AI ಕುರಿತು ಎಲಾನ್ ಮಸ್ಕ್ ಅಪರೂಪದ ಹೇಳಿಕೆ: ದೊಡ್ಡ ಚರ್ಚೆಗೆ ಕಾರಣವಾಗಿದ್ದು ಏಕೆ?

ಕೃತಕ ಬುದ್ಧಿಮತ್ತೆ (AI) ಕುರಿತ ಜಾಗತಿಕ ಸ್ಪರ್ಧೆ ದಿನದಿಂದ ದಿನಕ್ಕೆ ತೀವ್ರವಾಗುತ್ತಿದೆ. ಇದೇ ವೇಳೆ ಜಗತ್ತಿನ, ನಂ.1 ಶ್ರೀಮಂತ ಉದ್ಯಮಿ, ಸ್ಪೇಸ್‌ಎಕ್ಸ್ ಮುಖ್ಯಸ್ಥ ಎಲಾನ್ ಮಸ್ಕ್ ನೀಡಿರುವ ಹೊಸ ಹೇಳಿಕೆ ದೊಡ್ಡ ಚರ್ಚೆಗೆ ಕಾರಣವಾಗಿದೆ. ಅಪರೂಪವಾಗಿ ತಮ್ಮ ಪ್ರತಿಸ್ಪರ್ಧಿಗಳ ಬಲವನ್ನು ಒಪ್ಪಿಕೊಂಡಿರುವ ಮಸ್ಕ್, ಗೂಗಲ್ ಅಮೆರಿಕದಲ್ಲಿ AI ರೇಸ್‌ನಲ್ಲಿ ಮುನ್ನಡೆ ಸಾಧಿಸುವ ಸಾಧ್ಯತೆ ಇದೆ, ಭೂಮಿಯ ಮಟ್ಟದಲ್ಲಿ ಚೀನಾ ಮೇಲುಗೈ ಸಾಧಿಸಬಹುದು, ಮತ್ತು ಅಂತರಿಕ್ಷ ಕ್ಷೇತ್ರದಲ್ಲಿ ಸ್ಪೇಸ್‌ಎಕ್ಸ್ ಮುನ್ನಡೆಯಲಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.!

ಹೌದು, ಇಂತಹದೊಂದು ಹೇಳಿಕೆ ಅಬಾಕಸ್ AI ಕಂಪನಿಯ ಸಿಇಒ ಬಿಂದು ರೆಡ್ಡಿ ಅವರು ಮಾಡಿದ ಎಕ್ಸ್ ಪೋಸ್ಟ್‌ಗೆ ಮಸ್ಕ್ ಅವರು ನೀಡಿದ ಪ್ರತಿಕ್ರಿಯೆಯಾಗಿ ಬಂದಿದೆ. ಗೂಗಲ್‌ನ ಜೆಮಿನಿ 3.0 ಮಾದರಿ ತನ್ನ ನಿರೀಕ್ಷೆಗಳನ್ನು ಪೂರೈಸಲಿಲ್ಲ ಎಂದು ರೆಡ್ಡಿ ಅಸಮಾಧಾನ ವ್ಯಕ್ತಪಡಿಸಿದ್ದರು. ಇದರಿಂದಾಗಿ ಅನೇಕರು ಇನ್ನೂ ಜೆಮಿನಿ 2.5 ಮಾದರಿಯನ್ನೇ ಬಳಸುತ್ತಿದ್ದಾರೆ ಎಂದು ಅವರು ಹೇಳಿದ್ದಾರೆ. ಜೊತೆಗೆ, ಗೂಗಲ್ ತನ್ನ ಗಮನವನ್ನು ವಿಭಜಿಸದೆ, 100ಕ್ಕೂ ಹೆಚ್ಚು ತಂಡಗಳಿಂದ ಒಂದೇ ಸಮಯದಲ್ಲಿ AI ಮಾದರಿಗಳನ್ನು ತರಬೇತಿ ಮಾಡುವಂತಹ ದೊಡ್ಡ ಮಟ್ಟದ ಪ್ರಯೋಗಗಳನ್ನು ನಡೆಸಬೇಕು ಎಂದು ಸಲಹೆ ನೀಡಿದ್ದಾರೆ.

