iOS 26 ಅಪ್‌ಡೇಡ್ ಬಳಿಕ ಐಫೋನ್ ಬ್ಯಾಟರಿ ಡ್ರೈನ್ ಸಮಸ್ಯೆ: ಆಪಲ್ ಹೇಳಿದ್ದು ಹೀಗೆ!

ಆಪಲ್ ಇತ್ತೀಚೆಗೆ ಬಿಡುಗಡೆ ಮಾಡಿದ ಹೊಸ ಐಒಎಸ್ 26 ಅಪ್‌ಡೇಟ್ ಐಫೋನ್ ಬಳಕೆದಾರರಲ್ಲಿ ಮಿಶ್ರ ಪ್ರತಿಕ್ರಿಯೆಗಳಿಗೆ ಕಾರಣವಾಗಿದೆ. ಈ ಅಪ್‌ಡೇಟ್ ಹಲವಾರು ಹೊಸ ವೈಶಿಷ್ಟ್ಯಗಳನ್ನು ಮತ್ತು ಸುಧಾರಣೆಗಳನ್ನು ತಂದಿದ್ದರೂ, ಅಪ್‌ಡೇಟ್ ಬಳಿಕ ತಮ್ಮ ಫೋನ್‌ಗಳ ಬ್ಯಾಟರಿ ಬೇಗನೆ ಖಾಲಿಯಾಗುತ್ತಿದೆ ಎಂದು ಅನೇಕ ಬಳಕೆದಾರರು ಸಾಮಾಜಿಕ ಜಾಲತಾಣಗಳಲ್ಲಿ ದೂರು ನೀಡುತ್ತಿದ್ದಾರೆ. ಕೆಲವರು ಫೋನ್ ಹೆಚ್ಚು ಬಿಸಿಯಾಗುತ್ತಿದೆ ಎಂದೂ ಹೇಳುತ್ತಿದ್ದಾರೆ. ಇದು ಐಫೋನ್ ಬಳಕೆದಾರರಲ್ಲಿ ಆತಂಕ ಮೂಡಿಸಿರುವುದು ಸಹಜ. ಆದರೆ, ಈ ಸಮಸ್ಯೆಗೆ ಕಾರಣ ಮತ್ತು ಪರಿಹಾರಗಳೇನು ಎಂಬುದನ್ನು ನೋಡೋಣ ಬನ್ನಿ

ಬ್ಯಾಟರಿ ಡ್ರೈನ್‌ಗೆ ಕಾರಣವೇನು?
ದೊಡ್ಡ ಸಾಫ್ಟ್‌ವೇರ್ ಅಪ್‌ಡೇಟ್‌ಗಳ ನಂತರ ಬ್ಯಾಟರಿ ವೇಗವಾಗಿ ಖಾಲಿಯಾಗುವುದು ಮತ್ತು ತಾಪಮಾನ ಏರಿಕೆ ಕಾಣಿಸುವುದು ಸಾಮಾನ್ಯ. ಆಪಲ್ ಕಂಪನಿಯು ಈ ಕುರಿತು ಸ್ಪಷ್ಟನೆ ನೀಡಿದ್ದು, ಐಒಎಸ್ 26 ನವೀಕರಣದ ಬಳಿಕ ಫೋನ್ ಹಿನ್ನಲೆಯಲ್ಲಿ ಹಲವಾರು ಪ್ರಕ್ರಿಯೆಗಳನ್ನು ನಡೆಸುತ್ತದೆ. ಈ ಪ್ರಕ್ರಿಯೆಗಳಲ್ಲಿ ಫೈಲ್‌ಗಳ ಇಂಡೆಕ್ಸಿಂಗ್, ಆ್ಯಪ್‌ಗಳ ನವೀಕರಣ, ಮತ್ತು ಹೊಸ ವೈಶಿಷ್ಟ್ಯಗಳಿಗೆ ಅಗತ್ಯವಿರುವ ಸಿಸ್ಟಂ ಡೇಟಾ ಡೌನ್‌ಲೋಡ್ ಮಾಡುವುದು ಸೇರಿವೆ. ಈ ಕಾರ್ಯಗಳು ಬ್ಯಾಟರಿಯ ಮೇಲೆ ಹೆಚ್ಚಿನ ಒತ್ತಡ ಹೇರುವುದರಿಂದ ಅಪ್‌ಡೇಟ್ ಆದ ಮೊದಲ ಕೆಲವು ದಿನಗಳವರೆಗೆ ಬ್ಯಾಟರಿ ಬೇಗನೆ ಖಾಲಿಯಾಗುತ್ತದೆ. ಈ ಹಿನ್ನಲೆ ಪ್ರಕ್ರಿಯೆಗಳು ಸಾಮಾನ್ಯವಾಗಿ 24 ರಿಂದ 48 ಗಂಟೆಗಳಲ್ಲಿ ಪೂರ್ಣಗೊಂಡ ನಂತರ ಬ್ಯಾಟರಿ ಕಾರ್ಯಕ್ಷಮತೆ ಸಾಮಾನ್ಯ ಸ್ಥಿತಿಗೆ ಮರಳುತ್ತದೆ ಎಂದು ಆಪಲ್ ತಿಳಿಸಿದೆ.

