ಇನ್ಫಿನಿಕ್ಸ್ ಜಿಟಿ 50 ಪ್ರೊ ಲಾಂಚ್ ಡೇಟ್ ಫಿಕ್ಸ್: ಈ ಫೋನ್ ಫೀಚರ್ಸ್ ನೋಡಿದ್ರೆ ಶಾಕ್ ಆಗ್ತೀರಾ!

ಇನ್ಫಿನಿಕ್ಸ್ (Infinix) ತನ್ನ ಬಹುನಿರೀಕ್ಷಿತ 'ಜಿಟಿ 50 ಪ್ರೊ' (GT 50 Pro) ಸ್ಮಾರ್ಟ್‌ಫೋನ್ ಅನ್ನು ಅಕ್ಟೋಬರ್ 27 ರಂದು ಭಾರತದಲ್ಲಿ ಬಿಡುಗಡೆ ಮಾಡಲು ಮುಹೂರ್ತ ನಿಗದಿಪಡಿಸಿದೆ. ಈ ಫೋನ್ ಫ್ಲಿಪ್‌ಕಾರ್ಟ್ (Flipkart) ಮೂಲಕವೇ ವಿಶೇಷವಾಗಿ ಲಭ್ಯವಾಗಲಿದೆ. ಕಂಪನಿ ಹಂಚಿಕೊಂಡಿರುವ ಟೀಸರ್‌ಗಳ ಪ್ರಕಾರ, ಈ ಫೋನ್‌ನಲ್ಲಿ 144Hz ರಿಫ್ರೆಶ್ ರೇಟ್ ಹೊಂದಿರುವ 1.5K AMOLED ಡಿಸ್ಪ್ಲೇ, ಮೀಡಿಯಾಟೆಕ್ ಡೈಮೆನ್ಸಿಟಿ 8400 ಪ್ರೊಸೆಸರ್ ಮತ್ತು ಪಾರದರ್ಶಕ 'ಹೈಡ್ರೋಫ್ಲೋ' (HydroFlow) ಕೂಲಿಂಗ್ ವಿಂಡೋ ಇರಲಿದೆ. ಇದು 'ಬ್ಲ್ಯಾಕ್ ಅಬಿಸ್' ಮತ್ತು 'ರೆಡ್ ಬ್ಲೇಜ್' ಬಣ್ಣಗಳಲ್ಲಿ ಸಿಗಲಿದೆ. ಇದರೊಂದಿಗೆ ಗೇಮಿಂಗ್ ಅಕ್ಸೆಸರೀಸ್ ಎಕೋಸಿಸ್ಟಮ್ ಕೂಡ ಭಾರತಕ್ಕೆ ಕಾಲಿಡಲಿದೆ. ಇಂಟರಾಕ್ಟಿವ್ ಟೀಸರ್ ಮೂಲಕ ಬಿಡುಗಡೆ ದಿನಾಂಕ ಹೊರಬಿದ್ದ ತಕ್ಷಣವೇ ಈ ಫೋನ್ ಮೇಲಿನ ಕುತೂಹಲ ದುಪ್ಪಟ್ಟಾಗಿದೆ.

ಈ ಫೋನ್ ಏಕೆ ವಿಶೇಷ ಗೊತ್ತಾ?: ಜಾಗತಿಕ ಮಟ್ಟದ ಅತ್ಯಾಧುನಿಕ ಕೂಲಿಂಗ್ ತಂತ್ರಜ್ಞಾನ ಭಾರತಕ್ಕೂ ಸಿಗುತ್ತಿದೆ. ಇನ್ಫಿನಿಕ್ಸ್ ತಿಳಿಸಿರುವಂತೆ, ಇದರ 'ಹೈಡ್ರೋಫ್ಲೋ' ಕೂಲಿಂಗ್ ವ್ಯವಸ್ಥೆಯಲ್ಲಿ ಡ್ಯುಯಲ್-ಪಂಪ್ ಫ್ಲೋ-ಚಾನೆಲ್ ಮತ್ತು ಎಕ್ಸ್‌ಪ್ಲಿಸಿಟ್ ವ್ಯೂಪೋರ್ಟ್ ಡಿಸೈನ್ ಬಳಸಲಾಗಿದೆ. ಅಂದರೆ, ಫೋನಿನ ಹಿಂಭಾಗದ ಪ್ಯಾನೆಲ್‌ನಲ್ಲಿ ಲಿಕ್ವಿಡ್ ಹರಿಯುವ ಮಾರ್ಗ ಕಣ್ಣಿಗೆ ನೇರವಾಗಿ ಕಾಣಿಸುತ್ತದೆ! ಸೂಪರ್‌ಕಾರ್‌ಗಳ ಏರೋಡೈನಾಮಿಕ್ಸ್‌ನಿಂದ ಪ್ರೇರಿತವಾಗಿ ಈ ಡಿಸೈನ್ ಮಾಡಲಾಗಿದೆ ಎಂದು ಕಂಪನಿ ಹೇಳಿಕೊಂಡಿದೆ. ಫ್ಲಿಪ್‌ಕಾರ್ಟ್‌ನಲ್ಲಿ ಬ್ಲ್ಯಾಕ್ ಅಬಿಸ್ ಹಾಗೂ ರೆಡ್ ಬ್ಲೇಜ್ ಕಲರ್‌ಗಳಲ್ಲಿ ಇದು ಲಭ್ಯವಿರಲಿದೆ.

