Lava Play Ultra 5G: ಭಾರತದ ಮಾರುಕಟ್ಟೆಗೆ ಆಗಸ್ಟ್ 20 ರಂದು ಎಂಟ್ರಿ!

ಭಾರತೀಯ ಮೊಬೈಲ್ ಬ್ರ್ಯಾಂಡ್ ಲಾವಾ ಗೇಮಿಂಗ್ ಪ್ರಿಯರಿಗಾಗಿ ಹೊಸ ಫೋನ್ ಒಂದನ್ನು ಬಿಡುಗಡೆ ಮಾಡಲು ಸಜ್ಜಾಗಿದೆ. ದೇಶದ ಯುವ ಗೇಮಿಂಗ್ ಪ್ರಿಯರನ್ನು ಗುರಿಯಾಗಿಸಿಕೊಂಡು 'ಲಾವಾ ಪ್ಲೇ ಅಲ್ಟ್ರಾ 5G' (Lava Play Ultra 5G) ಹೆಸರಿನಲ್ಲಿ ಕಂಪೆನಿಯ ಮೊದಲ ಗೇಮಿಂಗ್-ಕೇಂದ್ರಿತ ಫೋನ್ ಅನ್ನು ಕಂಪೆನಿಯು ಪರಿಚಯಿಸುತ್ತಿದ್ದು, ಈ ಪೋನ್ ಇದೇ ವಾರಾಂತ್ಯದಲ್ಲಿ ದೇಶದಲ್ಲಿ ಬಿಡುಗಡೆಯಾಗಲಿದೆ ಎಂದು ಕಂಪನಿ ಅಧಿಕೃತವಾಗಿ ಘೋಷಿಸಿದೆ. ಈ ಹೊಸ ಲಾವಾ ಪ್ಲೇ ಅಲ್ಟ್ರಾ 5G ಫೋನಿನ ಫೀಚರ್ಸ್, ವಿನ್ಯಾಸ ಮತ್ತು ನಿರೀಕ್ಷಿತ ಬೆಲೆಯ ಕುರಿತು ಸಂಪೂರ್ಣ ಮಾಹಿತಿ ಇಲ್ಲಿದೆ.

ಹೊಸ ಲಾವಾ ಪ್ಲೇ ಅಲ್ಟ್ರಾ 5G ಫೋನ್ ಆಗಸ್ಟ್ 20 ರಂದು ಬಿಡುಗಡೆಯಾಗಲಿದೆ ಎಂದು ಲಾವಾ ಕಂಪನಿ ತನ್ನ ಅಧಿಕೃತ ಎಕ್ಸ್ (ಹಿಂದಿನ ಟ್ವಿಟರ್) ಖಾತೆಯಲ್ಲಿ ಖಚಿತಪಡಿಸಿದೆ. ಬಿಡುಗಡೆಯ ನಂತರ, ಈ ಫೋನ್ ಜನಪ್ರಿಯ ಇ-ಕಾಮರ್ಸ್ ತಾಣವಾದ ಅಮೆಜಾನ್‌ನಲ್ಲಿ ಖರೀದಿಗೆ ಲಭ್ಯವಾಗಲಿದೆ. ಅಮೆಜಾನ್ ಕೂಡ ಈಗಾಗಲೇ ಈ ಫೋನ್ ಕುರಿತಾದ ಪ್ರತ್ಯೇಕ ಮೈಕ್ರೋಸೈಟ್ ಅನ್ನು ತನ್ನ ವೆಬ್‌ಸೈಟ್‌ನಲ್ಲಿ ರಚಿಸಿದೆ, ಇದು ಫೋನಿನ ಬಿಡುಗಡೆಯ ಕುರಿತು ಹೆಚ್ಚಿನ ನಿರೀಕ್ಷೆಯನ್ನು ಹೆಚ್ಚಿಸಿದೆ.

