ಕರ್ನಾಟಕದಲ್ಲಿ ಆನ್‌ಲೈನ್‌ ಗ್ಯಾಬ್ಲಿಂಗ್‌ ಬ್ಯಾನ್‌ ಮಾಡಲು ನಿರ್ಧಾರ!

ಹೌದು, ಕರ್ನಾಟಕ ಸರ್ಕಾರ ಇಂದು ನಡೆದ ಕ್ಯಾಬಿನೆಟ್‌ ಮೀಟಿಂಗ್‌ನಲ್ಲಿ ಮಹತ್ವದ ನಿರ್ಧಾರವನ್ನು ತೆಗೆದುಕೊಂಡಿದೆ. ಇತ್ತೀಚಿನ ದಿನಗಳಲ್ಲಿ ಸಾಕಷ್ಟು ಸೌಂಡ್‌ ಮಾಡ್ತಿದ್ದ ಆನ್‌ಲೈನ್‌ ಜೂಜಾಟವನ್ನು ಬ್ಯಾನ್‌ ಮಾಡಿದೆ. ಇದಕ್ಕಾಗಿ ಕ್ಯಾಬಿನೆಟ್‌ ಮೀಟಿಂಗ್‌ ಪೋಲಿಸ್‌ ಕಾಯ್ದೆಗೆ ಕೆಲವು ತಿದ್ದುಪಡಿಗಳನ್ನು ಅಂಗೀಕರಿಸಿದೆ. ಇನ್ನು ಈ ತಿದ್ದುಪಡಿಗಳನ್ನು ವಿಧಾನಸಭೆಯ ಮುಂದೆ ಇಡಲಾಗುವುದು ಎಂದು ಕಾನೂನು ಮತ್ತು ಸಂಸದೀಯ ವ್ಯವಹಾರಗಳ ಸಚಿವ ಜೆ ಸಿ ಮಾಧುಸ್ವಾಮಿ ಹೇಳಿದ್ದಾರೆ. ಹಾಗಾದ್ರೆ ಕರ್ನಾಕಟದಲ್ಲಿ ಆನ್‌ಲೈನ್‌ ಗ್ಯಾಬ್ಲಿಂಗ್‌ ಅನ್ನು ಬ್ಯಾನ್‌ ಮಾಡಿದ್ದು ಯಾಕೆ ಅನ್ನೊದನ್ನ ಈ ಲೇಖನದಲ್ಲಿ ತಿಳಿಸಿಕೊಡ್ತೀವಿ ಓದಿರಿ.

ಆನ್‌ಲೈನ್‌ ಗ್ಯಾಬ್ಲಿಂಗ್‌ ಕರ್ನಾಟಕ ಮಾತ್ರವಲ್ಲ ದೇಶದ ಎಲ್ಲಾ ರಾಜ್ಯಗಳಲ್ಲೂ ಇದು ಸಿಕ್ಕಾಪಟ್ಟೆ ಸೌಂಡ್‌ ಮಾಡ್ತಾ ಇದೆ. ಆನ್‌ಲೈನ್‌ ಜೂಜಾಟದಲ್ಲಿ ಸಾಕಷ್ಟು ಜನ ಮೋಸ ಹೋಗುತ್ತಿರೋದು ಸುದ್ದಿಯಾಗುತ್ತಲೇ ಇದೆ. ಅಷ್ಟೇ ಅಲ್ಲ ಆನ್‌ಲೈನ್‌ ಜೂಜಾಟ ಒಂದು ರೀತಿಯ ವ್ಯಸನವಾಗಿ ಬದಲಾಗುತ್ತಿದೆ. ಇದೆಲ್ಲವನ್ನು ಗಮನದಲ್ಲಿಟ್ಟುಕೊಂಡು ಕರ್ನಾಟಕ ಸರ್ಕಾರ ಆನ್‌ಲೈನ್‌ ಗ್ಯಾಬ್ಲಿಂಗ್‌ ಬ್ಯಾನ್‌ ಮಾಡಲು ನಿರ್ಧಾರ ಮಾಡಿದೆ.

ಇನ್ನು ಆನ್‌ಲೈನ್ ಗ್ಯಾಬ್ಲಿಂಗ್‌ ಬ್ಯಾನ್‌ ಮಸೂದೆಯಲ್ಲಿ ಎಲ್ಲಾ ರೀತಿಯ ವೇಜಿಂಗ್ ಅಥವಾ ಬೆಟ್ಟಿಂಗ್‌ಗಳನ್ನು ಒಳಗೊಂಡಿರುವ ಆಟಗಳು ಸೇರಿವೆ. ಟೋಕನ್‌ಗಳ ರೂಪದಲ್ಲಿ ಅಥವಾ ಇಲೆಕ್ಟ್ರಾನಿಕ್ ವಿಧಾನಗಳು ಮತ್ತು ವರ್ಚುವಲ್ ಕರೆನ್ಸಿ ರೂಪದ ಎಲ್ಲಾ ಗೇಮ್‌ಗಳು ಕೂಡ ಬ್ಯಾನ್‌ ಆಗಲಿವೆ. ಆದರೆ ಇದು ರಾಜ್ಯದ ಒಳಗೆ ಅಥವಾ ಹೊರಗಿನ ಯಾವುದೇ ರೇಸ್ ಕೋರ್ಸ್‌ನಲ್ಲಿ ನಡೆಯುವ ಲಾಟರಿಗಳು ಅಥವಾ ಬೆಟ್ಟಿಂಗ್ ಅಥವಾ ಕುದುರೆ ರೇಸ್‌ಗಳಿಗೆ ಬೆಟ್ಟಿಂಗ್ ಒಳಗೊಂಡಿಲ್ಲ ಅನ್ನೊದನ್ನ ಸರ್ಕಾರ ಸ್ಪಷ್ಟಪಡಿಸಿದೆ.

ಆನ್‌ಲೈನ್‌ ಜೂಜಾಟ ಬ್ಯಾನ್‌ ನಿರ್ಧಾರ ಮಾಡಿರುವ ರಾಜ್ಯಗಳಲ್ಲಿ ಕರ್ನಾಟಕವೇ ಮೊದಲೇನಲ್ಲ. ಈಗಾಗಲೇ ಕಳೆದ ವರ್ಷ ನವೆಂಬರ್‌ನಲ್ಲಿ ತಮಿಳುನಾಡು ಸರ್ಕಾರ ಆನ್‌ಲೈನ್ ಜೂಜಾಟವನ್ನು ನಿಷೇಧಿಸುವ ಸುಗ್ರೀವಾಜ್ಞೆಯನ್ನು ಪ್ರಕಟಿಸಿತ್ತು. ಅಲ್ಲದೆ ಈ ವರ್ಷದ ಆರಂಭದಲ್ಲಿಯೇ ಕೇರಳ ರಾಜ್ಯ ಕೂಡ ಆನ್‌ಲೈನ್ ರಮ್ಮಿ ಆಟಗಳ ಮೇಲೆ ಬ್ಯಾನ್‌ ಆದೇಶ ಹೇರಿದೆ.