ಭಾರತಕ್ಕೆ 7,000mAh ಮೆಗಾ ಬ್ಯಾಟರಿ Realme ಫೋನ್ಸ್: ಆಗಸ್ಟ್ 20 ರಂದು ಲಾಂಚ್!

ಆಗಸ್ಟ್ 20 ರಂದು ಭಾರತದಲ್ಲಿ Realme P4 ಸರಣಿ ಫೋನ್‌ಗಳು ಬಿಡುಗಡೆಯಾಗಲಿರುವ ಸುದ್ದಿ ಇತ್ತೀಚಿಗಷ್ಟೇ ಹೊರಬಿದ್ದಿತ್ತು. ಇದೀಗ, ಈ ಹೊಸ Realme P4 ಸರಣಿಯಲ್ಲಿ Realme P4 5G ಮತ್ತು Realme P4 Pro 5G ಎಂಬ ಎರಡು ಮಾದರಿಗಳ ಫೀಚರ್ಸ್ ಮತ್ತು ಬೆಲೆ ಮಾಹಿತಿ ಸಹ ಬಹಿರಂಗವಾಗಿದೆ. ಈ ಎರಡೂ ಫೋನ್‌ಗಳು ಗೇಮಿಂಗ್ ಮತ್ತು ಕಾರ್ಯಕ್ಷಮತೆಯ ಮೇಲೆ ಕೇಂದ್ರೀಕರಿಸುತ್ತವೆ. ಈ ಸರಣಿಯ ಫೋನ್‌ಗಳು ₹30,000 ಗಿಂತ ಕಡಿಮೆ ಬೆಲೆಯಲ್ಲಿ ಲಭ್ಯವಾಗಲಿದೆ ಎಂದು ಕಂಪನಿಯು ಖಚಿತಪಡಿಸಿದೆ. ಈ ಕುರಿತ ಸಂಪೂರ್ಣ ಮಾಹಿತಿಯನ್ನು ನೋಡೋಣ ಬನ್ನಿ!

Realme P4 5G: ಪ್ರಮುಖ ವೈಶಿಷ್ಟ್ಯಗಳು
ಮುಂಬರುವ ಹೊಸ Realme P4 5G ಫೋನ್ MediaTek Dimensity 7400 Ultra 5G ಚಿಪ್‌ಸೆಟ್ ಮತ್ತು Pixelworks ಚಿಪ್‌ನಿಂದ ಕಾರ್ಯನಿರ್ವಹಿಸುತ್ತದೆ. ಇದು 6.77-ಇಂಚಿನ ಹೈಪರ್‌ಗ್ಲೋ ಅಮೋಲೆಡ್ ಡಿಸ್ಪ್ಲೇಯನ್ನು ಹೊಂದಿದೆ. ಈ ಡಿಸ್ಪ್ಲೇಯು 144Hz ರಿಫ್ರೆಶ್ ರೇಟ್, HDR10+ ಬೆಂಬಲ ಮತ್ತು 4,500 ನಿಟ್‌ಗಳ ಗರಿಷ್ಠ ಬ್ರೈಟ್‌ನೆಸ್‌ನೊಂದಿಗೆ ಬರುತ್ತದೆ. ಕಣ್ಣಿನ ಆರೋಗ್ಯಕ್ಕೆ ಒತ್ತು ನೀಡಿರುವ ಈ ಫೋನ್, 3,840Hz PWM ಡಿಮ್ಮಿಂಗ್ ಮತ್ತು ಹಾರ್ಡ್‌ವೇರ್-ಲೆವೆಲ್ ಬ್ಲೂ ಲೈಟ್ ಕಡಿತದ ವೈಶಿಷ್ಟ್ಯಗಳನ್ನು ಹೊಂದಿದೆ.

ಇದರೊಂದಿಗೆ, Realme P4 5G ಫೋನ್ 7,000mAh ಬ್ಯಾಟರಿಯನ್ನು ಹೊಂದಿದ್ದು, ಇದು 80W ಫಾಸ್ಟ್ ಚಾರ್ಜಿಂಗ್ ಬೆಂಬಲಿಸುತ್ತದೆ. ಕೇವಲ 25 ನಿಮಿಷಗಳಲ್ಲಿ 50% ಚಾರ್ಜ್ ಆಗುವ ಈ ಫೋನ್, 11 ಗಂಟೆಗಳ ಕಾಲ BGMI ಆಟ ಆಡಲು ಅವಕಾಶ ನೀಡುತ್ತದೆ. ಫೋನ್ ತಂಪಾಗಿರಲು 7,000 ಚದರ ಮಿಲಿಮೀಟರ್ ಏರ್‌ಫ್ಲೋ VC ಕೂಲಿಂಗ್ ಸಿಸ್ಟಮ್ ಅಳವಡಿಸಲಾಗಿದೆ ಎಂದು ಕಂಪನಿ ಹೇಳಿದೆ.

