8,000mAh ಬ್ಯಾಟರಿ & IP69K ರೇಟಿಂಗ್: ಒಪ್ಪೋ A7 ಪ್ರೋ ಲಾಂಚ್, ಈ ಫೋನ್ ವಿಶೇಷತೆಗಳೇನು?

ಒಪ್ಪೋ ಸಂಸ್ಥೆಯು ತನ್ನ ಹೊಸ 'A7 ಪ್ರೋ' ಸ್ಮಾರ್ಟ್‌ಫೋನ್ ಅನ್ನು ಸೆಪ್ಟೆಂಬರ್ 11 ರಂದು ಚೀನಾದಲ್ಲಿ ಬಿಡುಗಡೆ ಮಾಡಿದೆ. ಬೃಹತ್ 8,000mAh ಬ್ಯಾಟರಿ ಹಾಗೂ ಅತ್ಯಂತ ಗಟ್ಟಿಮುಟ್ಟಾದ IP69K ರೇಟಿಂಗ್ ಈ ಫೋನ್‌ನ ಪ್ರಮುಖ ಆಕರ್ಷಣೆಯಾಗಿದೆ. ಕಲರ್‌ಓಎಸ್ 16 ಆಧಾರಿತ ಮೀಡಿಯಾಸ್ಟೆಕ್ ಡೈಮೆನ್ಸಿಟಿ 6360 ಮ್ಯಾಕ್ಸ್ ಪ್ರೊಸೆಸರ್ ಹೊಂದಿರುವ ಈ ಫೋನ್, 120Hz ರಿಫ್ರೆಶ್ ರೇಟ್ ಬೆಂಬಲಿಸುವ 6.57 ಇಂಚಿನ OLED ಡಿಸ್‌ಪ್ಲೇ ಹೊಂದಿದೆ. ಚೀನಾದಲ್ಲಿ ಪ್ರಿ-ಆರ್ಡರ್ ಆರಂಭವಾಗಿದ್ದು, ಆರಂಭಿಕ ಬೆಲೆ CNY 2,199 ನಿಗದಿಯಾಗಿದೆ ಮತ್ತು ಇಂದಿನಿಂದಲೇ ಮಾರಾಟವೂ ಶರುವಾಗಿದೆ. ಹಾರಿಜಾಂಟಲ್ ಕ್ಯಾಮೆರಾ ಮಾಡ್ಯೂಲ್ ಹೊಂದಿರುವ ಈ ಫೋನ್, ಮೂರು ಆಕರ್ಷಕ ಬಣ್ಣಗಳಲ್ಲಿ ಲಭ್ಯವಿದೆ.

ಈ ಫೋನ್‌ನ ಡಿಸ್‌ಪ್ಲೇಯು 1080×2372 ಪಿಕ್ಸೆಲ್ ರೆಸಲ್ಯೂಶನ್, 1,400 ನಿಟ್ಸ್ ಪೀಕ್ ಬ್ರೈಟ್‌ನೆಸ್ ಮತ್ತು 240Hz ಟಚ್ ಸ್ಯಾಂಪ್ಲಿಂಗ್ ರೇಟ್ ಹೊಂದಿದೆ. 45W SuperVOOC ಫಾಸ್ಟ್ ಚಾರ್ಜಿಂಗ್ ಜತೆಗೆ, ಇತರ ಆಕ್ಸೆಸರಿಗಳನ್ನು ಚಾರ್ಜ್ ಮಾಡಲು 10W ವೈರ್ಡ್ ರಿವರ್ಸ್ ಚಾರ್ಜಿಂಗ್ ಬೆಂಬಲವೂ ಇಲ್ಲಿದೆ. ಧೂಳು ಮತ್ತು ನೀರಿನಿಂದ ರಕ್ಷಣೆಗೆ ಇದು IP66, IP68, IP69 ಮತ್ತು ಅತ್ಯುನ್ನತ IP69K ರೇಟಿಂಗ್‌ಗಳನ್ನು ಪಡೆದುಕೊಂಡಿದೆ. ಕ್ಯಾಮೆರಾ ವಿಭಾಗದಲ್ಲಿ 50MP ಹಿಂಬದಿ ಕ್ಯಾಮೆರಾ ಹಾಗೂ 8MP ಸೆಲ್ಫಿ ಶೂಟರ್ ನೀಡಲಾಗಿದೆ. ಇಷ್ಟೇ ಅಲ್ಲದೆ, ಈ ಬ್ಯಾಟರಿಯು ಬರೋಬ್ಬರಿ 2,000 ಚಾರ್ಜ್ ಸೈಕಲ್‌ಗಳವರೆಗೆ ದೀರ್ಘ ಆಯುಷ್ಯ ಹೊಂದಿರಲಿದೆ ಎಂದು ಒಪ್ಪೋ ಹೇಳಿಕೊಂಡಿದೆ.

