ಒಪ್ಪೋ K14 ಲೈಟ್ ರಿವ್ಯೂ: 7000mAh ಬ್ಯಾಟರಿ ಸೈ, ಆದ್ರೆ ಗೇಮಿಂಗ್ ಮತ್ತು ಚಾರ್ಜಿಂಗ್‌ನಲ್ಲಿ ಹೇಗಿದೆ?

ಒಪ್ಪೋ K14 ಲೈಟ್ ಸ್ಮಾರ್ಟ್‌ಫೋನ್ ಭಾರತದಲ್ಲಿ ಸೆಪ್ಟೆಂಬರ್ 16 ರಂದು ₹16,999 ಆರಂಭಿಕ ಬೆಲೆಯಲ್ಲಿ ಬಿಡುಗಡೆಯಾಗಿದೆ. ಆಯ್ದ ಬ್ಯಾಂಕ್ ಆಫರ್‌ಗಳನ್ನು ಬಳಸಿಕೊಂಡರೆ ಇದನ್ನು ₹15,999 ರ ಆಕರ್ಷಕ ಬೆಲೆಯಲ್ಲಿ ಖರೀದಿಸಬಹುದು. ಈ ಫೋನ್ ಫ್ಲಿಪ್‌ಕಾರ್ಟ್ ಮತ್ತು ಒಪ್ಪೋ ಇ-ಸ್ಟೋರ್‌ನಲ್ಲಿ ಲಭ್ಯವಿದೆ. ನಾವು ಇದರ ರೀಟೇಲ್ ಯುನಿಟ್ ಪರೀಕ್ಷಿಸಿದ್ದು, FPS, ಹೀಟಿಂಗ್ (ಥರ್ಮಲ್ಸ್), ಚಾರ್ಜಿಂಗ್ ಹಾಗೂ 120Hz ರಿಫ್ರೆಶ್ ರೇಟ್ ಕಾರ್ಯಕ್ಷಮತೆಯನ್ನು ಚೆಕ್ ಮಾಡಿದ್ದೇವೆ. ಇದರಲ್ಲಿ 6.75-ಇಂಚಿನ 120Hz HD+ LCD ಡಿಸ್‌ಪ್ಲೇ, ಯುನಿಸಾಕ್ T7250 ಪ್ರೊಸೆಸರ್, IP64 ರೇಟಿಂಗ್ ಮತ್ತು ಬೃಹತ್ 7,000mAh ಬ್ಯಾಟರಿ ನೀಡಲಾಗಿದೆ.

ಫೋನ್ ಆನ್ ಮಾಡಿದ ಕೂಡಲೇ ಸಿಸ್ಟಮ್ ಮೆನುಗಳು ಮತ್ತು ಕ್ರೋಮ್ ಬ್ರೌಸರ್‌ನಲ್ಲಿ ಡಿಸ್‌ಪ್ಲೇ 120Hz ಬೆಂಬಲಿಸುತ್ತದೆ. ಆದರೆ, ಯೂಟ್ಯೂಬ್ ಮತ್ತು ಇನ್‌ಸ್ಟಾಗ್ರಾಮ್ ಸೇರಿದಂತೆ ಕೆಲವು ಆ್ಯಪ್‌ಗಳು 60Hz ನಲ್ಲೇ ಕಾರ್ಯನಿರ್ವಹಿಸುತ್ತವೆ. 900 ನಿಟ್ಸ್ ಪೀಕ್ ಬ್ರೈಟ್‌ನೆಸ್ ಇರುವುದರಿಂದ ಹೊರಾಂಗಣದಲ್ಲೂ ಮ್ಯಾಪ್‌ಗಳನ್ನು ಸುಲಭವಾಗಿ ವೀಕ್ಷಿಸಬಹುದು. ಗೇಮಿಂಗ್ ವಿಚಾರಕ್ಕೆ ಬಂದರೆ, BGMI ನಲ್ಲಿ 'ಸ್ಮೂತ್' ಗ್ರಾಫಿಕ್ಸ್‌ನೊಂದಿಗೆ 'ಎಕ್ಸ್‌ಟ್ರೀಮ್ 60' ಆಪ್ಷನ್ ಸಪೋರ್ಟ್ ಸಿಗುತ್ತದೆ. ಆದರೆ ಗೇಮ್‌ನಲ್ಲಿ ಹೆವಿ ಸೀನ್‌ಗಳು ಬಂದಾಗ ಸಣ್ಣ ಮಟ್ಟದ ಲ್ಯಾಗ್ ಕಂಡುಬರುತ್ತದೆ.

