ಸಿಹಿಸುದ್ದಿ: ಶೀಘ್ರದಲ್ಲೇ ಭಾರತಕ್ಕೂ ಬರಲಿದೆಯಂತೆ Vivo X Fold 5 ಫೋನ್!

ಜನಪ್ರಿಯ ಮೊಬೈಲ್ ಬ್ರ್ಯಾಂಡ್ ವಿವೋ ತನ್ನ ಮುಂಬರುವ ಬಹುನಿರೀಕ್ಷಿತ ಫೋಲ್ಡಬಲ್ ಸ್ಮಾರ್ಟ್‌ಫೋನ್ Vivo X Fold 5 ಅನ್ನು ಜೂನ್ 25 ರಂದು ಚೀನಾದಲ್ಲಿ ಬಿಡುಗಡೆ ಮಾಡಲು ಸಜ್ಜಾಗಿದೆ. ಆನ್‌ಲೈನ್‌ನಲ್ಲಿ ಈಗಾಗಲೇ ಇದರ ವೈಶಿಷ್ಟ್ಯಗಳನ್ನು ವಿವೋ ಕಂಪೆನಿಯು ಸಕ್ರಿಯವಾಗಿ ಪ್ರಚಾರ ಮಾಡುತ್ತಿದೆ. ಈ ವೇಳೆಯಲ್ಲೇ, ಭಾರತದಲ್ಲೂ ಈ ಫೋನ್ ಬಿಡುಗಡೆಯಾಗುವ ಸೂಚನೆ ದೊರೆತಿದೆ. ಹೌದು, ಜುಲೈ ಎರಡನೇ ವಾರದಲ್ಲಿ ಈ ಫೋನ್ ಭಾರತಕ್ಕೆ ಕಾಲಿಡುವ ಸಾಧ್ಯತೆ ಇದೆ ಎಂದು ಹೊಸ ಸೋರಿಕೆಗಳು ಸೂಚಿಸುತ್ತಿವೆ.!

Vivo X Fold 5 ಫೋನಿನ ಭಾರತದಲ್ಲಿ ಬಿಡುಗಡೆಯ ದಿನಾಂಕ ಇನ್ನೂ ಅಧಿಕೃತವಾಗಿ ಘೋಷಣೆಯಾಗಿಲ್ಲವಾದರೂ, ಜುಲೈ ಎರಡನೇ ವಾರದಲ್ಲಿ ಈ ಫೋನ್ ಭಾರತಕ್ಕೆ ಕಾಲಿಡುವ ಸಾಧ್ಯತೆ ಇದೆ ಎಂದು ಹೊಸ ಸೋರಿಕೆಗಳು ಸೂಚಿಸುತ್ತಿವೆ. ಹೆಸರಿಸದ ಉದ್ಯಮದ ಮೂಲಗಳನ್ನು ಉಲ್ಲೇಖಿಸಿ, 91Mobiles ವರದಿ ಮಾಡಿರುವ ಪ್ರಕಾರ ಜುಲೈ 10 ಮತ್ತು ಜುಲೈ 15 ರ ನಡುವೆ Vivo X Fold 5 ಅನ್ನು ಭಾರತದಲ್ಲಿ ಬಿಡುಗಡೆ ಮಾಡಬಹುದು ಎಂದು ಹೇಳಲಾಗಿದೆ. ಆದರೆ, ಕಂಪೆನಿಯು ಈ ಕುರಿತ ಯಾವುದೇ ಮಾಹಿತಿಯನ್ನು ಅಧಿಕೃತಪಡಿಸಿಲ್ಲ.

Vivo X Fold 5 ಫೋನ್ ಚೀನಾದಲ್ಲಿ ಇದೇ ಜೂನ್ 25 ರಂದು ಸಂಜೆ 7 ಗಂಟೆಗೆ (ಭಾರತೀಯ ಕಾಲಮಾನ ಸಂಜೆ 4:30) ಈ ಫೋನ್ ಪರಿಚಯವಾಗಲಿದೆ. ಇದು ಜುಲೈ 9 ರಂದು ಬಿಡುಗಡೆಯಾಗುವ ಸಾಧ್ಯತೆಯಿರುವ ಸ್ಯಾಮ್‌ಸಂಗ್ ಗ್ಯಾಲಕ್ಸಿ Z ಫೋಲ್ಡ್ 7 ಮತ್ತು ಜುಲೈ 2 ರಂದು ಚೀನಾದಲ್ಲಿ ಬಿಡುಗಡೆಯಾಗಲಿರುವ ಹಾನರ್ ಮ್ಯಾಜಿಕ್ V5 ಫೋಲ್ಡಬಲ್ ಫೋನ್‌ಗಳೊಂದಿಗೆ Vivo X Fold 5 ನೇರವಾಗಿ ಸ್ಪರ್ಧಿಸುವ ನಿರೀಕ್ಷೆಯಿದೆ. ಮುಂಬರುವ ಈ Vivo X Fold 5 ಫೋನ್ ಕುರಿತು ಇದುವರೆಗಿನ ಮಾಹಿತಿ ಈ ಕೆಳಗಿನಂತಿದೆ.

