ಗೂಗಲ್‌ನ ಮುಂಬರುವ 'Pixel 9a' ಸ್ಮಾರ್ಟ್‌ಫೋನ್ ಬೆಲೆ ಇದೀಗ ಅಧಿಕೃತ!

ಗೂಗಲ್ ಶೀಘ್ರದಲ್ಲೇ ತನ್ನ ಹೊಸ ಮಿಡ್‌ರೇಂಜ್ ಸ್ಮಾರ್ಟ್‌ಫೋನ್ 'Pixel 9a' ಅನ್ನು ಜಾಗತಿಕವಾಗಿ ಬಿಡುಗಡೆ ಮಾಡುವ ನಿರೀಕ್ಷೆಯಲ್ಲಿದೆ. Pixel 9a ಫೋನ್ ಅಧಿಕೃತವಾಗಿ ಬಿಡುಗಡೆಯಾಗುವ ಮುನ್ನವೇ ಅದರ ಚಿತ್ರಗಳು ಮತ್ತು ವೀಡಿಯೊಗಳು ಆನ್‌ಲೈನ್‌ನಲ್ಲಿ ಈಗಾಗಲೇ ಲಭ್ಯವಾಗಿವೆ. ಇದೀಗ, ಈ ಫೋನ್ ಬೆಲೆಯ ಕುರಿತು ಮಾಹಿತಿಯು ಅಧಿಕೃತವಾಗಿದೆ.! ಹೌದು, ಜರ್ಮನ್ ಮತ್ತು ಯುಎಇ ವರ್ಗೀಕೃತ ವೆಬ್‌ಸೈಟ್‌ಗಳಲ್ಲಿ 'Pixel 9a' ಬೆಲೆಯನ್ನು ಪಟ್ಟಿ ಮಾಡಲಾಗಿದ್ದು, ಜರ್ಮನಿಯಲ್ಲಿ Pixel 9a ಫೋನ್ 128GB ಮಾದರಿಯ ಬೆಲೆ 549 ಯುರೋಗಳಿಂದ ಪ್ರಾರಂಭವಾಗುತ್ತದೆ. ಯುಎಇಯಲ್ಲಿ, 8GB RAM ಮತ್ತು 128GB ಸಂಗ್ರಹಣೆಯೊಂದಿಗೆ ಅಬ್ಸಿಡಿಯನ್ (ಕಪ್ಪು) ಮಾದರಿಯ ಬೆಲೆ 2,350 ದಿರ್ಹಮ್ ($640) ಎಂದು ಪಟ್ಟಿ ಮಾಡಲಾಗಿದೆ. ಹಾಗೂ, ಈ ಹಿಂದಿನ ಸೋರಿಕೆಗಳ ಪ್ರಕಾರದಂತೆಯೇ, Pixel 9a ಫೋನ್ ಐರಿಸ್, ಅಬ್ಸಿಡಿಯನ್, ಪಿಯೋನಿ ಮತ್ತು ಪಿಂಗಾಣಿ ಎಂಬ ನಾಲ್ಕು ಬಣ್ಣಗಳಲ್ಲಿ ಲಭ್ಯವಿರುತ್ತದೆ.

ಗೂಗಲ್ Pixel 9a: ಭಾರತದಲ್ಲಿ ನಿರೀಕ್ಷಿತ ಬೆಲೆ
ವರದಿಗಳ ಪ್ರಕಾರ, ಅಮೆರಿಕದಲ್ಲಿ ಗೂಗಲ್ Pixel 9a 128GB ಆವೃತ್ತಿಯ ಬೆಲೆ $499 (ಸುಮಾರು ರೂ. 43,100) ಆಗಿರಬಹುದು ಮತ್ತು 256GB ಮಾದರಿಯ ಬೆಲೆ $599 (ಸುಮಾರು ರೂ. 51,800) ಆಗಬಹುದು. ಭಾರತದಲ್ಲಿ ಕಳೆದ Pixel 9a ಮೂಲ ಮಾದರಿಯ ಬೆಲೆ ರೂ. 52,999 ಮತ್ತು 256GB ಆವೃತ್ತಿಯ ಬೆಲೆ ರೂ. 59,999 ಆಗಿತ್ತು. ಗೂಗಲ್ ಇದೇ ಬೆಲೆ ನೀತಿಯನ್ನು ಅನುಸರಿಸಿದರೆ, ಭಾರತದಲ್ಲಿ Pixel 9a ರೂ. 52,999 ರಿಂದ ಪ್ರಾರಂಭವಾಗಬಹುದು ಮತ್ತು 256GB ಮಾದರಿಯ ಬೆಲೆ ಸುಮಾರು ರೂ. 64,000 ಆಗಿರಬಹುದು. ಇದರಿಂದ ಎರಡು ಶೇಖರಣಾ ಆಯ್ಕೆಗಳ ನಡುವಿನ ಬೆಲೆಯ ಅಂತರ ರೂ. 10,000 ಕ್ಕಿಂತ ಹೆಚ್ಚಿರಲಿದೆ ಎನ್ನಬಹುದು.

