ಫಿಟ್‌ಬಿಟ್‌ ಸಂಸ್ಥೆಯಿಂದ ಬರಲಿದೆ 4G ಬೆಂಬಲಿಸುವ ಸ್ಮಾರ್ಟ್‌ವಾಚ್‌!

ಹೌದು, ಸ್ಮಾರ್ಟ್‌ವಾಚ್‌ ವಲಯದಲ್ಲಿ ಫಿಟ್‌ಬಿಟ್‌ ಕಂಪೆನಿ ಜನಪ್ರಿಯ ಕಂಪೆನಿಗಳಲ್ಲಿ ಒಂದಾಗಿದೆ. ಸದ್ಯ ಇದೀಗ ಫಿಟ್‌ಬಿಟ್‌ ತನ್ನ ಹೊಸ ಮಾದರಿಯ 4G ಬೆಂಬಲಿಸುವ ಸ್ಮಾರ್ಟ್‌ವಾಚ್‌ ಅನ್ನು ಬಿಡುಗಡೆ ಮಾಡಲು ಸಿದ್ದತೆ ನಡೆಸಿದೆ ಎಂದು ಹೇಳಲಾಗ್ತಿದೆ. ಈ ಸ್ಮಾರ್ಟ್‌ವಾಚ್‌ ಕೇವಲ ಮಕ್ಕಳನ್ನು ಮಾತ್ರ ಗುರಿಯಾಗಿರಿಸಿಕೊಂಡಿದೆ ಎನ್ನಲಾಗ್ತಿದ್ದು, ವೀಡಿಯೊ ಕರೆ ಮತ್ತು ಧ್ವನಿ ಕರೆ ಆಯ್ಕೆಗಳೊಂದಿಗೆ "ಸುರಕ್ಷತಾ ಟ್ರ್ಯಾಕಿಂಗ್ ಫೀಚರ್ಸ್‌ಗಳನ್ನ ಒಳಗೊಂಡಿರುತ್ತದೆ ಎಂದು ಊಹಿಸಲಾಗಿದೆ. ಅಷ್ಟಕ್ಕೂ ಈ ಸ್ಮಾರ್ಟ್‌ವಾಚ್‌ ಕುರಿತು ಲಬ್ಯವಿರುವ ಮಾಹಿತಿ ಏನು ಅನ್ನೊದನ್ನ ಈ ಲೇಖನದಲ್ಲಿ ತಿಳಿದುಕೊಳ್ಳೋಣ ಬನ್ನಿರಿ.

ಫಿಟ್‌ಬಿಟ್‌ ಕಂಪೆನಿ ಅಭಿವೃದ್ದಿ ಪಡಿಸುತ್ತಿರುವ ಈ ಹೊಸ ಸ್ಮಾರ್ಟ್‌ವಾಚ್‌ 4G ನೆಟ್‌ವರ್ಕ್‌ ಅನ್ನು ಬೆಂಬಲಿಸಲಿದ್ದು, ಮಕ್ಕಳಿಗಾಗಿಯೇ ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದೆ ಎನ್ನಲಾಗ್ತಿದೆ. ಸದ್ಯ ಫಿಟ್‌ಬಿಟ್‌ ಕಂಪನಿಯು ಮಕ್ಕಳಿಗಾಗಿ ಏಸ್ ಸರಣಿಯ ಸ್ಮಾರ್ಟ್ ವಾಚ್‌ಗಳನ್ನು ಹೊಂದಿದ್ದರೂ, ಈ ಮಾದರಿಗಳು ಯಾವಾಗಲೂ ಆನ್ ಟ್ರ್ಯಾಕಿಂಗ್ ಮತ್ತು ಸಂವಹನಕ್ಕಾಗಿ ಸೆಲ್ಯುಲಾರ್ ಸಂಪರ್ಕವನ್ನು ಹೊಂದಿರುವುದಿಲ್ಲ. ಇದಲ್ಲದೆ, ಫಿಟ್‌ಬಿಟ್ ಏಸ್ ಸರಣಿಯು ಫಿಟ್‌ನೆಸ್ ಕಡೆಗೆ ಹೆಚ್ಚು ಆಧಾರಿತವಾಗಿದೆ. ಅಲ್ಲದೆ ಜಿಪಿಎಸ್ ಟ್ರ್ಯಾಕಿಂಗ್‌ನಂತಹ ಸುರಕ್ಷತಾ ಟ್ರ್ಯಾಕಿಂಗ್ ಫೀಚರ್ಸ್‌ಗಳನ್ನ ಹೊಂದಿಲ್ಲ, ಇದೇ ಕಾರಣಕ್ಕೆ ಮಕ್ಕಳಿಗಾಗಿ 4G-ಶಕ್ತಗೊಂಡ ಸ್ಮಾರ್ಟ್ ವಾಚ್ ಅನ್ನು ಈ ವರ್ಷದ ಕೊನೆಯಲ್ಲಿ ಬಿಡುಗಡೆ ಮಾಡಲಾಗುವುದು ಎಂದು ವರದಿಯಾಗಿದೆ.