ಈ ಮೈಕ್ರೋಸೈಟ್ ಯಾವುದೇ ಫೀಚರ್‌ಗಳನ್ನು ಬಹಿರಂಗಪಡಿಸದಿದ್ದರೂ, "ಮೊಬೈಲ್ ಗೇಮಿಂಗ್ ಕಾರ್ಯಕ್ಷಮತೆಯ ಹೊಸ ಯುಗವು ಈಗ ಪ್ರಾರಂಭವಾಗುತ್ತದೆ" ಎಂದು ಹೇಳುವ ಮೂಲಕ ಫೋನ್‌ನ ಗೇಮಿಂಗ್ ಸಾಮರ್ಥ್ಯಗಳ ಬಗ್ಗೆ ಸುಳಿವು ನೀಡಿದೆ.ಈ ಹಿಂದಿನ ಟೀಸರ್ ಚಿತ್ರಗಳಲ್ಲಿ ಲಾವಾ ಪ್ಲೇ ಅಲ್ಟ್ರಾ 5G ಯ ವಿನ್ಯಾಸದ ಬಗ್ಗೆ ಕೆಲವು ಸುಳಿವುಗಳು ಲಭ್ಯವಾಗಿವೆ. ಫೋನ್‌ನ ಹಿಂಭಾಗವು ಆಕರ್ಷಕವಾದ ಗಾಜಿನ ವಿನ್ಯಾಸವನ್ನು ಹೊಂದಿದ್ದು, ಅದರ ಮೇಲೆ ಲಾವಾ ಮತ್ತು 5G ಬ್ರ್ಯಾಂಡಿಂಗ್ ಇರಲಿದೆ. ಪವರ್ ಮತ್ತು ವಾಲ್ಯೂಮ್ ಬಟನ್‌ಗಳು ಬಲ ಬದಿಯಲ್ಲಿ ಇರುವಂತೆ ಕಾಣುತ್ತಿದ್ದು, ಸಿಮ್ ಟ್ರೇ ಎಡಭಾಗದಲ್ಲಿ ಇರಲಿದೆ. ಇದರ ಜೊತೆಗೆ, ಫೋನ್‌ನ ಹಿಂಭಾಗದಲ್ಲಿ 64-ಮೆಗಾಪಿಕ್ಸೆಲ್ "AI ಮ್ಯಾಟ್ರಿಕ್ಸ್" ಕ್ಯಾಮೆರಾ ಇರಲಿದೆ ಎಂಬ ಸುಳಿವು ಕೂಡ ಟೀಸರ್ ಚಿತ್ರಗಳಲ್ಲಿ ಕಂಡುಬಂದಿದೆ.

ಇದಲ್ಲದೆ, ಆನ್‌ಲೈನ್‌ನಲ್ಲಿ ಹರಿದಾಡುತ್ತಿರುವ ಸೋರಿಕೆಯ ವರದಿಗಳ ಪ್ರಕಾರ, ಲಾವಾ ಪ್ಲೇ ಅಲ್ಟ್ರಾ 5G ಫೋನ್ ಕೆಲವು ಪ್ರಭಾವಶಾಲಿ ವೈಶಿಷ್ಟ್ಯಗಳನ್ನು ಹೊಂದಿರಬಹುದು. ಇದು 120Hz ರಿಫ್ರೆಶ್ ದರದೊಂದಿಗೆ 6.67 ಇಂಚಿನ ಅಮೋಲೆಡ್ (AMOLED) ಡಿಸ್ಪ್ಲೇಯನ್ನು ಒಳಗೊಂಡಿರಲಿದೆ.ಗೇಮಿಂಗ್ ಪ್ರಿಯರಿಗೆ ಉತ್ತಮ ಕಾರ್ಯಕ್ಷಮತೆ ನೀಡುವ ಸಲುವಾಗಿ, ಈ ಫೋನಿನಲ್ಲಿ ಮೀಡಿಯಾಟೆಕ್ ಡೈಮೆನ್ಸಿಟಿ 7300 SoC ಪ್ರೊಸೆಸರ್ ಅನ್ನು ಬಳಸಲಾಗಿದೆ ಎಂದು ಹೇಳಲಾಗಿದೆ. UFS 3.1 ಸ್ಟೋರೇಜ್ ಜೊತೆಗೆ ಈ ಪ್ರೊಸೆಸರ್ ಸುಮಾರು 7 ಲಕ್ಷಕ್ಕೂ ಹೆಚ್ಚು AnTuTu ಬೆಂಚ್‌ಮಾರ್ಕ್ ಸ್ಕೋರ್ ಅನ್ನು ನೀಡುವ ಸಾಮರ್ಥ್ಯ ಹೊಂದಿದೆ ಎಂದು ವರದಿಯಾಗಿದೆ. ಅಲ್ಲದೆ, ಉತ್ತಮ ಗೇಮಿಂಗ್ ಅನುಭವಕ್ಕಾಗಿ ಗೇಮ್‌ಬೂಸ್ಟ್ ಮೋಡ್ ಅನ್ನು ಕೂಡ ಈ ಫೋನ್‌ನಲ್ಲಿ ಸೇರಿಸುವ ಸಾಧ್ಯತೆ ಇದೆ.

