ಭಾರತದಲ್ಲಿ iQOO Z10R ಬಿಡುಗಡೆ: ₹20,000 ಒಳಗಿನ ಹೈ-ಪರ್ಫಾರ್ಮೆನ್ಸ್ ಫೋನ್!

ಜನಪ್ರಿಯ ಮೊಬೈಲ್ ಬ್ರ್ಯಾಂಡ್ iQOO ತನ್ನ ಹೊಸ ಸ್ಮಾರ್ಟ್‌ಫೋನ್ iQOO Z10R ಅನ್ನು ಭಾರತದಲ್ಲಿಂದು ಬಿಡುಗಡೆ ಮಾಡಿದೆ. iQOO ನ Z ಸರಣಿಗೆ ಹೊಸದಾಗಿ ಸೇರ್ಪಡೆಗೊಂಡಿರುವ ಈ ಹೊಸ ಫೋನ್ 20,000 ರೂ.ಗಿಂತ ಕಡಿಮೆ ಬೆಲೆಯಲ್ಲಿ ಅನೇಕ ಆಕರ್ಷಕ ವೈಶಿಷ್ಟ್ಯಗಳನ್ನು ಹೊತ್ತು ಬಿಡುಗಡೆಯಾಗಿದ್ದು, ಇದರಲ್ಲಿ ಕ್ವಾಡ್-ಕರ್ವ್ಡ್ AMOLED ಸ್ಕ್ರೀನ್, 120Hz ರಿಫ್ರೆಶ್ ರೇಟ್ ಮತ್ತು ಬೃಹತ್ 5,700mAh ಬ್ಯಾಟರಿಯಂತಹ ಪ್ರಮುಖ ವೈಶಿಷ್ಟ್ಯಗಳಿವೆ. ಹಾಗಾದರೆ, ಹೊಸ iQOO Z10R ಸ್ಮಾರ್ಟ್‌ಫೋನ್ ಹೇಗಿದೆ?, ಬೆಲೆಗಳು ಎಷ್ಟು ಎಂಬ ಸಂಪೂರ್ಣ ವಿವರಗಳನ್ನು ನೋಡೋಣ ಬನ್ನಿ.

iQOO Z10R: ಪ್ರಮುಖ ವೈಶಿಷ್ಟ್ಯಗಳು

ಹೊಸ iQOO Z10R ಸ್ಮಾರ್ಟ್‌ಫೋನ್ 6.77-ಇಂಚಿನ FHD+ ಕ್ವಾಡ್-ಕರ್ವ್ಡ್ ಸ್ಕ್ರೀನ್ ಅನ್ನು ಹೊಂದಿದ್ದು, ಇದು 120Hz ರಿಫ್ರೆಶ್ ದರವನ್ನು ನೀಡುತ್ತದೆ. ಈ ಫೋನ್ ಕೇವಲ 7.39mm ದಪ್ಪವಿದ್ದು, ಭಾರತದಲ್ಲಿ ಲಭ್ಯವಿರುವ ಅತ್ಯಂತ ತೆಳುವಾದ ಕ್ವಾಡ್-ಕರ್ವ್ಡ್ ಫೋನ್ ಎಂದು iQOO ಹೇಳಿಕೊಂಡಿದೆ. ಅಕ್ವಾಮರೀನ್ ಮತ್ತು ಮೂನ್‌ಸ್ಟೋನ್ ಎಂಬ ಎರಡು ಬಣ್ಣಗಳಲ್ಲಿ ಲಭ್ಯವಿರುವ ಈ ಫೋನ್ ಹಿಂಭಾಗದ ವಿನ್ಯಾಸವು iQOO Z9 ಮಾದರಿಗಳಿಗೆ ಹೋಲುತ್ತದೆ.

