ಭಾರತಕ್ಕೆ Oppo F31 ಸರಣಿ ಆಗಮನ ಯಾವಾಗ?..ಇಲ್ಲಿದೆ ಸಂಪೂರ್ಣ ವಿವರ!

ಭಾರತದಲ್ಲಿ ದೊಡ್ಡ ಅಭಿಮಾನಿ ಬಳಗವನ್ನು ಹೊಂದಿರುವ Oppo F-ಸರಣಿಯ ಸ್ಮಾರ್ಟ್‌ಫೋನ್‌ಗಳ ಹೊಸ ಆವೃತ್ತಿ, Oppo F31 ಸರಣಿಯು ಶೀಘ್ರವೇ ಬರುವುದಾಗಿ ತಿಳಿದು ಬಂದಿದೆ.! ಹೌದು, ಈ ವರ್ಷದ ಮಾರ್ಚ್‌ನಲ್ಲಿ ಬಿಡುಗಡೆಯಾದ Oppo F29 ಲೈನ್‌ಅಪ್‌ನ ಉತ್ತರಾಧಿಕಾರಿಯಾಗಿ, ಈ ಹೊಸ ಸರಣಿಯ ವಿನ್ಯಾಸ ರೆಂಡರ್‌ಗಳು ಮತ್ತು ಕೆಲವು ಪ್ರಮುಖ ವಿಶೇಷತೆಗಳು ಹೊರಬಿದ್ದಿವೆ.! ಈ ಲೈನ್‌ಅಪ್‌ನಲ್ಲಿ Oppo F31, Oppo F31 Pro, ಮತ್ತು Oppo F31 Pro+ ಮಾದರಿಗಳು ಇರಲಿವೆ ಎಂದು ಹೇಳಲಾಗಿದ್ದು, ಸೋರಿಕೆಯಾದ ಮಾಹಿತಿಗಳು Oppo ಅಭಿಮಾನಗಳಲ್ಲಿ ಭಾರೀ ಕುತೂಹಲವನ್ನು ಮೂಡಿಸಿದೆ.!

Oppo F31 ಸರಣಿ: ವಿನ್ಯಾಸ ಮತ್ತು ಮಾದರಿಗಳು
ಟಿಪ್‌ಸ್ಟರ್ ಅಭಿಷೇಕ್ ಯಾದವ್ (@yabhishekhd) ಎಕ್ಸ್ (ಹಿಂದೆ ಟ್ವಿಟರ್) ನಲ್ಲಿ ಹಂಚಿಕೊಂಡಿರುವ ರೆಂಡರ್‌ಗಳು Oppo F31 ಸರಣಿಯ ವಿನ್ಯಾಸದ ಬಗ್ಗೆ ಉತ್ತಮ ಸುಳಿವು ನೀಡಿವೆ. ಈ ಚಿತ್ರಗಳ ಪ್ರಕಾರ, Oppo F31 Pro+ ಮಾದರಿಯು ಬಿಳಿ, ಗುಲಾಬಿ ಮತ್ತು ನೀಲಿ ಬಣ್ಣಗಳಲ್ಲಿ ಲಭ್ಯವಿದ್ದು, ಅದರ ಹಿಂಭಾಗದಲ್ಲಿ ವೃತ್ತಾಕಾರದ ಕ್ಯಾಮೆರಾ ಮಾಡ್ಯೂಲ್ ಇದೆ. ಮತ್ತೊಂದೆಡೆ, Oppo F31 Pro ಮಾದರಿಯು ಚಿನ್ನ ಮತ್ತು ಕಪ್ಪು ಬಣ್ಣಗಳಲ್ಲಿ ಕಾಣಿಸಿಕೊಂಡಿದ್ದು, ಇದು ಬಾಗಿದ ಅಂಚುಗಳಿರುವ ಚೌಕಾಕಾರದ ಕ್ಯಾಮೆರಾ ದ್ವೀಪವನ್ನು ಹೊಂದಿದೆ.

ಸ್ಟ್ಯಾಂಡರ್ಡ್ Oppo F31 ಮಾದರಿಯು ಕೆಂಪು, ನೇರಳೆ ಮತ್ತು ನೀಲಿ ಬಣ್ಣದ ಆಯ್ಕೆಗಳಲ್ಲಿ ಕಾಣಿಸಿಕೊಂಡಿದೆ. ಇದರ ಹಿಂಭಾಗದಲ್ಲಿ ಚೌಕಾಕಾರದ ಕ್ಯಾಮೆರಾ ದ್ವೀಪವಿದ್ದು, ಕ್ಯಾಮೆರಾ ಸೆನ್ಸರ್‌ಗಳು ಮತ್ತು ಎಲ್‌ಇಡಿ ಫ್ಲ್ಯಾಶ್ ಲಂಬವಾಗಿ ಜೋಡಣೆಯಾಗಿವೆ. ಈ ಮೂರು ಮಾದರಿಗಳ ವಿಭಿನ್ನ ವಿನ್ಯಾಸಗಳು, ಪ್ರತಿ ಫೋನ್‌ಗೂ ವಿಶಿಷ್ಟವಾದ ನೋಟವನ್ನು ನೀಡುತ್ತವೆ. ಸೋರಿಕೆಯಾದ ಮಾಹಿತಿಯ ಪ್ರಕಾರ, ಎಲ್ಲಾ ಮೂರು F31 ಸರಣಿಯ ಸ್ಮಾರ್ಟ್‌ಫೋನ್‌ಗಳು ಬೃಹತ್ 7,000mAh ಬ್ಯಾಟರಿಯನ್ನು ಮತ್ತು ವಿಭಿನ್ನ ಚಿಪ್‌ಸೆಟ್‌ಗಳನ್ನು ಹೊಂದಿರಲಿವೆ.

