ರೆಟ್ರೊ ಸ್ಟೈಲ್‌ನಲ್ಲಿ ಮೂರು ಹೊಸ ಸ್ಪೀಕರ್‌ಗಳನ್ನು ಪರಿಚಯಿಸಿದ ಐವಾ! ಬೆಲೆ ಎಷ್ಟು?

ಆಡಿಯೋ ಪ್ರಾಡಕ್ಟ್‌ಗಳ ಜನಪ್ರಿಯ ಬ್ರ್ಯಾಂಡ್‌ ಐವಾ ಕಂಪೆನಿ ಹೊಸ ಪೋರ್ಟಬಲ್‌ ಸ್ಪೀಕರ್‌ಗಳನ್ನು ಬಿಡುಗಡೆ ಮಾಡಿದೆ. ಯುವಜನತೆಯ ಆಶಯಗಳಿಗೆ ಪೂರಕವಾದ ಡಿಸೈನ್‌ ಹಾಗೂ ವಿನ್ಯಾಸವನ್ನು ಈ ಪೋರ್ಟಬಲ್‌ ಸ್ಪೀಕರ್‌ಗಳಲ್ಲಿ ಕಾಣಬಹುದಾಗಿದೆ. ಸದ್ಯ ಮೂರು ಹೊಸ ಪೋರ್ಟಬಲ್‌ ಸ್ಪೀಕರ್‌ಗಳನ್ನು ಪರಿಚಯಿಸಲಾಗಿದೆ. ಇವುಗಳನ್ನು ಐವಾ MIX- 440 Enigma Beta, ಐವಾ RS-X 150 Natsukasii Pro ಮತ್ತು ಐವಾ RS-X 100 Natsukasii Proಗಳೆಂದು ಹೆಸರಿಸಲಾಗಿದೆ.

ಹೌದು, ಐವಾ ಕಂಪೆನಿ ಭಾರತದಲ್ಲಿ ಮೂರು ಹೊಸ ಪೋರ್ಟಬಲ್‌ ಸ್ಪೀಕರ್‌ಗಳನ್ನು ಬಿಡುಗಡೆ ಮಾಡಿದೆ. ಈ ಸ್ಪೀಕರ್‌ಗಳು ರೆಟ್ರೋ ಶೈಲಿಯನ್ನು ಹೊಂದಿದ್ದು, ಮೊದಲ ನೋಟದಲ್ಲಿ ಗಮನಸೆಳೆಯುವ ವಿನ್ಯಾಸವನ್ನು ಪಡೆದಿದೆ. ಅತ್ಯಾಸಕ್ತಿಯ ಆಡಿಯೊಫೈಲ್ಸ್ ಮತ್ತು ಹಾರ್ಡ್-ಕೋರ್ ಮ್ಯೂಸಿಕ್‌ ಪ್ರೇಮಿಗಳ ಅಗತ್ಯಗಳನ್ನು ಪೂರೈಸಲು ಈ ಸ್ಪೀಕರ್‌ಗಳನ್ನು ವಿನ್ಯಾಸಗೊಳಿಸಲಾಗಿದೆ ಎಂದು ಐವಾ ಕಂಪನಿ ಹೇಳಿಕೊಂಡಿದೆ. ಹಾಗಾದ್ರೆ ಐವಾ ಕಂಪೆನಿ ಪರಿಚಯಿಸಿರುವ ಹೊಸ ಪೋರ್ಟಬಲ್‌ ಸ್ಪೀಕರ್‌ಗಳ ವಿಶೇಷತೆ ಏನು ಅನ್ನೊದನ್ನ ಈ ಲೇಖನದಲ್ಲಿ ತಿಳಿಸಿಕೊಡ್ತಿವಿ ಓದಿರಿ.

ಐವಾ MIX-440 ಎನಿಗ್ಮಾ ಬೀಟಾ ಪೋರ್ಟಬಲ್ ಬ್ಲೂಟೂತ್ ಸ್ಪೀಕರ್ ಹೇಗಿದೆ?

