ಇನ್ಫಿನಿಕ್ಸ್ GT 50 Pro ಲಾಂಚ್ ಡೇಟ್ ಫಿಕ್ಸ್: ಗೇಮಿಂಗ್ ಕಿಟ್ ಜೊತೆಗೆ ಬರ್ತಿದೆ ಈ ಪವರ್‌ಫುಲ್ ಫೋನ್!

ಇನ್ಫಿನಿಕ್ಸ್ GT 50 Pro ಸ್ಮಾರ್ಟ್‌ಫೋನ್‌ನ ಭಾರತದ ಲಾಂಚ್ ದಿನಾಂಕ ಅಕ್ಟೋಬರ್ 27ಕ್ಕೆ ನಿಗದಿಯಾಗಿದೆ. ಮಧ್ಯಾಹ್ನ 12 ಗಂಟೆಗೆ ಲೈವ್‌ಸ್ಟ್ರೀಮ್ ಮೂಲಕ ಈ ಫೋನ್ ಬಿಡುಗಡೆಯಾಗಲಿದೆ ಎಂದು ಮೀಡಿಯಾ ಇನ್ವಿಟೇಷನ್‌ಗಳು ಖಚಿತಪಡಿಸಿವೆ. ಈಗಾಗಲೇ ಅಕ್ಟೋಬರ್ 24ರಿಂದ ಪ್ರಿ-ಬುಕಿಂಗ್ ಆರಂಭವಾಗಿದ್ದು, ಅಕ್ಟೋಬರ್ 27ರವರೆಗೆ ಚಾಲ್ತಿಯಲ್ಲಿರಲಿದೆ. ಈ ಇವೆಂಟ್‌ನಲ್ಲಿ ಫೋನ್‌ನ ಕೂಲಿಂಗ್ ವ್ಯವಸ್ಥೆ ಹಾಗೂ ಗೇಮಿಂಗ್ ಕಂಟ್ರೋಲರ್ ಎಕೋಸಿಸ್ಟಮ್ ಅನಾವರಣಗೊಳ್ಳಲಿದೆ.

ಭಾರತೀಯ ಗ್ರಾಹಕರಿಗೆ ಮೂರು ಆಕ್ಸೆಸರಿಗಳನ್ನೊಳಗೊಂಡ ಪೂರ್ಣ ಪ್ರಮಾಣದ ಗೇಮಿಂಗ್ ಕಿಟ್ ಬಂಡಲ್ ರೂಪದಲ್ಲಿ ಸಿಗಲಿದೆ. ಇದರಲ್ಲಿ GT NX ಕಂಟ್ರೋಲರ್, GT NX ಸ್ಟೇಷನ್ ಮತ್ತು ಮ್ಯಾಗ್‌ಚಾರ್ಜ್ ಕೂಲರ್ 2.0 ಇರಲಿವೆ. ಈ ಕಂಟ್ರೋಲರ್ ಅನ್ನು ಇಬ್ಬರು ಪ್ಲೇಯರ್‌ಗಳು ಆಡಲು ಅನುಕೂಲವಾಗುವಂತೆ ಸ್ಪ್ಲಿಟ್ ಮಾಡಬಹುದು; ಇನ್ನು ಡಾಕ್ ಮೂಲಕ 4K 60Hz ಔಟ್‌ಪುಟ್ ಪಡೆಯಲು ಸಾಧ್ಯವಿದೆ.

ಇನ್ಫಿನಿಕ್ಸ್ GT 50 Pro ಹಾರ್ಡ್‌ವೇರ್ ಮತ್ತು ಕೂಲಿಂಗ್ ಫೀಚರ್ಸ್‌ ಖಚಿತ!

ಭಾರತೀಯ ವೇರಿಯೆಂಟ್‌ನ ಪ್ರಮುಖ ಹಾರ್ಡ್‌ವೇರ್ ವಿವರಗಳು ಅಧಿಕೃತವಾಗಿ ಹೊರಬಿದ್ದಿವೆ. ಇದರಲ್ಲಿ ಮೀಡಿಯಾಟೆಕ್ ಡೈಮೆನ್ಸಿಟಿ 8400 ಅಲ್ಟಿಮೇಟ್ ಪ್ರೊಸೆಸರ್ ಮತ್ತು 144Hz ರಿಫ್ರೆಶ್ ರೇಟ್ ಹೊಂದಿರುವ 1.5K AMOLED ಸ್ಕ್ರೀನ್ ಇರಲಿದೆ. ಗೇಮಿಂಗ್‌ಗಾಗಿ ಬಿಲ್ಟ್-ಇನ್, ಪ್ರೆಶರ್-ಸೆನ್ಸಿಟಿವ್ GT ಟ್ರಿಗರ್ 2.0 ಶೋಲ್ಡರ್ ಬಟನ್‌ಗಳನ್ನು ನೀಡಲಾಗಿದೆ. ಹಿಂಭಾಗದಲ್ಲಿ ಡಿಸೈನ್ ಮಾಡಲಾದ ಹೈಡ್ರೋಫ್ಲೋ ಕೂಲಿಂಗ್ ಸಿಸ್ಟಮ್ ಹಾಗೂ 144FPS ಗೇಮಿಂಗ್ ಸಪೋರ್ಟ್ ಅನ್ನು ಇನ್ಫಿನಿಕ್ಸ್ ಪ್ರಮೋಟ್ ಮಾಡುತ್ತಿದೆ.

