುವ ನಿರೀಕ್ಷೆಯಿದೆ.

ಏಸರ್ ಕಂಪನಿಯು ಭಾರತೀಯ ಮಾರುಕಟ್ಟೆಗೆ ಮರಳಲು ಬಹಳ ಸಮಯದಿಂದ ಕಾಯುತ್ತಿದೆ. ಈ ಹಿಂದೆ ಮಾರ್ಚ್ 25 ರಂದು ಫೋನ್‌ಗಳನ್ನು ಬಿಡುಗಡೆ ಮಾಡಲು ನಿರ್ಧರಿಸಲಾಗಿತ್ತಾದರೂ, ಅದು ಕಾರಣಾಂತರಗಳಿಂದ ಮುಂದೂಡಲ್ಪಟ್ಟಿತು. ಇದೀಗ, ಏಸರ್ ತನ್ನ ಅಧಿಕೃತ ವೆಬ್‌ಸೈಟ್ ಮತ್ತು ಅಮೆಜಾನ್‌ನಲ್ಲಿ ಲ್ಯಾಂಡಿಂಗ್ ಪುಟವನ್ನು ತೆರೆದಿರುವ ಮೂಲಕ ಶೀಘ್ರದಲ್ಲೇ ಸ್ಮಾರ್ಟ್‌ಫೋನ್‌ಗಳನ್ನು ಬಿಡುಗಡೆ ಮಾಡುವುದನ್ನು ಖಚಿತಪಡಿಸಿದೆ.ಏಪ್ರಿಲ್ 15 ರಂದು ಬಿಡುಗಡೆಯಾಗಲಿರುವ ಈ ಎರಡು ಹೊಸ ಮಾದರಿಗಳು ಗ್ರಾಹಕರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗುತ್ತವೆಯೇ ಎಂದು ಕಾದು ನೋಡಬೇಕಿದೆ.