ಪ್ರೊಸೆಸರ್ ವಿಭಾಗದಲ್ಲಿ, ಉನ್ನತ ಮಟ್ಟದ Oppo F31 Pro+ ಮಾದರಿಯು ಸ್ನಾಪ್‌ಡ್ರಾಗನ್ 7 Gen 3 ಪ್ರೊಸೆಸರ್‌ನಿಂದ ಶಕ್ತಿ ಪಡೆಯಲಿದ್ದು, 12GB RAM ಮತ್ತು 256GB ಸ್ಟೋರೇಜ್ ಆಯ್ಕೆಗಳಲ್ಲಿ ಲಭ್ಯವಾಗಬಹುದು. ಇದು ಫ್ಲಾಟ್ ಡಿಸ್‌ಪ್ಲೇಯನ್ನು ಸಹ ಹೊಂದಿರಲಿದೆ.Oppo F31 Pro ಮಾದರಿಯು MediaTek Dimensity 7300 SoC ಯಿಂದ ಕಾರ್ಯನಿರ್ವಹಿಸುವ ನಿರೀಕ್ಷೆಯಿದೆ, ಆದರೆ ಸಾಮಾನ್ಯ Oppo F31 ಮಾದರಿಯು MediaTek Dimensity 6300 SoC ಯಿಂದ ಶಕ್ತಿ ಪಡೆಯಲಿದೆ ಎಂದು ಹೇಳಲಾಗಿದೆ.

ವರದಿಗಳ ಪ್ರಕಾರ, Oppo F31 ಸರಣಿಯು ಸೆಪ್ಟೆಂಬರ್ 12 ರಿಂದ ಸೆಪ್ಟೆಂಬರ್ 14 ರ ನಡುವೆ ಭಾರತದಲ್ಲಿ ಬಿಡುಗಡೆಯಾಗುವ ಸಾಧ್ಯತೆಯಿದೆ. ಆದರೆ, Oppo ಕಂಪೆನಿಯು ಈ ಯಾವುದೇ ವಿಷಯವನ್ನು ಅಧಿಕೃತವಾಗಿ ದೃಢಪಡಿಸಿಲ್ಲ ಎಂಬುದನ್ನು ಗಮನಿಸಿ. ಇನ್ನು ಈ ಹೊಸ ಸರಣಿಯು, ಹಿಂದಿನ Oppo F29 ಶ್ರೇಣಿಗಿಂತ ಕೆಲವು ಉತ್ತಮ ಹಾರ್ಡ್‌ವೇರ್ ಅಪ್‌ಗ್ರೇಡ್‌ಗಳನ್ನು ಹೊಂದಲಿದೆ ಎಂದು ನಿರೀಕ್ಷಿಸಲಾಗಿದೆ.

ಈ ವರ್ಷದ ಮಾರ್ಚ್‌ನಲ್ಲಿ ಬಿಡುಗಡೆಯಾದ Oppo F29 ಮತ್ತು F29 Pro ಮಾದರಿಗಳು 6.7-ಇಂಚಿನ ಫುಲ್-HD+ AMOLED ಡಿಸ್‌ಪ್ಲೇ ಮತ್ತು 50-ಮೆಗಾಪಿಕ್ಸೆಲ್ ಹಿಂಬದಿಯ ಕ್ಯಾಮೆರಾವನ್ನು ಹೊಂದಿದ್ದವು. F29 ಮಾದರಿಯು ಸ್ನಾಪ್‌ಡ್ರಾಗನ್ 6 Gen 1 ಚಿಪ್‌ಸೆಟ್ ಹೊಂದಿದ್ದರೆ, F29 Pro MediaTek Dimensity 7300 Energy SoC ಯಿಂದ ಕಾರ್ಯನಿರ್ವಹಿಸುತ್ತಿತ್ತು. ಹಾಗಾದರೆ, ಮುಂಬರುವ Oppo F31 ಸರಣಿ ಫೋನ್‌ಗಳು ಏನೆಲ್ಲಾ ಪ್ರಮುಖ ವಿಶೇಷತೆಗಳನ್ನು ಹೊಂದಿರಬಹುದು?, ನೀವು ಯಾವ ಫೀಚರ್ ನಿರೀಕ್ಷಿಸುತ್ತಿದ್ದೀರಾ?, ಎಂಬುದನ್ನು ಈ ಕೆಳಗೆ ಕಾಮೆಂಟ್ ಮಾಡಿ ತಿಳಿಸಿ.