Microsoft outage: ಮತ್ತೆ ಕೈಕೊಟ್ಟ ಮೈಕ್ರೋಸಾಫ್ಟ್.. ಎರಡು ವಾರದಲ್ಲಿ 2ನೇ ಬಾರಿಗೆ ಪ್ರಾಬ್ಲಂ! ಏನಾಗುತ್ತಿದೆ?

ಮತ್ತೆ ಕೈಕೊಟ್ಟ ಮೈಕ್ರೋಸಾಫ್ಟ್..! ಎರಡು ವಾರದಲ್ಲಿ ಎರಡನೇ ಬಾರಿಗೆ ಪ್ರಾಬ್ಲಂ! ಹೌದು, ಪ್ರಸಿದ್ಧ ಟೆಕ್ ದೈತ್ಯ ಮೈಕ್ರೋಸಾಫ್ಟ್‌ನಲ್ಲಿ (Microsoft) ಮತ್ತೊಮ್ಮೆ ತಾಂತ್ರಿಕ ದೋಷಗಳು ಉದ್ಭವಿಸಿದೆ. ಮೈಕ್ರೋಸಾಫ್ಟ್ 365 ಸೇವೆಯಲ್ಲಿ ಸಮಸ್ಯೆಗಳನ್ನು ಎದುರಿಸುತ್ತಿರುವುದನ್ನು ಸಾಕಷ್ಟು ಜನರು ಸಾಮಾಜಿಕ ಜಾಲತಾಣದ ಮೂಲಕ ಬಹಿರಂಗಪಡಿಸಿದ್ದಾರೆ. ಜುಲೈ 30ರ ಸಂಜೆ ವೇಳೆಗೆ ದಿಢೀರನೆ ಈ ಸಮಸ್ಯೆ ಕಾಣಿಸಿಕೊಂಡಿದೆ. ಈ ಸಮಸ್ಯೆಯನ್ನು ಪರಿಹರಿಸಲು ನಾವು ಶ್ರಮಿಸುತ್ತಿದ್ದೇವೆ ಎಂದು ಮೈಕ್ರೋಸಾಫ್ಟ್‌ ತನ್ನ ಸಾಮಾಜಿಕ ಜಾಲತಾಣ ಖಾತೆಯ ಮೂಲಕ ತಿಳಿಸಿದೆ. ಅಂದಹಾಗೆ, ಜುಲೈ 19ರಂದು ಈ ಸಮಸ್ಯೆ ಉದ್ಭವಿಸಿತ್ತು. ಪರಿಣಾಮ ಜಾಗತಿಕವಾಗಿ ಹಲವು ಕ್ಷೇತ್ರಗಳು ಸಂಕಷ್ಟಕ್ಕೆ ಸಿಲುಕಿದ್ದವು.

ಹೌದು, ಮೈಕ್ರೋಸಾಫ್ಟ್​ ಸರ್ವರ್​ಗಳಲ್ಲಿ ಉದ್ಭವಿಸಿದ ಸಮಸ್ಯೆಯಿಂದಾಗಿ ಜಾಗತಿಕವಾಗಿ ತಾಂತ್ರಿಕ ಬಿಕ್ಕಟ್ಟು ತಲೆದೋರಿತ್ತು. ವಿಶೇಷವಾಗಿ ವಿಮಾನ ಸೇವೆ ಸ್ಥಗಿತ ತ್ತು ವಿಳಂಬವಾಗಿತ್ತು. ಆದರೆ, ಈ ಸಮಸ್ಯೆಯನ್ನು ಪರಿಹರಿಸಿದ ಕೆಲವು ದಿನಗಳ ನಂತರ, ಮೈಕ್ರೋಸಾಫ್ಟ್ ಪ್ರಮುಖ ಘೋಷಣೆ ಮಾಡಿದೆ. ಮುಂದೆಯೂ ಇದೇ ರೀತಿಯ ತಾಂತ್ರಿಕ ಸಮಸ್ಯೆ ಎದುರಾಗಬಹುದು ಎಂದು ಎಚ್ಚರಿಕೆ ನೀಡಿದೆ. ಯುರೋಪಿಯನ್ ಕಮಿಷನ್ ಮಾಡಿರುವ ಕೆಲವು ನಿಯಮಗಳು ಇದಕ್ಕೆ ಕಾರಣ ಎಂದು ಆರೋಪಿಸಲಾಗಿದೆ.

