ಇಂದಿನಿಂದ ಅಮೆಜಾನ್ ಗ್ರೇಟ್ ಸಮ್ಮರ್ ಸೇಲ್ ಆರಂಭ!..ಏನೆಲ್ಲಾ ಕೊಡುಗೆಗಳು ನೋಡಿ!

ಭಾರತದಲ್ಲಿ ಬೇಸಿಗೆಯ ಶಾಖ ಹೆಚ್ಚಾಗುತ್ತಿದ್ದಂತೆ, ಆನ್‌ಲೈನ್ ಶಾಪಿಂಗ್ ದಿಗ್ಗಜ ಸಂಸ್ಥೆ ಅಮೆಜಾನ್ ತನ್ನ ಬಹುನಿರೀಕ್ಷಿತ "ಗ್ರೇಟ್ ಸಮ್ಮರ್ ಸೇಲ್ 2025" ಅನ್ನು ಆರಂಭಿಸಿದೆ. ಈ ಬಾರಿಯ ಮಾರಾಟವು ಅಮೆಜಾನ್ ಪ್ರೈಮ್ ಸದಸ್ಯರಿಗೆ ಇಂದು (ಮೇ 1) ಬೆಳಿಗ್ಗೆ 12 ಗಂಟೆಯಿಂದಲೇ ಆರಂಭವಾಗಿದೆ. ಉಳಿದ ಎಲ್ಲಾ ಸಾಮಾನ್ಯ ಗ್ರಾಹಕರು ಇಂದು ಮಧ್ಯಾಹ್ನ 12 ಗಂಟೆಯಿಂದ ಈ ಭರ್ಜರಿ ರಿಯಾಯಿತಿಗಳ ಲಾಭವನ್ನು ಪಡೆಯಬಹುದು ಎಂದು ಅಮೆಜಾನ್ ತಿಳಿಸಿದೆ. ಈ ಮಾರಾಟದ ವೇಳೆಯಲ್ಲಿ ಎಲೆಕ್ಟ್ರಾನಿಕ್ಸ್, ಫ್ಯಾಷನ್, ಗೃಹಾಲಂಕಾರ ಮತ್ತು ಅಡುಗೆಮನೆಯ ಅಗತ್ಯ ವಸ್ತುಗಳು ಸೇರಿದಂತೆ ವಿವಿಧ ಉತ್ಪನ್ನಗಳ ಮೇಲೆ ಗರಿಷ್ಠ ಶೇಕಡಾ 80 ರಷ್ಟು ರಿಯಾಯಿತಿಯನ್ನು ನೀಡುವುದಾಗಿ ಅಮೆಜಾನ್ ಹೇಳಿದೆ.

ಈಗಾಗಲೇ ಅಮೆಜಾನ್ ತನ್ನ ವೆಬ್‌ಸೈಟ್‌ನಲ್ಲಿ ಮೀಸಲಾದ ಪುಟದ ಮೂಲಕ ಈ ಮಾರಾಟದ ಕೆಲವು ಪ್ರಮುಖ ಕೊಡುಗೆಗಳನ್ನು ಬಹಿರಂಗಪಡಿಸಿದೆ. ಅದರ ಪ್ರಕಾರ, ಇತ್ತೀಚಿನ ಪ್ರಮುಖ ಸ್ಮಾರ್ಟ್‌ಫೋನ್‌ಗಳು ಮತ್ತು ಅವುಗಳ ಪರಿಕರಗಳ ಮೇಲೆ ಶೇಕಡಾ 40 ರವರೆಗೆ ರಿಯಾಯಿತಿ ಲಭ್ಯವಿರುತ್ತದೆ. ಟ್ಯಾಬ್ಲೆಟ್‌ಗಳ ಖರೀದಿಯ ಮೇಲೆ ಗ್ರಾಹಕರು ಗರಿಷ್ಠ ಶೇಕಡಾ 60 ರಷ್ಟು ರಿಯಾಯಿತಿ, ಗೃಹೋಪಯೋಗಿ , ಸ್ಮಾರ್ಟ್ ಟಿವಿಗಳು ಮತ್ತು ಪ್ರೊಜೆಕ್ಟರ್‌ಗಳಂತಹ ಉತ್ಪನ್ನಗಳ ಮೇಲೆ ಬರೋಬ್ಬರಿ ಶೇಕಡಾ 65 ರಷ್ಟು ರಿಯಾಯಿತಿ ಇರಲಿದೆ. ಅಷ್ಟೇ ಅಲ್ಲದೆ, ಪ್ರಯಾಣದ ಬುಕಿಂಗ್‌ಗಳ ಮೇಲೂ ಶೇಕಡಾ 40 ರಷ್ಟು ರಿಯಾಯಿತಿ ದೊರೆಯಲಿದೆ ಎಂದು ತಿಳಿಸಲಾಗಿದೆ.

