ಭಾರತೀಯರಿಗಾಗಿ ಕೇವಲ ₹399ಕ್ಕೆ ChatGPT Go ಚಂದಾದಾರಿಕೆ!..ಇಲ್ಲಿದೆ ಫುಲ್ ಡೀಟೇಲ್ಸ್!

ಭಾರತೀಯ ಬಳಕೆದಾರರಿಗೆ ಕೈಗೆಟುಕುವ ದರದಲ್ಲಿ AI ತಂತ್ರಜ್ಞಾನವನ್ನು ಮತ್ತಷ್ಟು ಹತ್ತಿರ ತರುವ ಉದ್ದೇಶದಿಂದ, ಜನಪ್ರಿಯ ಕೃತಕ ಬುದ್ಧಿಮತ್ತೆ (AI) ಸಂಸ್ಥೆ ಓಪನ್‌ಎಐ (OpenAI) ಭಾರತದಲ್ಲಿ ChatGPT Go ಎಂಬ ಹೊಸ ಸಬ್‌ಸ್ಕ್ರಿಪ್ಷನ್ ಪ್ಲಾನ್ ಅನ್ನು ಪರಿಚಯಿಸಿದೆ. ಮಾಸಿಕ ₹399 ಬೆಲೆಯನ್ನು ಹೊಂದಿರುವ ಈ ಯೋಜನೆಯ ಮೂಲಕ ಭಾರತೀಯ ಬಳಕೆದಾರರಿಗೆ ಪ್ರೀಮಿಯಂ AI ವೈಶಿಷ್ಟ್ಯಗಳನ್ನು ಸುಲಭವಾಗಿ ಒದಗಿಸುವ ಗುರಿ ಹೊಂದಿರುವುದಾಗಿ OpenAI ಕಂಪೆನಿ ತಿಳಿಸಿದೆ. ಹಾಗಾದರೆ, ಏನಿದು ಹೊಸ ChatGPT Go?, ಈ ಹೊಸ ವೈಶಿಷ್ಟ್ಯದ ವಿಶೇಷತೆಗಳು ಯಾವುವು ಎಂಬುದನ್ನು ನೋಡೋಣ ಬನ್ನಿ.

ChatGPT Go: ಏನೆಲ್ಲಾ ವಿಶೇಷತೆಗಳು
ಹೊಸ ChatGPT Go ಪ್ಲಾನ್ ಉಚಿತ ಆವೃತ್ತಿಗೆ ಹೋಲಿಸಿದರೆ ಹಲವು ಸುಧಾರಿತ ವೈಶಿಷ್ಟ್ಯಗಳನ್ನು ನೀಡುತ್ತದೆ. ಬಳಕೆದಾರರು ಉಚಿತ ಯೋಜನೆಯ ದರ ಮಿತಿಗಿಂತ 10 ಪಟ್ಟು ಹೆಚ್ಚು ಸಂದೇಶಗಳನ್ನು ಕಳುಹಿಸಬಹುದು, ಹೆಚ್ಚಿನ ಸಂಖ್ಯೆಯಲ್ಲಿ ಇಮೇಜ್‌ಗಳನ್ನು ರಚಿಸಬಹುದು, ಮತ್ತು ಫೈಲ್‌ಗಳನ್ನು ಅಪ್‌ಲೋಡ್ ಮಾಡಬಹುದು. ಈ ಹೊಸ ಯೋಜನೆ, ಇತ್ತೀಚೆಗೆ ಬಿಡುಗಡೆಯಾದ GPT-5 ಮಾದರಿಯನ್ನು ಆಧರಿಸಿದೆ ಮತ್ತು ಇದು ಸುಧಾರಿತ ಭಾರತೀಯ ಭಾಷಾ ಬೆಂಬಲವನ್ನು ಹೊಂದಿದೆ. ಇದರಿಂದ, ಸ್ಥಳೀಯ ಭಾಷೆಗಳಲ್ಲಿ ಹೆಚ್ಚು ನಿಖರವಾದ ಸಂವಹನ ಸಾಧ್ಯವಾಗಲಿದೆ.

