ಮ್ಯೂಸಿಕ್ ಪ್ರಿಯ ಏರ್‌ಟೆಲ್ ಗ್ರಾಹಕರಿಗೆ ಇದು ಭರ್ಜರಿ ಸಿಹಿಸುದ್ದಿ!

ಭಾರತದ ಪ್ರಮುಖ ಟೆಲಿಕಾಂ ಸಂಸ್ಥೆ ಏರ್‌ಟೆಲ್ ಭಾರತದಲ್ಲಿ ಡಿಜಿಟಲ್ ಸೇವೆಗಳ ಲಭ್ಯತೆಯನ್ನು ವಿಸ್ತರಿಸುವಲ್ಲಿ ಪ್ರಮುಖ ಹೆಜ್ಜೆಗಳನ್ನು ಇಡುತ್ತಿದೆ. ತನ್ನ ಗ್ರಾಹಕರಿಗೆ ಹಲವಾರು ಬಂಡಲ್ ಮಾಡಲಾದ ಡಿಜಿಟಲ್ ಸೇವೆಗಳನ್ನು ಹೆಚ್ಚಿಸುತ್ತಿರುವ ಏರ್‌ಟೆಲ್, ಈಗ ಪ್ರಿಪೇಯ್ಡ್ ಬಳಕೆದಾರರಿಗೆ ಆಪಲ್ ಮ್ಯೂಸಿಕ್ಗೆ (Apple Music) ಉಚಿತ ಪ್ರವೇಶವನ್ನು ನೀಡಲು ಪ್ರಾರಂಭಿಸಿದೆ.! ಈ ಹಿಂದೆ ಈ ಸೌಲಭ್ಯ ಪೋಸ್ಟ್‌ಪೇಯ್ಡ್ ಮತ್ತು ಬ್ರಾಡ್‌ಬ್ಯಾಂಡ್ ಚಂದಾದಾರರಿಗೆ ಮಾತ್ರ ಲಭ್ಯವಿತ್ತು. ಇದೀಗ ಈ ಉಚಿತ ಸೇವೆಯು ಪ್ರೀಪೇಟ್ ಗ್ರಾಹಕರಿಗೆ ಲಭ್ಯವಾಗುತ್ತಿದೆ.

ಕೆಲವು ಏರ್‌ಟೆಲ್ ಪ್ರಿಪೇಯ್ಡ್ ಗ್ರಾಹಕರು ಏರ್‌ಟೆಲ್ ಥ್ಯಾಂಕ್ಸ್ ಅಪ್ಲಿಕೇಶನ್‌ನಲ್ಲಿ ಆಪಲ್ ಮ್ಯೂಸಿಕ್ ಆಫರ್ ಅನ್ನು ನೋಡುತ್ತಿದ್ದಾರೆ. ಆರು ತಿಂಗಳವರೆಗೆ ಯಾವುದೇ ಹೆಚ್ಚುವರಿ ವೆಚ್ಚವಿಲ್ಲದೆ ಈ ಸ್ಟ್ರೀಮಿಂಗ್ ಸೇವೆಯನ್ನು ಆನಂದಿಸಬಹುದು ಎಂದು ಬ್ಯಾನರ್‌ನಲ್ಲಿ ಉಲ್ಲೇಖಿಸಲಾಗಿದೆ. ಆರು ತಿಂಗಳ ಅವಧಿ ಮುಗಿದ ನಂತರ, ಚಂದಾದಾರಿಕೆ ಪ್ರತಿ ತಿಂಗಳು ₹119 ಗೆ ಸ್ವಯಂಚಾಲಿತವಾಗಿ ನವೀಕರಣಗೊಳ್ಳುತ್ತದೆ ಎಂದು ಹೇಳಲಾಗಿದೆ. ಆಶ್ಚರ್ಯವೆಂದರೆ, ಅನಿಯಮಿತವಲ್ಲದ 5G ಯೋಜನೆಯಲ್ಲಿಯೂ ಈ ಕೊಡುಗೆ ಲಭ್ಯವಾಗಿದೆ.

