4.5 ಮಿಲಿಯನ್‌ಗೂ ಅಧಿಕ AnTuTu ಸ್ಕೋರ್: iQOO 15 Ultra ಫೋನ್ ದಾಖಲೆ!

iQOO ತನ್ನ ಮುಂದಿನ ತಲೆಮಾರಿನ ಗೇಮಿಂಗ್ ಫ್ಲಾಗ್‌ಶಿಪ್ ಸ್ಮಾರ್ಟ್‌ಫೋನ್ iQOO 15 Ultra ಮೂಲಕ ಮಾರುಕಟ್ಟೆಯಲ್ಲಿ ದೊಡ್ಡ ನಿರೀಕ್ಷೆಯನ್ನು ಹುಟ್ಟುಹಾಕಿದೆ. ಚೀನಾದಲ್ಲಿ ಪ್ರೀ-ಆರ್ಡರ್‌ಗಳು ಆರಂಭವಾಗಿರುವ ಬೆನ್ನಲ್ಲೇ, ಕಂಪನಿ ಫೋನ್‌ನ ಕಾರ್ಯಕ್ಷಮತೆ ಕುರಿತು ಅಧಿಕೃತ ಸುಳಿವುಗಳನ್ನು ನೀಡುತ್ತಿದೆ. ಇತ್ತೀಚೆಗೆ ಹೊರಬಿದ್ದ AnTuTu ಬೆಂಚ್‌ಮಾರ್ಕ್ ಸಂಖ್ಯೆಗಳು, ಈ ಫೋನ್ ಯಾವ ಮಟ್ಟದದಲ್ಲಿ ಪರ್ಫಾರ್ಮೆನ್ಸ್ ನೀಡಲಿದೆ ಎಂಬುದಕ್ಕೆ ಸ್ಪಷ್ಟ ಸೂಚನೆ ನೀಡುತ್ತವೆ. ಇದು ಟೆಕ್ ಲೋಕದಲ್ಲಿ ಗಮನಾರ್ಹ ಸಾಧನೆಯಾಗಿದೆ.!

AnTuTuನಲ್ಲಿ ಹೊಸ ದಾಖಲೆ
ಹೌದು, iQOO ಉತ್ಪನ್ನ ನಿರ್ದೇಶಕರಾದ ಗ್ಯಾಲಂಟ್ V (Galant V) ಅವರು ಹಂಚಿಕೊಂಡಿರುವ ಮಾಹಿತಿಯಂತೆ, iQOO 15 Ultra AnTuTu ಬೆಂಚ್‌ಮಾರ್ಕ್‌ನಲ್ಲಿ 4.5 ಮಿಲಿಯನ್‌ಗೂ ಅಧಿಕ ಸ್ಕೋರ್ ಗಳಿಸಿದೆ. ಇದು AnTuTu ವೇದಿಕೆಯಲ್ಲಿ ಇದುವರೆಗೆ ದಾಖಲಾಗಿರುವ ಅತ್ಯಧಿಕ ಅಂಕಗಳಲ್ಲೊಂದು ಎನ್ನಲಾಗುತ್ತಿದೆ. ಈ ದಾಖಲೆ, iQOO ತನ್ನ Ultra ಮಾದರಿಯನ್ನು ಕೇವಲ ಫ್ಲಾಗ್‌ಶಿಪ್ ಅಲ್ಲ, ಅತ್ಯಂತ ಶಕ್ತಿಶಾಲಿ ಗೇಮಿಂಗ್ ಡಿವೈಸ್ ಆಗಿ ರೂಪಿಸಲಾಗಿದೆ ಎಂಬುದನ್ನು ತೋರಿಸುತ್ತದೆ.

