ನಿಂಟೆಂಡೊ ಸ್ವಿಚ್ 2: ಕೇವಲ ನಾಲ್ಕು ದಿನಗಳಲ್ಲಿ ದಾಖಲೆ ಮಾರಾಟ!

ಜಪಾನ್‌ನ ಪ್ರಮುಖ ಗೇಮಿಂಗ್ ಕಂಪನಿಯಾದ ನಿಂಟೆಂಡೊ ತನ್ನ ಬಹುನಿರೀಕ್ಷಿತ 'ಸ್ವಿಚ್ 2' ಗೇಮಿಂಗ್ ಕನ್ಸೋಲ್ ಮಾರಾಟದಲ್ಲಿ ದಾಖಲೆಯನ್ನು ನಿರ್ಮಿಸಿದೆ. ಈ ಹೊಸ ಕನ್ಸೋಲ್ ಮಾರುಕಟ್ಟೆಗೆ ಬಂದ ಮೊದಲ ನಾಲ್ಕು ದಿನಗಳಲ್ಲಿ 3.5 ಮಿಲಿಯನ್ ಯುನಿಟ್‌ಗಳನ್ನು ಮಾರಾಟ ಮಾಡುವ ಮೂಲಕ ಹೊಸ ದಾಖಲೆ ನಿರ್ಮಿಸಿದೆ. ಇದು ನಿಂಟೆಂಡೊದ ಇತಿಹಾಸದಲ್ಲೇ ಅತ್ಯಂತ ವೇಗವಾಗಿ ಮಾರಾಟವಾದ ಗೇಮಿಂಗ್ ಕನ್ಸೋಲ್ ಎನಿಸಿಕೊಂಡಿದೆ ಎಂದು ಕಂಪನಿ ಬುಧವಾರ ಖಚಿತಪಡಿಸಿದೆ.

ನಿಂಟೆಂಡೊ ಆಫ್ ಅಮೆರಿಕದ ಅಧ್ಯಕ್ಷ ಮತ್ತು ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿಯಾದ (COO) ಡೌಗ್ ಬೌಸರ್ ಅವರು, "ಪ್ರಪಂಚದಾದ್ಯಂತದ ಅಭಿಮಾನಿಗಳು ಮನೆಯಲ್ಲಿ ಮತ್ತು ಪ್ರಯಾಣದಲ್ಲಿರುವಾಗ ಆಡಲು ನವೀಕರಿಸಿದ ಮಾರ್ಗವಾಗಿ ನಿಂಟೆಂಡೊ ಸ್ವಿಚ್ 2 ಗಾಗಿ ತಮ್ಮ ಉತ್ಸಾಹವನ್ನು ತೋರಿಸುತ್ತಿದ್ದಾರೆ" ಎಂದು ಹೇಳಿದ್ದಾರೆ. ಜೊತೆಗೆ, ಜಾಗತಿಕ ಆಸಕ್ತಿಯನ್ನು ಪೂರೈಸಲು ಹೆಚ್ಚಿನ ಘಟಕಗಳು ಬರಲಿವೆ ಎಂದು ನಿಂಟೆಂಡೊ ಕಂಪೆನಿ ತಿಳಿಸಿದೆ.

ಜೂನ್ 5 ರಂದು ಮಾರುಕಟ್ಟೆಗೆ ಬಂದ ಎರಡನೇ ತಲೆಮಾರಿನ ಈ ಕನ್ಸೋಲ್, ದೊಡ್ಡ ಪರದೆ ಮತ್ತು ಸುಧಾರಿತ ಗ್ರಾಫಿಕ್ಸ್ ಸೇರಿದಂತೆ ಹಲವು ಪ್ರಮುಖ ವೈಶಿಷ್ಟ್ಯಗಳನ್ನು ಹೊಂದಿದೆ. ಇದರ ಹಿಂದಿನ ಆವೃತ್ತಿಯ ಅನೇಕ ವೈಶಿಷ್ಟ್ಯಗಳನ್ನು ಇದು ಉಳಿಸಿಕೊಂಡಿದೆ. 'ಮಾರಿಯೋ ಕಾರ್ಟ್ ವರ್ಲ್ಡ್' ನಂತಹ ಜನಪ್ರಿಯ ಗೇಮ್‌ಗಳೊಂದಿಗೆ ಈ ಕನ್ಸೋಲ್ ಬಂಡಲ್ ಆಗಿ ಲಭ್ಯವಿದೆ. ಹಾಗಾದರೆ, ಹೊಸ ನಿಂಟೆಂಡೊ ಸ್ವಿಚ್ 2 ಗೇಮಿಂಗ್ ಕನ್ಸೋಲ್ ಹೇಗಿದೆ ಎಂಬುದನ್ನು ಮುಂದೆ ಓದಿ ತಿಳಿಯೋಣ ಬನ್ನಿ.