ಇನ್ಫಿನಿಕ್ಸ್ ಜಿಟಿ 50 ಪ್ರೊ ವೈಶಿಷ್ಟ್ಯಗಳು: 144Hz 1.5K AMOLED ಡಿಸ್ಪ್ಲೇ, ಡೈಮೆನ್ಸಿಟಿ 8400 ಪ್ರೊಸೆಸರ್

ದೀರ್ಘಾವಧಿಯ ಹೈ-ಫ್ರೇಮ್ ಗೇಮಿಂಗ್‌ಗಾಗಿಯೇ ಇದರ ಹಾರ್ಡ್‌ವೇರ್ ಅನ್ನು ಸಜ್ಜುಗೊಳಿಸಲಾಗಿದೆ. ಡೈಮೆನ್ಸಿಟಿ 8400 ಪ್ರೊಸೆಸರ್ ಜೊತೆಗೆ LPDDR5X RAM ಮತ್ತು UFS 4.1 ಸ್ಟೋರೇಜ್ ನೀಡಲಾಗಿದೆ. 6.78 ಇಂಚಿನ ಡಿಸ್ಪ್ಲೇ 1.5K ರೆಸಲ್ಯೂಶನ್ ಹಾಗೂ 144Hz ರಿಫ್ರೆಶ್ ರೇಟ್ ಬೆಂಬಲಿಸುತ್ತದೆ. ಈ ಫೋನ್‌ನಲ್ಲಿ 6,500mAh ಸಾಮರ್ಥ್ಯದ ದೊಡ್ಡ ಬ್ಯಾಟರಿ ಇದ್ದು, 45W ವೈರ್ಡ್ ಚಾರ್ಜಿಂಗ್ ನೀಡಲಾಗಿದೆ. ಅಷ್ಟೇ ಅಲ್ಲ, ಜಿಟಿ 50 ಪ್ರೊ 30W ವೈರ್‌ಲೆಸ್ ಚಾರ್ಜಿಂಗ್ ಸೌಲಭ್ಯವನ್ನೂ ಹೊಂದಿದೆ. ಗೇಮಿಂಗ್ ಅನುಭವ ಹೆಚ್ಚಿಸಲು ಶೋಲ್ಡರ್ ಟ್ರಿಗ್ಗರ್‌ಗಳು ಮತ್ತು ಆಕರ್ಷಕ RGB ಲೈಟಿಂಗ್ ಫೀಚರ್‌ಗಳನ್ನು ಸೇರಿಸಲಾಗಿದೆ.