ಈ ಹಿನ್ನೆಲೆಯಲ್ಲಿ ಮೈಕ್ರೋಸಾಫ್ಟ್ ಸೇವೆಗಳು ಮತ್ತೊಮ್ಮೆ ಅಸ್ತವ್ಯಸ್ತಗೊಂಡಿವೆ. Azure Support ಈ ಸಮಸ್ಯೆಗೆ X ವೇದಿಕೆಯಾಗಿ ಪ್ರತಿಕ್ರಿಯಿಸಿದೆ. ನಿಮ್ಮ ಸಹನೆಗೆ ಧನ್ಯವಾದಗಳು. ಕಂಪನಿಯು ಸಮಸ್ಯೆಯನ್ನು ಪರಿಹರಿಸಲು ಪ್ರಯತ್ನಿಸುತ್ತಿದೆ.ಮತ್ತು ಸಾಧ್ಯವಾದಷ್ಟು ಬೇಗ ದೋಷಗಳನ್ನು ಸರಿಪಡಿಸುತ್ತಾರೆ ಎಂದು ಸಾಮಾಜಿಕ ಜಾಲತಾಣ ಖಾತೆಯಲ್ಲಿ ಪೋಸ್ಟ್ ಮಾಡಿದೆ.

ಅನೇಕ ಬಳಕೆದಾರರಿಂದ ಸಾಲು ಸಾಲು ದೂರು!

ಮೈಕ್ರೋಸಾಫ್ಟ್ ಈ ದೋಷದ ಬಗ್ಗೆ ಮೇಲ್ವಿಚಾರಣೆ ಮಾಡುತ್ತಿದೆ. ಈ ಮೂಲಕ ಬಳಕೆದಾರರ ಸಮಸ್ಯೆಗಳನ್ನು ಪರಿಹರಿಸುವ ಕೆಲಸ ಮಾಡುತ್ತಿದೆ. 365 ಸ್ಟೇಟಸ್ ಅಕೌಂಟ್ ಅವರು ಸಮಸ್ಯೆಯ ಬಗ್ಗೆ ತಿಳಿದಿದ್ದಾರೆ ಮತ್ತು ಅದನ್ನು ಪರಿಹರಿಸಲು ಕೆಲಸ ಮಾಡುತ್ತಿದ್ದಾರೆ ಎಂದು ಹೇಳಿದ್ದಾರೆ. ಡೌನ್‌ಡೆಕ್ಟರ್‌ನಲ್ಲಿ ಔಟ್‌ಲುಕ್ ಸೇರಿದಂತೆ ಇತರ ಅಪ್ಲಿಕೇಶನ್‌ಗಳಿಗೆ ಸಂಬಂಧಿಸಿದ ಸಮಸ್ಯೆಗಳ ಬಗ್ಗೆ ಹಲವಾರು ಬಳಕೆದಾರರು ದೂರು ನೀಡುತ್ತಿರುವ ಹಿನ್ನೆಲೆಯಲ್ಲಿ ಕಂಪನಿಯು ಈ ಸ್ಥಗಿತವನ್ನು ಗುರುತಿಸಿದೆ.

'ಬ್ಲೂ ಸ್ಕ್ರೀನ್ ಆಫ್ ಎರರ್‌'ನಿಂದ ಲಕ್ಷಾಂತರ ಜನರಿಗೆ ತೊಂದರೆ

ಈ ತಿಂಗಳ 19 ರಂದು (ಜುಲೈ 19, 2024) ಮೈಕ್ರೋಸಾಫ್ಟ್‌ನಲ್ಲಿ ಸಂಭವಿಸಿದ ದೋಷದಿಂದಾಗಿ, ಪ್ರಪಂಚದಾದ್ಯಂತ ವಿಂಡೋಸ್ ಬಳಕೆದಾರರು ತೊಂದರೆಗಳನ್ನು ಎದುರಿಸಿದರು. ಪರಿಣಾಮವಾಗಿ ಕಂಪ್ಯೂಟರ್‌ಗಳು ಇದ್ದಕ್ಕಿದ್ದಂತೆ ಸ್ಥಗಿತಗೊಂಡವು. ಈ ಸಮಸ್ಯೆಯನ್ನು ಬ್ಲೂ ಸ್ಕ್ರೀನ್ ಆಫ್ ಎರರ್ (BSOD) ಎಂದು ಕರೆಯಲಾಗುತ್ತದೆ. ಕ್ರೌಡ್‌ಸ್ಟ್ರೈಕ್‌ನಲ್ಲಿನ ನವೀಕರಣದಿಂದಾಗಿ ಈ ಪರಿಸ್ಥಿತಿಯು ಉದ್ಭವಿಸಿದೆ. ಇದರಿಂದ ಲಕ್ಷಾಂತರ ಜನರು ತೊಂದರೆ ಅನುಭವಿಸಿದರು. ಆದರೆ, ಅದೇ ದಿನ ಮೈಕ್ರೋಸಾಫ್ಟ್ ಈ ಸಮಸ್ಯೆಯನ್ನು ಪರಿಹರಿಸಿದೆ.