ಪ್ರಮುಖ ಮೊಬೈಲ್ ಬ್ರಾಂಡ್‌ಗಳಾದ ಆಪಲ್, ಐಕ್ಯೂಒಒ, ಒನ್‌ಪ್ಲಸ್, ಸ್ಯಾಮ್‌ಸಂಗ್, ರಿಯಲ್‌ಮಿ ಮತ್ತು ಶಿಯೋಮಿಯ ವಿವಿಧ ಮೊಬೈಲ್ ಫೋನ್‌ಗಳು ಮತ್ತು ಪರಿಕರಗಳು ಈ ಗ್ರೇಟ್ ಸಮ್ಮರ್ ಸೇಲ್ ಮಾರಾಟದಲ್ಲಿ ಕಡಿಮೆ ಬೆಲೆಗೆ ಲಭ್ಯವಿರಲಿವೆ. ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಎಸ್ 24 ಅಲ್ಟ್ರಾ, ಐಫೋನ್ 15 ಮತ್ತು ಒನ್‌ಪ್ಲಸ್ 13 ಆರ್ ನಂತಹ ಜನಪ್ರಿಯ ಹ್ಯಾಂಡ್‌ಸೆಟ್‌ಗಳು ಈಗಾಗಲೇ ರಿಯಾಯಿತಿ ದರಗಳೊಂದಿಗೆ ಪಟ್ಟಿಮಾಡಲ್ಪಟ್ಟಿವೆ. ಮುಂಬರುವ ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಎ 55 5ಜಿ ಮತ್ತು ಗ್ಯಾಲಕ್ಸಿ ಎಂ 35 5ಜಿ ಮಾದರಿಗಳು ಸಹ ಮಾರಾಟದ ಸಮಯದಲ್ಲಿ ರಿಯಾಯಿತಿ ದರದಲ್ಲಿ ಲಭ್ಯವಿರುತ್ತವೆ ಎಂದು ಅಮೆಜಾನ್ ತಿಳಿಸಿದೆ.

ಟಿವಿ ಮತ್ತು ಗೃಹೋಪಯೋಗಿ ವಸ್ತುಗಳ ವಿಭಾಗದಲ್ಲಿ, 43-ಇಂಚಿನ ಶಿಯೋಮಿ ಸ್ಮಾರ್ಟ್ ಟಿವಿ ಎ ಪ್ರೊ ಮತ್ತು 55-ಇಂಚಿನ ಸೋನಿ ಬ್ರಾವಿಯಾ 3 ಸರಣಿಯ 4 ಕೆ ಅಲ್ಟ್ರಾ ಎಚ್‌ಡಿ ಸ್ಮಾರ್ಟ್‌ಟಿವಿಗಳು ಬೆಲೆ ಕಡಿತವನ್ನು ಪಡೆಯುವುದು ಖಚಿತವಾಗಿದೆ. ವಿಶೇಷವಾಗಿ ಅಮೆಜಾನ್‌ನ ಸ್ವಂತ ಎಕೋ ಮತ್ತು ಕಿಂಡಲ್ ಸಾಧನಗಳ ಮೇಲೂ ಆಕರ್ಷಕ ಕೊಡುಗೆಗಳು ದೊರೆಯಲಿವೆ. ಹೆಚ್ಚುವರಿಯಾಗಿ, ಅಮೆಜಾನ್ ಎಚ್‌ಡಿಎಫ್‌ಸಿ ಬ್ಯಾಂಕ್ ಕಾರ್ಡ್‌ಗಳು ಮತ್ತು ಇಎಂಐ ವಹಿವಾಟುಗಳ ಮೂಲಕ ಮಾಡುವ ಖರೀದಿಗಳ ಮೇಲೆ ಶೇಕಡಾ 10 ರಷ್ಟು ತಕ್ಷಣದ ರಿಯಾಯಿತಿಯನ್ನು ನೀಡುತ್ತಿದೆ. ಇದು ಗ್ರಾಹಕರಿಗೆ ಹೆಚ್ಚು ಲಾಭದಾಯಕವಾಗಲಿದೆ.

ಈ ಮಾರಾಟದ ವೇಳೆ ಅಮೆಜಾನ್ ಪೇ ಐಸಿಐಸಿಐ ಕ್ರೆಡಿಟ್ ಕಾರ್ಡ್ ಹೊಂದಿರುವವರು ಸಹ ಯಾವುದೇ ಹೆಚ್ಚುವರಿ ವೆಚ್ಚವಿಲ್ಲದೆ ಇಎಂಐ ಆಯ್ಕೆಗಳು ಮತ್ತು ಇತರ ವಿಶೇಷ ಕೊಡುಗೆಗಳನ್ನು ಪಡೆಯಬಹುದು. ಇವುಗಳ ಜೊತೆಗೆ, ವಿನಿಮಯ ಕೊಡುಗೆಗಳು ಮತ್ತು ಕೂಪನ್ ಆಧಾರಿತ ರಿಯಾಯಿತಿಗಳ ಲಾಭವನ್ನೂ ಪಡೆದುಕೊಳ್ಳಬಹುದು. ಈ ಮಾರಾಟವು ಎಷ್ಟು ದಿನಗಳವರೆಗೆ ಇರುತ್ತದೆ ಎಂಬುದನ್ನು ಅಮೆಜಾನ್ ಇನ್ನೂ ಅಧಿಕೃತವಾಗಿ ತಿಳಿಸಿಲ್ಲವಾದರೂ, ಇದು ಮುಂದಿನ ಕೆಲವು ದಿನಗಳವರೆಗೆ ಮುಂದುವರಿಯುವ ನಿರೀಕ್ಷೆಯಿದೆ. ನಿಮಗೆ ನಿರ್ದಿಷ್ಟ ಉತ್ಪನ್ನಗಳನ್ನು ಖರೀದಿಸುವ ಆಲೋಚನೆ ಇದ್ದರೆ ಮತ್ತು ಅವುಗಳ ಬೆಲೆಗಳು ಕಡಿಮೆಯಾಗಿದ್ದರೆ, ಸ್ಟಾಕ್ ಇರುವಾಗಲೇ ಖರೀದಿಸುವುದು ಉತ್ತಮ.