ಹೊಸ 'CMF Phone 2' ಫೋನ್ ಬಿಡುಗಡೆಗೆ Nothing ಸಬ್‌ಬ್ರ್ಯಾಂಡ್ ಸಜ್ಜು!

ಯುಕೆ ಮೂಲದ ಜನಪ್ರಿಯ ಮೊಬೈಲ್ ಬ್ರ್ಯಾಂಡ್ Nothing ನ ಸಬ್‌ಬ್ರ್ಯಾಂಡ್ CMF, ಭಾರತೀಯ ಮಾರುಕಟ್ಟೆಗೆ ಶೀಘ್ರವೇ ತನ್ನ ಹೊಸ ಸ್ಮಾರ್ಟ್‌ಫೋನ್ ಅನ್ನು ಪರಿಚಯಿಸಲು ಸಜ್ಜಾಗಿದೆ. CMF ತನ್ನ ಸಾಮಾಜಿಕ ಮಾಧ್ಯಮದಲ್ಲಿ ಈ ಕುರಿತು ಟೀಸರ್ ಒಂದನ್ನು ಬಿಡುಗಡೆ ಮಾಡಿದ್ದು, ತನ್ನ ಮುಂಬರುವ ಸ್ಮಾರ್ಟ್‌ಫೋನಿನ ಹಿಂಬದಿಯ ಕ್ಯಾಮೆರಾ ಮಾಡ್ಯೂಲ್‌ನ ವಿನ್ಯಾಸವನ್ನು ತೋರಿಸಿದೆ. ಮತ್ತು ಈ ಹೊಸ ಸ್ಮಾರ್ಟ್‌ಫೋನ್ ಫ್ಲಿಪ್‌ಕಾರ್ಟ್ ಮೂಲಕ ಶೀಘ್ರದಲ್ಲೇ ಮಾರಾಟಕ್ಕೆ ಲಭ್ಯವಾಗಲಿದೆ ಎಂದು ತಿಳಿಸಿದೆ.

CMF ತನ್ನ ಅಧಿಕೃತ X (ಹಿಂದೆ ಟ್ವಿಟರ್) ಖಾತೆಯಲ್ಲಿ 'ಶೀಘ್ರದಲ್ಲೇ ಬರಲಿದೆ' ಎಂಬ ಟ್ಯಾಗ್‌ಲೈನ್‌ನೊಂದಿಗೆ ಟೀಸರ್ ಚಿತ್ರವನ್ನು ಪೋಸ್ಟ್ ಮಾಡಿದೆ. ಈ ಚಿತ್ರದಲ್ಲಿ CMF ನ ವಿಶಿಷ್ಟ ಕಿತ್ತಳೆ ಬಣ್ಣದ ಹಿಂಭಾಗದ ಫಲಕವನ್ನು ತೋರಿಸಲಾಗಿದೆ. ಗಮನಾರ್ಹವಾಗಿ, ಈ ಹೊಸ ಫೋನ್ ಒಂದೇ-ಕ್ಯಾಮೆರಾ ಸೆಟಪ್ ಅನ್ನು ಹೊಂದಿದ್ದು, ಇದು ಹಿಂದಿನ ಮಾದರಿಯಾದ CMF Phone 1 ರ ಡ್ಯುಯಲ್-ಕ್ಯಾಮೆರಾ ವ್ಯವಸ್ಥೆಯೊಂದಿಗೆ ಭಿನ್ನವಾಗಿದೆ. ಕ್ಯಾಮೆರಾ ಸೆನ್ಸರ್ ಹಿಂಭಾಗದ ಫಲಕದಲ್ಲಿ ಲಂಬವಾಗಿ ಜೋಡಿಸಲಾಗಿದೆ ಮತ್ತು ಫ್ಲ್ಯಾಷ್ ಸೆನ್ಸರ್‌ನ ಕೆಳಗೆ ಇದೆ.

ಈ ಪೋಸ್ಟ್‌ನಲ್ಲಿ ಸ್ಮಾರ್ಟ್‌ಫೋನ್‌ನ ನಿಖರವಾದ ಹೆಸರು ಅಥವಾ ಬಿಡುಗಡೆ ದಿನಾಂಕವನ್ನು ಬಹಿರಂಗಪಡಿಸಲಾಗಿಲ್ಲ. ಆದರೆ, ಈ ಹೊಸ ಫೋನ್ ಕಳೆದ ವರ್ಷ ಬಿಡುಗಡೆಯಾಗಿದ್ದ CMF Phone 1 ರ ಉತ್ತರಾಧಿಕಾರಿಯಾಗಿ CMF Phone 2 ಹೆಸರಿನಲ್ಲಿ ಬರಬಹುದು ಎಂದು ಊಹಿಸಲಾಗಿದೆ. ಈ ಹಿಂದೆಯೂ ಸಹ CMF Phone 2 ಶೀಘ್ರದಲ್ಲೇ ಬಿಡುಗಡೆಯಾಗುವ ಸಾಧ್ಯತೆ ಬಗ್ಗೆ ವದಂತಿಗಳು ಹರಿದಾಡಿವೆ. ಕೆಲವು ಮೂಲಗಳ ಪ್ರಕಾರ, ಈ CMF Phone 2 ಫೋನ್ ಏಪ್ರಿಲ್ ತಿಂಗಳ ಅಂತ್ಯದಲ್ಲಿ ಬಿಡುಗಡೆಯಾಗಲಿದೆ ಎಂದು ಹೇಳಲಾಗಿತ್ತು.