ಐವಾ MIX-440 ಎನಿಗ್ಮಾ ಬೀಟಾ ಪೋರ್ಟಬಲ್ ಬ್ಲೂಟೂತ್ ಸ್ಪೀಕರ್ ಡೈನಾಮಿಕ್‌ ಮತ್ತು ಬಹುಮುಖ ಸ್ಪೀಕರ್‌ ಆಗಿದೆ. ಇದು ಅತ್ಯುತ್ತಮವಾದ ಆಡಿಯೋ ಎಕ್ಸ್‌ಪಿರಿಯನ್ಸ್‌ ನೀಡಲಿದೆ ಎಂದು ಐವಾ ಕಂಪೆನಿ ಹೇಳಿಕೊಂಡಿದೆ. ಇದು ವಿಶೇಷವಾಗಿ BASS++ ಸೌಂಡ್‌ ಪ್ರೊಫೈಲ್ ಅನ್ನು ಹೊಂದಿದ್ದು, ಬ್ಲೂಟೂತ್ 5.0 ಕನೆಕ್ಟಿವಿಟಿಯನ್ನು ಬೆಂಬಲಿಸಲಿದೆ. ಈ ಸ್ಪೀಕರ್ ಪೋರ್ಟಬಲ್ ಮತ್ತು ತುಂಬಾನೇ ಸ್ಟೈಲಿಶ್ ಆಗಿದ್ದು, ಎರಡು ಬಾಸ್ ರೇಡಿಯೇಟರ್‌ಗಳೊಂದಿಗೆ ಧ್ವನಿಯನ್ನು ಸಮವಾಗಿ ವಿತರಿಸಲಿದೆ.

ಇನ್ನು ಈ ಸ್ಪೀಕರ್‌ 15000 mAH ಸಾಮರ್ಥ್ಯದ ಬ್ಯಾಟರಿಯನ್ನು ಹೊಂದಿದ್ದು, 80W ಪವರ್‌ಫುಲ್‌ ಸೌಂಡ್‌ ಅನ್ನು ನೀಡಲಿದೆ. ಇದು ಟೈಪ್ - ಸಿ ಚಾರ್ಜಿಂಗ್ ಪಾಯಿಂಟ್‌ ಹೊಂದಿದ್ದು, 4 ಗಂಟೆಗಳ ಚಾರ್ಜಿಂಗ್ ಟೈಂ ಮತ್ತು 9 ಗಂಟೆಗಳ ಪ್ಲೇಬ್ಯಾಕ್ ಟೈಂ ಅನ್ನು ಆಕ್ಟಿವ್‌ ಮಾಡಲಿದೆ. ಇದಲ್ಲದೆ ಈ ಸ್ಪೀಕರ್ ಕರೋಕೆ ಪ್ರಿಯರಿಗೆ ಉಪಯುಕ್ತವಾಗುವ ಕಾರ್ಡ್‌ಲೆಸ್ MIC ಅನ್ನು ಕೂಡ ಒಳಗೊಂಡಿದೆ. ಇದರಲ್ಲಿ ನೀವು ಡಿಜಿಟಲ್‌ ಕಂಟ್ರೋಲ್‌ ಮತ್ತು TSW ಮಲ್ಟಿ-ಲಿಂಕ್ ಟೆಕ್ನಾಳಜಿಯನ್ನು ಕಾಣಬಹುದಾಗಿದೆ.

ಐವಾ RS-X 150 Natsukasii Pro ಪೋರ್ಟಬಲ್ ರೆಟ್ರೋ ಬ್ಲೂಟೂತ್ ಸ್ಪೀಕರ್ ಫೀಚರ್ಸ್‌

ಐವಾ RS-X 150 Natsukasii Pro ಪ್ರೀಮಿಯಂ ರೆಟ್ರೊ ಬ್ಲೂಟೂತ್‌ ಸ್ಪೀಕರ್‌ ಬ್ಯೂಟಿಫುಲ್‌ ಡಿಸೈನ್‌ನಿಂದ ಗಮನಸೆಳೆದಿದೆ. ಇದರ ವಿನ್ಯಾಸಕ್ಕೆ ಮನಸೋಲದವರೇ ಇಲ್ಲ ಎನ್ನಬಹುದು. ಇದು ಅತ್ಯುತ್ತಮ ದರ್ಜೆಯ ಸೌಂಡ್‌ ಗುಣಮಟ್ಟವನ್ನು ಹೊಂದಿದ್ದು, ಜಪಾನೀಸ್ ತಂತ್ರಜ್ಞಾನ ಮತ್ತು ಟ್ರಿಪಲ್ ಡ್ರೈವರ್‌ಗಳನ್ನು ಒಳಗೊಂಡಿದೆ. ಇನ್ನು ಈ ಸ್ಪೀಕರ್‌ 6000mAh ಸಾಮರ್ಥ್ಯದ ಬ್ಯಾಟರಿಯನ್ನು ಹೊಂದಿದ್ದು, 12 ಗಂಟೆಗಳ ಪ್ಲೇಬ್ಯಾಕ್‌ ಟೈಂ ನೀಡಲಿದೆ. ಇದು ಟೈಪ್-ಸಿ ಚಾರ್ಜಿಂಗ್ ಪೋರ್ಟ್‌ನೊಂದಿಗೆ ಬರಲಿದೆ.

