Fake Notes: ನಿಮ್ಮ ಫೋನಿನಲ್ಲೇ ನಕಲಿ ನೋಟುಗಳನ್ನು ಪತ್ತೆ ಮಾಡಬಹುದು! ಇಲ್ಲಿದೆ RBI ಹೊಸ ಆಪ್

ನಿಮ್ಮ ಮೊಬೈಲ್‌ನಲ್ಲೂ ನಕಲಿ ನೋಟುಗಳನ್ನು ಪತ್ತೆ ಮಾಡಬಹುದು! ಆರ್‌ಬಿಐನ ಪರಿಚಯಿಸಿದೆ ಹೊಸ ಅಪ್ಲಿಕೇಶನ್. ನೀವು ಮಾಡಬೇಕಾಗಿರುವುದು ಇಷ್ಟೇ.. ಅಪ್ಲಿಕೇಶನ್ ಡೌನ್‌ಲೋಡ್ ಮಾಡಿ, ನಿಮ್ಮ ಫೋನಿನ ಕ್ಯಾಮೆರಾ ಆನ್ ಮಾಡಿ, 500 ರೂಪಾಯಿ ನೋಟನ್ನು ಕ್ಯಾಮೆರಾಗೆ ತನ್ನಿ. ಈ ಆಪ್ ಇದು ನಕಲಿಯೋ (Fake Notes) ಅಥವಾ ಅಸಲಿಯೋ (Real Notes) ಎಂದು ನಿಮಗೆ ತಿಳಿಸುತ್ತದೆ. ವಿಷಯವೆಂದರೆ, ಈ ಆಪ್ ಕೆಲಸ ಮಾಡಲು ಇಂಟರ್ನೆಟ್ ಅಗತ್ಯವಿಲ್ಲ. ಇದು ಹರಿದ ಅಥವಾ ಕೊಳಕಾದ ನೋಟುಗಳನ್ನು ಸಹ ಪತ್ತೆ ಮಾಡುತ್ತದೆ. ಈ ಆಪ್ ಯಾವುದು ಇದು ಹೇಗೆ ಕೆಲಸ ಮಾಡುತ್ತದೆ ಎಂಬ ಈ ಬಗ್ಗೆ ಇಲ್ಲಿದೆ ಸಂಪೂರ್ಣ ಮಾಹಿತಿ.

ಪ್ರಸ್ತುತ ದಿನಗಳಲ್ಲಿ ನಕಲಿ ನೋಟುಗಳ ಹಾವಳಿ ಹೆಚ್ಚುತ್ತಿದೆ. ಸಾಮಾನ್ಯ ಜನರಿಗೆ ಅಸಲಿ ಮತ್ತು ನಕಲಿ ನೋಟುಗಳ ನಡುವೆ ವ್ಯತ್ಯಾಸವನ್ನು ಕಂಡುಹಿಡಿಯುವುದು ತುಸು ಕಷ್ಟ. ಈ ಕಾರಣದಿಂದಾಗಿ, ಸರ್ಕಾರವು ಸಿಬಿಐ, ಸೆಬಿ ಮತ್ತು ಎನ್‌ಐಎಯಂತಹ ಸಂಸ್ಥೆಗಳಿಗೆ ಎಚ್ಚರಿಕೆ ನೀಡಿದೆ. ಬಹಳಷ್ಟು ನಕಲಿ 500 ರೂಪಾಯಿ ನೋಟುಗಳು (fake currency) ಪತ್ತೆಯಾಗಿವೆ. ಈ ನೋಟುಗಳು ಚಲಾವಣೆಯಲ್ಲಿವೆ ಮತ್ತು ಅವುಗಳನ್ನು ಹಿಡಿಯುವುದು ತುಂಬಾ ಕಷ್ಟಕರವಾಗಿತ್ತು. ಆದರೆ, ಭಯಪಡುವ ಅಗತ್ಯವಿಲ್ಲ. ನಿಮ್ಮ ಬಳಿ ಸ್ಮಾರ್ಟ್‌ಫೋನ್ ಇದ್ದರೆ, 500 ರೂ. ನೋಟು (500 Rupee Notes) ಅಸಲಿಯೇ ಎಂಬ ಸತ್ಯಾಸತ್ಯತೆಯನ್ನು ಪರಿಶೀಲಿಸಬಹುದು.