ಬೆಂಚ್‌ಮಾರ್ಕ್ ಅಂಕೆಗಳು ಏನು ಹೇಳುತ್ತವೆ?
AnTuTu ಲಿಸ್ಟಿಂಗ್ ಪ್ರಕಾರ, Snapdragon 8 Elite Gen 5 ಚಿಪ್‌ಸೆಟ್ ಹೊಂದಿರುವ ಈ ಫೋನ್ CPU, GPU, ಮೆಮೊರಿ ಮತ್ತು UX ಎಲ್ಲ ವಿಭಾಗಗಳಲ್ಲೂ ಅತ್ಯುತ್ತಮ ಅಂಕಗಳನ್ನು ಪಡೆದುಕೊಂಡಿದೆ. ವಿಶೇಷವಾಗಿ GPU ಮತ್ತು UX ವಿಭಾಗದ ಬಲವಾದ ಸ್ಕೋರ್‌ಗಳು, ಹೈ-ಫ್ರೇಮ್ ರೇಟ್ ಗೇಮ್ಸ್ ಮತ್ತು ಸ್ಮೂತ್ ಯೂಸರ್ ಅನುಭವಕ್ಕೆ ಈ ಡಿವೈಸ್ ಸೂಕ್ತವಾಗಿದೆ ಎಂಬುದನ್ನು ಸೂಚಿಸುತ್ತವೆ. ಬೆಂಚ್‌ಮಾರ್ಕ್ ಮಾತ್ರವೇ ಸಂಪೂರ್ಣ ಚಿತ್ರವಲ್ಲವಾದರೂ, ಇಂತಹ ಸಂಖ್ಯೆಗಳು ಗಂಭೀರ ಗೇಮರ್‌ಗಳಿಗೆ ಭರವಸೆ ನೀಡುತ್ತವೆ.

ದೀರ್ಘ ಗೇಮಿಂಗ್‌ಗೆ ವಿಶೇಷ ವಿನ್ಯಾಸ
iQOO 15 Ultra ಅನ್ನು ಸಾಮಾನ್ಯ ಫ್ಲಾಗ್‌ಶಿಪ್‌ಗಳಿಂದ ವಿಭಿನ್ನವಾಗಿಸುವುದು ಇದರ ಗೇಮಿಂಗ್ ಫೋಕಸ್. ಲೀಕ್‌ಗಳು ಮತ್ತು ಟೀಸರ್‌ಗಳ ಪ್ರಕಾರ, ಈ ಫೋನ್‌ನಲ್ಲಿ ಆಕ್ಟಿವ್ ಕೂಲಿಂಗ್ ಫ್ಯಾನ್ ಮತ್ತು ಡಿಡಿಕೇಟೆಡ್ ಗೇಮಿಂಗ್ ಶೋಲ್ಡರ್ ಬಟನ್‌ಗಳು ಇರಲಿವೆ. ಇವು ದೀರ್ಘ ಸಮಯ ಗೇಮ್ ಆಡಿದರೂ ಫೋನ್ ತಾಪಮಾನ ಹೆಚ್ಚಾಗದಂತೆ ಕಾಪಾಡಿ, ಸ್ಥಿರ ಪರ್ಫಾರ್ಮೆನ್ಸ್ ನೀಡಲು ಸಹಾಯ ಮಾಡುತ್ತವೆ.

ಬ್ಯಾಟರಿ ಮತ್ತು ಚಾರ್ಜಿಂಗ್‌ನಲ್ಲಿ Ultra ಮಟ್ಟ
ಗೇಮಿಂಗ್ ಬಳಕೆದಾರರಿಗೆ ಅತ್ಯಂತ ಮುಖ್ಯವಾದ ಬ್ಯಾಟರಿ ವಿಷಯದಲ್ಲೂ iQOO ದೊಡ್ಡ ಹೆಜ್ಜೆ ಇಟ್ಟಿದೆ. ವರದಿಗಳ ಪ್ರಕಾರ, iQOO 15 Ultra ನಲ್ಲಿ 7,000mAh ಕ್ಕಿಂತ ಹೆಚ್ಚಿನ ಸಾಮರ್ಥ್ಯದ ಬ್ಯಾಟರಿ ಇರಬಹುದು. ಜೊತೆಗೆ, 200W ಅಲ್ಟ್ರಾ-ಫಾಸ್ಟ್ ಚಾರ್ಜಿಂಗ್ ಬೆಂಬಲ ದೊರಕುವ ನಿರೀಕ್ಷೆಯಿದ್ದು, ಕಡಿಮೆ ಸಮಯದಲ್ಲಿ ಫೋನ್ ಸಂಪೂರ್ಣ ಚಾರ್ಜ್ ಆಗುವ ಸಾಧ್ಯತೆ ಇದೆ. ಇದು ನಿರಂತರ ಗೇಮಿಂಗ್ ಮತ್ತು ಹೆವಿ ಬಳಕೆಗೆ ದೊಡ್ಡ ಪ್ಲಸ್ ಆಗಲಿದೆ.