ಗೂಗಲ್ Pixel 9a ಸ್ಮಾರ್ಟ್‌ಫೋನ್ ವಿನ್ಯಾಸವನ್ನು ಹಂಚಿಕೊಂಡಿದ್ದ ಟಿಪ್‌ಸ್ಟರ್ ಇವಾನ್ ಬ್ಲಾಸ್ (@evleaks) ಅವರು ಸ್ಮಾರ್ಟ್‌ಫೋನಿನ ನಾಲ್ಕು ಚಿತ್ರಗಳನ್ನು ಪ್ರಕಟಿಸಿದ್ದಾರೆ. ಈ ಚಿತ್ರಗಳು, ಹಿಂದಿನ ಪಿಕ್ಸೆಲ್ 9 ಶ್ರೇಣಿಯ ಇತರ ಮಾದರಿಗಳಿಗಿಂತ ವಿಭಿನ್ನವಾಗಿ, ಎತ್ತರದ ಕ್ಯಾಮೆರಾ ಮಾಡ್ಯೂಲ್ ಇಲ್ಲದೆ ಡ್ಯುಯಲ್ ರಿಯರ್ ಕ್ಯಾಮೆರಾ ಸೆಟಪ್ ಅನ್ನು ಹೊಂದಿರುವುದನ್ನು ತೋರಿಸುತ್ತವೆ. (ಕೆಲವು ಲೀಕ್ ವೀಡಿಯೋಗಳಲ್ಲಿ ಸಹ ಈ ವಿನ್ಯಾಸವನ್ನು ದೃಢೀಕರಿಸಲಾಗಿದೆ) ಈ Pixel 9a ಸ್ಮಾರ್ಟ್‌ಫೋನ್ ಐರಿಸ್, ಅಬ್ಸಿಡಿಯನ್, ಪಿಯೋನಿ ಮತ್ತು ಪಿಂಗಾಣಿ ಬಣ್ಣಗಳಲ್ಲಿ ಲಭ್ಯವಾಗಲಿದೆ ಮತ್ತು ಈ ನಾಲ್ಕು ಬಣ್ಣಗಳ ಆಯ್ಕೆಗಳು ಸೋರಿಕೆಯಾದ ರೆಂಡರ್‌ಗಳಲ್ಲಿ ಕಾಣಿಸುತ್ತವೆ. ಹ್ಯಾಂಡ್‌ಸೆಟ್ ಹಿಂಭಾಗದಲ್ಲಿ ಹಲವಾರು ನೀರಿನ ಹನಿಗಳೊಂದಿಗೆ ಕಾಣಿಸುತ್ತಿದ್ದು, ಇದು ಅದರ ಐಪಿ ರೇಟಿಂಗ್‌ನ್ನು ಸೂಚಿಸುತ್ತದೆ ಮತ್ತು ಇದು ಉಪಗ್ರಹ ಸಂಪರ್ಕವನ್ನು ಬೆಂಬಲಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಹಿಂದಿನ ವರದಿಗಳ ಪ್ರಕಾರ, Pixel 9a ಗೂಗಲ್‌ನ ಟೆನ್ಸರ್ ಜಿ 4 ಚಿಪ್‌ನಿಂದ ಚಾಲಿತವಾಗಿದ್ದು, 8GB RAM ಮತ್ತು 256GB ವರೆಗೆ ಅಂತರ್ನಿರ್ಮಿತ ಸಂಗ್ರಹಣೆಯೊಂದಿಗೆ ಜೋಡಿಸಲ್ಪಟ್ಟಿದೆ. ಈ ಹ್ಯಾಂಡ್‌ಸೆಟ್ 48-ಮೆಗಾಪಿಕ್ಸೆಲ್ ಪ್ರಾಥಮಿಕ ಹಿಂಭಾಗದ ಕ್ಯಾಮೆರಾವನ್ನು ಹೊಂದಿರುತ್ತದೆ ಎಂದು ನಿರೀಕ್ಷಿಸಲಾಗಿದೆ. ಇದು ಆಂಡ್ರಾಯ್ಡ್ 15 ನಲ್ಲಿ ಕಾರ್ಯನಿರ್ವಹಿಸುತ್ತದೆ ಮತ್ತು 5,100mAh ಬ್ಯಾಟರಿಯೊಂದಿಗೆ 23W (ವೈರ್ಡ್) ಮತ್ತು 7.5W (ವೈರ್‌ಲೆಸ್) ಚಾರ್ಜಿಂಗ್ ಬೆಂಬಲವನ್ನು ಹೊಂದಿರಬಹುದು. ಈ ಸ್ಮಾರ್ಟ್‌ಫೋನ್ ಗೂಗಲ್‌ನ ಪರಿಸರ ವ್ಯವಸ್ಥೆಯೊಂದಿಗೆ ಉತ್ತಮವಾಗಿ ಕಾರ್ಯನಿರ್ವಹಿಸುವ ನಿರೀಕ್ಷೆಯಿದೆ. ಆದರೆ, ಈ ಸ್ಮಾರ್ಟ್‌ಫೋನ್‌ನ ಬಿಡುಗಡೆ ದಿನಾಂಕ ಮತ್ತು ಬೆಲೆಯ ಕುರಿತು ಹೆಚ್ಚಿನ ಮಾಹಿತಿಗಾಗಿ ನಾವು ನಿರೀಕ್ಷಿಸಬೇಕಾಗಿದೆ.

ಮುಂಬರುವ ಗೂಗಲ್ Pixel 9a ಸ್ಮಾರ್ಟ್‌ಫೋನ್‌ಗಳ ವೈಶಿಷ್ಟ್ಯಗಳು:
ಹಿಂಭಾಗದಲ್ಲಿ ಎರಡು ಕ್ಯಾಮೆರಾಗಳನ್ನು ಹೊಂದಿದ್ದು, ಎತ್ತರದ ಕ್ಯಾಮೆರಾ ಮಾಡ್ಯೂಲ್ ಇಲ್ಲದ ವಿನ್ಯಾಸ.
IP68 ರೇಟಿಂಗ್, ಧೂಳು ಮತ್ತು ನೀರಿನ ಪ್ರತಿರೋಧ.
ಗೂಗಲ್ ಜೆಮಿನಿ AI ತಂತ್ರಜ್ಞಾನ ಬೆಂಬಲ.
ಸುಧಾರಿತ ಕ್ಯಾಮೆರಾ ವೈಶಿಷ್ಟ್ಯಗಳು.
ಉಪಗ್ರಹ ಸಂಪರ್ಕ ಬೆಂಬಲ.
ಗೂಗಲ್ ಅಪ್ಲಿಕೇಶನ್‌ಗಳೊಂದಿಗೆ ಉತ್ತಮ ಹೊಂದಾಣಿಕೆ.
ಐರಿಸ್ (ನೇರಳೆ), ಅಬ್ಸಿಡಿಯನ್ (ಕಪ್ಪು), ಪಿಯೋನಿ (ಗುಲಾಬಿ), ಮತ್ತು ಪಿಂಗಾಣಿ (ಬಿಳಿ) ಎಂಬ ನಾಲ್ಕು ಬಣ್ಣಗಳಲ್ಲಿ ಲಭ್ಯವಿರುವ ನಿರೀಕ್ಷೆ.