ನಿಂಟೆಂಡೊ ಸ್ವಿಚ್ 2, 7.9 ಸಾಧನವು ಇಂಚಿನ 1080p LCD ಡಿಸ್‌ಪ್ಲೇಯನ್ನು ಹೊಂದಿದೆ. ಇದು 120Hz ವರೆಗಿನ ರಿಫ್ರೆಶ್ ರೇಟ್ ಅನ್ನು ಬೆಂಬಲಿಸುತ್ತದೆ. ಡಾಕ್ಡ್ ಮೋಡ್‌ನಲ್ಲಿ 4K ರೆಸಲ್ಯೂಶನ್ ಅನ್ನು ಬೆಂಬಲಿಸುವ ಸಾಮರ್ಥ್ಯವನ್ನು ಇದು ಹೊಂದಿದೆ. HDR ಮತ್ತು 120fps ಗೇಮ್‌ಪ್ಲೇ ಅನ್ನು ಸಹ ಇದು ಒದಗಿಸುತ್ತದೆ ಎಂದು ನಿಂಟೆಂಡೊ ತಿಳಿಸಿದೆ.ಸಂಗ್ರಹಣೆ ವಿಭಾಗದಲ್ಲಿ, 256GB ಆಂತರಿಕ ಸಂಗ್ರಹಣೆಯೊಂದಿಗೆ ಲಭ್ಯವಿದೆ. ಇದನ್ನು ಮೈಕ್ರೊ ಎಸ್‌ಡಿ ಎಕ್ಸ್‌ಪ್ರೆಸ್ ಕಾರ್ಡ್‌ಗಳ ಮೂಲಕ ವಿಸ್ತರಿಸಬಹುದು. ಕನ್ಸೋಲ್ ನಿಂಟೆಂಡೊ ಸ್ವಿಚ್ ಡಿಜಿಟಲ್ ಮತ್ತು ಭೌತಿಕ ಆಟಗಳೊಂದಿಗೆ ಹಿಮ್ಮುಖವಾಗಿ ಹೊಂದಿಕೊಳ್ಳುತ್ತದೆ.

ಹೊಸ ಸ್ವಿಚ್ 2 ಸಾಧನವು ಈಗ ಮರುವಿನ್ಯಾಸಗೊಳಿಸಲಾದ ಮ್ಯಾಗ್ನೆಟಿಕ್ ಜಾಯ್-ಕಾನ್‌ಗಳೊಂದಿಗೆ ಬಂದಿದ್ದು, ಇದನ್ನು ಮೌಸ್ ಆಗಿಯೂ ನಿರ್ವಹಿಸಬಹುದು ಎಂದು ಹೇಳಲಾಗಿದೆ. ಇದರ ದಪ್ಪ 13.9 ಮಿ.ಮೀ. ಇದ್ದು, ಹಿಂದಿನ ಆವೃತ್ತಿಯಂತೆಯೇ ಇದೆ. ಇದು ಪ್ರಬಲವಾದ ಮತ್ತು ಮರುವಿನ್ಯಾಸಗೊಳಿಸಲಾದ ಗೇಮಿಂಗ್ ಹಾರ್ಡ್‌ವೇರ್ ಅನ್ನು ಹೊಂದಿದೆ. ಹೊಸ ಕನ್ಸೋಲ್ ಡಿಸ್ಕಾರ್ಡ್-ಶೈಲಿಯ ಧ್ವನಿ ಮತ್ತು ವೀಡಿಯೊ ಚಾಟ್ ಅನ್ನು ಬೆಂಬಲಿಸುವ ಹೊಸ ಆಟದ ಸಂವಹನ ವ್ಯವಸ್ಥೆಗಳನ್ನು ಸಹ ನೀಡುತ್ತದೆ, ಇದು ಗೇಮಿಂಗ್, ಸ್ಕ್ರೀನ್ ಹಂಚಿಕೆ ಮತ್ತು ಗೇಮ್ ಹಂಚಿಕೆಗೆ ಉಪಯುಕ್ತವಾಗಿದೆ.

