12ನೇ ವಯಸ್ಸಿನ ಬಾಲಕಿ ತಯಾರಿಸಿದ್ದು ಜಗತ್ತನ್ನೇ ಉಳಿಸುವ 'ರೊಬೊಟ್'!!

ಯಾರೀಕೆ 'ಅನಾ ಡ್ಯು'?

ನಾವು ಮೊದಲೇ ಹೇಳಿದಂತೆ ಪರಿಸರ ಕಾಳಜಿಗಾಗಿ ಸಂಶೋಧನೆಯಲ್ಲಿ ತೊಡಗಿರುವ ಸಂಶೋಧಕಿ ಈ ಅನಾ ಡ್ಯು. ನೀರಿನಾಳದಲ್ಲಿರುವ ಮೈಕ್ರೋಪ್ಲಾಸ್ಟಿಕ್ ಪತ್ತೆ ಮಾಡುವ ಇನ್ಫ್ರಾರೆಡ್ ಆಧಾರಿತ ರೊಬೊ ಕಂಡುಹಿಡಿದು ಸುದ್ದಿಯಾದವಳು. ಇತ್ತೀಚಿಗೆ ನಡೆದ 2018ನೇ ಡಿಸ್ಕವರಿ ಎಜುಕೇಶನ್ 3ಎಂ ಯಂಗ್ ಸೈಂಟಿಸ್ಟ್ ಚಾಲೆಂಜ್‌ನಲ್ಲಿ ಈಕೆ ಅಂತಿಮ ಸ್ಪರ್ಧಿ ಕೂಡ ಹೌದು.

ರೊಬೊ ನಿರ್ಮಾತೃ!

ರೊಬೊಟ್ ಎಂದರೆ ಏನು ಎಂದು ತಿಳಿಯುವ ವಯಸ್ಸು ಸಹ ಆಗಿಲ್ಲ 'ಅನಾ ಡ್ಯು' ಒಂದು ರೊಬೊವನ್ನು ಕಂಡುಹಿಡಿದು ಸುದ್ದಿಯಾಗಿದ್ದಾಳೆ. ಪ್ಲಾಸ್ಟಿಕ್ ಜಲಮಾಲಿನ್ಯಕ್ಕೆ ಪ್ರಮುಖ ಕಾರಣ. ಜತೆಗೆ ಜಲಚರಗಳ ಜೀವಕ್ಕೂ ಕುತ್ತಾಗಿ ಪರಿಣಮಿಸಿದೆ ಎಂಬ ಅಂಶವನ್ನು ತನ್ನ ತರಗತಿಯಲ್ಲಿ ಕಲಿತಿದ್ದ ಅನಾ ಡ್ಯು ಇದಕ್ಕಾಗಿ ಏನಾದರೂ ಮಾಡಬೇಕು ಎಂದು ರೊಬೊ ಒಂದನ್ನು ತಯಾರಿಸಿದ್ದಾಳೆ.

ಹೇಗಿದೆ 'ಅನಾ ಡ್ಯು' ರೋಬೊ?

ಸಾಗರವನ್ನೇ ಸ್ವಚ್ಚಗೊಳಿಸುವ ಆಕಾಂಕ್ಷೆ ಹೊತ್ತ ಅನಾ ಡ್ಯೂ ಕಂಡುಹಿಡಿದ ರೊಬೊ ಹೆಸರು 'ರಿಮೋಟ್ ಆಪರೇಟೆಡ್ ವಾಹನ' (Remote Operated Vehicle). ಈ ರೊಬೊ ಇನ್‌ಫ್ರಾ ರೆಡ್ ಕಿರಣಗಳನ್ನು ಬಳಸಿ ಮೈಕ್ರೋಪ್ಲಾಸ್ಟಿಕ್ ಅನ್ನು ಪತ್ತೆ ಮಾಡುತ್ತದೆಯಂತೆ. ಈ ಉಪಕರಣ ಬಳಸಿ ಸಾಗರದಾಳದಲ್ಲಿನ ಪ್ಲಾಸ್ಟಿಕ್ ಅನ್ನು ಸಹ ಗುರುತಿಸಬಹುದು ಎಂದು ಅನಾ ಡ್ಯೂ ಹೇಳಿದ್ದಾಳೆ.

