ಐಫೋನ್ 17 ಏರ್: ಅತ್ಯಂತ ತೆಳುವಾದ ವಿನ್ಯಾಸ, ಬ್ಯಾಟರಿ ಇರುವ ಫೋನ್ ಕೇಸ್!

ಆಪಲ್ ತನ್ನ ಜನಪ್ರಿಯ ಐಫೋನ್ ಸರಣಿಗೆ ಐಫೋನ್ 17 ಏರ್ (ಅಥವಾ ಸ್ಲಿಮ್) ಹೊಸ ಸಾಧನವನ್ನು ಪರಿಚಯಿಸಲು ಸಿದ್ಧವಾಗಿದೆ. ಮುಂದಿನ ಸೆಪ್ಟೆಂಬರ್‌ನಲ್ಲಿ ಐಫೋನ್ 17, ಐಫೋನ್ 17 ಪ್ರೊ ಮತ್ತು ಐಫೋನ್ 17 ಪ್ರೊ ಮ್ಯಾಕ್ಸ್‌ನೊಂದಿಗೆ ಬಿಡುಗಡೆಯಾಗುವ ನಿರೀಕ್ಷೆಯಿರುವ ಈ ಹೊಸ ಮಾದರಿಯು ಐಫೋನ್ 16 ಪ್ಲಸ್ ಅನ್ನು ಬದಲಾಯಿಸುವ ಗುರಿಯನ್ನು ಹೊಂದಿದೆ. ವಿಶೇಷವಾಗಿ ಈ ಐಫೋನ್ 17 ಏರ್ ಸಾಧನವು ಇದುವರೆಗಿನ ಅತ್ಯಂತ ತೆಳುವಾದ ಐಫೋನ್ ಆಗಿರಬಹುದು, ಇದು ಕೇವಲ 5.5mm ದಪ್ಪವನ್ನು ಹೊಂದಿರಬಹುದು ಎಂಬ ಸುದ್ದಿಗಳು ಈಗಾಗಲೇ ಹರಿದಾಡಿದೆ. ಇದೀಗ ಬಂದಿರುವ ಸುದ್ದಿಯ ಪ್ರಕಾರ, ಆಪಲ್ ತನ್ನ ಮುಂಬರುವ ಐಫೋನ್ 17 ಏರ್‌ಗಾಗಿ ತನ್ನ ಸ್ಮಾರ್ಟ್ ಬ್ಯಾಟರಿ ಕೇಸ್‌ ಅನ್ನ ಪರಿಚಯಿಸುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಹೌದು, ವರದಿಗಳ ಪ್ರಕಾರ ಐಫೋನ್ 17 ಏರ್‌ನ ಬ್ಯಾಟರಿ ಕಾರ್ಯಕ್ಷಮತೆಯು ಸರಣಿಯ ಇತರ ಮಾದರಿಗಳಿಗಿಂತ ಸ್ವಲ್ಪ ಕಡಿಮೆ ಇರಬಹುದು. ಆಪಲ್‌ನ ಆಂತರಿಕ ಪರೀಕ್ಷೆಗಳ ಪ್ರಕಾರ, ಈ ಫೋನಿನಲ್ಲಿ ಕೇವಲ 60% ರಿಂದ 70% ಬಳಕೆದಾರರು ಮಾತ್ರ ಚಾರ್ಜ್ ಮಾಡದೆ ಪೂರ್ಣ ದಿನವನ್ನು ಕಳೆಯಲು ಸಾಧ್ಯವಾಗುತ್ತದೆ. ಇದಕ್ಕೆ ವ್ಯತಿರಿಕ್ತವಾಗಿ, ಇತರ ಐಫೋನ್ ಮಾದರಿಗಳಲ್ಲಿ ಈ ಪ್ರಮಾಣವು ಸಾಮಾನ್ಯವಾಗಿ 80% ರಿಂದ 90% ರಷ್ಟಿರುತ್ತದೆ. ಈ ಸಂಭಾವ್ಯ ಸಮಸ್ಯೆಯನ್ನು ಪರಿಹರಿಸಲು ಆಪಲ್ ಒಂದು ವಿಶೇಷ ಪರಿಕರವನ್ನು ಪರಿಚಯಿಸುವ ಸಾಧ್ಯತೆಯಿದೆ. ಆಪಲ್ ಐಫೋನ್ 17 ಏರ್‌ಗಾಗಿ ತನ್ನ ಸ್ಮಾರ್ಟ್ ಬ್ಯಾಟರಿ ಕೇಸ್‌ನ ಹೊಸ ಆವೃತ್ತಿಯನ್ನು ಮರಳಿ ತರಬಹುದು. ಈ ಹಿಂದೆ 2015 ರಲ್ಲಿ ಐಫೋನ್ 6 ಸರಣಿಯೊಂದಿಗೆ ಪರಿಚಯಿಸಲಾದ ಈ ಪರಿಕಲ್ಪನೆಯ ಬ್ಯಾಟರಿ ಪ್ಯಾಕ್ ಅನ್ನು ಸಂಯೋಜಿಸುವ ಫೋನ್ ಕೇಸ್ ಅನ್ನು ಒಳಗೊಂಡಿರುತ್ತದೆ ಎನ್ನಲಾಗಿದೆ.

