2026ರಲ್ಲಿ ಐಫೋನ್ ಫೋಲ್ಡ್ ಜೊತೆಗೆ ‘ಐಫೋನ್ ಫ್ಲಿಪ್’ ಬಿಡುಗಡೆಗೆ ಆಪಲ್ ಪ್ಲಾನ್!

ಆಪಲ್ ತನ್ನ ಮೊದಲ ಫೋಲ್ಡೇಬಲ್ ಐಫೋನ್ ಅನ್ನು 2026ರಲ್ಲಿ ಪರಿಚಯಿಸುವ ಸಾಧ್ಯತೆ ಇದೆ ಎಂಬ ಸುದ್ದಿ ಈಗಾಗಲೇ ಜಾಗತಿಕ ತಂತ್ರಜ್ಞಾನ ವಲಯದಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದೆ. ಈ ಬಹುನಿರೀಕ್ಷಿತ ಫೋನ್ ಅನ್ನು "ಐಫೋನ್ ಫೋಲ್ಡ್" ಎಂದು ಕರೆಯಲಾಗುತ್ತಿದೆ. ಆದರೆ, ಇತ್ತೀಚಿನ ಹೊಸ ವರದಿಗಳ ಪ್ರಕಾರ, ಆಪಲ್ ಇದೊಂದೇ ಫೋಲ್ಡೇಬಲ್ ಮಾದರಿಯಲ್ಲಿ ನಿಲ್ಲುವ ಸಾಧ್ಯತೆ ಕಡಿಮೆ ಇದೆ. ಕಂಪನಿ ಮತ್ತೊಂದು ವಿಭಿನ್ನ ಫೋಲ್ಡೇಬಲ್ ವಿನ್ಯಾಸದ ಐಫೋನ್ ಮೇಲೂ ಕೆಲಸ ಮಾಡುತ್ತಿದೆ ಎನ್ನಲಾಗಿದೆ.!

ಹೌದು, ಪ್ರಸಿದ್ಧ ತಂತ್ರಜ್ಞಾನ ವಿಶ್ಲೇಷಕ ಮತ್ತು ಬ್ಲೂಂಬರ್ಗ್ ಪತ್ರಕರ್ತ ಮಾರ್ಕ್ ಗರ್ಮನ್ ಅವರ ಇತ್ತೀಚಿನ Power On ನ್ಯೂಸ್‌ಲೆಟರ್ ಪ್ರಕಾರ, ಆಪಲ್ ಚಿಕ್ಕ ಗಾತ್ರದ ಕ್ಲಾಮ್‌ಶೆಲ್ ಫೋಲ್ಡೇಬಲ್ ಐಫೋನ್ ಅನ್ನು ಪರೀಕ್ಷಿಸುತ್ತಿದೆ. ಈ ಮಾದರಿಯನ್ನು ತಾತ್ಕಾಲಿಕವಾಗಿ "ಐಫೋನ್ ಫ್ಲಿಪ್" ಎಂದು ಕರೆಯಲಾಗುತ್ತಿದೆ. ಇದು ಐಫೋನ್ ಫೋಲ್ಡ್ ಬಿಡುಗಡೆಗೊಂಡ ಬಳಿಕ, ಅಂದರೆ 2026ರ ಎರಡನೇಾರ್ಧದಲ್ಲಿ ಮಾರುಕಟ್ಟೆಗೆ ಬರಬಹುದು ಎಂಬ ನಿರೀಕ್ಷೆ ಇದೆ.

ಐಫೋನ್ ಫ್ಲಿಪ್ ಚೌಕಾಕಾರದ ವಿನ್ಯಾಸ ಹೊಂದಿರುವ, ಮೇಲಿಂದ ಕೆಳಕ್ಕೆ ಮಡಚಿಕೊಳ್ಳುವ ಫೋನ್ ಆಗಿರಬಹುದು. ಈ ವಿನ್ಯಾಸವು ಸ್ಯಾಮ್ಸಂಗ್ ಗ್ಯಾಲಕ್ಸಿ Z ಫ್ಲಿಪ್ 7 ಹಾಗೂ ಮೋಟೊರೋಲಾ ರೇಜರ್ ಸರಣಿಯಂತೆಯೇ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ. ಕಾಂಪ್ಯಾಕ್ಟ್ ಫೋನ್‌ಗಳನ್ನು ಇಷ್ಟಪಡುವ ಯುವ ಬಳಕೆದಾರರಿಗೆ ಇದು ವಿಶೇಷ ಆಕರ್ಷಣೆಯಾಗಬಹುದು ಎಂದು ತಂತ್ರಜ್ಞಾನ ತಜ್ಞರು ಅಭಿಪ್ರಾಯಪಡುತ್ತಾರೆ.

