ಸೈಬರ್ ವಂಚಕನ ಖತರ್ನಾಕ್ ಐಡಿಯಾ; ಬೆಚ್ಚಿಬಿದ್ದ ನಗರದ ರಾಯಭಾರಿ ಕಚೇರಿ!!

ವಂಚಿಸಲು ಯತ್ನಿಸಿದ್ದು ಹೇಗೆ?

ಅಪರಿಚಿತ ವಂಚಕನೊಬ್ಬ, ಟೊಯೋಟಾ ಇನೋವಾ ಕ್ರಿಸ್ಟಾ ಕಾರಿನ ಫೋಟೋ ಹಾಕಿ ಕಾರು ಮಾರಾಟದ ಬಗ್ಗೆ ಜಾಹಿರಾತು ನೀಡಿದ್ದಾನೆ. ನೋ ಸ್ಕ್ರಾಚಸ್, ಟೊಯೋಟಾ ಇನೋವಾ ಕ್ರಿಸ್ಟಾ, ಫಾರ್‌ ಸೇಲ್ ಎಂಬ ಅಡಿಬರಹದಲ್ಲಿದ್ದ ಜಾಹೀರಾತನ್ನು ನೀಡಿದ್ದಾನೆ. ಹಣವಿರುವ ವ್ಯಕ್ತಿಗಳು ಮಾತ್ರ ಪ್ರತಿಕ್ರಿಯೆ ನೀಡುವಂತೆ ದುಬಾರಿ ಕಾರಿನ ಜಾಹಿರಾತು ನೀಡಿದ್ದಾನೆ.

ರಾಯಭಾರಿ ಕಚೇರಿ ವಿಳಾಸ!

ಟೊಯೋಟಾ ಇನೋವಾ ಕ್ರಿಸ್ಟಾ ಸೇಲ್ ಫಾರ್‌ 14 ಲಕ್ಷ ರೂ. ಎಂದು ಜಾಹೀರಾತು ಪೋಸ್ಟ್‌ ಹಾಕಿದ್ದ ವ್ಯಕ್ತಿ ಕೊಳ್ಳಲು ಆಸಕ್ತಿ ಇರುವವರು ಸಂಪರ್ಕಿಸಲು ಮೊಬೈಲ್‌ ನಂಬರ್‌ ನೀಡಿದ್ದಾನೆ. ಆದರ ಜೊತೆಗೆ ಕಬ್ಬನ್ ರಸ್ತೆಯಲ್ಲಿರುವ ರಾಯಭಾರಿ ಕಚೇರಿ ವಿಳಾಸವನ್ನೂ ನಮೂದಿಸಿಸುವ ಮೂಲಕ ಜನರನ್ನು ನಂಬಿಸುವ ಕೆಲಸವನ್ನು ಮಾಡಿದ್ದಾನೆ.

ಬಲೆಗೆ ಬಿದ್ದರು ವ್ಯಕ್ತಿ.

ಆನ್‌ಲೈನ್‌ ತಾಣದಲ್ಲಿ ವಂಚಕ ಹಾಕಿದ ಕಾರಿನ ಮಾರಾಟದ ಜಾಹೀರಾತು ಪೋಸ್ಟರ್ ಗಮನಿಸಿದ ವ್ಯಕ್ತಿಯೊಬ್ಬರು ಕಾರನ್ನು ಕೊಳ್ಳುವ ಆಸಕ್ತಿ ವಹಿಸಿದ್ದಾರೆ. ನಂತರ ವಂಚಕನ ಜೊತೆ ದೂರವಾಣಿ ಸಂಭಾಷಣೆ ನಡೆದು, ಆತನ ಮಾತಿಗೆ ಮರುಳಾಗಿ ವಂಚಕ ನೀಡಿದ ಅಕೌಂಟ್ ನಂಬರ್‌ಗೆ 20 ಸಾವಿರ ರೂ. ಹಣವನ್ನು ಸಹ ವರ್ಗಾವಣೆ ಮಾಡಿದ್ದಾರೆ.