ಕಾರ್ಯಕ್ಷಮತೆಯ ವಿಷಯದಲ್ಲಿ, iQOO Z10R ಮೀಡಿಯಾ ಟೆಕ್ ಡೈಮೆನ್ಸಿಟಿ 7400 5G ಚಿಪ್‌ಸೆಟ್‌ನಿಂದ ಚಾಲಿತವಾಗಿದೆ. ಇದು 12GB RAM ಮತ್ತು 256GB ವರೆಗಿನ ಸಂಗ್ರಹಣೆಯೊಂದಿಗೆ ಲಭ್ಯವಿದೆ. ಈ ಫೋನ್ 20,000 ರೂ.ಗಿಂತ ಕಡಿಮೆ ಬೆಲೆಯಲ್ಲಿ ಲಭ್ಯವಿರುವ ಅತ್ಯಂತ ವೇಗದ ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್ ಎಂದು ಕಂಪನಿ ಹೇಳಿಕೊಂಡಿದೆ, ಇದರ AnTuTu ಸ್ಕೋರ್ 750,000 ಆಗಿದೆ. ಗೇಮಿಂಗ್ ಮತ್ತು ಹೆಚ್ಚಿನ ಬಳಕೆಯ ಸಮಯದಲ್ಲಿ ಉಷ್ಣತೆಯನ್ನು ನಿಯಂತ್ರಿಸಲು, iQOO ದೊಡ್ಡ ಗ್ರ್ಯಾಫೈಟ್ ಪ್ರದೇಶವನ್ನು ಅಳವಡಿಸಿದೆ.

ಸಾಫ್ಟ್‌ವೇರ್ ವಿಭಾಗದಲ್ಲಿ, iQOO Z10R ಆಂಡ್ರಾಯ್ಡ್ 15 ಆಧಾರಿತ Funtouch OS 15 ಅನ್ನು ರನ್ ಮಾಡುತ್ತದೆ. ಇದು ಸರ್ಕಲ್ ಟು ಸರ್ಚ್, AI ನೋಟ್ ಅಸಿಸ್ಟ್, AI ಸ್ಕ್ರೀನ್ ಟ್ರಾನ್ಸ್‌ಲೇಷನ್ ಮತ್ತು AI ಟ್ರಾನ್ಸ್‌ಸ್ಕ್ರಿಪ್ಟ್ ಅಸಿಸ್ಟ್‌ನಂತಹ ಹಲವಾರು AI ವೈಶಿಷ್ಟ್ಯಗಳನ್ನು ಬೆಂಬಲಿಸುತ್ತದೆ.

ಕ್ಯಾಮೆರಾ ವಿಭಾಗದಲ್ಲಿ, ಈ ಫೋನ್‌ನ ಹಿಂಭಾಗದಲ್ಲಿ 50-ಮೆಗಾಪಿಕ್ಸೆಲ್ ಸೋನಿ IMX882 ಸಂವೇದಕವಿದ್ದು, ಇದು 4K ರೆಕಾರ್ಡಿಂಗ್ ಸಾಮರ್ಥ್ಯವನ್ನು ಹೊಂದಿದೆ. ಇದನ್ನು 2-ಮೆಗಾಪಿಕ್ಸೆಲ್ ಡೆಪ್ತ್ ಸೆನ್ಸರ್‌ನೊಂದಿಗೆ ಜೋಡಿಸಲಾಗಿದೆ. ಸೆಲ್ಫಿಗಾಗಿ, Z10R 32-ಮೆಗಾಪಿಕ್ಸೆಲ್ ಮುಂಭಾಗದ ಕ್ಯಾಮೆರಾವನ್ನು ಹೊಂದಿದ್ದು, ಅದು 4K ವೀಡಿಯೊ ರೆಕಾರ್ಡಿಂಗ್ ಅನ್ನು ಸಹ ಬೆಂಬಲಿಸುತ್ತದೆ.

