ಐಫೋನ್ 17 ಖರೀದಿಗೆ ಕ್ಯೂ: ಬೆಂಗಳೂರಿನಲ್ಲಿ ಸಂಭ್ರಮ, ಮುಂಬೈನಲ್ಲಿ ಗಲಾಟೆ!

ಭಾರತದಲ್ಲಿ Apple ಪ್ರಿಯರಿಗೆ ಬಹುನಿರೀಕ್ಷಿತ iPhone 17 ಸರಣಿಯ iPhone 17, iPhone 17 Air, iPhone 17 Pro, ಮತ್ತು iPhone 17 Pro Max ನಾಲ್ಕು ಫೋನ್‌ಗಳು ಅಂತಿಮವಾಗಿ ಇಂದಿನಿಂದ ಖರಿದಿಗೆ ಲಭ್ಯವಾಗುತ್ತಿವೆ. ಈ ಬಾರಿ, Apple ಸ್ಟೋರ್‌ಗಳು ಬೆಳಿಗ್ಗೆ 8 ಗಂಟೆಗೆ ಬಾಗಿಲು ತೆರೆದರೂ, ಅದಕ್ಕೂ ಗಂಟೆಗಳ ಮೊದಲೇ ಉತ್ಸಾಹಿ ಖರೀದಿದಾರರು ಸಾಲಿನಲ್ಲಿ ನಿಂತಿದ್ದರು. ಬೆಂಗಳೂರು, ನವದೆಹಲಿ, ಮುಂಬೈ, ಮತ್ತು ಪುಣೆಯಲ್ಲಿರುವ Apple ನ ನಾಲ್ಕು ಪ್ರಮುಖ ಸ್ಟೋರ್‌ಗಳಲ್ಲೂ ಈ ದೃಶ್ಯ ಕಂಡುಬಂದಿತು. ಈ ವಿಷಯದಲ್ಲಿ ಬೆಂಗಳೂರಿನಲ್ಲಿ ಸಂಭ್ರಮ ಏರ್ಪಟ್ಟರೆ, ಮುಂಬೈನಲ್ಲಿ ಗದ್ದಲ ಉಂಟಾಯಿತು.!

ಮುಂಬೈನ ಬಾಂದ್ರಾ-ಕುರ್ಲಾ ಕಾಂಪ್ಲೆಕ್ಸ್‌ನಲ್ಲಿರುವ ಜಿಯೋ ವರ್ಲ್ಡ್ ಸೆಂಟರ್‌ನಲ್ಲಿರುವ Apple ಸ್ಟೋರ್‌ನ ಮುಂದೆ ಅವ್ಯವಸ್ಥೆಗೆ ಸಾಕ್ಷಿಯಾಯಿತು. ಪಿಟಿಐ ಹಂಚಿಕೊಂಡ ವೀಡಿಯೊದಲ್ಲಿ, ದೊಡ್ಡ ಜನಸಮೂಹ ಪರಸ್ಪರ ಜಗಳವಾಡುವುದನ್ನು ತೋರಿಸಿದೆ. ಭದ್ರತಾ ಸಿಬ್ಬಂದಿಯನ್ನು ನಿರ್ಲಕ್ಷಿಸಿ, ಕೆಲವರು ನೂಕಾಟ-ತಳ್ಳಾಟ ಮಾಡುತ್ತಿದ್ದರು.ಮುಂದೆ ಹೋಗಲು ಪ್ರಯತ್ನಿಸುತ್ತಿದ್ದಾಗ ಜಗಳ ಪ್ರಾರಂಭವಾಯಿತು. ಒಬ್ಬ ಖರೀದಿದಾರರು ಎಎನ್‌ಐಗೆ (ANI) ತಿಳಿಸಿದಂತೆ, ಭದ್ರತೆಯ ಕೊರತೆಯಿಂದಾಗಿ ಈ ಗೊಂದಲ ಉಂಟಾಯಿತು. ಜನರು ಸಾಲು ಮುರಿಯುತ್ತಿದ್ದರು, ಇದರಿಂದಾಗಿ ಗಂಟೆಗಟ್ಟಲೆ ಕಾದವರಿಗೆ ಉತ್ಪನ್ನಗಳು ಸಿಗುತ್ತಿಲ್ಲ ಎಂದರು.

ಬೆಂಗಳೂರಿನಲ್ಲಿ ಪರಿಸ್ಥಿತಿ
ಬೆಂಗಳೂರು ಸೇರಿದಂತೆ ಇತರ ನಗರಗಳಲ್ಲೂ ಉತ್ಸಾಹ ಜೋರಾಗಿತ್ತು. ಬೆಂಗಳೂರು ಮತ್ತು ನವದೆಹಲಿಯ Apple ಸ್ಟೋರ್ ಹೊರಗೆ ಖರೀದಿದಾರರು ರಾತ್ರಿಯಿಡೀ ಕಾಯುತ್ತಿದ್ದರು. ದೆಹಲಿಯಲ್ಲಿ ಸಾಲು ಎರಡು ಮಹಡಿಗಳಲ್ಲಿ ಹರಡಿತ್ತು. ಪುಣೆಯಲ್ಲಿರುವ Apple ಸ್ಟೋರ್‌ಲ್ಲಿಯೂ ಇದೇ ರೀತಿಯ ಪರಿಸ್ಥಿತಿ ಇತ್ತು. ಆದರೆ, ಮುಂಬೈನಲ್ಲಿ ಕಂಡುಬಂದ ಆಕ್ರಮಣಕಾರಿ ನಡವಳಿಕೆ ಬೆಂಗಳೂರಿನಲ್ಲಿ ಇರಲಿಲ್ಲ. ಬೆಂಗಳೂರಿನಲ್ಲಿ ಜನಸಂದಣಿ ಅಷ್ಟೇ ದೊಡ್ಡದಾಗಿದ್ದರೂ, ಅಲ್ಲಿ ಶಾಂತ ಮತ್ತು ಸಂಭ್ರಮದ ವಾತಾವರಣವಿತ್ತು. ಹೊಸ ಸಾಧನವನ್ನು ಮೊದಲು ಪಡೆಯಲು ಉತ್ಸುಕರಾದ ಜನರನ್ನು ಇಲ್ಲಿ ಕಾಣಬಹುದಿತ್ತು.

Photo Credit: