ಭಾರತದಲ್ಲಿ CMF Phone 2 Pro ಖರೀದಿಸಲಿರುವ ಗ್ರಾಹಕರಿಗೆ ವಿಶೇಷ ಪ್ರಯೋಜನ!

ಬಹುನಿರೀಕ್ಷಿತ CMF Phone 2 Pro ಸ್ಮಾರ್ಟ್‌ಫೋನ್ ಇದೇ ಏಪ್ರಿಲ್ 28 ರಂದು ಭಾರತೀಯ ಮತ್ತು ಜಾಗತಿಕ ಮಾರುಕಟ್ಟೆಗಳಲ್ಲಿ ಬಿಡುಗಡೆಗೆ ಸಿದ್ಧವಾಗಿದೆ. ಬಿಡುಗಡೆಗೂ ಮುನ್ನ, ಈ ಹೊಸ ಸ್ಮಾರ್ಟ್‌ಫೋನ್ ತನ್ನ ಹಿಂದಿನ ಮಾದರಿಯಾದ CMF Phone 1 ನಲ್ಲಿ ನೀಡದಿದ್ದ ಹೆಚ್ಚುವರಿ ಚಾರ್ಜರ್‌ನೊಂದಿಗೆ ಬರಲಿದೆ ಎಂದು ಕಂಪನಿಯ ಅಧಿಕಾರಿಯೊಬ್ಬರು ಖಚಿತಪಡಿಸಿದ್ದಾರೆ. ಆದಾಗ್ಯೂ, ಈ ಸೌಲಭ್ಯವು ಆಯ್ದ ಮಾರುಕಟ್ಟೆಗಳಿಗೆ ಮಾತ್ರ ಸೀಮಿತವಾಗಿದ್ದು, ಬಹುತೇಕ ಪ್ರದೇಶಗಳಲ್ಲಿ ಕೇವಲ ಫೋನ್ ಮತ್ತು ಚಾರ್ಜಿಂಗ್ ಕೇಬಲ್ ಮಾತ್ರ ಬಾಕ್ಸ್‌ನಲ್ಲಿ ಲಭ್ಯವಾಗುವ ಸಾಧ್ಯತೆ ಇದೆ.

ನಥಿಂಗ್ ಇಂಡಿಯಾದ CMF Phone 2 Pro ಬಿಡುಗಡೆ ದಿನಾಂಕದ ಕುರಿತಾದ X (ಹಿಂದೆ ಟ್ವಿಟರ್) ಪೋಸ್ಟ್‌ಗೆ ಪ್ರತಿಕ್ರಿಯಿಸಿದ ಬಳಕೆದಾರರೊಬ್ಬರು, ಬಾಕ್ಸ್‌ನಲ್ಲಿ ಚಾರ್ಜರ್ ನೀಡುವಂತೆ ಮನವಿ ಮಾಡಿದ್ದರು. ಇದಕ್ಕೆ ಉತ್ತರಿಸಿದ ನಥಿಂಗ್‌ನ ಸಹ-ಸಂಸ್ಥಾಪಕ ಮತ್ತು ಭಾರತದ ಅಧ್ಯಕ್ಷ ಅಕಿಸ್ ಇವಾಂಜೆಲಿಡಿಸ್ ಅವರು, ಮುಂಬರುವ ಫೋನ್ ಭಾರತದಲ್ಲಿ ಚಾರ್ಜರ್‌ನೊಂದಿಗೆ ಬರಲಿದೆ ಎಂದು ದೃಢಪಡಿಸಿದ್ದಾರೆ.ಅಧಿಕಾರಿಯೊಬ್ಬರು ಹಂಚಿಕೊಂಡಿರುವ ಚಿತ್ರದ ಪ್ರಕಾರ, CMF Phone 2 Pro ನ ಚಿಲ್ಲರೆ ಪೆಟ್ಟಿಗೆಯಲ್ಲಿ ಚಾರ್ಜರ್‌ಗಾಗಿ ಪ್ರತ್ಯೇಕ ಸ್ಥಳವನ್ನು ಕಾಣಬಹುದು.