iQOO Z10R 90W ವೇಗದ ವೈರ್ಡ್ ಚಾರ್ಜಿಂಗ್ ಬೆಂಬಲದೊಂದಿಗೆ ಬೃಹತ್ 5,700mAh ಬ್ಯಾಟರಿಯನ್ನು ಹೊಂದಿದೆ. ಗೇಮಿಂಗ್ ಸಮಯದಲ್ಲಿ ಶಾಖದ ನಿರ್ಮಾಣವನ್ನು ತಡೆಯಲು ಬೈಪಾಸ್ ಚಾರ್ಜಿಂಗ್ ವೈಶಿಷ್ಟ್ಯವನ್ನು ಸಹ ಇದು ಬೆಂಬಲಿಸುತ್ತದೆ. ಹೆಚ್ಚುವರಿಯಾಗಿ, ಡ್ಯುಯಲ್ ಸ್ಟಿರಿಯೊ ಸ್ಪೀಕರ್‌ಗಳು, IP68/69 ರೇಟಿಂಗ್ ಮತ್ತು MIL-STD 810H ಪ್ರಮಾಣೀಕರಣದೊಂದಿಗೆ ಮಿಲಿಟರಿ ದರ್ಜೆಯ ಆಘಾತ ನಿರೋಧಕತೆ ಈ ಫೋನಿನ ಪ್ರಮುಖ ವೈಶಿಷ್ಟ್ಯಗಳಾಗಿವೆ.

ಬೆಲೆ ಮತ್ತು ಲಭ್ಯತೆ

ಭಾರತದಲ್ಲಿ iQOO Z10R ಫೋನ್ ಮೂರು ವಿಭಿನ್ನ ಶೇಖರಣಾ ಆಯ್ಕೆಗಳಲ್ಲಿ ಲಭ್ಯವಿದೆ. ಇದರ ಮೂಲ 8GB RAM + 128GB ಶೇಖರಣಾ ಮಾದರಿಯ ಬೆಲೆ 19,499 ರೂ. ಇದೆ. 8GB + 256GB ಆಯ್ಕೆಗೆ 21,499 ರೂ. ಮತ್ತು 12GB + 256GB ಉನ್ನತ ಶ್ರೇಣಿಯ ಮಾದರಿಗೆ 23,499 ರೂ. ನಿಗದಿಪಡಿಸಲಾಗಿದೆ. ಆದರೆ, ಪರಿಚಯಾತ್ಮಕ ಕೊಡುಗೆಯಾಗಿ, ಈ ಫೋನ್‌ಗಳು ಕ್ರಮವಾಗಿ 17,499 ರೂ., 19,499 ರೂ. ಮತ್ತು 21,499 ರೂ.ಗೆ ಲಭ್ಯವಿರುತ್ತವೆ.

ಇನ್ನು ಈ ಫೋನ್ ಜುಲೈ 29 ರಂದು ಮಧ್ಯಾಹ್ನದಿಂದ ಅಮೆಜಾನ್ ಮತ್ತು iQOO ನ ಅಧಿಕೃತ ಭಾರತದ ವೆಬ್‌ಸೈಟ್‌ಗಳಮೂಲಕ ಮಾರಾಟಕ್ಕೆ ಲಭ್ಯವಿರುತ್ತದೆ. ಗ್ರಾಹಕರು ಆಯ್ದ ಕಾರ್ಡ್‌ಗಳಲ್ಲಿ 2,000 ರೂ.ಗಳ ತ್ವರಿತ ಬ್ಯಾಂಕ್ ರಿಯಾಯಿತಿ ಅಥವಾ 2,000 ರೂ.ಗಳ ವಿನಿಮಯ ಬೋನಸ್ ಪಡೆಯಬಹುದು. ಜೊತೆಗೆ, 6 ತಿಂಗಳ ನೋ-ಕಾಸ್ಟ್ EMI ಆಯ್ಕೆಯೂ ಲಭ್ಯವಿದೆ. ಈ ಎಲ್ಲವೂ ಸೀಮಿತ ಅವಧಿಯ ಕೊಡುಗೆಯಾಗಿರುತ್ತದೆ ಎಂದು ಕಂಪೆನಿಯು ತಿಳಿಸಿದೆ.