ಈ ಹಿನ್ನೆಲೆ ಎಲಾನ್ ಮಸ್ಕ್ ಸ್ಪಷ್ಟವಾಗಿ ಪ್ರತಿಕ್ರಿಯಿಸಿ, "ಪಶ್ಚಿಮ ರಾಷ್ಟ್ರಗಳಲ್ಲಿ AI ರೇಸ್ ನಲ್ಲಿ ಗೂಗಲ್ ಗೆಲುವು ಸಾಧಿಸುತ್ತದೆ, ಭೂಮಿಯ ಮಟ್ಟದಲ್ಲಿ ಚೀನಾ ಮುನ್ನಡೆಯುತ್ತದೆ, ಮತ್ತು ಅಂತಾರಿಕ್ಷದಲ್ಲಿ ಸ್ಪೇಸ್‌ಎಕ್ಸ್ ಗೆಲ್ಲುತ್ತದೆ" ಎಂದು ತಿಳಿಸಿದ್ದಾರೆ. ಈ ಹೇಳಿಕೆ AI ಕ್ಷೇತ್ರದ ಭವಿಷ್ಯದ ದಿಕ್ಕಿನ ಬಗ್ಗೆ ಹೊಸ ಚರ್ಚೆಗೆ ದಾರಿ ಮಾಡಿಕೊಡುತ್ತಿದೆ. ಇದರ ಜೊತೆಗೆ, ಮಸ್ಕ್ ತಮ್ಮದೇ AI ಕಂಪನಿ xAI ಬಗ್ಗೆ ಕೂಡ ಮಹತ್ವದ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ. Grok AI ಅಭಿವೃದ್ಧಿಪಡಿಸಿರುವ ಈ ಸಂಸ್ಥೆ ಈಗಾಗಲೇ ತನ್ನ ಪ್ರಮುಖ ಸ್ಪರ್ಧಿಗಳಿಗಿಂತ ಹಿಂದೆ ಇದೆ ಎಂದು ಅವರು ಒಪ್ಪಿಕೊಂಡಿದ್ದಾರೆ.

ಆದರೆ, ಈ ವರ್ಷವೇ Grok xAI ಸ್ಪರ್ಧೆಯಲ್ಲಿ ಮುನ್ನಡೆಯನ್ನು ತಲುಪಲಿದೆ ಮತ್ತು ಮುಂದಿನ ಮೂರು ವರ್ಷಗಳಲ್ಲಿ ಉಳಿದ ಕಂಪನಿಗಳನ್ನು ಬಹಳಷ್ಟು ಹಿಂದೆ ಬಿಡಲಿದೆ ಎಂದು ಅವರು ಆತ್ಮವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಅವರ ಮಾತಿನಲ್ಲಿ, "ಎರಡನೇ ಸ್ಥಾನದಲ್ಲಿರುವವರನ್ನು ನೋಡಲು ಜೇಮ್ಸ್ ವೆಬ್ ಟೆಲಿಸ್ಕೋಪ್ ಬೇಕಾಗುವಷ್ಟು ದೂರ ಮುನ್ನಡೆಯುತ್ತೇವೆ" ಎಂಬ ಹೇಳಿಕೆ ಗಮನ ಸೆಳೆಯುತ್ತದೆ. ಮಸ್ಕ್ ಮತ್ತೊಂದು ಪ್ರಮುಖ ವಿಚಾರವನ್ನು ಕೂಡ ಸ್ಪಷ್ಟಪಡಿಸಿದ್ದಾರೆ. xAI ಅನ್ನು ಮೊದಲ ಬಾರಿ ಸರಿಯಾಗಿ ನಿರ್ಮಿಸಲಾಗಿಲ್ಲ, ಅದನ್ನು ಸಂಪೂರ್ಣವಾಗಿ ಮರುರಚನೆ ಮಾಡಲು ತಾವು ಮುಂದಾಗಿದ್ದೇವೆ ಎಂದು ಹೇಳಿದ್ದಾರೆ.

ಫೈನಾನ್ಷಿಯಲ್ ಟೈಮ್ಸ್ ವರದಿ ಪ್ರಕಾರ, AI ಕೋಡಿಂಗ್ ಪ್ಲಾಟ್‌ಫಾರ್ಮ್ ಅಭಿವೃದ್ಧಿಯಲ್ಲಿ ನಿರೀಕ್ಷಿತ ಪ್ರಗತಿ ಕಂಡುಬರದ ಹಿನ್ನೆಲೆಯಲ್ಲಿ, ಮಸ್ಕ್ ಕಂಪನಿಯಲ್ಲಿ ಸಿಬ್ಬಂದಿ ಕಡಿತ ಕ್ರಮವನ್ನೂ ಕೈಗೊಂಡಿದ್ದಾರೆ. ಕಂಪನಿಯ 11 ಸಹ-ಸ್ಥಾಪಕರಲ್ಲಿ ಈಗ ಕೇವಲ ಇಬ್ಬರು ಮಾತ್ರ ಉಳಿದಿರುವುದು ಈ ಸಂಸ್ಥೆಯ ಒಳಗಿನ ಬದಲಾವಣೆಗಳನ್ನು ಸೂಚಿಸುತ್ತದೆ. ಈ ಪ್ಲಾಟ್‌ಫಾರ್ಮ್ ಓಪನ್‌ಎಐನ Codex ಅಥವಾ ಆಂಥ್ರೋಪಿಕ್‌ನ Claude Code ಮಾದರಿಗಳಿಗೆ ಸಮಾನವಾಗಿರಬೇಕೆಂಬ ಉದ್ದೇಶ ಹೊಂದಿತ್ತು ಎಂಬುದನ್ನು ನಾವಿಲ್ಲಿ ಗಮನಸಬಹುದು.

