ಭಾರತಕ್ಕೆ Samsung Galaxy A37 ಮತ್ತು A57 ಆಗಮನದ ಸುಳಿವು: ಫೀಚರ್ಸ್ ಸಹ ಲೀಕ್!

ದಕ್ಷಿಣ ಕೊರಿಯಾದ ಟೆಕ್ ದಿಗ್ಗಜ Samsung ಭಾರತ ಮಾರುಕಟ್ಟೆಗೆ ತನ್ನ ಹೊಸ Galaxy A ಸರಣಿಯ ಎರಡು ಸ್ಮಾರ್ಟ್‌ಫೋನ್‌ಗಳನ್ನು ಪರಿಚಯಿಸಲು ಸಿದ್ಧವಾಗಿರುವಂತೆ ಕಾಣುತ್ತಿದೆ. ಬಹುಕಾಲದಿಂದ ನಿರೀಕ್ಷೆಯಲ್ಲಿರುವ Samsung Galaxy A37 ಮತ್ತು Samsung Galaxy A57 ಫೋನ್‌ಗಳು ಇದೇ ಮಾರ್ಚ್ ತಿಂಗಳಲ್ಲಿ ಭಾರತದಲ್ಲಿ ಲಾಂಚ್ ಆಗುವ ಸಾಧ್ಯತೆ ಇದೆ ಎಂಬ ಮಾಹಿತಿ ಲೀಕ್‌ಗಳ ಮೂಲಕ ಹೊರಬಂದಿದೆ. ಕಂಪನಿ ಅಧಿಕೃತವಾಗಿ ದಿನಾಂಕ ಘೋಷಿಸದಿದ್ದರೂ, ಈ ಹೊಸ ಮಾದರಿಗಳು ಮಧ್ಯಮ ದರ್ಜೆಯ ವಿಭಾಗದಲ್ಲಿ ಸ್ಪರ್ಧೆಯನ್ನು ಮತ್ತಷ್ಟು ಕಠಿಣಗೊಳಿಸುವ ನಿರೀಕ್ಷೆಯಿದೆ.

ಜನಪ್ರಿಯ ಟಿಪ್‌ಸ್ಟರ್ ಸಂಜು ಚೌಧರಿ ಅವರು X ನಲ್ಲಿ ಪೋಸ್ಟ್ ಒಂದನ್ನು ಮಾಡಿದ್ದು, ಇದರಲ್ಲಿ Samsung Galaxy A37 ಮತ್ತು Samsung Galaxy A57 ಫೋನ್‌ಗಳು ಮಾರ್ಚ್‌ನಲ್ಲಿ ಭಾರತಕ್ಕೆ ಬರುತ್ತಿವೆ ಎಂದು ಹೇಳಿಕೊಂಡಿದ್ದಾರೆ. ಈ ಎರಡೂ ಫೋನ್‌ಗಳು ಫುಲ್-HD+ AMOLED ಡಿಸ್‌ಪ್ಲೇ ಮತ್ತು 120Hz ರಿಫ್ರೆಶ್ ರೇಟ್‌ನೊಂದಿಗೆ ಬರಲಿವೆ. ಇದು ವೀಕ್ಷಣೆ, ಗೇಮಿಂಗ್ ಮತ್ತು ಸೋಶಿಯಲ್ ಮೀಡಿಯಾ ಬ್ರೌಸಿಂಗ್‌ಗೆ ಮೃದುವಾದ ಅನುಭವವನ್ನು ನೀಡಲಿದೆ. Galaxy A57 ನಲ್ಲಿ 6.6 ಇಂಚಿನ ಡಿಸ್‌ಪ್ಲೇ ಇರಲಿದ್ದು, Galaxy A37 ನಲ್ಲಿ 6.7 ಇಂಚಿನ ಪರದೆ ದೊರೆಯುವ ಸಾಧ್ಯತೆ ಇದೆ ಎಂದಿದ್ದಾರೆ.

ಪ್ರೊಸೆಸರ್ ವಿಚಾರದಲ್ಲಿ Samsung Galaxy A57 ನಲ್ಲಿ Exynos 1680 ಚಿಪ್‌ಸೆಟ್ ಬಳಸಲಾಗಬಹುದು. ಇದು ಹಿಂಭಾಗದಲ್ಲಿ 50 ಮೆಗಾಪಿಕ್ಸೆಲ್ ಪ್ರಾಥಮಿಕ ಕ್ಯಾಮೆರಾ (OIS ಬೆಂಬಲದೊಂದಿಗೆ), 12 ಮೆಗಾಪಿಕ್ಸೆಲ್ ಅಲ್ಟ್ರಾ ವೈಡ್ ಲೆನ್ಸ್ ಮತ್ತು 5 ಮೆಗಾಪಿಕ್ಸೆಲ್ ಮ್ಯಾಕ್ರೋ ಸೆನ್ಸರ್ ಹೊಂದಿರುವ ಟ್ರಿಪಲ್ ಕ್ಯಾಮೆರಾ ಸೆಟ್‌ಅಪ್ ಇರಬಹುದು. ಇದರ ದಪ್ಪವು ಸುಮಾರು 6.9 ಮಿಮೀ ಆಗಿರಬಹುದು ಮತ್ತು ತೂಕವು 182 ಗ್ರಾಂ ಇರಬಹುದು ಎಂದು ಊಹಿಸಲಾಗಿದೆ. ಹಾಗೂ ಇದಕ್ಕೆ IP68 ರೇಟಿಂಗ್ ಇರಲಿದ್ದು, ನೀರು ಮತ್ತು ಧೂಳಿನಿಂದ ಉತ್ತಮ ರಕ್ಷಣೆ ದೊರೆಯಲಿದೆ ಎನ್ನಲಾಗಿದೆ.

