ಪೊಕೊ M7 ಪ್ಲಸ್: ಆಗಸ್ಟ್ 13 ರಂದು ಭಾರತಕ್ಕೆ ಲಗ್ಗೆ, 15 ಸಾವಿರದೊಳಗೆ!

ಜನಪ್ರಿಯ ಸ್ಮಾರ್ಟ್‌ಫೋನ್ ಬ್ರಾಂಡ್ ಪೊಕೊ ತನ್ನ ಹೊಸ M-ಸೀರೀಸ್ ಸ್ಮಾರ್ಟ್‌ಫೋನ್ ಬಿಡುಗಡೆ ಮಾಡುವುದಾಗಿ ಇತ್ತೀಚಿಗಷ್ಟೇ ಘೋಷಿಸಿತ್ತು. ಇದೀಗ ಈ ಸ್ಮಾರ್ಟ್‌ಫೋನ್ 'ಪೊಕೊ M7 ಪ್ಲಸ್' ಎಂಬುದಾಗಿ ಅಧಿಕೃತವಾಗಿ ತಿಳಿದುಬಂದಿದೆ. ಪೊಕೊ ತನ್ನ ಹೊಸ ಪೊಕೊ M7 ಪ್ಲಸ್ ಅನ್ನು ಆಗಸ್ಟ್ 13 ರಂದು ಭಾರತದಲ್ಲಿ ಅನಾವರಣಗೊಳಿಸಲಾಗುವುದು ಎಂದು ಘೋಷಿಸಿದ್ದು, ಈ ಫೋನಿನ ಕೆಲವು ವೈಶಿಷ್ಟ್ಯಗಳನ್ನು ಈಗಾಗಲೇ ಬಹಿರಂಗಪಡಿಸಿದೆ. ಇದು ಬಳಕೆದಾರರ ನಿರೀಕ್ಷೆಯನ್ನು ಹೆಚ್ಚಿಸಿದೆ.

ಪೊಕೊ M7 ಪ್ಲಸ್: ವಿನ್ಯಾಸ ಮತ್ತು ಪ್ರಮುಖ ವೈಶಿಷ್ಟ್ಯಗಳು

ಹೊಸ ಪೊಕೊ M7 ಪ್ಲಸ್ ಸ್ಮಾರ್ಟ್‌ಫೋನ್‌ನ ಪ್ರಮುಖ ವೈಶಿಷ್ಟ್ಯವೆಂದರೆ ಇದರ ಶಕ್ತಿಯುತ ಬ್ಯಾಟರಿ ಮತ್ತು ವಿಶಿಷ್ಟ ವಿನ್ಯಾಸ. ಈ ಫೋನ್ 50MP ಪ್ರಾಥಮಿಕ ಕ್ಯಾಮೆರಾವನ್ನು ಹೊಂದಿರುವುದು ಖಚಿತವಾಗಿದೆ. ಫೋನಿನ ಹಿಂಭಾಗದಲ್ಲಿ ಲಂಬವಾಗಿ ಜೋಡಿಸಲಾದ ಕ್ಯಾಮೆರಾ ದ್ವೀಪದಲ್ಲಿ "50MP AI CAM" ಎಂಬ ಶೀರ್ಷಿಕೆ ಇದೆ. ದೊಡ್ಡ ಬ್ಯಾಟರಿಯ ಹೊರತಾಗಿಯೂ, ಈ ಫೋನ್ ಅತ್ಯಂತ ತೆಳುವಾದ ಸಾಧನಗಳಲ್ಲಿ ಒಂದಾಗಿದೆ ಎಂದು ಪೊಕೊ ಹೇಳಿಕೊಂಡಿದೆ. ಇದರ ಪ್ರೀಮಿಯಂ ವಿನ್ಯಾಸವು ಆಧುನಿಕ ಮತ್ತು ಆಕರ್ಷಕವಾಗಿದ್ದು, ಯುವ ಗ್ರಾಹಕರನ್ನು ಗಮನದಲ್ಲಿಟ್ಟುಕೊಂಡು ರೂಪಿಸಲಾಗಿದೆ.

ಈ ಫೋನ್‌ನ ಪ್ರಮುಖ ಆಕರ್ಷಣೆಯೆಂದರೆ ಅದರ 7,000 mAh Si/C ಬ್ಯಾಟರಿ. ಪೊಕೊ ಹೇಳುವ ಪ್ರಕಾರ, ₹15,000 ಕ್ಕಿಂತ ಕಡಿಮೆ ಬೆಲೆಯ ವಿಭಾಗದಲ್ಲಿ ಇಂತಹ ದೊಡ್ಡ ಸಿಲಿಕಾನ್-ಕಾರ್ಬನ್ ಬ್ಯಾಟರಿಯನ್ನು ಹೊಂದಿದ ಮೊದಲ ಫೋನ್ ಇದಾಗಿದೆ. ಈ ಬ್ಯಾಟರಿಯು ಒಂದು ಪೂರ್ಣ ಚಾರ್ಜ್‌ನಲ್ಲಿ ಇದು 144 ಗಂಟೆಗಳ ಸಂಗೀತ ಪ್ಲೇಬ್ಯಾಕ್, 27 ಗಂಟೆಗಳ ಸಾಮಾಜಿಕ ಮಾಧ್ಯಮ ಸ್ಕ್ರೋಲಿಂಗ್, 12 ಗಂಟೆಗಳ ನ್ಯಾವಿಗೇಷನ್ ಮತ್ತು 24 ಗಂಟೆಗಳ ವೀಡಿಯೊ ಸ್ಟ್ರೀಮಿಂಗ್ ಸಾಮರ್ಥ್ಯ ಹೊಂದಿದೆ ಎಂದು ಕಂಪೆನಿಯು ಹೇಳಿಕೊಂಡಿದೆ.