Realme P4 Pro 5G:ಪ್ರಮುಖ ವೈಶಿಷ್ಟ್ಯಗಳು
ಇತ್ತ Realme P4 Pro 5G ಫೋನ್ Snapdragon 7 Gen 4 ಚಿಪ್‌ಸೆಟ್‌ನೊಂದಿಗೆ HyperVision AI GPU ಅನ್ನು ಹೊಂದಿದೆ. ಇದು ಸಹ 7,000mAh ಬ್ಯಾಟರಿ ಮತ್ತು 80W ಫಾಸ್ಟ್ ಚಾರ್ಜಿಂಗ್ ಅನ್ನು ಹೊಂದಿದೆ. Pro ಮಾದರಿಯು 90FPS ನಲ್ಲಿ ಎಂಟು ಗಂಟೆಗಳ BGMI ಆಟವನ್ನು ಬೆಂಬಲಿಸುತ್ತದೆ. ಇದರ ಹೈಪರ್‌ಗ್ಲೋ AMOLED 4D ಕರ್ವ್+ ಡಿಸ್ಪ್ಲೇ 144Hz ರಿಫ್ರೆಶ್ ರೇಟ್, 6,500 ನಿಟ್ಸ್ ಪೀಕ್ ಬ್ರೈಟ್‌ನೆಸ್ ಮತ್ತು 4,320Hz ಹೈ-ಫ್ರೀಕ್ವೆನ್ಸಿ ಡಿಮ್ಮಿಂಗ್‌ನಂತಹ ವೈಶಿಷ್ಟ್ಯಗಳನ್ನು ಒಳಗೊಂಡಿದೆ.

Realme P4 ಸರಣಿ: ವಿಶಿಷ್ಟ ವಿನ್ಯಾಸ ಮತ್ತು ಬಣ್ಣಗಳು
Realme P4 ಸರಣಿಯ ಮತ್ತೊಂದು ಪ್ರಮುಖ ಅಂಶವೆಂದರೆ ಅದರ ವಿಶಿಷ್ಟ ವಿನ್ಯಾಸ. Realme P4 Pro ಫೋನ್ "ಲಿವಿಂಗ್ ನೇಚರ್ ಡಿಸೈನ್" ಅನ್ನು ಹೊಂದಿದ್ದು, ಇದರಲ್ಲಿ ಪ್ರೀಮಿಯಂ ಟೆಕ್-ವುಡ್ ಬ್ಯಾಕ್ ಪ್ಯಾನಲ್ ಬಳಸಲಾಗಿದೆ. ಇದು ಬಿರ್ಚ್ ವುಡ್, ಡಾರ್ಕ್ ಓಕ್ ವುಡ್ ಮತ್ತು ಮಿಡ್‌ನೈಟ್ ಐವಿ ಎಂಬ ಮೂರು ಬಣ್ಣಗಳಲ್ಲಿ ಲಭ್ಯವಾಗಲಿದೆ.

ಇದೇ ಸಮಯದಲ್ಲಿ, Realme P4 ಫೋನ್ "ಮೆಟಲ್ ಹಾರ್ಟ್ ಡಿಸೈನ್" ಅನ್ನು ಹೊಂದಿದ್ದು, ಗಟ್ಟಿತನ ಮತ್ತು ಶೈಲಿಯನ್ನು ಒಟ್ಟಿಗೆ ಸೇರಿಸುವಂತೆ ವಿನ್ಯಾಸಗೊಳಿಸಲಾಗಿದೆ. ಈ ಫೋನ್ ಸ್ಟೀಲ್ ಗ್ರೇ, ಎಂಜಿನ್ ಬ್ಲೂ ಮತ್ತು ಫೋರ್ಜ್ ರೆಡ್ ಬಣ್ಣಗಳಲ್ಲಿ ದೊರೆಯುತ್ತದೆ.

ಕಾರ್ಯಕ್ಷಮತೆಯನ್ನು ಉತ್ತಮಪಡಿಸಲು, Realme P4 ಸರಣಿಯಲ್ಲಿ ಕಂಪನಿಯು "ಫ್ರೇಮ್ ಜನರೇಷನ್ ಇಂಡೆಕ್ಸ್" ಎಂಬ ಹೊಸ ವೈಶಿಷ್ಟ್ಯವನ್ನು ಪರಿಚಯಿಸಿಲಾಗಿದೆ. ಇದು ಫೋನ್‌ನ ಕಾರ್ಯಕ್ಷಮತೆಯ ಬಗ್ಗೆ ನಿಖರವಾದ ಮಾಹಿತಿ ನೀಡುತ್ತದೆ.

ಒಟ್ಟಾರೆಯಾಗಿ, Realme P4 ಸರಣಿಯು ಶಕ್ತಿಶಾಲಿ ಚಿಪ್‌ಸೆಟ್‌ಗಳು, ಗೇಮಿಂಗ್‌ಗೆ ಸೂಕ್ತವಾದ ಡಿಸ್ಪ್ಲೇ ಮತ್ತು ವೇಗದ ಚಾರ್ಜಿಂಗ್‌ನಂತಹ ವೈಶಿಷ್ಟ್ಯಗಳೊಂದಿಗೆ ಮಾರುಕಟ್ಟೆಗೆ ಬರಲು ಸಿದ್ಧವಾಗಿದೆ. ಈ ಸರಣಿಯು ₹30,000 ಗಿಂತ ಕಡಿಮೆ ಬೆಲೆಯ ವಿಭಾಗದಲ್ಲಿ ಸ್ಪರ್ಧೆಯನ್ನು ಹೆಚ್ಚಿಸುವ ಸಾಧ್ಯತೆ ಇದೆ.