ಡಿಸ್ಪ್ಲೇ ಮತ್ತು ಕ್ಯಾಮೆರಾ ವಿವರಗಳು
iQOO 15 Ultra ಸ್ಮಾರ್ಟ್‌ಫೋನ್‌ನಲ್ಲಿ 6.85 ಇಂಚಿನ ದೊಡ್ಡ AMOLED ಡಿಸ್ಪ್ಲೇ, 2K ರೆಸಲ್ಯೂಷನ್ ಮತ್ತು 144Hz ರಿಫ್ರೆಶ್ ರೇಟ್ ಇರಲಿದೆ ಎನ್ನಲಾಗಿದೆ. ಇದರಿಂದ ಗೇಮಿಂಗ್ ಮತ್ತು ವೀಡಿಯೊ ವೀಕ್ಷಣೆ ಇನ್ನಷ್ಟು ಸ್ಮೂತ್ ಆಗಲಿದೆ. ಕ್ಯಾಮೆರಾ ವಿಭಾಗದಲ್ಲಿ, ಮೂರು 50 ಮೆಗಾಪಿಕ್ಸೆಲ್ ಸೆನ್ಸರ್‌ಗಳಿರುವ ಟ್ರಿಪಲ್ ರಿಯರ್ ಕ್ಯಾಮೆರಾ ಸೆಟ್‌ಅಪ್ ನಿರೀಕ್ಷಿಸಲಾಗಿದೆ. ಗೇಮಿಂಗ್ ಮುಖ್ಯ ಗುರಿಯಾದರೂ, ದಿನನಿತ್ಯದ ಫೋಟೋಗ್ರಫಿಗೂ ಇದು ಸಮರ್ಪಕ ಅನುಭವ ನೀಡುವಂತೆ ರೂಪಿಸಲಾಗಿದೆ.

ಹೈ-ಪರ್ಫಾರ್ಮೆನ್ಸ್ ಹುಡುಕುವವರಿಗೆ iQOO 15 Ultra
ಒಟ್ಟಾರೆಯಾಗಿ, iQOO 15 Ultra ಗೇಮಿಂಗ್ ಪ್ರಿಯರು ಮತ್ತು ಅತ್ಯುನ್ನತ ಕಾರ್ಯಕ್ಷಮತೆ ಬಯಸುವ ಬಳಕೆದಾರರಿಗೆ ವಿಶೇಷವಾಗಿ ವಿನ್ಯಾಸಗೊಂಡಿರುವ ಫ್ಲಾಗ್‌ಶಿಪ್ ಸ್ಮಾರ್ಟ್‌ಫೋನ್ ಆಗಿದೆ. AnTuTuನಲ್ಲಿ ದಾಖಲೆ ಬರೆದಿರುವುದು ಇದರ ಸಾಮರ್ಥ್ಯಕ್ಕೆ ಮೊದಲ ಸಾಕ್ಷಿ ಮಾತ್ರ. ಅಧಿಕೃತ ಬಿಡುಗಡೆ ಹತ್ತಿರವಾಗುತ್ತಿದ್ದಂತೆ, ಭಾರತ ಸೇರಿದಂತೆ ಜಾಗತಿಕ ಮಾರುಕಟ್ಟೆಯಲ್ಲಿ ಈ ಫೋನ್ ದೊಡ್ಡ ಚರ್ಚೆಗೆ ಕಾರಣವಾಗುವ ಸಾಧ್ಯತೆ ಇದೆ. ಈ ಕುರಿತು ನಾವು ಕೂಡ ಹೆಚ್ಚು ಕುತೂಹಲವನ್ನು ಹೊಂದಿದ್ದೇವೆ.