ಒಪ್ಪೋ A7 ಪ್ರೋ ಚೀನಾ ಲಾಂಚ್‌ನ ಪ್ರಮುಖ ಮುಖ್ಯಾಂಶಗಳು

ISO 20653 ಮಾನದಂಡದ ಪ್ರಕಾರ, IP69K ರೇಟಿಂಗ್ ಎಂದರೆ ಅಧಿಕ ಒತ್ತಡ ಮತ್ತು ಹೆಚ್ಚಿನ ತಾಪಮಾನದ ನೀರನ್ನು ತಡೆಯುವ ಸಾಮರ್ಥ್ಯ ಎಂದರ್ಥ. ಈ ಫೋನ್ 85-ಡಿಗ್ರಿ ತಾಪಮಾನದ ನೀರಿನ ಸ್ಪ್ರೇ ಹಾಗೂ 1.5 ಮೀಟರ್ ವರೆಗಿನ ನೀರಿನ ಆಳದಲ್ಲೂ ಸುರಕ್ಷಿತವಾಗಿರುತ್ತದೆ ಎಂದು ಒಪ್ಪೋ ತಿಳಿಸಿದೆ. ಫೋನ್‌ನ ಹೌಸಿಂಗ್ ಅಲೋಯ್ ಫ್ರೇಮ್, ಇಂಪ್ಯಾಕ್ಟ್ ಬೀಮ್‌ಗಳು ಮತ್ತು ದಪ್ಪಗಿನ ಗ್ಲಾಸ್ ಹೊಂದಿರುವ 'ಡೈಮಂಡ್' ವಿನ್ಯಾಸದಲ್ಲಿದೆ. ಜತೆಗೆ, ಇದು 15 ಜಿಜೆಬಿ 150A-2009 ಮಿಲಿಟರಿ ಶ್ರೇಣಿಯ ಪರೀಕ್ಷೆಗಳನ್ನು ಪಾಸು ಮಾಡಿದೆ. ಅಂದರೆ, ದಿನನಿತ್ಯದ ಬಳಕೆಗೆ ಆರಾಮದಾಯಕವಾಗಿದ್ದು, ಅತ್ಯಂತ ಗಟ್ಟಿಮುಟ್ಟಾಗಿದೆ.

ಒಪ್ಪೋ A7 ಪ್ರೋ ಭಾರತ ಲಾಂಚ್ ಮತ್ತು BIS ಲಿಸ್ಟಿಂಗ್

ಜುಲೈ ಕೊನೆಯಲ್ಲಿ ಒಪ್ಪೋದ CPH2931 ಮತ್ತು CPH2913 ಎಂಬ ಎರಡು ಮಾಡೆಲ್‌ಗಳು ಭಾರತದ ಬಿಐಎಸ್ (BIS) ಪ್ರಮಾಣೀಕರಣ ತಾಣದಲ್ಲಿ ಕಾಣಿಸಿಕೊಂಡಿದ್ದವು. ಬ್ರೆಜಿಲ್‌ನ ANATEL ಲಿಸ್ಟಿಂಗ್ ಆಧಾರದಲ್ಲಿ, CPH2931 ಮಾಡೆಲ್ ಈ A7 ಪ್ರೋ ಫೋನ್ ಇರಬಹುದು ಎಂದು ವಿಶ್ಲೇಷಕರು ಅಂದಾಜಿಸಿದ್ದಾರೆ. ಆದರೆ CPH2913 ಫೈಂಡ್ X10 ಸರಣಿಗೆ ಸೇರಿರುವುದರಿಂದ ನಿಖರ ಮಾಹಿತಿ ಕಾದುನೋಡಬೇಕಿದೆ. ಈ ವಾರ ರೀಟೇಲ್ ಪೇಜ್‌ಗಳು ಅಪ್‌ಡೇಟ್ ಆಗಲಿದ್ದು, ಒಪ್ಪೋ ಇಂಡಿಯಾ ಅಥವಾ ಫ್ಲಿಪ್‌ಕಾರ್ಟ್‌ನಲ್ಲಿ 'Notify Me' ಪೇಜ್‌ಗಳು ಶೀಘ್ರವೇ ಲೈವ್ ಆಗುವ ಸಾಧ್ಯತೆಯಿದೆ.

ಒಪ್ಪೋ A7 ಪ್ರೋ ನಿರೀಕ್ಷಿತ ಬೆಲೆ ಮತ್ತು ಸ್ಪರ್ಧಿಗಳು

ಭಾರತದಲ್ಲಿ ಇದರ ಬೆಲೆ ಎಷ್ಟು ಎಂಬುದು ಇನ್ನೂ ಅಧಿಕೃತವಾಗಿಲ್ಲ. ಚೀನಾದಲ್ಲಿ CNY 2,199 ರಿಂದ 2,499 ಬೆಲೆಯಲ್ಲಿ ಲಾಂಚ್ ಆಗಿರುವುದರಿಂದ, ಭಾರತೀಯ ಮಾರುಕಟ್ಟೆಯಲ್ಲಿ ಕಠಿಣ ಸ್ಪರ್ಧೆ ನೀಡಲು ಒಪ್ಪೋ ಇದನ್ನು ₹20,000 ರಿಂದ ₹25,000 ಶ್ರೇಣಿಯಲ್ಲಿ ಪರಿಚಯಿಸಬೇಕಾಗಬಹುದು. ಬೃಹತ್ ಬ್ಯಾಟರಿ ಹೊಂದಿರುವ ಇನ್ಫಿನಿಕ್ಸ್, ಟೆಕ್ನೋ, ಲಾವಾದ ಮುಂಬರುವ ಬ್ಲೇಜ್ ಸರಣಿ ಹಾಗೂ ರೆಡ್ಮಿ, ರಿಯಲ್ ಮಿ ಫೋನ್‌ಗಳಿಗೆ ಇದು ಪ್ರಬಲ ಸವಾಲಾಗಲಿದೆ. ಭಾರತೀಯ ಆವೃತ್ತಿಯಲ್ಲೂ 8,000mAh ಬ್ಯಾಟರಿ, 120Hz OLED, IP69K, 45W ಚಾರ್ಜಿಂಗ್ ಮತ್ತು ಇದೇ ಕ್ಯಾಮೆರಾ ಸೆಟಪ್ ಇರಲಿದೆಯೇ ಎಂಬುದನ್ನು ಕಾದುನೋಡಬೇಕಿದೆ.