ಪವರ್ ಅಡಾಪ್ಟರ್ ಇಲ್ಲದೆ ಬಿಡುಗಡೆಯಾದ CMF Phone 1 ನಿಂದ ಗ್ರಾಹಕರು ವ್ಯಕ್ತಪಡಿಸಿದ ಅಸಮಾಧಾನಕ್ಕೆ ಸ್ಪಂದಿಸುವ ಸಲುವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಹೇಳಲಾಗಿದೆ. CMF Phone 1, 33W ವೈರ್ಡ್ ಫಾಸ್ಟ್ ಚಾರ್ಜಿಂಗ್ ಅನ್ನು ಬೆಂಬಲಿಸುತ್ತಿದ್ದರೂ, ಗ್ರಾಹಕರು ಅದರ ಪೂರ್ಣ ಪ್ರಯೋಜನ ಪಡೆಯಲು ಪ್ರತ್ಯೇಕವಾಗಿ 33W ಫಾಸ್ಟ್ ಚಾರ್ಜರ್ ಅನ್ನು ಖರೀದಿಸಬೇಕಾಗಿತ್ತು. ಗಮನಾರ್ಹವಾಗಿ, ನಥಿಂಗ್ ತನ್ನ ಉಪ-ಬ್ರ್ಯಾಂಡ್ ಮೂಲಕ 65W GaN ಮತ್ತು 100W GaN ಫಾಸ್ಟ್ ಚಾರ್ಜರ್‌ಗಳನ್ನು ಪ್ರತ್ಯೇಕ ಪರಿಕರಗಳಾಗಿ ಮಾರಾಟ ಮಾಡುತ್ತಿದೆ.

ನಥಿಂಗ್ ಇಂಡಿಯಾ ಅಧ್ಯಕ್ಷರ X ಪೋಸ್ಟ್‌ಗೆ ನೀಡಿದ ಉತ್ತರವನ್ನು ಗಮನಿಸಿದರೆ, ಈ ನಿರ್ಧಾರವು ಸದ್ಯಕ್ಕೆ ಭಾರತೀಯ ಮಾರುಕಟ್ಟೆಗೆ ಮಾತ್ರ ಸೀಮಿತವಾಗಿರುವ ಸಾಧ್ಯತೆ ಇದೆ. ಜಾಗತಿಕ ಮಾರುಕಟ್ಟೆಗಳಲ್ಲಿ ಬಿಡುಗಡೆಯಾಗುವ CMF Phone 2 Pro ನ ಚಿಲ್ಲರೆ ಘಟಕಗಳು ಚಾರ್ಜರ್ ಇಲ್ಲದೆ ಬರಬಹುದು ಎಂದು ನಿರೀಕ್ಷಿಸಲಾಗಿದೆ. ನಾವು ಗಮನಿಸುವುದಾದರೆ, ಭಾರತೀಯ ಮಾರುಕಟ್ಟೆಯು ಯಾವಾಗಲೂ ಬಾಕ್ಸ್‌ನಲ್ಲಿ ಚಾರ್ಜರ್ ಇರುವ ಸ್ಮಾರ್ಟ್‌ಫೋನ್‌ಗಳತ್ತ ಹೆಚ್ಚು ಆಕರ್ಷಿತರಾಗುತ್ತಾರೆ. ಇದರಿಂದ ಭಾರತೀಯರಿಗಾಗಿ ನಥಿಂಗ್ ಈ ಹೊಸ ಪರಿಕ್ರಮ ತೆಗೆದುಕೊಳ್ಳುತ್ತಿರುವ ಸಾಧ್ಯತೆ ಇದೆ.

ಕಳೆದ ಜುಲೈ 2024 ರಲ್ಲಿ ಬಿಡುಗಡೆಯಾದ CMF Phone 1 ನಂತರ, ನಥಿಂಗ್ ಉಪ-ಬ್ರ್ಯಾಂಡ್ CMF ನಿಂದ ಬಿಡುಗಡೆಯಾಗುತ್ತಿರುವ ಎರಡನೇ ಸ್ಮಾರ್ಟ್‌ಫೋನ್ CMF Phone 2 Pro ಆಗಿದೆ. ಕಂಪನಿಯ ಇತ್ತೀಚಿನ ಮಾಹಿತಿಯ ಪ್ರಕಾರ, CMF Phone 2 Pro ಬಿಡುಗಡೆಯ ಸಂದರ್ಭದಲ್ಲಿಯೇ ಆಡಿಯೊ ವಿಭಾಗದಲ್ಲಿ ಮೂರು ಹೊಸ ಉತ್ಪನ್ನಗಳನ್ನು ಸಹ ಪರಿಚಯಿಸಲಾಗುವುದು - CMF ಬಡ್ಸ್ 2, ಬಡ್ಸ್ 2a ಮತ್ತು ಬಡ್ಸ್ 2 ಪ್ಲಸ್. ಈ ಹೊಸ ಸೇರ್ಪಡೆಗಳು CMF ಬ್ರ್ಯಾಂಡ್‌ನ ಉತ್ಪನ್ನ ಶ್ರೇಣಿಯನ್ನು ಮತ್ತಷ್ಟು ವಿಸ್ತರಿಸಲಿವೆ. ಮತ್ತು CMF Phone 2 Pro ಫೋನ್ ವಿನ್ಯಾಸ ಕೂಡ ಬಹಿರಂಗವಾಗಿದೆ.