ಇನ್ನು ಈ ಸ್ಮಾರ್ಟ್ ವಾಚ್ ಅನ್ನು ಅಭಿವೃದ್ಧಿಪಡಿಸುವ ಸಲುವಾಗಿ ಫಿಟ್‌ಬಿಟ್, ಹಾಂಗ್ ಕಾಂಗ್ ಮೂಲದ ಡೋಕಿ ಟೆಕ್ನಾಲಜೀಸ್ ಕಂಪೆನಿಯನ್ನ ತನ್ನ ಸ್ವಾಧೀನಕ್ಕೆ ತೆಗೆದುಕೊಂಡಿದೆ. ಈ ಕಂಪೆನಿ ಮಕ್ಕಳ ಸ್ನೇಹಿ ಧರಿಸಬಹುದಾದ ವಸ್ತುಗಳಿಗೆ ಹೆಸರುವಾಸಿಯಾಗಿದೆ. ಅಲ್ಲದೆ ಡೋಕಿ ಟೆಕ್ನಾಲಜೀಸ್‌ನ ಸ್ಮಾರ್ಟ್‌ವಾಚ್‌ಗಳು ವಿಡಿಯೋ ಮತ್ತು ವಾಯ್ಸ್ ಕಾಲಿಂಗ್ ಆಯ್ಕೆಗಳ ಜೊತೆಗೆ ಜಿಪಿಎಸ್ ಟ್ರ್ಯಾಕಿಂಗ್ ವ್ಯವಸ್ಥೆಯನ್ನು ಹೊಂದಿವೆ. ಈ ಕಾರಣಕ್ಕಾಗಿ ಫಿಟ್‌ಬಿಟ್‌
ಮತ್ತು ಡೋಕಿ ಟೆಕ್ನಾಲಜೀಸ್ ಎರಡೂ ಈ ಸ್ಮಾರ್ಟ್‌ವಾಚ್‌ ಅನ್ನು ಅಭಿವೃದ್ಧಿ ಪಡಿಸುತ್ತಿವೆ ಎಂದು ಎನ್ನಲಾಗ್ತಿದೆ.

ಸದ್ಯ ಫಿಟ್‌ಬಿಟ್‌ ಕಂಪನಿಯು ಮುಂಬರುವ ವಾಚ್‌ಓಎಸ್‌ನಲ್ಲಿ "ಸ್ಕೂಲ್‌ಟೈಮ್" ಫೀಚರ್ಸ್‌ ಅನ್ನ ನೀಡುವ ಸಾಧ್ಯತೆ ಇದೆ. ಇದು ಶಾಲಾ ಸಮಯದಲ್ಲಿ ಪೋಷಕರಿಗೆ ಅಪ್ಲಿಕೇಶನ್‌ಗಳನ್ನು ನಿರ್ವಹಿಸಲು ಅನುವು ಮಾಡಿಕೊಡುತ್ತದೆ. ಇನ್ನು ಈ ಸ್ಮಾರ್ಟ್‌ವಾಚ್‌ 4G ನೆಟ್‌ವರ್ಕ್‌ ಬೆಂಬಲಿಸುವುದರಿಂದ ಮಕ್ಕಳ ಮೇಲೆ ಫೋಷಕರು ಗಮನಹರಿಸಲು ಸಾಧ್ಯವಾಗಲಿದೆ. ಅಲ್ಲದೆ ಈ ಸ್ಮಾರ್ಟ್‌ವಾಚ್‌ ಇನ್ನು ಹೆಚ್ಚಿನ ನವೀನ ಮಾದರಿಯ ಫೀಚರ್ಸ್‌ಗಳನ್ನ ಹೊಂದಿರುವ ಸೂಚನೆ ಇದೆ ಎನ್ನಲಾಗ್ತಿದೆ. ಸದ್ಯ ಈ ಸ್ಮಾರ್ಟ್‌ವಾಚ್‌ ಈ ವರ್ಷದ ಕೊನೆಯಲ್ಲಿ ಬಿಡುಗಡೆ ಮಾಡಲಿದೆ ಎಂದು ಅಂದಾಜಿಸಲಾಗಿದೆ.