ಇನ್ಫಿನಿಕ್ಸ್ ಜಿಟಿ 50 ಪ್ರೊ ಬೆಂಚ್‌ಮಾರ್ಕ್ ಸ್ಕೋರ್ ಮತ್ತು ಹೈಡ್ರೋಫ್ಲೋ ಕೂಲಿಂಗ್

ಮಿಡ್-ಪ್ರೀಮಿಯಂ ವಿಭಾಗದಲ್ಲಿ ಈ ಫೋನಿನ ಆರಂಭಿಕ ಬೆಂಚ್‌ಮಾರ್ಕ್ ಅಂಕಿ-ಅಂಶಗಳು ಸಖತ್ ಪವರ್‌ಫುಲ್ ಆಗಿ ಕಾಣಿಸುತ್ತಿವೆ. GSMArena ವರದಿ ಪ್ರಕಾರ, ಇದು AnTuTu v11 ನಲ್ಲಿ ಸುಮಾರು 2.14 ಮಿಲಿಯನ್ (21.4 ಲಕ್ಷ) ಸ್ಕೋರ್ ಗಳಿಸಿದೆ. ಗೀಕ್‌ಬೆಂಚ್ 6 (Geekbench 6) ನಲ್ಲಿ ಸಿಂಗಲ್-ಕೋರ್‌ಗೆ 1,636 ಹಾಗೂ ಮಲ್ಟಿ-ಕೋರ್‌ಗೆ 6,806 ಅಂಕಗಳನ್ನು ಪಡೆದುಕೊಂಡಿದೆ. ಇನ್ನು 3DMark ವೈಲ್ಡ್ ಲೈಫ್ ಎಕ್ಸ್‌ಟ್ರೀಮ್ ಲೂಪ್‌ನಲ್ಲಿ 6,571 ಸ್ಕೋರ್ ದಾಖಲಾಗಿದೆ. ಗೇಮಿಂಗ್ ವೇಳೆ GPU ಮೇಲಿನ ಲೋಡ್ ತಡೆಯಲು ಈ ಹೈಡ್ರೋಫ್ಲೋ ಕೂಲಿಂಗ್ ನೆರವಾಗಲಿದೆ. (ತಾಪಮಾನ ಮತ್ತು ಸಾಫ್ಟ್‌ವೇರ್ ಅಪ್‌ಡೇಟ್‌ಗೆ ಅನುಗುಣವಾಗಿ ಸ್ಕೋರ್‌ಗಳು ಕೊಂಚ ಬದಲಾಗಬಹುದು).

ಇನ್ಫಿನಿಕ್ಸ್ ಜಿಟಿ 50 ಪ್ರೊ ಭಾರತದಲ್ಲಿ ಬೆಲೆ ಎಷ್ಟಿರಬಹುದು? ಫ್ಲಿಪ್‌ಕಾರ್ಟ್ ಮೊದಲ ಸೇಲ್ ವಿವರ

ಭಾರತದಲ್ಲಿ ಈ ಫೋನಿನ ಅಧಿಕೃತ ಬೆಲೆಯನ್ನು ಕಂಪನಿ ಇನ್ನೂ ಬಹಿರಂಗಪಡಿಸಿಲ್ಲ. ಆದಾಗ್ಯೂ, ವಿದೇಶಿ ಬೆಲೆಗಳನ್ನು ಆಧರಿಸಿ ಸ್ಮಾರ್ಟ್‌ಪ್ರಿಕ್ಸ್ (Smartprix) ಅಂದಾಜಿಸಿರುವಂತೆ, ಇದು ₹30,000 ದಿಂದ ₹35,000 ಆಜುಬಾಜಿನಲ್ಲಿ ಇರಬಹುದು. ಫ್ಲಿಪ್‌ಕಾರ್ಟ್ ಬಿಡುಗಡೆ ಸಮಯದಲ್ಲಿ ಆಕ್ಸಿಸ್ (Axis) ಅಥವಾ ಐಸಿಐಸಿಐ (ICICI) ಬ್ಯಾಂಕ್ ಕಾರ್ಡ್‌ಗಳ ಮೇಲೆ ಇನ್‌ಸ್ಟೆಂಟ್ ಡಿಸ್ಕೌಂಟ್ ಸಿಗುವ ಸಾಧ್ಯತೆಯಿದೆ. ಬಿಡುಗಡೆಯಾದ ತಕ್ಷಣವೇ ಮೊದಲ ಸೇಲ್ ಆರಂಭವಾಗಲಿದ್ದು, ಪ್ರೀ-ಆರ್ಡರ್ ವಿವರಗಳಿಗಾಗಿ ಫ್ಲಿಪ್‌ಕಾರ್ಟ್ ಹಾಗೂ ಇನ್ಫಿನಿಕ್ಸ್‌ನ ಅಧಿಕೃತ ಸೋಶಿಯಲ್ ಮೀಡಿಯಾ ಪೇಜ್‌ಗಳನ್ನು ಗಮನಿಸುತ್ತಿರಿ.