ಆದರೆ, ಆಪಲ್ ಇನ್ನೂ ಕ್ಲಾಮ್‌ಶೆಲ್ ಶೈಲಿಯ ಐಫೋನ್ ಕುರಿತು ಯಾವುದೇ ಅಧಿಕೃತ ಘೋಷಣೆ ಮಾಡಿಲ್ಲ. ಐಫೋನ್ ಫ್ಲಿಪ್ ಅಭಿವೃದ್ಧಿ ಹಂತದಲ್ಲಿದ್ದರೂ, ಅದು ಅಂತಿಮವಾಗಿ ಬಿಡುಗಡೆಗೊಳ್ಳುತ್ತದೆಯೇ ಎಂಬುದು ಖಚಿತವಲ್ಲ ಎಂದು ಗರ್ಮನ್ ತಿಳಿಸಿದ್ದಾರೆ. ಐಫೋನ್ ಫೋಲ್ಡ್ ಮಾರುಕಟ್ಟೆಯಲ್ಲಿ ಯಾವ ಮಟ್ಟಿಗೆ ಯಶಸ್ಸು ಸಾಧಿಸುತ್ತದೆ ಎಂಬುದರ ಮೇಲೆ ಮುಂದಿನ ನಿರ್ಧಾರಗಳು ಅವಲಂಬಿತವಾಗಿರಬಹುದು.

ಇನ್ನೊಂದು ಪ್ರಮುಖ ವಿಚಾರವೆಂದರೆ, ಆಪಲ್ ಫೋಲ್ಡೇಬಲ್ ಐಫೋನ್ ವಿಭಾಗದಲ್ಲಿ ಹೆಚ್ಚಿನ ಅವಕಾಶಗಳನ್ನು ನೋಡುತ್ತಿದೆ. ಮೊದಲ ಫೋಲ್ಡೇಬಲ್ ಐಫೋನ್ ಉತ್ತಮ ಪ್ರತಿಕ್ರಿಯೆ ಪಡೆದರೆ, ಗ್ರಾಹಕರು ವಿಭಿನ್ನ ಫೋಲ್ಡೇಬಲ್ ವಿನ್ಯಾಸಗಳ ಐಫೋನ್‌ಗಳನ್ನು ಬೇಡಿಕೆ ಮಾಡಬಹುದು. ಈಗಾಗಲೇ ವಿಭಿನ್ನ ಗಾತ್ರದ ಐಫೋನ್‌ಗಳಿಗೆ ಬೇಡಿಕೆ ಇರುವಂತೆ, ಭವಿಷ್ಯದಲ್ಲಿ ಫೋಲ್ಡೇಬಲ್ ಮಾದರಿಗಳಿಗೂ ಅದೇ ರೀತಿಯ ಸ್ವೀಕಾರ ಸಿಗುವ ನಿರೀಕ್ಷೆ ಇದೆ.

ಇದರ ಜೊತೆಗೆ, ಐಫೋನ್ ಫೋಲ್ಡ್‌ಗಿಂತ ದೊಡ್ಡ ಗಾತ್ರದ ಬುಕ್-ಸ್ಟೈಲ್ ಫೋಲ್ಡೇಬಲ್ ಐಫೋನ್ ಒಂದನ್ನು ಆಪಲ್ ಮುಂದಿನ ದಿನಗಳಲ್ಲಿ ಪರಿಚಯಿಸಬಹುದು ಎನ್ನುವ ಮಾತೂ ಕೇಳಿಬರುತ್ತಿದೆ. ಲೀಕ್‌ಗಳ ಪ್ರಕಾರ, ಮೊದಲ ಐಫೋನ್ ಫೋಲ್ಡ್ ಸುಮಾರು 5.5 ಇಂಚಿನ ಹೊರಗಿನ ಡಿಸ್ಪ್ಲೇ ಹೊಂದಿರಬಹುದು ಮತ್ತು ಇದು ಸ್ಯಾಮ್ಸಂಗ್ ಗ್ಯಾಲಕ್ಸಿ Z ಫೋಲ್ಡ್ 7ಕ್ಕಿಂತ ಸ್ವಲ್ಪ ಚಿಕ್ಕದಾಗಿರಬಹುದು.