ಇನ್ನೊಂದೆಡೆ, ಎಲಾನ್ ಮಸ್ಕ್ ಅವರು ತಮ್ಮ xAI ಕಂಪನಿಯನ್ನು X ಸಾಮಾಜಿಕ ಜಾಲತಾಣದೊಂದಿಗೆ ವಿಲೀನಗೊಳಿಸಿರುವುದು ಮತ್ತು ಸ್ಪೇಸ್‌ಎಕ್ಸ್ ಮೂಲಕ xAI ಅನ್ನು ಪಡೆದುಕೊಳ್ಳುವ ಯೋಜನೆ ಘೋಷಿಸಿರುವುದು ಗಮನಾರ್ಹ ಬೆಳವಣಿಗೆಗಳಾಗಿವೆ. ಈ ಯೋಜನೆಯ ಭಾಗವಾಗಿ, ಅಂತಾರಿಕ್ಷದಲ್ಲಿ ಡೇಟಾ ಸೆಂಟರ್‌ಗಳನ್ನು ನಿರ್ಮಿಸುವ ಮಹತ್ವಾಕಾಂಕ್ಷಿ ಗುರಿಯನ್ನು ಅವರು ಹೊಂದಿದ್ದಾರೆ. ದೀರ್ಘಾವಧಿಯಲ್ಲಿ, AI ಅಭಿವೃದ್ಧಿಗೆ ಅಗತ್ಯವಿರುವ ಅಪಾರ ಶಕ್ತಿಯನ್ನು ಪೂರೈಸಲು ಅಂತಾರಿಕ್ಷವೇ ಪ್ರಮುಖ ಪರಿಹಾರವಾಗಬಹುದು ಎಂದು ಮಸ್ಕ್ ಅಭಿಪ್ರಾಯಪಟ್ಟಿದ್ದಾರೆ.

"ದೀರ್ಘಾವಧಿಯಲ್ಲಿ, ಬಾಹ್ಯಾಕಾಶ ಆಧಾರಿತ AI ಸ್ಪಷ್ಟವಾಗಿ ಅಳೆಯುವ ಏಕೈಕ ಮಾರ್ಗವಾಗಿದೆ. ನಮ್ಮ ಸೂರ್ಯನ ಶಕ್ತಿಯ ಮಿಲಿಯನ್‌ನ ಒಂದು ಭಾಗವನ್ನೂ ಬಳಸಿಕೊಳ್ಳಲು ನಮ್ಮ ನಾಗರಿಕತೆ ಪ್ರಸ್ತುತ ಬಳಸುವುದಕ್ಕಿಂತ ಮಿಲಿಯನ್ ಪಟ್ಟು ಹೆಚ್ಚು ಶಕ್ತಿಯ ಅಗತ್ಯವಿರುತ್ತದೆ!" ಎಂದು ಮಸ್ಕ್ ಆಗ ಬ್ಲಾಗ್ ಪೋಸ್ಟ್‌ನಲ್ಲಿ ಹೇಳಿದ್ದರು.ಒಟ್ಟಿನಲ್ಲಿ, ಎಲಾನ್ ಮಸ್ಕ್ ಅವರ ಈ ಹೇಳಿಕೆಗಳು AI ರೇಸ್‌ನ ಭವಿಷ್ಯ, ಜಾಗತಿಕ ಸ್ಪರ್ಧೆ ಮತ್ತು ಅಂತಾರಿಕ್ಷದ ಮಹತ್ವವನ್ನು ಹೊಸ ದೃಷ್ಟಿಕೋನದಲ್ಲಿ ಪರಿಚಯಿಸುತ್ತವೆ. AI ಕ್ಷೇತ್ರದಲ್ಲಿ ಮುಂದಿನ ದಿನಗಳಲ್ಲಿ ನಡೆಯಲಿರುವ ಬದಲಾವಣೆಗಳಿಗೆ ಮಹತ್ವದ ಸೂಚನೆ ಇವಾಗಿರಬಹುದು.!