ಇನ್ನೊಂದೆಡೆ Samsung Galaxy A37 ನಲ್ಲಿ Exynos 1480 ಚಿಪ್‌ಸೆಟ್ ನೀಡುವ ಸಾಧ್ಯತೆ ಇದೆ. ಇದರಲ್ಲೂ 50 ಮೆಗಾಪಿಕ್ಸೆಲ್ ಮುಖ್ಯ ಕ್ಯಾಮೆರಾ (1/1.56 ಇಂಚಿನ ಸೆನ್ಸರ್), 8 ಮೆಗಾಪಿಕ್ಸೆಲ್ ಅಲ್ಟ್ರಾ ವೈಡ್ ಮತ್ತು 5 ಮೆಗಾಪಿಕ್ಸೆಲ್ ಮ್ಯಾಕ್ರೋ ಲೆನ್ಸ್ ಇರುವ ಟ್ರಿಪಲ್ ಕ್ಯಾಮೆರಾ ವ್ಯವಸ್ಥೆ ಇರಬಹುದು. ಈ ಮಾದರಿಯಲ್ಲಿ IP67 ರೇಟಿಂಗ್ ನೀಡಲಾಗುವ ಸಾಧ್ಯತೆ ಇದೆ. ಬ್ಯಾಟರಿ ವಿಚಾರದಲ್ಲಿ ಎರಡೂ ಫೋನ್‌ಗಳು 5,000mAh ಸಾಮರ್ಥ್ಯದ ಬ್ಯಾಟರಿಯೊಂದಿಗೆ 45W ವೇಗದ ಚಾರ್ಜಿಂಗ್ ಬೆಂಬಲವನ್ನು ನೀಡಲಿವೆ ಮತ್ತು 12 ಮೆಗಾಪಿಕ್ಸೆಲ್ ಸೆಲ್ಫಿ ಕ್ಯಾಮೆರಾ ಹೊಂದಲಿವೆ ಎಂಬ ಮಾಹಿತಿ ಲಭ್ಯವಾಗಿದೆ.

ಇನ್ನು ಈ ಎರಡೂ ಸ್ಮಾರ್ಟ್‌ಫೋನ್‌ಗಳು ಸಿಂಗಾಪುರದ IMDA ಪ್ರಮಾಣಪತ್ರ ವೆಬ್‌ಸೈಟ್‌ನಲ್ಲಿ ಕಾಣಿಸಿಕೊಂಡಿದ್ದು, ಜಾಗತಿಕ ಬಿಡುಗಡೆ ಸಮೀಪದಲ್ಲಿದೆ ಎಂಬ ಸೂಚನೆ ನೀಡುತ್ತದೆ. ಪಟ್ಟಿಯ ಪ್ರಕಾರ, Galaxy A37 (ಮಾಡೆಲ್ ನಂಬರ್ A376B/DS) ಮತ್ತು Galaxy A57 (SM-A576B/DS) ಡ್ಯುಯಲ್ ಸಿಮ್ ಬೆಂಬಲದೊಂದಿಗೆ ಬರಲಿವೆ. ಈ IMDA ಪಟ್ಟಿಯು ಗ್ಯಾಲಕ್ಸಿ A37 ಮತ್ತು ಗ್ಯಾಲಕ್ಸಿ A57 ನ ಯಾವುದೇ ವಿಶೇಷಣಗಳನ್ನು ಬಹಿರಂಗಪಡಿಸುವುದಿಲ್ಲ, ಆದರೆ ಇದು 5G, ಬ್ಲೂಟೂತ್, NFC ಮತ್ತು Wi-Fi ಸಂಪರ್ಕ ಆಯ್ಕೆಗಳಿಗೆ ಬೆಂಬಲವನ್ನು ಖಚಿತಪಡಿಸುತ್ತದೆ ಎಂಬುದನ್ನು ನಾವು ಗಮನಿಸಬಹುದು.

ಭಾರತೀಯ ಮಾರುಕಟ್ಟೆಯಲ್ಲಿ ಮಧ್ಯಮ ಬೆಲೆಯ ವಿಭಾಗದಲ್ಲಿ ಈಗಾಗಲೇ ತೀವ್ರ ಸ್ಪರ್ಧೆ ಇದೆ. ಆದರೂ ಉತ್ತಮ ಡಿಸ್‌ಪ್ಲೇ, ಶಕ್ತಿಶಾಲಿ ಪ್ರೊಸೆಸರ್ ಮತ್ತು ಉತ್ತಮ ಕ್ಯಾಮೆರಾ ವೈಶಿಷ್ಟ್ಯಗಳೊಂದಿಗೆ Samsung Galaxy A37 ಮತ್ತು Samsung Galaxy A57 ಗ್ರಾಹಕರ ಗಮನ ಸೆಳೆಯುವ ಸಾಧ್ಯತೆ ಹೆಚ್ಚು. ಅಧಿಕೃತ ಲಾಂಚ್ ದಿನಾಂಕ ಮತ್ತು ಬೆಲೆ ವಿವರಗಳು ಬಹಿರಂಗವಾದ ಬಳಿಕವೇ ಖರೀದಿದಾರರಿಗೆ ಸ್ಪಷ್ಟ ಚಿತ್ರಣ ಸಿಗಲಿದೆ. ಆದರೆ, ಭಾರತದಲ್ಲಿ Galaxy A ಸರಣಿಗೆ ತನ್ನದೇ ಆದ ಅಭಿಮಾನಿಗಳು ಇರುವುದರಿಂದ ಇವರಲ್ಲಿ ಕಾತುರ ಮತ್ತಷ್ಟು ಹೆಚ್ಚಾಗಿದೆ ಎನ್ನಬಹುದು.