ಒಪ್ಪೋ K14 ಲೈಟ್ ಇಂಡಿಯಾ ಟೆಸ್ಟ್: BGMI FPS ಮತ್ತು ಹೀಟಿಂಗ್ ಮಾಹಿತಿ

ನಾವು ಫ್ಯಾನ್ ಆಫ್ ಮಾಡಿ, 30–34°C ಕೊಠಡಿಯ ತಾಪಮಾನದಲ್ಲಿ ಈ ಫೋನ್ ಪರೀಕ್ಷಿಸಿದೆವು. 'ಸ್ಮೂತ್' ಮತ್ತು 'ಎಕ್ಸ್‌ಟ್ರೀಮ್' ಸೆಟ್ಟಿಂಗ್‌ನಲ್ಲಿ 30 ನಿಮಿಷಗಳ ಕಾಲ BGMI ಆಡಿದಾಗ ಸರಾಸರಿ 42 FPS ಫ್ರೇಮ್ ರೇಟ್ ಸಿಕ್ಕಿದೆ. 1% ಲೋ FPS 27 ತಲುಪಿದ್ದು, ಫ್ರೇಮ್-ಟೈಮ್ 50 ಮಿಲಿಸೆಕೆಂಡ್ ವರೆಗೆ ಸ್ಪೈಕ್ ಆಯಿತು. ಈ ವೇಳೆ ಫೋನಿನ ಹಿಂಭಾಗದ ತಾಪಮಾನ 42.3°C ಮತ್ತು ಸ್ಕ್ರೀನ್ ತಾಪಮಾನ 39.1°C ಗೆ ಏರಿತು. ಆದಾಗ್ಯೂ ಫೋನ್ ಕೈಯಲ್ಲಿ ಹಿಡಿದುಕೊಳ್ಳಲು ಯಾವುದೇ ತೊಂದರೆಯಾಗಲಿಲ್ಲ.

ಒಪ್ಪೋ K14 ಲೈಟ್: 120Hz ಡಿಸ್‌ಪ್ಲೇ ಮತ್ತು ಆ್ಯಪ್ ಸಪೋರ್ಟ್

120Hz ಮೋಡ್‌ನಲ್ಲಿ ಸೆಟ್ಟಿಂಗ್ಸ್, ಕ್ರೋಮ್ ಮತ್ತು X (ಟ್ವಿಟರ್) ಆ್ಯಪ್‌ಗಳಲ್ಲಿ ಸ್ಕ್ರೋಲಿಂಗ್ ತುಂಬಾ ಸ್ಮೂತ್ ಆಗಿದೆ. ಬಜೆಟ್ ಎಲ್‌ಸಿಡಿ ಡಿಸ್‌ಪ್ಲೇಗಳಲ್ಲಿ ಸಾಮಾನ್ಯವಾಗಿರುವಂತೆ ಯೂಟ್ಯೂಬ್, ಇನ್‌ಸ್ಟಾಗ್ರಾಮ್ ಮತ್ತು ಗೂಗಲ್ ಮ್ಯಾಪ್ಸ್‌ಗಳು 60Hz ನಲ್ಲೇ ರನ್ ಆಗುತ್ತವೆ. ಇದರ ಟಚ್ ರೆಸ್ಪಾನ್ಸ್ ಉತ್ತಮವಾಗಿದೆ, ಒದ್ದೆ ಬೆರಳಿನಲ್ಲೂ ಸ್ಕ್ರೀನ್ ಯೂಸ್ ಮಾಡಬಹುದು ಎಂಬ ಒಪ್ಪೋದ 'ಸ್ಪ್ಲ್ಯಾಶ್ ಟಚ್' (Splash Touch) ಕ್ಲೇಮ್ ನಿಜವಾಗಿದೆ. ಆದರೆ ಆ್ಯಪ್‌ಗಳಿಗೆ ಅನುಗುಣವಾಗಿ ರಿಫ್ರೆಶ್ ರೇಟ್ ಬದಲಾಗುತ್ತದೆ ಎಂಬುದನ್ನು ನೆನಪಿಡಿ.

ಒಪ್ಪೋ K14 ಲೈಟ್ ಬ್ಯಾಟರಿ ಮತ್ತು ಚಾರ್ಜಿಂಗ್ ಸ್ಪೀಡ್ ಪರೀಕ್ಷೆ

ಸಾಮಾನ್ಯ ಬಳಕೆ ಹಾಗೂ ಗೇಮಿಂಗ್ ಎರಡರಲ್ಲೂ ಇದರ 7,000mAh ಬೃಹತ್ ಬ್ಯಾಟರಿ ಅತ್ಯುತ್ತಮ ಪರ್ಫಾರ್ಮೆನ್ಸ್ ನೀಡುತ್ತದೆ. ಒಂದು ಗಂಟೆಯ ಪರೀಕ್ಷೆಯಲ್ಲಿ ಯೂಟ್ಯೂಬ್‌ಗೆ ಶೇ. 8, ಮ್ಯಾಪ್ಸ್‌ಗೆ ಶೇ. 12 ಮತ್ತು BGMI ಗೇಮಿಂಗ್‌ಗೆ ಶೇ. 19 ರಷ್ಟು ಬ್ಯಾಟರಿ ಕಡಿಮೆಯಾಗಿದೆ. ಫೋನ್ ಜೊತೆ ಸಿಗುವ 15W ಚಾರ್ಜರ್ ಬಳಸಿ 0 ಯಿಂದ 100 ಪ್ರತಿಶತ ಚಾರ್ಜ್ ಮಾಡಲು 2 ಗಂಟೆ 48 ನಿಮಿಷ ಬೇಕಾಯಿತು. ಒಪ್ಪೋ ಹೇಳಿಕೊಂಡಿದ್ದ 2 ಗಂಟೆ 52 ನಿಮಿಷದ ಕ್ಲೇಮ್‌ಗೆ ಇದು ಸರಿಹೊಂದುತ್ತದೆ. ಜೊತೆಗೆ ರಿವರ್ಸ್ ವೈರ್ಡ್ ಚಾರ್ಜಿಂಗ್ ಕೂಡ ಯಶಸ್ವಿಯಾಗಿ ಕೆಲಸ ಮಾಡುತ್ತದೆ.

ಇಂಡೋರ್‌ನಲ್ಲಿ ಜಿಯೋ ಮತ್ತು ಏರ್‌ಟೆಲ್ ನೆಟ್‌ವರ್ಕ್ ಕನೆಕ್ಟಿವಿಟಿ ಸ್ಥಿರವಾಗಿದೆ. ಇದರಲ್ಲಿ ಎಂಟ್ರಿ-ಲೆವೆಲ್ UFS 2.2 ಸ್ಟೋರೇಜ್ ನೀಡಲಾಗಿದೆ. ನಿಮಗೇನಾದರೂ ದೀರ್ಘಕಾಲ ಬಾಳಿಕೆ ಬರುವ ಬ್ಯಾಟರಿ, IP64 ರೇಟಿಂಗ್ ಹಾಗೂ ಸ್ಮೂತ್ ಯೂಸರ್ ಇಂಟರ್‌ಫೇಸ್ (UI) ಬೇಕಿದ್ದರೆ ₹15,999 ಬೆಲೆಗೆ ಇದನ್ನು ಖರೀದಿಸಬಹುದು. ಒಂದು ವೇಳೆ ಗೇಮಿಂಗ್ ಮತ್ತು ವೇಗದ ಚಾರ್ಜಿಂಗ್ ನಿಮ್ಮ ಮೊದಲ ಆದ್ಯತೆಯಾಗಿದ್ದರೆ, ಹಬ್ಬದ ಆಫರ್‌ಗಳಿಗಾಗಿ ಕಾಯುವುದು ಅಥವಾ ಶಕ್ತಿಶಾಲಿ ಪ್ರೊಸೆಸರ್ ಹೊಂದಿರುವ ಇತರ ಫೋನ್‌ಗಳನ್ನು ಪರಿಗಣಿಸುವುದು ಸೂಕ್ತ. ಒಪ್ಪೋ K14 ಲೈಟ್ ಬ್ಯಾಟರಿ ಬ್ಯಾಕಪ್ ವಿಷಯದಲ್ಲಿ ಸೈ ಎನಿಸಿಕೊಂಡರೂ, ಸ್ಪೀಡ್ ಬಯಸುವವರು ಡಿಸ್ಕೌಂಟ್ ಆಫರ್‌ಗಳಿಗೆ ಕಾಯುವುದು ಒಳಿತು.