ತಾಂತ್ರಿಕ ವಿಶೇಷಣಗಳ ವಿಷಯಕ್ಕೆ ಬಂದರೆ, ಮುಂಬರುವ ಐಫೋನ್ 17 ಏರ್ ಸಾಧನವು 120Hz ರಿಫ್ರೆಶ್ ದರದೊಂದಿಗೆ 6.6-ಇಂಚಿನ OLED ಡಿಸ್ಪ್ಲೇಯನ್ನು ಹೊಂದಿರುವ ನಿರೀಕ್ಷೆಯಿದೆ. ಇದು 24-ಮೆಗಾಪಿಕ್ಸೆಲ್ ಸೆಲ್ಫಿ ಕ್ಯಾಮೆರಾ ಮತ್ತು 48-ಮೆಗಾಪಿಕ್ಸೆಲ್ ಹಿಂಬದಿಯ ಕ್ಯಾಮೆರಾವನ್ನು ಒಳಗೊಂಡಿರಬಹುದು. ಕಾರ್ಯಕ್ಷಮತೆಗಾಗಿ, ಐಫೋನ್ 17 ಏರ್ ಸಾಧನವು 8GB RAM ನೊಂದಿಗೆ ಆಪಲ್‌ನ A18 ಅಥವಾ A19 ಚಿಪ್‌ಸೆಟ್‌ನಿಂದ ಚಾಲಿತವಾಗಬಹುದು ಎನ್ನಲಾಗಿದೆ. ಐಫೋನ್ 17 ಏರ್ ಆಕರ್ಷಕವಾದ ತೆಳುವಾದ ವಿನ್ಯಾಸ ಮತ್ತು ಸುಧಾರಿತ ವೈಶಿಷ್ಟ್ಯಗಳನ್ನು ಭರವಸೆ ನೀಡುತ್ತದೆ. ಇದಕ್ಕಾಗಿ ಐಫೋನ್ 17 ಏರ್‌ನ ಆರಂಭಿಕ ಬೆಲೆ $1,299 (ಸುಮಾರು ರೂ. 1,09,500) ಆಗಿರಬಹುದು ಎಂದು ಅಂದಾಜಿಸಲಾಗಿದೆ. ಆದರೆ, ಆಪಲ್‌ನಿಂದ ಈ ಬಗ್ಗೆ ಯಾವುದೇ ಅಧಿಕೃತ ಮಾಹಿತಿಯನ್ನು ಹೊರಹಾಕಿಲ್ಲ.

ಇಷ್ಟೇ ಅಲ್ಲದೆ, ಐಫೋನ್ 17 ಏರ್ ಚೀನಾದ ಮಾರುಕಟ್ಟೆಯಲ್ಲಿ ಒಂದು ವಿಶಿಷ್ಟ ಸವಾಲನ್ನು ಎದುರಿಸಬಹುದು. ಈ ಮಾದರಿಯು ಭೌತಿಕ ಸಿಮ್ ಕಾರ್ಡ್ ಸ್ಲಾಟ್ ಅನ್ನು ಹೊಂದಿರುವುದಿಲ್ಲ ಎಂದು ನಿರೀಕ್ಷಿಸಲಾಗಿದೆ. ಬದಲಿಗೆ eSIM ತಂತ್ರಜ್ಞಾನವನ್ನು ಮಾತ್ರ ಅವಲಂಬಿಸಿರುತ್ತದೆ. ಪ್ರಸ್ತುತ ಚೀನಾದ ನಿಯಮಗಳು eSIM ಗಳ ಬಳಕೆಯನ್ನು ಅನುಮತಿಸದ ಕಾರಣ, ಇದು ಐಫೋನ್ 17 ಏರ್‌ನ ಮಾರಾಟದ ಮೇಲೆ ಪರಿಣಾಮ ಬೀರಬಹುದು ಎಂದು ವರದಿಗಳು ಹೇಳಿವೆ. ಒಟ್ಟಾರೆಯಾಗಿ, ಐಫೋನ್ 17 ಏರ್ ಆಕರ್ಷಕವಾದ ತೆಳುವಾದ ವಿನ್ಯಾಸ ಮತ್ತು ಸುಧಾರಿತ ವೈಶಿಷ್ಟ್ಯಗಳನ್ನು ಭರವಸೆ ನೀಡುತ್ತದೆ. ಆದಾಗ್ಯೂ, ಸಂಭಾವ್ಯ ಕಡಿಮೆ ಬ್ಯಾಟರಿ ಬಾಳಿಕೆ ಇದರ ಯಶಸ್ಸಿನ ಮೇಲೆ ಪರಿಣಾಮ ಬೀರಬಹುದು. ಹಾಗಾಗಿ, ಫೋನ್ ಕೇಸ್ ಮೂಲಕ ಬಳಕೆದಾರರಿಗೆ ಹೆಚ್ಚುವರಿ ಬ್ಯಾಟರಿ ಬಾಳಿಕೆಯನ್ನು ಒದಗಿಸುವ ಮೂಲಕ ಆಪಲ್ ಈ ಸಮಸ್ಯೆಗೆ ಪರಿಹಾರ ಹುಡುಕುತ್ತಿರಬಹುದು.