ಕ್ಯಾಮೆರಾ ವಿಭಾಗಕ್ಕೆ ಬಂದರೆ, ಲಾವಾ ಪ್ಲೇ ಅಲ್ಟ್ರಾ 5G ಫೋನ್ ಹಿಂಭಾಗದಲ್ಲಿ ಡ್ಯುಯಲ್ ಕ್ಯಾಮೆರಾ ಸೆಟಪ್ ಅನ್ನು ಹೊಂದಿದ್ದು, ಇದರಲ್ಲಿ ಸೋನಿ IMX682 ಪ್ರೈಮರಿ ಸೆನ್ಸಾರ್ ಸಹ ಇರಬಹುದು. ಜೊತೆಗೆ, ಇದು 64-ಮೆಗಾಪಿಕ್ಸೆಲ್ AI ಮ್ಯಾಟ್ರಿಕ್ಸ್ ಕ್ಯಾಮೆರಾ ತಂತ್ರಜ್ಞಾನವನ್ನು ಬೆಂಬಲಿಸುತ್ತದೆ. ಇತರ ವೈಶಿಷ್ಟ್ಯಗಳಲ್ಲಿ, ಇಮ್ಮರ್ಸಿವ್ ಆಡಿಯೋ ಅನುಭವಕ್ಕಾಗಿ ಡ್ಯುಯಲ್ ಸ್ಟೀರಿಯೊ ಸ್ಪೀಕರ್‌ಗಳು ಮತ್ತು ಶಬ್ದ ರದ್ದತಿಗಾಗಿ ಡ್ಯುಯಲ್ ಮೈಕ್ರೋಫೋನ್‌ಗಳು ಇರಬಹುದು. ಫೋನ್‌ನ ಬ್ಯಾಟರಿ ಸಾಮರ್ಥ್ಯವು 5,000mAh ಆಗಿದ್ದು, 33W ವೈರ್ಡ್ ಫಾಸ್ಟ್ ಚಾರ್ಜಿಂಗ್ ಬೆಂಬಲದೊಂದಿಗೆ ಬರಲಿದೆ ಎಂದು ವರದಿಯಾಗಿದೆ. ಈ ಎಲ್ಲಾ ವಿಶೇಷತೆಗಳನ್ನು ಗಮನಿಸಿದರೆ, ಲಾವಾ ಪ್ಲೇ ಅಲ್ಟ್ರಾ 5G ಒಂದು ಉತ್ತಮ ಗೇಮಿಂಗ್ ಫೋನ್ ಆಗಿರಲಿದೆ ಎಂದು ನಿರೀಕ್ಷಿಸಲಾಗಿದೆ. ಇದರ ಬೆಲೆ ಮತ್ತು ಸಂಪೂರ್ಣ ವೈಶಿಷ್ಟ್ಯಗಳ ಕುರಿತು ಆಗಸ್ಟ್ 20ರಂದು ಬಿಡುಗಡೆಯ ಸಂದರ್ಭದಲ್ಲಿ ಸ್ಪಷ್ಟ ಮಾಹಿತಿ ದೊರೆಯಲಿದೆ.