ಸೈಬರ್ ಕ್ರೈಂ ದೂರು ಸಲ್ಲಿಸಲು ಪೊಲೀಸ್ ಠಾಣೆಗೆ ಹೋಗುವ ಮುನ್ನ ಇಲ್ಲಿ ನೋಡಿ!

ಹೌದು, ನಗರದ ಇನ್‌ಫೆಂಟ್ರಿ ರಸ್ತೆಯಲ್ಲಿರುವ ಪೊಲೀಸ್‌ ಆಯುಕ್ತರ ಕಚೇರಿ ಆವರಣದಲ್ಲಿನ ಸೈಬರ್‌ ಠಾಣೆಗೆ ಬರುತ್ತಿರುವ ದೂರುದಾರರಿಗೆ ಠಾಣೆಗೆ ಬಾಗಿಲು ಹಾಕಿರುವ ಫಲಕವೊಂದು ಕಾಣಿಸುತ್ತಿದೆ. ಅದರಲ್ಲಿ ತಿಳಿಸಿರುವಂತೆ, ಹೆಚ್ಚೆಚ್ಚು ದೂರುಗಳನ್ನು ಸ್ವೀಕರಿಸಿ ಐಟಿ ಸೆಲ್‌ ವೆಬ್‌ಸೈಟ್‌ಗೆ ಅಪ್‌ಲೋಡ್‌ ಮಾಡಲು ಆಗುತ್ತಿಲ್ಲ. ಈ ಕಾರಣದಿಂದ ಸಮೀಪದ ಠಾಣೆಗೆ ದೂರು ನೀಡಿ ಅಥವಾ ವೆಬ್‌ಸೈಟ್‌ನಲ್ಲಿ ದೂರು ದಾಖಲಿಸಿ ಎಂದು ಫಲಕಗಳನ್ನು ಅಂಟಿಸಲಾಗಿದೆ. ಹೀಗಾಗಿ, ಸಾರ್ವಜನಿಕರು ಸೈಬರ್ ಕ್ರೈಂ ಠಾಣೆಗೆ ಬಂದು, ವಾಪಸ್‌ ಹೋಗುತ್ತಿದ್ದಾರೆ.

ಪ್ರತಿ ಪೊಲೀಸ್ ಠಾಣೆಯ ಎಫ್‌ಐಆರ್‌ಗಳ ಸಾಮರ್ಥ್ಯ 9,999 ಮಾತ್ರ ಇದೆ. 10,000 ಮೇಲ್ಪಟ್ಟು ಅಂಕಿಗಳನ್ನು ಐಟಿ ಸೆಲ್‌ ವೆಬ್‌ಸೈಟ್‌ನಲ್ಲಿ ಸ್ವೀಕರಿಸುವಂತಹ ವ್ಯವಸ್ಥೆ ಇಲ್ಲ. ಇತ್ತೀಚೆಗೆ 10 ಸಾವಿರ ಗಡಿಯನ್ನು ನಗರದ ಸೈಬರ್ ಕ್ರೈಂ ತಲುಪಿದೆ. ಇದರಿಂದಾಗಿ ಮತ್ತಷ್ಟು ದೂರುಗಳನ್ನು ಸ್ವೀಕರಿಸಿ ಐಟಿ ಸೆಲ್‌ ವೆಬ್‌ಸೈಟ್‌ಗೆ ಅಪ್‌ಲೋಡ್‌ ಮಾಡಲು ಆಗುತ್ತಿಲ್ಲ. ಈ ಕಾರಣದಿಂದ ಸಮೀಪದ ಠಾಣೆಗೆ ದೂರು ನೀಡಿ ಅಥವಾ ವೆಬ್‌ಸೈಟ್‌ನಲ್ಲಿ ದೂರು ದಾಖಲಿಸಿ ಎಂದು ಫಲಕಗಳನ್ನು ಅಂಟಿಸಲಾಗಿರುವುದನ್ನು ನಾವು ನೋಡಬಹುದಾಗಿದೆ.

ರಾಜ್ಯದ ಎಲ್ಲ ಠಾಣೆಗಳ ಅಪರಾಧ ಪ್ರಕರಣಗಳು (ಎಫ್‌ಐಆರ್‌) ಪೊಲೀಸ್‌ ಇಲಾಖೆಯ ಐಟಿ ಸೆಲ್‌ನ ವೆಬ್‌ಸೈಟ್‌ ಮೂಲಕ ಅಪ್‌ಲೋಡ್‌ ಮಾಡಲಾಗುತ್ತದೆ. ಹಾಗಾಗಿ, ಇನ್ನು ಮುಂದೆ ನಗರ ವ್ಯಾಪ್ತಿಯ ಸೈಬರ್ ಮತ್ತು ಆನ್‌ಲೈನ್‌ ದೂರುಗಳನ್ನು ಸಮೀಪದ ಪೊಲೀಸ್‌ ಠಾಣೆಗಳಲ್ಲಿ ದಾಖಲಿಸಬೇಕು. ಇಲ್ಲವೇ, ಸೈಬರ್ ಕ್ರೈಮ್ ವೆಬ್‌ಸೈಟ್‌ಗೆ ಭೇಟಿ ನೀಡಿ ದಾಖಲಿಸಬಹುದು ಎಂದು ಪೊಲೀಸರು ಸಲಹೆ ನೀಡಿದ್ದು, ನೀವು ಕೂಡ ಸೈಬರ್ ಕ್ರೈಂ/ ಆನ್‌ಲೈನ್ ವಂಚನೆ ಬಲೆಗೆ ಬಿದ್ದು ಹಣ ಕಳೆದುಕೊಂಡಿದ್ದರೆ ಪೊಲೀಸ್ ಸ್ಟೇಷನ್‌ಗೆ ಹೋಗದೇ ಇರುವುದು ಒಳಿತು.

ಇನ್ನು ವಂಚಕರು ಬಲೆಗೆ ಬಿದ್ದು ನೊಂದವರು ತಕ್ಷಣವೇ ದೂರು ಸಲ್ಲಿಸುವಂತಾಗಲು ಸರ್ಕಾರ ಸೈಬರ್ ಅಪರಾಧಗಳಿಗೆ ಸೈಕಾರ್ಡ್ (cycord.gov.in) ಎಂಬ ಜಾಲತಾಣವನ್ನು ತೆರೆದಿದೆ. ಮಿನಿಸ್ಟ್ರಿ ಆಫ್ ಹೋಮ್ ಅಫೇರ್ಸ್ ಇಲಾಖೆಯಡಿಯಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಈ ತಾಣವನ್ನು ಎಲ್ಲಾ ಸೈಬರ್ ಅಪರಾಧ/ ಘಟನೆಗಳಿಗೆ ಸಂಬಂಧಿಸಿದ ಸಮಸ್ಯೆಗಳನ್ನು ಪರಿಹರಿಸಲು ತೆರೆಯಲಾಗಿದೆ. ಇಲ್ಲಿ ಸೈಬರ್ ಘಟನೆಗಳಿಗೆ ಸಂಬಂಧಿಸಿದ ಸಮಸ್ಯೆಗಳನ್ನು ಪರಿಹರಿಸಲು ಇಲ್ಲಿ ಲಾ ಎನ್ಫೋರ್ಸ್ಮೆಂಟ್ ಏಜೆನ್ಸಿಗಳು ಸಹಕರಿಸುತ್ತವೆ.