Apple Watch Series 10 ಮತ್ತು AirPods 4 ಲಾಂಚ್: ಅಚ್ಚರಿ ಫೀಚರ್ಸ್‌, ಬೆಲೆ ನೋಡಿ!

ಆಪಲ್‌ ಅಭಿಮಾನಿಗಳಿಗೆ ಭರಪೂರ ಸಿಹಿ ಸುದ್ದಿ. ಐಫೋನ್ ಪ್ರಿಯರಿಗಾಗಿ ನಾಲ್ಕು ಹೊಸ ಅದ್ಭುತ ಸ್ಮಾರ್ಟ್‌ಫೋನ್ ಬಿಡುಗಡೆ. ಜೊತೆಗೆ, ಹೊಸ ಸ್ಮಾರ್ಟ್‌ವಾಚ್ ಮತ್ತು ಬಡ್ಸ್ ಕೂಡ ಲಾಂಚ್. ಹೌದು, ಟೆಕ್‌ ದೈತ್ಯ ಆಪಲ್‌ ಭಾರತದಲ್ಲಿ ಐಫೋನ್ 16 ಸರಣಿಯನ್ನು ಬಿಡುಗಡೆ ಮಾಡಿದೆ. ಇದರಲ್ಲಿ Apple Watch Series 10 ಮತ್ತು AirPods 4 ಅನ್ನು ಅನಾವರಣಗೊಳಿಸಲಾಯಿತು. ವಾಚ್ ಅಲ್ಟ್ರಾಗಿಂತ ವಾಚ್ ಸೀರಿಸ್ 10ರ ಡಿಸ್ಪ್ಲೇ ದೊಡ್ಡದಾಗಿದೆ. ಇದು ವಾಚ್ ಸರಣಿ 9 ಗಿಂತ ತೆಳ್ಳಗಿದೆ. ಈ ಹೊಸ ಸ್ಮಾರ್ಟ್‌ವಾಚ್ ಹಲವು ವೈಶಿಷ್ಟ್ಯಗಳೊಂದಿಗೆ ಎಂಟ್ರಿ ಕೊಟ್ಟಿದೆ.

ಹೌದು, ದೊಡ್ಡ ಡಿಸ್ಪ್ಲೇಯನ್ನು ಹೊಂದಿರುವ ತೆಳ್ಳಗಿನ ಆಪಲ್ ವಾಚ್ Apple Watch Series 10 ಬಿಡುಗಡೆಯಾಗಿದೆ. ಆಪಲ್ ವಾಚ್ ಸರಣಿ 10 ಹೊಸ ಪಾಲಿಶ್ ಮಾಡಿದ ಟೈಟಾನಿಯಂ ಫಿನಿಶ್‌ನಲ್ಲಿ ಬರುತ್ತದೆ. ಇದರಿಂದಾಗಿ, ಗಡಿಯಾರವು ತೆಳ್ಳಗಿದೆ ಮತ್ತು ಆದರೆ ಹಗುರವಾಗಿದೆ ಎಂದು ಕಂಪನಿಯು ಹೇಳಿದೆ. ಈ ವಾಚ್‌ ಸೆಪ್ಟೆಂಬರ್ 20 ರಿಂದ ಖರೀದಿಗೆ ಲಭ್ಯವಿರುತ್ತದೆ. ಬನ್ನಿ, ಇದರ ಬೆಲೆ ಮತ್ತು ಇನ್ನಿತರ ವೈಶಿಷ್ಟ್ಯಳನ್ನು ತಿಳಿಯೋಣ.

ಆಪಲ್ ವಾಚ್ ಸರಣಿ 10 ಬೆಲೆ

ಕಂಪನಿಯು ಆಪಲ್ ವಾಚ್ ಸರಣಿ 10 ಅನ್ನು $ 399 ಬೆಲೆಗೆ ಬಿಡುಗಡೆ ಮಾಡಿದೆ. ಅಂದರೆ ಭಾರತೀಯ ರೂಪಾಯಿಗಳಲ್ಲಿ ಸುಮಾರು 33,497 ರೂ. ಆಗಿದೆ. ಈ ಸ್ಮಾರ್ಟ್‌ವಾಚ್‌ನ ಮೊದಲ ಮಾರಾಟ ಸೆಪ್ಟೆಂಬರ್ 20 ರಿಂದ ಪ್ರಾರಂಭವಾಗಲಿದೆ.