ಐವಾ RS-X 100 Natsukasii Pro ಪೋರ್ಟಬಲ್ ರೆಟ್ರೋ ಬ್ಲೂಟೂತ್ ಸ್ಪೀಕರ್

ಐವಾ RS-X 100 Natsukasii Pro ಸ್ಪೀಕರ್‌ ತನ್ನ ರೆಟ್ರೊ ಸ್ಟೈಲಿಂಗ್ ಮತ್ತು ಸೌಂಡ್‌ ಔಟ್‌ಪುಟ್‌ನಿಂದ ಗಮನಸೆಳೆಯಲಿದೆ. ಈ ಸ್ಪೀಕರ್‌ ಕಾಂಪ್ಯಾಕ್ಟ್ ಬಿಲ್ಟ್‌ ಅನ್ನು ಹೊಂದಿದ್ದು, ಸಮತೋಲಿತ ಧ್ವನಿ ವಿತರಣೆಗಾಗಿ ಟ್ರಿಪಲ್ ಡ್ರೈವರ್‌ಗಳನ್ನು ಒಳಗೊಂಡಿದೆ. ಇನ್ನು ಈ ಡಿವೈಸ್‌ 4000 mAH ಸಾಮರ್ಥ್ಯದ ಬ್ಯಾಟರಿಯನ್ನು ಹೊಂದಿದ್ದು, ತ್ವರಿತ ಚಾರ್ಜಿಂಗ್‌ಗಾಗಿ ಟೈಪ್-ಸಿ ಚಾರ್ಜಿಂಗ್ ಪೋರ್ಟ್ ಅನ್ನು ಬೆಂಬಲಿಸಲಿದೆ.

ಭಾರತದಲ್ಲಿ ಐವಾ ಸ್ಪೀಕರ್‌ಗಳ ಬೆಲೆ ಮತ್ತು ಲಭ್ಯತೆ

ಐವಾ MIX-440 ಎನಿಗ್ಮಾ ಬೀಟಾ ಪೋರ್ಟಬಲ್ ಬ್ಲೂಟೂತ್ ಸ್ಪೀಕರ್ ಅತ್ಯುಂತ ದುಬಾರಿ ಸ್ಪೀಕರ್‌ ಆಗಿದೆ. ಭಾರತದಲ್ಲಿ ಇದರ ಬೆಲೆ 54,990ರೂ. ಆಗಿದೆ. ಇನ್ನು ಐವಾ RS-X 150 Natsukasii Pro ಪೋರ್ಟಬಲ್ ರೆಟ್ರೋ ಬ್ಲೂಟೂತ್ ಸ್ಪೀಕರ್‌ 33,990ರೂ. ಬೆಲೆ ಹೊಂದಿದೆ. ಆದರೆ ಐವಾ RS-X 100 Natsukasii Pro ಪೋರ್ಟಬಲ್ ರೆಟ್ರೋ ಬ್ಲೂಟೂತ್ ಸ್ಪೀಕರ್ 27,990ರೂ. ಬೆಲೆಯಲ್ಲಿ ಲಭ್ಯವಾಗಲಿದೆ. ಇನ್ನು ಐವಾ ಕಂಪೆನಿಯ ಈ ಮೂರು ಸ್ಪೀಕರ್‌ಗಳು ಕೂಡ ಐವಾ ವೆಬ್‌ಸೈಟ್‌ನಲ್ಲಿ ಲಭ್ಯವಿದೆ. ಹಾಗೆಯೇ ಕ್ರೋಮಾ, ರಿಲಯನ್ಸ್ ಡಿಜಿಟಲ್ ಮತ್ತು ಸೆಲೆಕ್ಟ್ ಪಾರ್ಟ್‌ನರ್ ಸ್ಟೋರ್‌ಗಳಲ್ಲಿಯೂ ಕೂಡ ಮಾರಾಟಕ್ಕೆ ಬರಲಿವೆ.