ರಜಿನಿಯ 2.0 ಸಿನಿಮಾ ಬಿಡುಗಡೆ ಮಾಡದಂತೆ ಟೆಲಿಕಾಂ ಕಂಪೆನಿಗಳ ತಕರಾರು!!..ಏಕೆ ಗೊತ್ತಾ?

ವಿಶ್ವ ಸಿನಿಮಾ ಜಗತ್ತಿನಲ್ಲಿ ಭಾರೀ ನಿರೀಕ್ಷೆಯನ್ನು ಹುಟ್ಟಿಹಾಕಿರುವ ಸೂಪರ್​ ಸ್ಟಾರ್ ರಜನಿಕಾಂತ್​ ಹಾಗೂ ಬಾಲಿವುಡ್​ ಸ್ಟಾರ್​ ಅಕ್ಷಯ್​ ಕುಮಾರ್​ ಅಭಿನಯದ 2.0 ಸಿನಿಮಾ ಬಿಡುಗಡೆಗೆ ಟೆಲಿಕಾಂ ಕಂಪೆನಿಗಳು ಅಡ್ಡಗಾಲು ಹಾಕಿವೆ. ಭರ್ಜರಿ 540 ಕೋಟಿ ರೂ. ಬಜೆಟ್​ನಲ್ಲಿ ಸಿದ್ಧವಾಗಿರುವ 2.0 ಸಿನಿಮಾ ಬಿಡುಗಡೆಗೆ ತಡೆ ಕೋರಿ ಸೆನ್ಸಾರ್​ ಮಂಡಳಿಯಲ್ಲಿ ಅರ್ಜಿ ಸಲ್ಲಿಕೆಯಾಗಿದೆ.

ಗುರುವಾರ ವಿಶ್ವದಾಧ್ಯಂತ ಸಿನಿ ರಸಿಕರನ್ನು ರಂಜಿಸಲು ಬರುತ್ತಿರುವ ರಜಿನಿಯ 2.0 ಸಿನಿಮಾ ಬಿಡುಗಡೆಗೆ ತಡೆ ಕೋರಿ ಟೆಲಿಕಾಂ ಟವರ್ ಕಂಪನಿಗಳು ಸೆನ್ಸಾರ್​ ಮಂಡಳಿ ಮೊರೆ ಹೋಗಿದ್ದು, ಯಾವುದೇ ಕಾರಣಕ್ಕೂ 2.0 ಸಿನಿಮಾ ಬಿಡುಗಡೆಗೆ ಅವಕಾಶ ನೀಡಬಾರದು. ಈಗ ನೀಡಲಾಗಿರುವ ಸೆನ್ಸಾರ್​ ಪ್ರಮಾಣಪತ್ರವನ್ನು ಕೂಡಲೇ ವಾಪಸ್​ ಪಡೆಯಬೇಕು ಎಂದು ಮನವಿ ಸಲ್ಲಿಸಿವೆ.

ರಜಿನಿಕಾಂತ್ ಅಭಿನಯದ 2.0 ಸಿನಿಮಾದಲ್ಲಿ 'ಮೊಬೈಲ್​ಗಳು ಹಾಗೂ ಸಿಗ್ನಲ್​ ಟವರ್​ನಿಂದ ವಿಕಿರಣಗಳು ಹೊರಹೊಮ್ಮಿ ಅದು ಮನುಷ್ಯರ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತದೆ' ಎಂಬ ತಪ್ಪು ಸಂದೇಶ ರವಾನಿಸುತ್ತಿದೆ. ಹಾಗಾಗಿ, ಸಿನಿಮಾ ಬಿಡುಗಡೆಗೆ ಅವಕಾಶ ನೀಡಬಾರದು ಎಂದು 'ಸೆಲ್ಯುಲಾರ್​ ಆಪರೇಟರ್ಸ್​ ಅಸೋಸಿಯೇಷನ್​ ಆಫ್​ ಇಂಡಿಯಾ' ಸಂಸ್ಥೆ ಒತ್ತಾಯಿಸಿದೆ.

2.0 ಸಿನಿಮಾ ಬಿಡುಗಡೆಗೆ ತಡೆ ನೀಡುವುದು ಮಾತ್ರವಲ್ಲದೇ, ಹಾಗೆಯೇ ಈಗಾಗಲೇ ಬಿಡುಗಡೆಯಾಗಿರುವ ಸಿನಿಮಾದ ಟ್ರೇಲರ್​ನ ಲಿಂಕ್​ಗಳನ್ನು ಅಂತರ್ಜಾಲದಿಂದ ತೆಗೆದುಹಾಕಬೇಕು ಎಂದು ಸೆಲ್ಯುಲಾರ್​ ಆಪರೇಟರ್ಸ್​ ಅಸೋಸಿಯೇಷನ್​ ಆಫ್​ ಇಂಡಿಯಾ (ಸಿಒಎಐ) ಮಹಾ ನಿರ್ದೇಶಕರಾದೆ ರಂಜನ್​ ಮಾಥಿವ್​ ಅವರು ಸೆನ್ಸಾರ್​ ಮಂಡಳಿಯನ್ನು ಒತ್ತಾಯಿಸಿದ್ದಾರೆ.

ಈಗಾಗಲೇ ಮೊಬೈಲ್​ ಟವರ್​ಗಳು ಹಾಗೂ ಮೊಬೈಲ್​ನಿಂದ ಹೊರಹೊಮ್ಮುವ ವಿಕಿರಣಗಳು ಪಕ್ಷಿಗಳಿಗೆ, ಮಕ್ಕಳಿಗೆ ಹಾಗು ಇನ್ನು ಕೆಲವು ಮಾನವ ಚಟುವಟಿಕೆಗಳಿಗೆ ಅಪಾಯಕಾರಿ ಎಂಬ ತಪ್ಪು ಕಲ್ಪನೆಯನ್ನು ಹೊಂದಲಾಗಿದೆ. 2.0 ಸಿನಿಮಾ ಕೂಡ ಅದನ್ನೇ ಪ್ರತಿಪಾದಿಸುತ್ತಿದೆ ಹಾಗಾಗಿ ನಾವು ಸೆನ್ಸಾರ್​ ಮಂಡಳಿ ಮೊರೆ ಹೋಗಿದ್ದೇವೆ ಎಂದು ಮಾಥಿವ್​ ಅವರು ತಿಳಿಸಿದ್ದಾರೆ.