ಯಾವುದೇ ಭದ್ರತೆ ಮತ್ತು ಸೈಬರ್ ದಾಳಿಯಾಗಿಲ್ಲ

ಮೈಕ್ರೋಸಾಫ್ಟ್‌ನಲ್ಲಿನ ಇತ್ತೀಚಿನ ಸಮಸ್ಯೆಯಿಂದಾಗಿ ಅನೇಕ ಸಂಸ್ಥೆಗಳು ತಮ್ಮ ಕಾರ್ಯಾಚರಣೆಯನ್ನು ಸುಮಾರು ಒಂದು ದಿನದವರೆಗೆ ನಿರ್ವಹಿಸಲು ಸಾಧ್ಯವಾಗಲಿಲ್ಲ. ಈ ಸಂದರ್ಭದಲ್ಲಿ ಹಲವು ವಿಮಾನಗಳು ವಿಳಂಬವಾಗಿವೆ. ಮೈಕ್ರೋಸಾಫ್ಟ್ ವಿಂಡೋಸ್‌ನಲ್ಲಿ ಉಂಟಾಗಿರುವ ತಾಂತ್ರಿಕ ಸಮಸ್ಯೆಯ ಬಗ್ಗೆ ಹಲವು ಸೈಬರ್ ತಜ್ಞರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಈ ಬಗ್ಗೆ ಕ್ರೌಡ್ ಸ್ಟ್ರೈಕ್ ಸಂಘಟನೆ ವಿವರಣೆ ನೀಡಿದೆ. ವಿಂಡೋಸ್‌ನಲ್ಲಿ ಕೇವಲ ತಾಂತ್ರಿಕ ಅಡಚಣೆ ಉಂಟಾಗಿದೆ. ಯಾವುದೇ ಭದ್ರತೆ ಮತ್ತು ಸೈಬರ್ ದಾಳಿಯಾಗಿಲ್ಲ ಎಂದು ಸ್ಪಷ್ಟಪಡಿಸಿದೆ.

ಎರಡು ವಾರಗಳಲ್ಲಿ ಎರಡನೇ ಬಾರಿಗೆ ತಾಂತ್ರಿಕ ಸಮಸ್ಯೆ

ಮೈಕ್ರೋಸಾಫ್ಟ್ ಕಳೆದ ವಾರ ಮತ್ತೊಂದು ಪ್ರಮುಖ ಘೋಷಣೆ ಮಾಡಿದೆ. ಭವಿಷ್ಯದಲ್ಲಿ ಮತ್ತೊಂದು ಕ್ರೌಡ್‌ಸ್ಟ್ರೈಕ್ ರೀತಿಯ ಅಡ್ಡಿಯಾಗುವ ಸಾಧ್ಯತೆಯಿದೆ. ಮತ್ತು ಆ ಪರಿಸ್ಥಿತಿ ಸಂಭವಿಸುವುದನ್ನು ತಡೆಯಲು ಯಾವುದೇ ಮಾರ್ಗವಿಲ್ಲ ಎಂದು ಮೈಕ್ರೋಸಾಫ್ಟ್ ಹೇಳಿದೆ. ಮೂರನೇ ವ್ಯಕ್ತಿಯ ಮಾರಾಟಗಾರರು OS ಕರ್ನಲ್ ಆವೃತ್ತಿಗೆ ಸಂಪೂರ್ಣ ಪ್ರವೇಶವನ್ನು ಹೊಂದಲು ಯುರೋಪಿಯನ್ ಕಮಿಷನ್ ಹೊಸ ನಿಯಮವನ್ನು ತಂದಿದೆ.

ಅಂದರೆ, ಕ್ರೌಡ್‌ಸ್ಟ್ರೈಕ್‌ನಂತಹ ಥರ್ಡ್ ಪಾರ್ಟಿ ಕಂಪನಿಗಳ ಇಂಜಿನಿಯರ್‌ಗಳು ಮೈಕ್ರೋಸಾಫ್ಟ್ ಇಂಜಿನಿಯರ್‌ಗಳಂತೆಯೇ ಅದೇ ಮಟ್ಟಕ್ಕೆ ಪೂರ್ಣ ಪ್ರವೇಶವನ್ನು ಹೊಂದಿರುತ್ತಾರೆ. ಮುಂದೆಯೂ ತಾಂತ್ರಿಕ ಸಮಸ್ಯೆಗಳು ಎದುರಾಗುವ ಸಾಧ್ಯತೆ ಇದೆ ಎಂದು ಆತಂಕ ವ್ಯಕ್ತಪಡಿಸಿದೆ. ಈ ಮಧ್ಯೆ, ಎರಡು ವಾರಗಳಲ್ಲಿ ಎರಡನೇ ಬಾರಿಗೆ ತಾಂತ್ರಿಕ ಸಮಸ್ಯೆ ಉದ್ಭವಿಸಿದೆ.