ಆದರೆ ಕೆಲವು ತಂತ್ರಜ್ಞರು ಈ ಸಮಸ್ಯೆಗೆ ಇನ್ನೂ ಕೆಲವು ಕಾರಣಗಳನ್ನು ನೀಡುತ್ತಾರೆ. ಐಒಎಸ್ 26 ರಲ್ಲಿನ ಹೊಸ "ಲಿಕ್ವಿಡ್ ಗ್ಲಾಸ್ ಯುಐ" (Liquid Glass UI) ನಂತಹ ದೃಶ್ಯ ಪರಿಣಾಮಗಳು ಮತ್ತು ಹೆಚ್ಚುವರಿ ವೈಶಿಷ್ಟ್ಯಗಳು ಸ್ವಲ್ಪ ಹೆಚ್ಚುವರಿ ಶಕ್ತಿಯನ್ನು ಬಳಸಬಹುದು. ಇದರಿಂದಾಗಿ, ಹಳೆಯ ಮಾದರಿಯ ಐಫೋನ್‌ಗಳಲ್ಲಿ ಬ್ಯಾಟರಿ ಸಮಸ್ಯೆ ಮುಂದುವರಿಯುವ ಸಾಧ್ಯತೆ ಇದೆ. ಏಕೆಂದರೆ, ಈ ಹಳೆಯ ಫೋನ್‌ಗಳು ಹೊಸ ತಂತ್ರಜ್ಞಾನಕ್ಕೆ ಬೇಕಾದಷ್ಟು ಸಾಮರ್ಥ್ಯವನ್ನು ಹೊಂದಿಲ್ಲದಿರಬಹುದು.

ಈ ಸಮಸ್ಯೆಗೆ ತಾತ್ಕಾಲಿಕ ಪರಿಹಾರಗಳು
ಬ್ಯಾಟರಿ ಸಮಸ್ಯೆ ನಿಮ್ಮನ್ನು ಕಾಡುತ್ತಿದ್ದರೆ, ಕೆಲವು ಸರಳ ಪರಿಹಾರಗಳನ್ನು ಅನುಸರಿಸಬಹುದು. ಇವು ಬ್ಯಾಟರಿ ಬಳಕೆಯನ್ನು ನಿಯಂತ್ರಿಸಲು ಸಹಾಯ ಮಾಡುತ್ತವೆ:

1. ಅಪ್‌ಡೇಟ್ ನಂತರ ಕನಿಷ್ಠ 24-48 ಗಂಟೆಗಳವರೆಗೆ ಕಾಯಿರಿ. ಹಿನ್ನಲೆ ಪ್ರಕ್ರಿಯೆಗಳು ಮುಗಿದ ನಂತರ ಬ್ಯಾಟರಿ ಬಳಕೆ ಸಹಜ ಸ್ಥಿತಿಗೆ ಮರಳುತ್ತದೆ.
2. ಸೆಟ್ಟಿಂಗ್ಸ್ ನಲ್ಲಿರುವ Battery Usage by Apps ಆಯ್ಕೆಯನ್ನು ಪರಿಶೀಲಿಸಿ. ಇಲ್ಲಿ, ಅತಿ ಹೆಚ್ಚು ಬ್ಯಾಟರಿ ಬಳಸುವ ಆ್ಯಪ್‌ಗಳನ್ನು ಗುರುತಿಸಿ, ಅವುಗಳನ್ನು ನವೀಕರಿಸುವುದು ಅಥವಾ ಅಗತ್ಯವಿಲ್ಲದಿದ್ದರೆ ತೆಗೆದುಹಾಕುವುದು ಉತ್ತಮ.
3. Background App Refresh ವೈಶಿಷ್ಟ್ಯವನ್ನು ಆಫ್ ಮಾಡುವುದರಿಂದ ಹಿನ್ನಲೆಯಲ್ಲಿ ಆ್ಯಪ್‌ಗಳು ರಿಫ್ರೆಶ್ ಆಗುವುದನ್ನು ತಪ್ಪಿಸಿ, ಬ್ಯಾಟರಿ ಉಳಿಸಬಹುದು.
4. ಅಗತ್ಯವಿಲ್ಲದ ಆ್ಯಪ್‌ಗಳಿಗೆ Location Services ಅನ್ನು ಆಫ್ ಮಾಡಿ. ಇದರಿಂದ ಬ್ಯಾಟರಿ ಬಳಕೆ ಗಣನೀಯವಾಗಿ ಕಡಿಮೆಯಾಗುತ್ತದೆ.
5. ಸ್ಕ್ರೀನ್‌ನ ಬ್ರೈಟ್‌ನೆಸ್ ಅನ್ನು ಕಡಿಮೆ ಮಾಡಿ ಮತ್ತು ಆಟೋ-ಲಾಕ್ ಸಮಯವನ್ನು ಕಡಿಮೆ ಮಾಡಿ. ಇದರಿಂದ ಸ್ಕ್ರೀನ್ ಅನಗತ್ಯವಾಗಿ ಆನ್ ಆಗಿರುವುದನ್ನು ತಪ್ಪಿಸಬಹುದು.
6. ಬ್ಯಾಟರಿ 20% ಗಿಂತ ಕಡಿಮೆ ಇರುವಾಗ Low Power Mode ಅನ್ನು ಸಕ್ರಿಯಗೊಳಿಸುವುದು ಉತ್ತಮ. ಇದು ಬ್ಯಾಟರಿ ಬಳಕೆಯನ್ನು ಮಿತಗೊಳಿಸಿ, ಅವಧಿಯನ್ನು ಹೆಚ್ಚಿಸುತ್ತದೆ.

ಮೇಲಿನ ತಾತ್ಕಾಲಿಕ ಪರಿಹಾರಗಳು ನಿಮ್ಮ ಸಮಸ್ಯೆಯನ್ನು ಬಗೆಹರಿಸದಿದ್ದರೆ, ನೀವು ಇನ್ನೂ ಕೆಲವು ದೀರ್ಘಕಾಲದ ಕ್ರಮಗಳನ್ನು ಕೈಗೊಳ್ಳಬಹುದು. ತಂತ್ರಜ್ಞರ ಪ್ರಕಾರ, "ರಿಸೆಟ್ ಆಲ್ ಸೆಟ್ಟಿಂಗ್ಸ್" (Reset All Settings) ಅಥವಾ ಐಒಎಸ್ 26 ಅನ್ನು ಸಂಪೂರ್ಣವಾಗಿ ಡಿಲೀಟ್ ಮಾಡಿ, ಹೊಸದಾಗಿ ಇನ್ಸ್ಟಾಲ್ ಮಾಡುವುದು ಸಹಾಯಕವಾಗಬಹುದು. ಹಾಗಾಗಿ, ಐಒಎಸ್ 26 ಅಪ್‌ಡೇಟ್ ನಂತರ ನಿಮ್ಮ ಐಫೋನ್ ಬ್ಯಾಟರಿ ವೇಗವಾಗಿ ಖಾಲಿಯಾಗುತ್ತಿದ್ದರೆ, ಆತಂಕಪಡುವ ಅಗತ್ಯವಿಲ್ಲ. ಇದು ಸಾಮಾನ್ಯವಾಗಿ ತಾತ್ಕಾಲಿಕ ಸಮಸ್ಯೆಯಾಗಿದ್ದು, ಮೇಲಿನ ಸಲಹೆಗಳನ್ನು ಅನುಸರಿಸುವುದರಿಂದ ಬಗೆಹರಿಸಬಹುದು.