ಆರ್‌ಬಿಐ 'ಮನಿ' ಆಪ್

ನಕಲಿ ನೋಟುಗಳನ್ನು ಪತ್ತೆಹಚ್ಚಲು ಆರ್‌ಬಿಐ ವಿಶೇಷ ಮೊಬೈಲ್ ಆಪ್ (RBI MANI App) ಅನ್ನು ಅಭಿವೃದ್ಧಿಪಡಿಸಿದೆ. ಇದಕ್ಕೆ 'ಮೊಬೈಲ್ ಏಡೆಡ್ ನೋಟ್ ಐಡೆಂಟಿಫೈಯರ್' (MANI) ಎಂದು ಹೆಸರಿಸಲಾಗಿದೆ. ಈ ಅಪ್ಲಿಕೇಶನ್ ಆಂಡ್ರಾಯ್ಡ್ ಮತ್ತು ಐಫೋನ್ ಎರಡರಲ್ಲೂ ಲಭ್ಯವಿದೆ. ಇದು ಬಳಸಲು ತುಂಬಾ ಸುಲಭ. ಈ ಆಪ್‌ ಹರಿದ ನೋಟುಗಳು ಅಥವಾ ಕೊಳಕಾದ ನೋಟುಗಳನ್ನು ಸಹ ಪತ್ತೆ ಮಾಡುತ್ತದೆ. ಮೊದಲೇ ಹೇಳಿದಂತೆ, ಈ ಅಪ್ಲಿಕೇಶನ್ ಬಳಸಲು ಇಂಟರ್ನೆಟ್ ಅಗತ್ಯವಿಲ್ಲ.

ಗಾಂಧಿ ಫೋಟೋದ ಪಕ್ಕ ಈ ಮಾರ್ಕ್ ಇರುತ್ತೆ!

ಅಸಲಿ ಬ್ಯಾಂಕ್ ನೋಟು ವಿಶಿಷ್ಟ ಗುರುತಿನ ಚಿಹ್ನೆಯನ್ನು ಹೊಂದಿರುತ್ತದೆ. ಅಂದರೆ ಭದ್ರತಾ ದಾರ, ವಾಟರ್‌ಮಾರ್ಕ್‌ಗಳು, ಬಣ್ಣ ಬದಲಾಯಿಸುವ ಶಾಯಿ ಇರುತ್ತದೆ. ನಿಮ್ಮ ಫೋನಿನ ಕ್ಯಾಮೆರಾ ಮೂಲಕ ಈ ವೈಶಿಷ್ಟ್ಯಗಳನ್ನು ಗುರುತಿಸಬಹುದು. 500 ರೂಪಾಯಿ ನೋಟಿನ ಮಧ್ಯದಲ್ಲಿ ಹೊಳೆಯುವ ಪಟ್ಟಿಯಿದ್ದು, ಅದರ ಮೇಲೆ 'ಭಾರತ್' ಮತ್ತು 'ಆರ್‌ಬಿಐ' ಎಂಬ ಪದಗಳನ್ನು ಬರೆಯಲಾಗಿದೆ. ನೀವು ನೋಟನ್ನು ಸ್ವಲ್ಪ ಬಗ್ಗಿಸಿದಾಗ ಈ ರೇಖೆಯು ಬಣ್ಣವನ್ನು ಬದಲಾಯಿಸುತ್ತದೆ. ಜೊತೆಗೆ ಮಹಾತ್ಮ ಗಾಂಧಿ (Mahatma Gandhi) ಅವರ ಫೋಟೋದ ಪಕ್ಕದಲ್ಲಿ ವಾಟರ್‌ಮಾರ್ಕ್ ಇರುತ್ತದೆ. ಇದು ಬೆಳಕಿನಲ್ಲಿ ಸ್ಪಷ್ಟವಾಗಿ ಗೋಚರಿಸುತ್ತದೆ.