Apple Watch Series 10 ಜೊತೆಗೆ, Apple Watch Ultra 2 in Black Satin colourway ಸುಮಾರು 67,000 ರೂ.ಗಳಲ್ಲಿ ($799) ಖರೀದಿಗೆ ಲಭ್ಯವಿರುತ್ತದೆ. ಇದರ ಮುಂಗಡ ಬುಕಿಂಗ್ ಇಂದಿನಿಂದ ಪ್ರಾರಂಭವಾಗುತ್ತವೆ. ಮತ್ತು ಸೆಪ್ಟೆಂಬರ್ 20 ರಿಂದ ಖರೀದಿಗೆ ಲಭ್ಯವಿರುತ್ತವೆ.

ಆಪಲ್ ವಾಚ್ ಸರಣಿ 10ರ ವೈಶಿಷ್ಟ್ಯಗಳು

ಕಂಪನಿಯು ಇದರ ಡಿಸ್ಲ್ಪೇಯು ಹಿಂದಿನ ಮಾದರಿಗಿಂತ ಶೇ.30 ರಷ್ಟು ದೊಡ್ಡದಾಗಿದೆ ಎಂದು ಹೇಳಿದೆ. ಇದು 'ಬಾಳಿಕೆ ಬರುವ ಓನಿಕ್ಸ್ ಗ್ಲಾಸ್'ನೊಂದಿಗೆ ಮುಚ್ಚಲ್ಪಟ್ಟಿದೆ. ಇದರ ಬಾಡಿಯು ಸರಣಿ 9 ಕ್ಕಿಂತ ಶೇ.10 ತೆಳ್ಳಗಿದ್ದು, 9.6 ಮಿಮೀ ಅಳತೆಯಾಗಿದೆ. ಈ ವಾಚ್‌ನ ಬ್ಯಾಟರಿ ಬ್ಯಾಕಪ್‌ ಬಗ್ಗೆ ಹೇಳುವುದಾದರೆ, ಈ ಆಪಲ್ ವಾಚ್ ವೇಗವಾಗಿ ಚಾರ್ಜಿಂಗ್ ಆಗುವ ಸ್ಮಾರ್ಟ್‌ವಾಚ್ ಆಗಿದೆ.

30 ನಿಮಿಷಗಳ ಚಾರ್ಜ್‌ನಲ್ಲಿ ಶೇ.80 ಕ್ಕಿಂತ ಹೆಚ್ಚು ಬ್ಯಾಟರಿ ಅವಧಿಯನ್ನು ನೀಡುತ್ತದೆ. ಇದು ಸಂಪೂರ್ಣ ಚಾರ್ಜ್‌ನಲ್ಲಿ 18 ಗಂಟೆಗಳ ಬ್ಯಾಟರಿ ಅವಧಿಯನ್ನು ಒದಗಿಸುತ್ತದೆ ಎಂದು ಕಂಪನಿ ಹೇಳಿದೆ. ಈ ಸ್ಮಾರ್ಟ್ ವಾಚ್‌ನಲ್ಲಿರುವ ಸ್ಪೀಕರ್ ಅನ್ನು ಸಹ ನವೀಕರಿಸಲಾಗಿದೆ ಮತ್ತು ಮೊದಲ ಬಾರಿಗೆ, ಬಳಕೆದಾರರು ಏರ್‌ಪಾಡ್‌ಗಳಿಲ್ಲದೆಯೇ ಧರಿಸಬಹುದಾದ ಸಾಧನದಲ್ಲಿ ನೇರವಾಗಿ ಸಂಗೀತ ಮತ್ತು ಪಾಡ್‌ಕಾಸ್ಟ್‌ಗಳನ್ನು ಪ್ಲೇ ಮಾಡಲು ಸಾಧ್ಯವಾಗುತ್ತದೆ.