ಇತ್ತೀಚೆಗಷ್ಟೇ, CMF ತನ್ನ ಹೊಸ ಉತ್ಪನ್ನಗಳನ್ನು ಟೀಸರ್ ಮಾಡಿದ್ದು, ಈ ಫೋನ್ 'ಬಲ್ಬಸೌರ್' ಎಂಬ ಸಂಕೇತನಾಮದೊಂದಿಗೆ ಬರಬಹುದು ಎಂದುಸಹ ಊಹಿಸಲಾಗಿದೆ. ಇಷ್ಟೇ ಅಲ್ಲದೆ, ಈ ಹೊಸ CMF ಸ್ಮಾರ್ಟ್‌ಫೋನ್‌ಗಾಗಿ ಫ್ಲಿಪ್‌ಕಾರ್ಟ್‌ನಲ್ಲಿ ಒಂದು ಮೈಕ್ರೋಸೈಟ್ ಈಗ ಲೈವ್ ಆಗಿದೆ. ಈ ಸೈಟ್‌ನಲ್ಲಿ "ಪರಿಪೂರ್ಣ ಶಾಟ್‌ನ ಹುಡುಕಾಟದಲ್ಲಿ" ಎಂಬ ಟ್ಯಾಗ್‌ಲೈನ್‌ನೊಂದಿಗೆ ಫೋನ್‌ನ ಕ್ಯಾಮೆರಾ ಮಾಡ್ಯೂಲ್ ಅನ್ನು ಪ್ರದರ್ಶಿಸಲಾಗಿದೆ. ಈ ಪಟ್ಟಿಯ ಪ್ರಕಾರ, ಈ ಹೊಸ ಫೋನ್ ಫ್ಲಿಪ್‌ಕಾರ್ಟ್‌ನಲ್ಲಿ ಎಸ್‌ಕ್ಲೂಸಿವ್ ಆಗಿ ಮಾರಾಟವಾಗಲಿದೆ.

CMF Phone 1 ಸ್ಮಾರ್ಟ್‌ಫೋನ್ ಹೇಗಿತ್ತು?
Nothing ಸಬ್‌ಬ್ರ್ಯಾಂಡ್ CMF ಪರಿಚಯಿಸಿದ್ದ ಮೊದಲ ಸ್ಮಾರ್ಟ್‌ಫೋನ್ CMF Phone 1 ಕಳೆದ ವರ್ಷ ಜುಲೈನಲ್ಲಿ ಬಿಡುಗಡೆಯಾಗಿತ್ತು ಮತ್ತು ಇದರ ಆರಂಭಿಕ ಬೆಲೆ 15,999 ರೂ. ಆಗಿತ್ತು. ಈ ಮಾದರಿಯು 6GB RAM ಮತ್ತು 128GB ಸ್ಟೋರೇಜ್ ಅನ್ನು ಹೊಂದಿತ್ತು. CMF Phone 2 ಫೋನ್ ಸಹ ಇದೇ ಬೆಲೆಯಲ್ಲಿರಬಹುದು ಎನ್ನಲಾಗಿದೆ. ಹಿಂದಿನ CMF Phone 1 6.7-ಇಂಚಿನ ಪೂರ್ಣ-HD+ AMOLED LTPS ಡಿಸ್ಪ್ಲೇ ಮತ್ತು 120Hz ವರೆಗೆ ಅಡಾಪ್ಟಿವ್ ರಿಫ್ರೆಶ್ ದರವನ್ನು ಹೊಂದಿತ್ತು. ಹಾಗೂ ಮೀಡಿಯಾ ಟೆಕ್ ಡೈಮೆನ್ಸಿಟಿ 7300 5G ಪ್ರೊಸೆಸರ್ ಮತ್ತು 8GB RAM ಅನ್ನು ಒಳಗೊಂಡಿತ್ತು.

ಕ್ಯಾಮೆರಾ ವಿಭಾಗದಲ್ಲಿ, ಹಿಂದಿನ CMF Phone 1 ಸ್ಮಾರ್ಟ್‌ಫೋನ್ 50-ಮೆಗಾಪಿಕ್ಸೆಲ್ ಪ್ರಾಥಮಿಕ ಸೋನಿ ಸೆನ್ಸರ್ ಮತ್ತು ಪೋರ್ಟ್ರೇಟ್ ಸೆನ್ಸರ್‌ನೊಂದಿಗೆ ಡ್ಯುಯಲ್ ಹಿಂಬದಿಯ ಕ್ಯಾಮೆರಾ ಸೆಟಪ್ ಅನ್ನು ಹೊಂದಿತ್ತು. ಬ್ಯಾಟರಿ ವಿಭಾಗದಲ್ಲಿ, ಈ CMF Phone 1 ಸ್ಮಾರ್ಟ್‌ಫೋನ್ 33W ವೇಗದ ಚಾರ್ಜಿಂಗ್ ಮತ್ತು 5W ರಿವರ್ಸ್ ವೈರ್ಡ್ ಚಾರ್ಜಿಂಗ್ ಅನ್ನು ಬೆಂಬಲಿಸುವ 5,000mAh ಬ್ಯಾಟರಿಯನ್ನು ಹೊಂದಿತ್ತು. ಇದಲ್ಲದೆ, ಈ ಸ್ಮಾರ್ಟ್‌ಫೋನ್ ಧೂಳು ಮತ್ತು ನೀರಿನ ಪ್ರತಿರೋಧಕ್ಕಾಗಿ IP52 ರೇಟಿಂಗ್ ಅನ್ನು ಹೊಂದಿರುವುದನ್ನು ನಾವು ನೋಡಬಹುದು.