ಗಾಂಧೀಜಿ ಕನ್ನಡಕದ ಬಳಿ ನೋಡಿ

ನೋಟುಗಳ ಮೇಲಿನ ಕೆಲವು ಪದಗಳನ್ನು ಬಹಳ ಸೂಕ್ಷ್ಮ ಅಕ್ಷರಗಳಲ್ಲಿ ಮುದ್ರಿಸಲಾಗುತ್ತದೆ. ಇದನ್ನು ಮೈಕ್ರೋ ಲೆಟರಿಂಗ್ ಎಂದು ಕರೆಯಲಾಗುತ್ತದೆ. ಇವುಗಳನ್ನು ಹೆಚ್ಚಾಗಿ ನಕಲಿ ನೋಟುಗಳಲ್ಲಿ ಸರಿಯಾಗಿ ತಯಾರಿಸಲಾಗುವುದಿಲ್ಲ. ನಿಮ್ಮ ಮೊಬೈಲ್ ಕ್ಯಾಮೆರಾವನ್ನು ಜೂಮ್ ಮೋಡ್‌ನಲ್ಲಿ ಇರಿಸಿ, ನೋಟಿನ ಭಾಗಗಳನ್ನು ಸೂಕ್ಷ್ಮವಾಗಿ ಗಮನಿಸಬಹುದು. ಉದಾಹರಣೆಗೆ ಮಹಾತ್ಮ ಗಾಂಧೀಜಿಯವರ ಕನ್ನಡಕದ ಬಳಿ ಅಥವಾ ಸಂಖ್ಯೆಗಳ ಸುತ್ತಲೂ ನೋಡಬೇಕು. ಇಲ್ಲಿ 'RBI', 'Bharat' ಮತ್ತು '500' ನಂತಹ ಪದಗಳನ್ನು ಸಣ್ಣ ಅಕ್ಷರಗಳಲ್ಲಿ ಮುದ್ರಿಸಲಾಗಿದೆ. ಇವು ಸ್ಪಷ್ಟವಾಗಿ ಗೋಚರಿಸಿದರೆ, ಆ ನೋಟು ಅಸಲಿಯಾಗಿರುತ್ತದೆ.

ನಿಮ್ಮ ಫೋನಿನಲ್ಲೇ UV ಪರೀಕ್ಷೆ ಮಾಡಿ

ಇದಲ್ಲದೆ, ನಿಮ್ಮ ಫೋನಿನ ಬ್ಯಾಟರಿ ಬೆಳಕಿನೊಂದಿಗೆ ಒಂದು ಸಣ್ಣ UV ಪರೀಕ್ಷೆಯನ್ನು ಸಹ ಮಾಡಬಹುದು. ಪಾರದರ್ಶಕ ನೀಲಿ ಅಥವಾ ನೇರಳೆ ಪ್ಲಾಸ್ಟಿಕ್ ತುಂಡನ್ನು ತೆಗೆದುಕೊಂಡು ಅದನ್ನು ಫ್ಲ್ಯಾಶ್ ಮೇಲೆ ಇಡಬೇಕು. ಆಗ ಈ UV ಬೆಳಕನ್ನು ನೋಟಿನ ಮೇಲೆ ಬರುವಂತೆ ಮಾಡಿ. ಅಸಲಿ ನೋಟುಗಳ ಮೇಲಿನ ಸಂಖ್ಯೆಗಳು ಮತ್ತು ದಾರಗಳು ಮಸುಕಾದ ನೀಲಿ ಅಥವಾ ಹಸಿರು ಬೆಳಕಿನಲ್ಲಿ ಗೋಚರಿಸುತ್ತವೆ. ಒಟ್ಟಾರೆ, ತಂತ್ರಜ್ಞಾನದ ಸಹಾಯದಿಂದ ನೀವು ನಕಲಿ ನೋಟುಗಳನ್ನು ಪತ್ತೆ ಮಾಡಬಹುದು. ನೀವು ಮಾಡಬೇಕಾಗಿರುವುದು ಸ್ವಲ್ಪ ಗಮನಹರಿಸಿ ಮತ್ತು ನಿಮ್ಮ ಮೊಬೈಲ್‌ ಅನ್ನು ಸರಿಯಾಗಿ ಬಳಸಬೇಕು.