ಸುಧಾರಿತ ಆರೋಗ್ಯ ವೈಶಿಷ್ಟ್ಯಗಳೊಂದಿಗೆ ಲಗ್ಗೆ

ಧರಿಸಬಹುದಾದ ಮೊದಲ ವೈಡ್-ಆಂಗಲ್ OLED ಡಿಸ್ಪ್ಲೇಯನ್ನು ಹೊಂದಿದೆ. ಇದರ ಕೇಸ್ ಅನ್ನು ಬಾಳಿಕೆ ಬರುವ ಅಲ್ಯೂಮಿನಿಯಂ ಮಿಶ್ರಲೋಹದಿಂದ ರಚಿಸಲಾಗಿದೆ. ಈ ವರ್ಷ, ಆಪಲ್ ವಾಚ್ ಅನ್ನು ಗ್ರೇಡ್ 5 ಟೈಟಾನಿಯಂಗೆ ಅಪ್‌ಗ್ರೇಡ್ ಮಾಡುತ್ತದೆ. ಸ್ಟೇನ್‌ಲೆಸ್ ಸ್ಟೀಲ್ ಅನ್ನು ಬದಲಾಯಿಸುತ್ತದೆ. ಇದು ಮೂರು ಬಣ್ಣ ಆಯ್ಕೆಗಳನ್ನು ಹೊಂದಿದೆ. ನೀವು ಕಪ್ಪು, ಬೆಳ್ಳಿ ಮತ್ತು ಗುಲಾಬಿ ಬಣ್ಣದಲ್ಲಿ ಖರೀದಿಸಬಹುದು.

Apple AirPods 4: ಗ್ಲೋ ಟೈಮ್ ಈವೆಂಟ್‌ನಲ್ಲಿ AirPods 4 ಅನ್ನು ಬಿಡುಗಡೆ ಮಾಡಲಾಯಿತು. ಏರ್‌ಪಾಡ್ಸ್ 4 H2 ಚಿಪ್‌ನೊಂದಿಗೆ ಬರುತ್ತದೆ ಎಂದು ಆಪಲ್ ಹೇಳಿದೆ. ಇದು ಆಡಿಯೋ ಗುಣಮಟ್ಟವನ್ನು ಸುಧಾರಿಸುತ್ತದೆ ಮತ್ತು ವೈಯಕ್ತೀಕರಿಸಿದ ಪ್ರಾದೇಶಿಕ ಆಡಿಯೋವನ್ನು ಹೊಂದಿದೆ. ಇದಲ್ಲದೆ, AirPods 4 ಸಿರಿಯೊಂದಿಗೆ ಸಂವಹನ ನಡೆಸುತ್ತಿದೆ ಮತ್ತು ಮೊದಲ ಬಾರಿಗೆ ಸಕ್ರಿಯ ಶಬ್ದ ರದ್ದತಿಯನ್ನು ಹೊಂದಿದೆ.

Apple AirPods 4 ಬೆಲೆ: ಕಂಪನಿಯು ಆಪಲ್ ಏರ್‌ಪಾಡ್ಸ್ 4 ಅನ್ನು ಎರಡು ರೂಪಾಂತರಗಳಲ್ಲಿ ಬಿಡುಗಡೆ ಮಾಡಿದೆ. ANC ಇಲ್ಲದೆ ಯುಎಸ್‌ನಲ್ಲಿ ಸುಮಾರು 11,000 ರೂ.ಗೆ ($129) ಪರಿಚಯಿಸಲಾಗಿದೆ. ಆದರೆ, ಸಕ್ರಿಯ ಶಬ್ದ ರದ್ದತಿ (ANC ಯೊಂದಿಗೆ) ರೂಪಾಂತರದ ಬೆಲೆ ಸುಮಾರು 15,000 ರೂ. ($179) ಇದೆ. ಇದು ಇಂದಿನಿಂದ ಮುಂಗಡ ಬುಕ್ಕಿಂಗ್‌ಗೆ ಲಭ್ಯವಿದೆ. ಸೆಪ್ಟೆಂಬರ್ 20 ರಂದು ಮಾರಾಟ ಪ್ರಾರಂಭವಾಗುತ್ತದೆ.