'ಅತಿ-ತೆಳುವಾದ. ಅತಿ-ಹಗುರವಾದ. ಅತಿ-ನಯವಾದ' ಎಂಬ ಟ್ಯಾಗ್‌ಲೈನ್ ಅಡಿಯಲ್ಲಿ Nothing ಕಂಪನಿಯ ಸಬ್-ಬ್ರ್ಯಾಂಡ್ CMF ತನ್ನ ಹೊಸ ಸ್ಮಾರ್ಟ್‌ಫೋನ್ CMF Phone 2 Pro ನ ಮೊದಲ ಲುಕ್ ಅನ್ನು ಇತ್ತೀಚಿಗಷ್ಟೆ ಬಿಡುಗಡೆ ಮಾಡಿದೆ. CMF ಬಿಡುಗಡೆಗೊಳಿಸಿರುವ ಹೊಸ ಟೀಸರ್ ವೀಡಿಯೊದಲ್ಲಿ CMF Phone 2 Pro ಸ್ಮಾರ್ಟ್‌ಫೋನ್ ಅತ್ಯಂತ ತೆಳುವಾದ ಮತ್ತು ದೊಡ್ಡ ಕ್ಯಾಮೆರಾ ಬಂಪ್ ಇಲ್ಲದ ಸ್ಲಿಮ್ ಸ್ಮಾರ್ಟ್‌ಫೋನ್ ಆಗಿ ಬಿಡುಗಡೆಯಾಗುತ್ತಿದೆ. ಕಪ್ಪು ಬಣ್ಣದಲ್ಲಿ ಕಾಣಿಸಿಕೊಂಡಿರುವ ಈ ಸ್ಮಾರ್ಟ್‌ಫೋನ್ ಬ್ಲಾಕ್‌ಮ್ಯಾಟ್ ವಿನ್ಯಾಸವನ್ನು ಹೊಂದಿರಬಹುದಾದ ಸಾಧ್ಯತೆ ಕೂಡ ಇದೆ.

ಇಷ್ಟೇ ಅಲ್ಲದೆ, CMF Phone 2 Pro ಸ್ಮಾರ್ಟ್‌ಫೋನ್ ಹಿಂಭಾಗದಲ್ಲಿ ಟೆಕ್ಸ್ಚರ್ಡ್ ವಿನ್ಯಾಸವನ್ನು ಹೊಂದಿದೆ ಮತ್ತು ಕೆಳಭಾಗದಲ್ಲಿ CMF by Nothing ಬ್ರ್ಯಾಂಡಿಂಗ್ ಇದೆ. ಕಳೆದ ಬಾರಿಯ CMF Phone 1 ನಂತೆಯೇ, ಈ ಸ್ಮಾರ್ಟ್‌ಫೋನ್ ಕೂಡ ಪರಸ್ಪರ ಬದಲಾಯಿಸಬಹುದಾದ ಬ್ಯಾಕ್ ಪ್ಯಾನೆಲ್‌ಗಳೊಂದಿಗೆ ಬರುವ ಸಾಧ್ಯತೆ ಇದೆ, ಏಕೆಂದರೆ ವೀಡಿಯೊದಲ್ಲಿ ಪ್ಯಾನೆಲ್‌ನಲ್ಲಿ ಸ್ಕ್ರೂ ಅನ್ನು ತೋರಿಸಲಾಗಿದೆ ಇನ್ನು ನಾವು ಈಗಾಗಲೇ ತಿಳಿದಿರುವಂತೆ, CMF Phone 2 Pro ಸ್ಮಾರ್ಟ್‌ಫೋನನ್ನು ಭಾರತ ಸೇರಿದಂತೆ ಜಾಗತಿಕ ಮಾರುಕಟ್ಟೆಯಲ್ಲಿ ಏಪ್ರಿಲ್ 28 ರಂದು ಸಂಜೆ 6:30 ಕ್ಕೆ ಅನಾವರಣಗೊಳಿಸಲಾಗುತ್ತದೆ.