ಸುಧಾರಿತ CPU ಮತ್ತು GPU ಕಾರ್ಯಕ್ಷಮತೆಯ ಜೊತೆಗೆ, ಸ್ವಿಚ್ 2 3D ಆಡಿಯೊ ಬೆಂಬಲವನ್ನು ಹೊಂದಿದೆ. ಗೇಮ್‌ಚಾಟ್ ಮತ್ತು ವೀಡಿಯೊ ಚಾಟ್‌ಗಾಗಿ ಹೊಸ 'C' ಬಟನ್ ಅನ್ನು ಸಹ ಇದು ಒಳಗೊಂಡಿದೆ. ಹೆಚ್ಚು ವಿವರವಾದ ಗ್ರಾಫಿಕ್ಸ್ ಮತ್ತು ವೇಗವಾದ ಲೋಡಿಂಗ್ ಸಮಯವನ್ನು ಇದು ಬೆಂಬಲಿಸುತ್ತದೆ. ಗೇಮ್‌ಚಾಟ್ ವೈಶಿಷ್ಟ್ಯವು ಆಟಗಾರರಿಗೆ ಆನ್‌ಲೈನ್‌ನಲ್ಲಿ ಪರಸ್ಪರ ಮಾತನಾಡಲು ಅನುವು ಮಾಡಿಕೊಡುತ್ತದೆ. ವೀಡಿಯೊ ಚಾಟ್ ಸಕ್ರಿಯಗೊಳಿಸಲು, ನಿಂಟೆಂಡೊ ಪ್ರತ್ಯೇಕವಾಗಿ ಮಾರಾಟ ಮಾಡುವ ಸ್ವಿಚ್ 2 ಕ್ಯಾಮೆರಾವನ್ನು USB ಟೈಪ್-ಸಿ ಪೋರ್ಟ್ ಮೂಲಕ ಕನ್ಸೋಲ್‌ಗೆ ಸಂಪರ್ಕಿಸಬಹುದು.

ಬೆಲೆ ಮತ್ತು ಲಭ್ಯತೆ
ನಿಂಟೆಂಡೊ ಸ್ವಿಚ್ 2 ರ 256GB ಸಂಗ್ರಹಣೆಯ ಆವೃತ್ತಿಯು ಅಮೆರಿಕಾದಲ್ಲಿ $449.99 (ಸುಮಾರು ₹38,500) ಬೆಲೆಯನ್ನು ಹೊಂದಿದೆ. 'ಮಾರಿಯೋ ಕಾರ್ಟ್ ವರ್ಲ್ಡ್' ನೊಂದಿಗೆ ಬಂಡಲ್‌ನಲ್ಲಿ ಖರೀದಿಸಿದರೆ, ಇದರ ಬೆಲೆ $499.99 (ಸುಮಾರು ₹42,725) ಆಗಿರುತ್ತದೆ. ನಿಂಟೆಂಡೊ ಸ್ವಿಚ್ 2 ಭಾರತದಲ್ಲಿ ಅಧಿಕೃತವಾಗಿ ಬಿಡುಗಡೆಯಾಗುವುದಿಲ್ಲ. ಆದರೆ ಆನ್‌ಲೈನ್ ಮೂಲಕ ಖರೀದಿಸಲು ಲಭ್ಯವಿರಲಿದೆ. ಒಟ್ಟಿನಲ್ಲಿ ನಿಂಟೆಂಡೊ ಸ್ವಿಚ್ 2 ಗೇಮಿಂಗ್ ಜಗತ್ತಿನಲ್ಲಿ ಹೊಸ ಅಲೆ ಸೃಷ್ಟಿಸಿದ್ದು, ಈ ಬಗ್ಗೆ ನಿಮ್ಮ ಅಭಿಪ್ರಾಯ ಏನು ಎಂಬುದನ್ನು ಕಾಮೆಂಟ್ ಮಾಡಿ ತಿಳಿಸಿ.