ಸಾಗರವನ್ನೇ ಸ್ವಚ್ಚಗೊಳಿಸುವ ಆಕಾಂಕ್ಷಿ!

ಈಗಾಗಲೇ 150 ಮಿಲಿಯನ್ ಮೆಟ್ರಿಕ್ ಟನ್ ಪ್ಲಾಸ್ಟಿಕ್ ಸಾಗರದಾಳದಲ್ಲಿ ಸಂಗ್ರಹಗೊಂಡಿದ್ದು, ಪ್ರತಿವರ್ಷ 8 ಮಿಲಿಯನ್ ಟನ್‌ನಷ್ಟು ಮೈಕ್ರೋಪ್ಲಾಸ್ಟಿಕ್ ಸಾಗರ ತಳ ಸೇರುತ್ತಿದೆ. ಇದು ಜಲಮಾಲಿನ್ಯಕ್ಕೆ ಪ್ರಮುಖ ಕಾರಣವಾಗಿದೆ. ಜತೆಯಲ್ಲಿ ಜಲಚರಗಳ ಜೀವಕ್ಕೂ ಕುತ್ತಾಗಿ ಪರಿಣಮಿಸಿದೆ ಎಂಬುದನ್ನು ತಿಳಿದ ಅನಾ ಡ್ಯುಗೆ ಸಾಗರವನ್ನೇ ಸ್ವಚ್ಚಗೊಳಿಸುವ ಆಕಾಂಕ್ಷೆ ಇದೆಯಂತೆ.

'ಅನಾ ಡ್ಯು' ಹೇಳುವುದೇನು?

ಸಾಕಷ್ಟು ಮಲಿನಕಾರಕಗಳು ಪರಿಸರದಲ್ಲಿ ಸೇರಿಕೊಳ್ಳುವುದರಿಂದ ಪರಿಸರ ಹಾಳಾಗಲು ಕಾರಣವಾಗಿವೆ. ಅವುಗಳಲ್ಲಿ ಪ್ಲಾಸ್ಟಿಕ್ ಮಾತ್ರ ಬಹಳ ಅಪಾಯಕಾರಿ ಮಲಿನಕಾರಕವಾಗಿದೆ. . ಏಕೆಂದರೆ ಅದು ಜೈವಿಕ ಶಿಥಿಲೀಯವಲ್ಲ. ಹೀಗಾಗಿ ಪ್ಲಾಸ್ಟಿಕ್‌ನಿಂದಾಗುವ ಮಾಲಿನ್ಯವನ್ನು ನಿಯಂತ್ರಿಸುವುದು ಬಹಳಮುಖ್ಯ ಎಂದು 12 ವರ್ಷ ವಯಸ್ಸಿನ ಅನಾ ಡ್ಯೂ ಹೇಳುತ್ತಾಳೆ.

ಇಂಜಿನಿಯರ್ ಆಗುವಾಸೆ!

ತನ್ನ 12ನೇ ವಯಸ್ಸಿನಲ್ಲೇ ಪರಿಸರಕ್ಕೆ ಪ್ಲಾಸ್ಟಿಕ್ ಬಹಳ ಅಪಾಯಕಾರಿ ಎಂದು ತಿಳಿದಿರುವ 'ಅನಾ ಡ್ಯೂ', ಪರಿಸರ ಸಮಸ್ಯೆಗಳಿಗೆ ಪರಿಹಾರ ಹುಡುಕುವ ನಿಟ್ಟಿನಲ್ಲಿ ಹಲವು ಬಗೆಯ ಉಪಕರಣಗಳನ್ನು ತಯಾರಿಸುವ ಗುರಿಯನ್ನು ಹೊತ್ತಿದ್ದಾಳೆ. ಅದಕ್ಕಾಗಿ ನಾನು ಎಂಜಿನಿಯರ್ ಆಗಬೇಕು ಎಂದು ತನ್ನ ಮನದ ಇಂಗಿತವನ್ನು ವ್ಯಕ್ತಪಡಿಸಿದ್ದಾಳೆ ಈ ಚಿಕ್ಕ ಬಾಲೆ.