ಇದರ ಜೊತೆಗೆ, ಈ ಪೊಕೊ M7 ಪ್ಲಸ್ ಫೋನ್ 18W ರಿವರ್ಸ್ ವೈರ್ಡ್ ಚಾರ್ಜಿಂಗ್ ಅನ್ನು ಸಹ ಬೆಂಬಲಿಸುತ್ತದೆ, ಇದು ತುರ್ತು ಪರಿಸ್ಥಿತಿಗಳಲ್ಲಿ ಇತರ ಡಿವೈಸ್‌ಗಳನ್ನು ಚಾರ್ಜ್ ಮಾಡಲು ಸಹಾಯ ಮಾಡುತ್ತದೆ. POCO M7 Plus 5G ಅನ್ನು ಬಿಳಿ ಬಣ್ಣದಲ್ಲಿ ಮತ್ತು ಫ್ರೇಮ್ ಉದ್ದಕ್ಕೂ ನೀಲಿ ಮತ್ತು ಕೆಂಪು ಅಕ್ಷರಗಳೊಂದಿಗೆ ತೋರಿಸುವ ಚಿತ್ರವನ್ನು ಹಂಚಿಕೊಂಡಿದೆ. ಈ ಬಾರಿ ಅವರು ವಿಶಿಷ್ಟ ದೃಶ್ಯ ಗುರುತನ್ನು ಗುರಿಯಾಗಿಸಿಕೊಂಡಿರುವಂತಿದೆ. ಇನ್ನು ಈ ಫೋನ್ ಯುಎಸ್‌ಬಿ-ಸಿ ಪೋರ್ಟ್‌ನೊಂದಿಗೆ ಇರುವುದನ್ನು ನಾವು ನೋಡಬಹುದು.

ಪೊಕೊ M7 ಪ್ಲಸ್: ನಿರೀಕ್ಷಿತ ವೈಶಿಷ್ಟ್ಯಗಳು,

ನಾವು ಇನ್ನೂ ಸಂಪೂರ್ಣ ಫೀಚರ್ಸ್ ಶೀಟ್ ಅನ್ನು ನೋಡಿಲ್ಲವಾದರೂ, ಪೊಕೊ M7 ಪ್ಲಸ್‌ನ ಕೆಲವು ಫೀಚರ್ಸ್ ರೆಡ್‌ಮಿ 15 5G ಆವೃತ್ತಿಯಂತೆಯೇ ಇರಬಹುದು ಎಂದು ವದಂತಿಗಳು ಹಬ್ಬಿವೆ. ಇದು ನಿಜವಾದರೆ, ಈ ಫೋನ್‌ನಲ್ಲಿ ಸ್ನಾಪ್‌ಡ್ರಾಗನ್ 6s Gen 3 SoC ಪ್ರೊಸೆಸರ್, 6.9" FullHD+ 144Hz LCD ಡಿಸ್‌ಪ್ಲೇ, 4GB RAM ಮತ್ತು 128GB ಇಂಟರ್ನಲ್ ಸ್ಟೋರೇಜ್ ಇರಬಹುದು. ಸೆಲ್ಫಿಗಾಗಿ 8MP ಮುಂಭಾಗದ ಕ್ಯಾಮೆರಾ ಮತ್ತು ಸೈಡ್-ಮೌಂಟೆಡ್ ಫಿಂಗರ್‌ಪ್ರಿಂಟ್ ಸ್ಕ್ಯಾನರ್ ಸಹ ಇರಲಿದೆ ಎಂದು ನಿರೀಕ್ಷಿಸಲಾಗಿದೆ. ಈ ಫೋನ್ 33W ವೇಗದ ಚಾರ್ಜಿಂಗ್ ಅನ್ನು ಸಹ ಬೆಂಬಲಿಸುತ್ತದೆ.

ಆಗಸ್ಟ್ 13 ರಂದು ಭಾರತದಲ್ಲಿ ಅನಾವರಣಗೊಳ್ಳಲಿರುವ ಪೊಕೊ M7 ಪ್ಲಸ್ ಫ್ಲಿಪ್‌ಕಾರ್ಟ್ ಮೂಲಕ ಎಸ್‌ಕ್ಲೂಸಿವ್ ಆಗಿ ಖರೀದಿಗೆ ಲಭ್ಯವಿರಲಿದೆ. ಒಟ್ಟಾರೆಯಾಗಿ, ಪೊಕೊ M7 ಪ್ಲಸ್ ತನ್ನ ಬೆಲೆಗೆ ಉತ್ತಮ ವೈಶಿಷ್ಟ್ಯಗಳೊಂದಿಗೆ ಮಾರುಕಟ್ಟೆಗೆ ಬರಲಿದೆ ಎಂದು ನಿರೀಕ್ಷಿಸಲಾಗಿದೆ. ಈ ಕುರಿತಂತೆ ನಿಮ್ಮ ಅನಿಸಿಕೆ ಏನು ಎಂಬುದನ್ನು ಈ ಕೆಳಗೆ ಕಾಮೆಂಟ್ ಮಾಡಿ ತಿಳಿಸಿ.