ಹೆಚ್ಚಿನ ಹಣಕ್ಕೆ ಬೇಡಿಕೆ.

ಆ ವ್ಯಕ್ತಿ ಹಣ ವರ್ಗಾವಣೆ ಮಾಡಿದ ನಂತರ ಮತ್ತೆ ಹೆಚ್ಚಿನ ಹಣಕ್ಕೆ ವಂಚಕ ಬೇಡಿಕೆ ಇಟ್ಟಿದ್ದಾನೆ. ಮೊದಲು ಕಾರನ್ನು ನೋಡಬೇಕು ಎಂದು ಹೇಳಿದಾಗ, ಆತ ಹೇಳಿದಂತೆ ಮಂಗಳವಾರ ಮಧ್ಯಾಹ್ನ ಕಾರು ನೋಡುವ ಸಲುವಾಗಿ ರಾಯಭಾರಿ ಕಚೇರಿಗೆ ಆಗಮಿಸಿದ್ದಾರೆ. ಆದರೆ, ಎಷ್ಟು ಹೊತ್ತು ಕಾದರೂ ವಂಚಕನಿಂದ ಕರೆಯಾಗಲಿ ಮತ್ತು ಪ್ರತಿಕ್ರಿಯೆಯಾಗಲಿ ಇರಲಿಲ್ಲ.

ಬಯಲಾಯಿತು ಸತ್ಯ.

ವಂಚಕನಿಂದ ಪ್ರತಿಕ್ರಿಯೆ ಸಿಗದಿದ್ದರಿಂದ ಜಪಾನ್ ರಾಯಭಾರಿ ಕಚೇರಿಯಲ್ಲಿನ ಅಧಿಕಾರಿಗಳನ್ನು ವಿಚಾರಿಸಿದ್ದಾರೆ.ಈ ಮಾಹಿತಿ ಕೇಳಿ ರಾಯಭಾರಿ ಕಚೇರಿ ಸಿಬ್ಬಂದಿ ಬೆಸ್ತು ಬಿದ್ದಿದ್ದಾರೆ. ಇದಾದ ನಂತರ ರಾಯಭಾರಿ ಟಕಾಯುಕಿ ಕಿಟಗಾವ್ ಅವರ ಸೂಚನೆ ಮೇರೆಗೆ ಅಲ್ಲಿನ ಅಧಿಕಾರಿ ಮಿತ್ಸುಹಿರೋ ಅಮೋ ವಿಧಾನಸೌಧ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ವಿದೇಶಿ ಸೈಬರ್ ವಂಚಕರ ಕೃತ್ಯ?

ವಂಚಕ ಯಾರದೋ ಫೋಟೋ ಅಪ್ಲೋಡ್‌ ಮಾಡಿ, ಜಪಾನ್‌ ರಾಯಭಾರಿ ಹೆಸರು ದುರ್ಬಳಕೆ ಮಾಡಿಕೊಂಡಿದ್ದಾನೆ ಎಂದು ತಿಳಿದುಬಂದಿದೆ. ವಿದೇಶಿ ಸೈಬರ್ ವಂಚಕರು ಈ ಕೃತ್ಯ ಎಸಗಿರುವ ಸಾಧ್ಯತೆ ಹೆಚ್ಚಿದೆ ಎಂದು ಪೊಲೀಸರು ಶಂಕಿಸಿದ್ದಾರೆ. ವಂಚಕನ ಕುರಿತು ಸುಳಿವು ಸಿಕ್ಕಿದ್ದು, ಆತನ ಬಂಧನಕ್ಕೆ ಬಲೆ ಬೀಸಲಾಗಿದೆ ಎಂದು ಪೊಲೀಸ್‌ ಅಧಿಕಾರಿಯೋರ್ವರು ತಿಳಿಸಿದ್ದಾರೆ.