ಭಾರತೀಯ ವಿದ್ಯಾರ್ಥಿಗಳೇ ತಯಾರಿಸಿದ ಈ ಚಾಲಕರಹಿತ ಸ್ಮಾರ್ಟ್‌ಬಸ್‌ಗೆ ನಮ್ಮ ಸಲಾಮ್!!

ಚಾಲಕ ರಹಿತ ಮತ್ತು ಸೌರಶಕ್ತಿ ಬಸ್!

ಇಂದಿನ ದಿನಗಳಲ್ಲಿ ಇಂತಹದೊಂದು ಕಲ್ಪನೆಯನ್ನು ಕಾಣಲು ಸುಲಭವಾಗಿರುತ್ತದೆ. ಆದರೆ, ಅದನ್ನು ವ್ಯವಸ್ಥಿತವಾಗಿ ಜಾರಿಗೆ ತರಲು ಸಾಧ್ಯವಾಗುವುದು ದೃಢನಿಶ್ಚಯ ಇದ್ದಾಗ ಮಾತ್ರ. ಹೌದು, ರಾಷ್ಟ್ರದಲ್ಲಿ ಮೊದಲ ಬಾರಿಗೆ ಚಾಲಕ ರಹಿತ ಮತ್ತು ಸೌರಶಕ್ತಿ ಚಲಿತ ಅತ್ಯಂತ ಅಗ್ಗದ ಬಸ್‌ ನಿರ್ಮಾಣ ಮಾಡುವ ಮೂಲಕ ಪಂಜಾಬ್‌ನ ಕಾಲೇಜು ವಿದ್ಯಾರ್ಥಿಗಳು ಸುದ್ದಿಯಾಗಿದ್ದಾರೆ.

ಮಾಲಿನ್ಯ ರಹಿತ ಸ್ಮಾರ್ಟ್‌ ಬಸ್‌

ಪಂಜಾಬ್‌ನ ಲವ್ಲಿ ಪ್ರೊಫೆಶನಲ್ ಯೂನಿವರ್ಸಿಟಿ (ಎಲ್‌ಪಿಯು) ವಿದ್ಯಾರ್ಥಿಗಳು ನಿರ್ಮಿಸಿರುವ ಈ ಬಸ್ ಕೇವಲ ಚಾಲಕ ರಹಿತ ಮತ್ತು ಸೌರಶಕ್ತಿಯಿಂದ ಚಲಿಸುವ ಅತ್ಯಂತ ಅಗ್ಗದ ಬಸ್‌ ಮಾತ್ರವಲ್ಲ, ಬದಲಾಗಿ ಸಂಪೂರ್ಣ ಮಾಲಿನ್ಯರಹಿತ ಸ್ಮಾರ್ಟ್ಬಸ್ ಇದಾಗಿದೆ. ಜಿಪಿಎಸ್ ಮತ್ತು ಬ್ಲೂಟೂತ್‌ ಸಹಾಯದಿಂದ ಸ್ವಯಂ ಕಾರ್ಯನಿರ್ವಹಿಸುವ ತಂತ್ರಜ್ಞಾನವನ್ನು ಬಸ್ ಹೊಂದಿದೆ.

ಇದರ ವಿಶೇಷತೆ ಏನು ಗೊತ್ತಾ?

ಸಂಪೂರ್ಣ ಮಾಲಿನ್ಯರಹಿತ ಈ ಸ್ಮಾರ್ಟ್ಬಸ್ ಗಂಟೆಗೆ 30 ಕಿ.ಮೀ. ವೇಗದಲ್ಲಿ ಚಲಿಸುತ್ತದೆ. 10-30 ಮಂದಿ ಸಾಮರ್ಥ್ಯದ ನೂತನ ಬಸ್‌, ಒಂದು ಬಾರಿ ಪೂರ್ತಿ ಚಾರ್ಚ್ ಮಾಡಿದರೆ 70 ಕಿ.ಮೀ. ವರಗೆ ಚಲಿಸುತ್ತದೆ. ಚಾಲನೆ ಮತ್ತು ನಿರ್ವಹಣೆಗಾಗಿ ಅತ್ಯಂತ ಕಡಿಮೆ ವಿದ್ಯುಚ್ಚಕ್ತಿಯನ್ನು ಬಳಸಿಕೊಳ್ಳುವ ಈ ಬಸ್ ಅತ್ಯಂತ ಕಡಿಮೆ ವೆಚ್ಚದಲ್ಲಿಯೂ ತಯಾರಾಗಿರುವುದು ಆಶ್ಚರ್ಯ.!

ಬೆಲೆ ಕೇವಲ 6 ಲಕ್ಷ ರೂ.

ಜಲಂದರ್‌ನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ನೂತನ ಬಸ್‌ ಪ್ರದರ್ಶಿಸಲಾದ ಈ ಬಸ್‌ನ ಮೊದಲ ಆಕರ್ಷಣೆ ಇದರ ವಿನ್ಯಾಸ, ಚಾಲಕ ರಹಿತ, ಸ್ಮಾರ್ಟ್‌ ವಿಶೇಷತೆಗಳು ಹಾಗೂ ಸಂಪೂರ್ಣ ತಂತ್ರಜ್ಞಾನಗಳಾಗಿದ್ದವು. ಆದರೆ, ಇದರ ಬೆಲೆ ಕೇವಲ 6 ಲಕ್ಷ ರೂ. ಎಂದಾಗ ಎಲ್ಲರೂ ಮಂತ್ರಮುಗ್ದರಾದರು. ಏಕೆಂದರೆ, ಸಾಮಾನ್ಯ ಬಸ್‌ಗಳ ಬೆಲೆಯೇ 15-20 ಲಕ್ಷ ರೂ.ಗಳಿರುತ್ತವೆ.

ಒಂದು ವರ್ಷ ಕಾಲಾವಕಾಶ

ಜಿಪಿಎಸ್ ಮತ್ತು ಬ್ಲೂಟೂತ್‌ ಸಹಾಯದಿಂದ ಚಾಲಕ ರಹಿತವಾಗಿ ಚಲಿಸುವ ಈ ನೂತನ ಬಸ್‌ ತಯಾರಿಕೆಗೆ ವಿದ್ಯಾರ್ಥಿಗಳು ಒಂದು ವರ್ಷ ಕಾಲಾವಕಾಶ ತೆಗೆದುಕೊಂಡಿದ್ದಾರೆ. ನೂರಕ್ಕೆ ನೂರು ಹೊಸ ತಂತ್ರಜ್ಞಾನವನ್ನು ಅಳವಡಿಸಲು ವಿಧ್ಯಾರ್ಥಿಗಳು ಸಾಕಷ್ಟು ಶ್ರಮಿಸಿದ್ದಾರೆ. ಹಣ ಮತ್ತು ಶ್ರಮವನ್ನು ದೇಶಕ್ಕಾಗಿ ಬಳಸಿಕೊಂಡ ಆ ವಿದ್ಯಾರ್ಥಿಗಳಿಗೆ ನಮ್ಮದೊಂದು ಸಲಾಮ್.