ಏರ್‌ಟೆಲ್‌ ತನ್ನ ರೀಚಾರ್ಜ್ ಪ್ಯಾಕ್‌ಗಳಲ್ಲಿ ಪ್ರೀಮಿಯಂ ಮನರಂಜನೆಯ ಲಾಭಗಳನ್ನು ಸೇರಿಸಲು ಜಾಗತಿಕ ಮತ್ತು ಭಾರತೀಯ ಪ್ಲಾಟ್‌ಫಾರ್ಮ್‌ಗಳೊಂದಿಗೆ ಸಕ್ರಿಯವಾಗಿ ಸಹಕರಿಸುತ್ತಿದೆ. ಕಳೆದ ವರ್ಷ, ಏರ್‌ಟೆಲ್ ತನ್ನ ಗ್ರಾಹಕರಿಗೆ Apple TV+ ಮತ್ತು Apple Music ಚಂದಾದಾರಿಕೆಗಳನ್ನು ಒದಗಿಸಲು Apple ಜೊತೆ ಪಾಲುದಾರಿಕೆಯನ್ನು ಘೋಷಿಸಿತ್ತು. ಆರಂಭದಲ್ಲಿ, ಈ ಪ್ರಯೋಜನವನ್ನು ಬ್ರಾಡ್‌ಬ್ಯಾಂಡ್ ಮತ್ತು ಪೋಸ್ಟ್‌ಪೇಯ್ಡ್ ಗ್ರಾಹಕರಿಗೆ ಬಿಡುಗಡೆ ಮಾಡಲಾಗಿತ್ತು, ಆದರೆ ಈಗ ಅದನ್ನು ಪ್ರಿಪೇಯ್ಡ್ ಬಳಕೆದಾರರ ದೊಡ್ಡ ಬೇಸ್‌ಗೆ ವಿಸ್ತರಿಸಲಾಗುತ್ತಿದೆ.

ಏರ್‌ಟೆಲ್ ಪ್ರೀಪೇಡ್ ಬಳಕೆದಾರರಿಗೆ ಆಪಲ್ ಮ್ಯೂಸಿಕ್ಗೆ ಉಚಿತ ಪ್ರವೇಶವನ್ನು ಒದಗಿಸುವ ಕುರಿತಂತೆ ಏರ್‌ಟೆಲ್ ಅಧಿಕೃತವಾಗಿ ಯಾವುದೇ ಘೋಷಣೆ ಮಾಡಿಲ್ಲ. ಆದ್ದರಿಂದ ಈ ಪ್ರಯೋಜನದ ಅರ್ಹತಾ ಮಾನದಂಡಗಳು ಸ್ಪಷ್ಟವಾಗಿಲ್ಲ. ಗ್ರಾಹಕರು ತಮಗೆ ಈ ಪ್ರಯೋಜನ ಲಭ್ಯವಿದೆಯೇ ಎಂದು ಖಚಿತಪಡಿಸಿಕೊಳ್ಳಲು ಏರ್‌ಟೆಲ್ ಥ್ಯಾಂಕ್ಸ್ ಅಪ್ಲಿಕೇಶನ್ ಪರಿಶೀಲಿಸಬಹುದು. ಇತ್ತೀಚೆಗೆ ಏರ್‌ಟೆಲ್ ತನ್ನ ಬಳಕೆದಾರರಿಗೆ ಪರ್ಪ್ಲೆಕ್ಸಿಟಿ AI ಪ್ರೊಗೆ ಉಚಿತ ಪ್ರವೇಶವನ್ನು ನೀಡುವುದಾಗಿ ಘೋಷಿಸಿದ ಕೆಲವೇ ವಾರಗಳಲ್ಲಿ ಈ ಕ್ರಮ ಬಂದಿದೆ.

ಇತ್ತೀಚೆಗೆ, ಏರ್‌ಟೆಲ್ 25ಕ್ಕೂ ಹೆಚ್ಚು OTT ಪ್ಲಾಟ್‌ಫಾರ್ಮ್‌ಗಳಿಗೆ ಪ್ರವೇಶ ಒದಗಿಸುವ ಹೊಸ ರೀಚಾರ್ಜ್ ಯೋಜನೆಗಳನ್ನು ಪರಿಚಯಿಸಿದೆ. ಈ ಪ್ಯಾಕ್‌ಗಳು ಡೇಟಾ ಮತ್ತು ಅನಿಯಮಿತ ಕರೆಗಳ ಜೊತೆಗೆ ನೆಟ್‌ಫ್ಲಿಕ್ಸ್, ಡಿಸ್ನಿ+ ಹಾಟ್‌ಸ್ಟಾರ್, ZEE5, ಸೋನಿಲಿವ್, ಲಯನ್ಸ್‌ಗೇಟ್ ಪ್ಲೇ, ಹೊಯ್ಚೊಯ್, ಸನ್‌ನೆಕ್ಸ್ಟ್ ಮತ್ತು ಆಹಾ ಸೇರಿದಂತೆ ಇತರ ಹಲವು ಪ್ಲಾಟ್‌ಫಾರ್ಮ್‌ಗಳನ್ನು ಒಳಗೊಂಡಿವೆ. ಏರ್‌ಟೆಲ್ ಪ್ರಕಾರ, ಈ ಪ್ಯಾಕ್‌ಗಳು 16 ಕ್ಕೂ ಹೆಚ್ಚು ಭಾಷೆಗಳಲ್ಲಿ ಮನರಂಜನೆಯನ್ನು ಒದಗಿಸುತ್ತವೆ ಮತ್ತು ದೇಶಾದ್ಯಂತ ವ್ಯಾಪಕ ಶ್ರೇಣಿಯ ಪ್ರೇಕ್ಷಕರ ಅಗತ್ಯಗಳನ್ನು ಪೂರೈಸುತ್ತವೆ.

ಉದಾಹರಣೆಗೆ, ₹279 ಪ್ರಿಪೇಯ್ಡ್ ಯೋಜನೆಯು ಒಂದು ತಿಂಗಳ ಮಾನ್ಯತೆಯೊಂದಿಗೆ ಬರುತ್ತದೆ. ಇದು ನೆಟ್‌ಫ್ಲಿಕ್ಸ್ ಬೇಸಿಕ್, ZEE5, ಡಿಸ್ನಿ+ ಹಾಟ್‌ಸ್ಟಾರ್ ಮತ್ತು ಏರ್‌ಟೆಲ್ ಎಕ್ಸ್‌ಸ್ಟ್ರೀಮ್ ಪ್ಲೇ ಪ್ರೀಮಿಯಂ ಚಂದಾದಾರಿಕೆಗಳನ್ನು ಒಳಗೊಂಡಿದೆ. ಈ ಯೋಜನೆಯಲ್ಲಿ ಸೇರಿಸಲಾದ OTT ಚಂದಾದಾರಿಕೆಗಳು ಸುಮಾರು ₹750 ಮೌಲ್ಯದ್ದಾಗಿವೆ ಎಂದು ಏರ್‌ಟೆಲ್ ಹೈಲೈಟ್ ಮಾಡಿದೆ. ಹೆಚ್ಚಿನ ಡೇಟಾ ಬಳಕೆದಾರರಿಗೆ, ಏರ್‌ಟೆಲ್ ₹598 ಯೋಜನೆಯನ್ನು ಒದಗಿಸುತ್ತಿದ್ದು, ಈ ಯೋಜನೆಯು 28 ದಿನಗಳ ಮಾನ್ಯತೆಯೊಂದಿಗೆ ಅನಿಯಮಿತ 5G ಡೇಟಾ, ಅನಿಯಮಿತ ಕರೆಗಳು ಮತ್ತು ಬಂಡಲ್ ಮಾಡಲಾದ OTT ಚಂದಾದಾರಿಕೆಗಳನ್ನು ಒದಗಿಸುತ್ತದೆ. ಇದಕ್ಕಿಂತ ಹೆಚ್ಚಿನ ₹1,729 ರೀಚಾರ್ಜ್ ಯೋಜನೆಯು 84 ದಿನಗಳವರೆಗೆ ಅನಿಯಮಿತ 5G ಡೇಟಾ ಮತ್ತು ಧ್ವನಿ ಕರೆಗಳನ್ನು ನೀಡುತ್ತದೆ.

ಪರ್ಪ್ಲೆಕ್ಸಿಟಿ AI ಜೊತೆಗಿನ ಪಾಲುದಾರಿಕೆಗಾಗಿ ಏರ್‌ಟೆಲ್ ಇತ್ತೀಚೆಗೆ ಗಮನ ಸೆಳೆದಿತ್ತು. ಜುಲೈ 2025 ರಲ್ಲಿ, ಕಂಪನಿಯು ತನ್ನ ಎಲ್ಲಾ ಗ್ರಾಹಕರಿಗೆ ಪರ್ಪ್ಲೆಕ್ಸಿಟಿ ಪ್ರೊಗೆ ಉಚಿತ ಪ್ರವೇಶವನ್ನು ನೀಡುವುದಾಗಿ ಬಹಿರಂಗಪಡಿಸಿತು. ಈ ಪ್ರೀಮಿಯಂ ಯೋಜನೆಯು ಸುಧಾರಿತ AI ಮಾದರಿಗಳು, ಫೈಲ್ ಅಪ್‌ಲೋಡ್‌ಗಳು, ಇಮೇಜ್ ಜನರೆಷನ್ ಮತ್ತು ಇತರ ಪರಿಕರಗಳಿಗೆ ಪ್ರವೇಶವನ್ನು ಒದಗಿಸುತ್ತದೆ. ಈ ಕುರಿತ ಸಂಪೂರ್ಣ ಮಾಹಿತಿಯನ್ನು ನೀವು ಈ ಲಿಂಕ್ ಮೇಲೆ ಕ್ಲಿಕ್ ಮಾಡುವ ಮೂಲಕ ತಿಳಿಯಬಹುದು.