ಹಲವಾರು ಟೀಸರ್‌ಗಳು Vivo X Fold 5 ಫೋನ್‌ನ ಪ್ರಮುಖ ವೈಶಿಷ್ಟ್ಯಗಳ ಬಗ್ಗೆ ಸ್ಪಷ್ಟ ಕಲ್ಪನೆ ನೀಡುತ್ತವೆ. ಈ ಫೋನ್ 6,000mAh ಬ್ಯಾಟರಿಯೊಂದಿಗೆ ಬರಲಿದ್ದು, ಇದು 80W ವೈರ್ಡ್ ಮತ್ತು 40W ವೈರ್‌ಲೆಸ್ ಫಾಸ್ಟ್ ಚಾರ್ಜಿಂಗ್ ಅನ್ನು ಬೆಂಬಲಿಸುತ್ತದೆ. ರಿವರ್ಸ್ ಚಾರ್ಜಿಂಗ್ ಸಾಮರ್ಥ್ಯವೂ ಇದರಲ್ಲಿದೆ. ಕ್ಯಾಮೆರಾ ವಿಭಾಗದಲ್ಲಿ, ಇದು ಝೈಸ್-ಟ್ಯೂನ್ಡ್ ಟ್ರಿಪಲ್ ರಿಯರ್ ಕ್ಯಾಮೆರಾ ಘಟಕವನ್ನು ಹೊಂದಿರಲಿದೆ, ಇದರಲ್ಲಿ 3x ಆಪ್ಟಿಕಲ್ ಜೂಮ್ ಹೊಂದಿರುವ ಪೆರಿಸ್ಕೋಪ್ ಟೆಲಿಫೋಟೋ ಶೂಟರ್ ಸೇರಿದೆ.

ಡಿಸ್‌ಪ್ಲೇ ವಿಷಯದಲ್ಲಿ, Vivo X Fold 5 ಫೋನ್‌ ಒಳ ಮತ್ತು ಹೊರ ಸ್ಕ್ರೀನ್‌ಗಳು 8T LTPO ಪ್ಯಾನೆಲ್‌ಗಳನ್ನು ಬಳಸುತ್ತವೆ. ಪುಸ್ತಕ-ಶೈಲಿಯ ಈ ಫೋಲ್ಡಬಲ್ ಫೋನ್‌ನ ಅಧಿಕೃತ ಚಿತ್ರಗಳು ಈಗಾಗಲೇ ಆನ್‌ಲೈನ್‌ನಲ್ಲಿ ಲಭ್ಯವಿದ್ದು, ತೆಳುವಾದ ವಿನ್ಯಾಸ ಮತ್ತು ದೊಡ್ಡ ವೃತ್ತಾಕಾರದ ಕ್ಯಾಮೆರಾ ಕಟೌಟ್ ಅನ್ನು ಪ್ರದರ್ಶಿಸುತ್ತವೆ. Vivo X Fold 5 ಫೋನ್ ಬೈಬಾಯಿ (ಹಸಿರು), ಕ್ವಿಂಗ್‌ಸಾಂಗ್ (ಬಿಳಿ), ಮತ್ತು ಟೈಟಾನಿಯಂ (ಕಪ್ಪು) ಎಂಬ ಮೂರು ಆಕರ್ಷಕ ಬಣ್ಣಗಳ ಆಯ್ಕೆಗಳಲ್ಲಿ ಲಭ್ಯವಿರಲಿದೆ ಎಂದು ಈಗಾಗಲೇ ಖಚಿತಪಡಿಸಲಾಗಿದೆ.

ಇಷ್ಟೇ ಅಲ್ಲದೆ, ಬಾಳಿಕೆ ಮತ್ತು ರಕ್ಷಣೆಯ ದೃಷ್ಟಿಯಿಂದ, Vivo X Fold 5 ಫೋನ್ IPX8 + IPX9 + IPX9+ ನೀರಿನ ಪ್ರತಿರೋಧ ರೇಟಿಂಗ್ ಅನ್ನು ಹೊಂದಿದೆ ಎಂದು ಜಾಹೀರಾತು ಮಾಡಲಾಗಿದೆ. ಇದಲ್ಲದೆ, ಇದು IP5X-ರೇಟೆಡ್ ಧೂಳು ನಿರೋಧಕ ಸಾಮರ್ಥ್ಯವನ್ನೂ ಹೊಂದಿದೆ. ಫೋನ್ ಸುಮಾರು 216 ಗ್ರಾಂ ತೂಕವನ್ನು ಹೊಂದಿರಲಿದೆ ಮತ್ತು ಮಡಚಿದಾಗ ಸುಮಾರು 9.2 ಮಿ.ಮೀ ದಪ್ಪವಿರಲಿದೆ ಎಂದು ದೃಢಪಡಿಸಲಾಗಿದೆ. ಹಾಗಾಗಿ, ಈ ಫೋನ್ ಭಾರತೀಯ ಮಾರುಕಟ್ಟೆಗೆ ಶೀಘ್ರವೇ ಬರುತ್ತದೆ ಎಂಬ ಸುದ್ದಿಯು ಹೆಚ್ಚು ಮೌಲ್ಯವನ್ನು ಹೊಂದಿದೆ.