ಇನ್ಫಿನಿಕ್ಸ್ GT 50 Pro ಗೇಮಿಂಗ್ ಕಿಟ್, ಆಫರ್‌ಗಳು ಮತ್ತು ಲಭ್ಯತೆ

ಈ ಸ್ಮಾರ್ಟ್‌ಫೋನ್ ಬಿಡುಗಡೆಯ ದಿನದಿಂದಲೇ ಫ್ಲಿಪ್‌ಕಾರ್ಟ್‌ನಲ್ಲಿ ಲಭ್ಯವಿರಲಿದ್ದು, ಬ್ಲ್ಯಾಕ್ ಅಬಿಸ್ ಹಾಗೂ ರೆಡ್ ಬ್ಲೇಜ್ ಬಣ್ಣಗಳಲ್ಲಿ ಸಿಗಲಿದೆ. ಇನ್ಫಿನಿಕ್ಸ್ ವೆಬ್‌ಸೈಟ್‌ನಲ್ಲಿ ₹1,999 ಪಾವತಿಸಿ ಪ್ರಿ-ಬುಕ್ ಮಾಡಿಕೊಳ್ಳಬಹುದು. ಇದರ ಜೊತೆಗೆ ₹5,000 ವರೆಗೆ ಡಿಸ್ಕೌಂಟ್ ಮತ್ತು ಕಾಂಪ್ಲಿಮೆಂಟರಿ X60 ಸ್ಪೀಕರ್ ನೀಡಲಾಗುತ್ತಿದೆ. ಅಧಿಕೃತ ಪ್ರಿ-ಬುಕಿಂಗ್ ವಿಂಡೋ ಅಕ್ಟೋಬರ್ 24 ರಿಂದ ಅಕ್ಟೋಬರ್ 27 ರವರೆಗೆ ತೆರೆದಿರುತ್ತದೆ.

ಭಾರತದಲ್ಲಿ ಫೋನ್‌ನ ಬೆಲೆ ಇನ್ನು ರಹಸ್ಯವಾಗಿದೆ, ಹೀಗಾಗಿ ಬಂಡಲ್ ಆಫರ್ ಹಾಗೂ ಪ್ರತ್ಯೇಕ ಆಕ್ಸೆಸರಿಗಳ ಬೆಲೆ ಹೇಗಿರಲಿದೆ ಎಂಬುದನ್ನು ಕಾಯ್ದುನೋಡಬೇಕಿದೆ. ವೆಬ್‌ಸೈಟ್‌ನಲ್ಲಿ 12GB/256GB ಮತ್ತು 12GB/512GB ಆಯ್ಕೆಗಳು ಕಾಣಿಸಿಕೊಂಡಿದ್ದು, ಎರಡು ವೇರಿಯೆಂಟ್‌ಗಳಲ್ಲಿ ಲಾಂಚ್ ಆಗುವ ಸುಳಿವು ನೀಡಿದೆ. 91ಮೊಬೈಲ್ಸ್ ವರದಿ ಪ್ರಕಾರ, ಈ ಫೋನ್ ಪೋಕೋ X8 Pro ಮತ್ತು ಒನ್‌ಪ್ಲಸ್ ನಾರ್ಡ್ CE ಮಾಡೆಲ್‌ಗಳಿಗೆ ಪ್ರಬಲ ಸ್ಪರ್ಧೆ ನೀಡಲಿದೆ.

ಲಾಂಚ್ ದಿನದಂದು ಫಸ್ಟ್ ಸೇಲ್ ದಿನಾಂಕ, ಬ್ಯಾಂಕ್ ಆಫರ್‌ಗಳು ಮತ್ತು 144FPS ಬೆಂಬಲಿಸುವ ಗೇಮ್‌ಗಳ ಪಟ್ಟಿಯ ವಿವರ ಸಿಗಲಿದೆ. ಜೊತೆಗೆ ಗೇಮಿಂಗ್ ಕಿಟ್‌ನ ಆಕ್ಸೆಸರಿಗಳು ಪ್ರತ್ಯೇಕವಾಗಿ ಮಾರಾಟವಾಗುತ್ತವೆಯೇ ಮತ್ತು ಅವುಗಳ ಬೆಲೆ ಎಷ್ಟಿರಲಿದೆ ಎಂಬುದು ತಿಳಿಯಲಿದೆ. ಫ್ಲಿಪ್‌ಕಾರ್ಟ್ ಮುಂಚಿತವಾಗಿಯೇ ಡೆಲಿವರಿ ಆಪ್ಷನ್ ನೀಡಿದರೆ ಪ್ರಿ-ಬುಕ್ ಮಾಡಿದವರಿಗೆ ಹೆಚ್ಚು ಅನುಕೂಲವಾಗಲಿದೆ. ಬರಿ ಬೆಂಚ್‌ಮಾರ್ಕ್ ಸ್ಕೋರ್‌ಗಳಿಗಿಂತಲೂ ನಿರಂತರ ಪರ್ಫಾರ್ಮೆನ್ಸ್ ಮತ್ತು ಶೋಲ್ಡರ್ ಟ್ರಿಗರ್‌ಗಳನ್ನು ಇಷ್ಟಪಡುವ ಗೇಮರ್‌ಗಳಿಗೆ ಈ ಫೋನ್ ಸೂಕ್ತ ಎನಿಸಲಿದೆ.