ತಂತ್ರಜ್ಞಾನ ವೈಶಿಷ್ಟ್ಯಗಳ ವಿಚಾರಕ್ಕೆ ಬಂದರೆ, ಐಫೋನ್ ಫೋಲ್ಡ್‌ನಲ್ಲಿ ಹಿಂಜ್ ಭಾಗದ ಬಳಿ ಕಡಿಮೆ ಕ್ರೀಸ್ ಕಾಣಿಸಿಕೊಳ್ಳುವಂತೆ ವಿನ್ಯಾಸಗೊಳಿಸಲಾಗುತ್ತಿದೆ ಎಂಬ ಮಾಹಿತಿ ಲಭ್ಯವಾಗಿದೆ. ಇದು ಫೋಲ್ಡೇಬಲ್ ಫೋನ್‌ಗಳಲ್ಲಿ ದೊಡ್ಡ ಸವಾಲಾಗಿರುವ ಸಮಸ್ಯೆಗೆ ಪರಿಹಾರವಾಗಬಹುದು. CAD ರೆಂಡರ್‌ಗಳು ಸಮತಟ್ಟಾದ ಡಿಸ್ಪ್ಲೇ ಮತ್ತು ಪ್ರೀಮಿಯಂ ವಿನ್ಯಾಸವನ್ನು ಸೂಚಿಸುತ್ತವೆ.ಕಾರ್ಯಕ್ಷಮತೆಯ ದೃಷ್ಟಿಯಿಂದ, ಐಫೋನ್ ಫೋಲ್ಡ್‌ನಲ್ಲಿ 2nm ತಂತ್ರಜ್ಞಾನದಲ್ಲಿ ತಯಾರಿಸಲಾದ A20 ಪ್ರೊ ಚಿಪ್‌ಸೆಟ್ ಇರಬಹುದು.

ಈ ಫೋನ್‌ಗಳಲ್ಲಿ ನೆಟ್‌ವರ್ಕ್ ಸಂಪರ್ಕಕ್ಕಾಗಿ ಆಪಲ್‌ನ ಸ್ವಂತ C2 ಮೋಡೆಮ್ ಬಳಸುವ ಸಾಧ್ಯತೆ ಇದೆ. ಭದ್ರತೆಗಾಗಿ ಪವರ್ ಬಟನ್‌ನಲ್ಲಿ ಟಚ್ ಐಡಿ ನೀಡಬಹುದು ಎಂಬ ವರದಿಗಳೂ ಹರಿದಾಡುತ್ತಿವೆ. ಒಟ್ಟಾರೆಯಾಗಿ, 2026 ಆಪಲ್‌ಗೆ ಫೋಲ್ಡೇಬಲ್ ಐಫೋನ್‌ಗಳ ದೃಷ್ಟಿಯಿಂದ ಮಹತ್ವದ ವರ್ಷವಾಗುವ ಸಾಧ್ಯತೆ ಇದೆ. ಐಫೋನ್ ಫೋಲ್ಡ್ ಹಾಗೂ ಐಫೋನ್ ಫ್ಲಿಪ್ ಎರಡೂ ಮಾರುಕಟ್ಟೆಗೆ ಬಂದರೆ, ಸ್ಮಾರ್ಟ್‌ಫೋನ್ ವಿನ್ಯಾಸ ಮತ್ತು ಬಳಕೆದಾರ ಅನುಭವದಲ್ಲಿ ಹೊಸ ಅಧ್ಯಾಯ ಆರಂಭವಾಗುವುದು ಖಚಿತ.