ಇದರೊಂದಿಗೆ, ಇದು ದೊಡ್ಡದಾದ ಸಂಭಾಷಣೆಯ ಮೆಮೊರಿ ಹೊಂದಿದ್ದು, ಬಳಕೆದಾರರೊಂದಿಗೆ ಹೆಚ್ಚು ವೈಯಕ್ತಿಕಗೊಳಿಸಿದ ಸಂವಾದಗಳನ್ನು ನಿರ್ವಹಿಸುತ್ತದೆ. ಪೈಥಾನ್ ಮತ್ತು ಇತರ ಡಾಟಾ ವಿಶ್ಲೇಷಣಾ ಪರಿಕರಗಳಿಗೆ ಹೆಚ್ಚಿನ ಮಿತಿಗಳನ್ನೂ ಸಹ ಇದು ನೀಡುತ್ತದೆ. ಬಳಕೆದಾರರು ತಮ್ಮ ಕೆಲಸಗಳನ್ನು ಸುಲಭವಾಗಿ ನಿರ್ವಹಿಸಲು ಪ್ರೊಜೆಕ್ಟ್‌ಗಳು, ಟಾಸ್ಕ್‌ಗಳು, ಮತ್ತು ಕಸ್ಟಮ್ GPTಗಳನ್ನು ರಚಿಸಲು ಸಹ ಇದು ಅವಕಾಶ ಕಲ್ಪಿಸುತ್ತದೆ.

ಓಪನ್‌ಎಐನ ಹೊಸ ಹೆಜ್ಜೆ: ಭಾರತದ ಮಾರುಕಟ್ಟೆಗೆ ಒತ್ತು
ಭಾರತವು ಓಪನ್‌ಎಐಗೆ ಪ್ರಮುಖ ಮಾರುಕಟ್ಟೆಯಾಗಿದೆ. ಇಲ್ಲಿ ಲಕ್ಷಾಂತರ ವಿದ್ಯಾರ್ಥಿಗಳು, ವೃತ್ತಿಪರರು ಮತ್ತು ಉದ್ಯಮಿಗಳು ತಮ್ಮ ದೈನಂದಿನ ಕೆಲಸ, ಕಲಿಕೆ ಮತ್ತು ಸೃಜನಶೀಲ ಕಾರ್ಯಗಳಿಗಾಗಿ ChatGPTಯನ್ನು ಬಳಸುತ್ತಿದ್ದಾರೆ. ಈ ಬೃಹತ್ ಬೇಡಿಕೆಯನ್ನು ಗಮನದಲ್ಲಿಟ್ಟುಕೊಂಡು, ಓಪನ್‌ಎಐ ತನ್ನ ಎಲ್ಲಾ ಸಬ್‌ಸ್ಕ್ರಿಪ್ಷನ್‌ಗಳಿಗೆ UPI (ಯೂನಿಫೈಡ್ ಪೇಮೆಂಟ್ಸ್ ಇಂಟರ್‌ಫೇಸ್) ಪಾವತಿ ವಿಧಾನವನ್ನು ಸೇರಿಸಿದೆ. ಇದು ಭಾರತದ ಬಳಕೆದಾರರಿಗೆ ಪಾವತಿ ಪ್ರಕ್ರಿಯೆಯನ್ನು ಇನ್ನಷ್ಟು ಸುಲಭಗೊಳಿಸಿದೆ. ಓಪನ್‌ಎಐನ ಸಿಇಒ ಸ್ಯಾಮ್ ಆಲ್ಟ್‌ಮನ್ ಅವರು ಭಾರತವು ಶೀಘ್ರದಲ್ಲೇ ಜಾಗತಿಕವಾಗಿ ಅತಿದೊಡ್ಡ ಮಾರುಕಟ್ಟೆಯಾಗಿ ಹೊರಹೊಮ್ಮಬಹುದು ಎಂದು ಹೇಳಿದ್ದಾರೆ. ChatGPT Goದ ಪ್ರಮುಖ ಉದ್ದೇಶವೇ, ಕಡಿಮೆ ಬೆಲೆಯಲ್ಲಿ ಸುಧಾರಿತ ವೈಶಿಷ್ಟ್ಯಗಳನ್ನು ನೀಡುವುದು ಎಂದು ಓಪನ್‌ಎಐ ತಿಳಿಸಿದೆ.

ಇತರ ಯೋಜನೆಗಳ ಜೊತೆಗೆ ChatGPT Go
ChatGPT Go, ಈಗ ಇರುವ ಇತರ ಎರಡು ಪ್ರೀಮಿಯಂ ಯೋಜನೆಗಳಾದ ChatGPT Plus ಮತ್ತು ChatGPT Pro ಜೊತೆ ಸೇರಿಕೊಳ್ಳುತ್ತದೆ. ChatGPT Plus (ಮಾಸಿಕ ₹1,999) ಪ್ರವೇಶವು ವೇಗದ ಕಾರ್ಯಕ್ಷಮತೆ ಮತ್ತು ಹೆಚ್ಚಿನ ಬಳಕೆಯ ಮಿತಿಗಳನ್ನು ನೀಡುತ್ತದೆ. ಆದರೆ, ChatGPT Pro (ಮಾಸಿಕ ₹19,900) ವೃತ್ತಿಪರರು ಮತ್ತು ಉದ್ಯಮಗಳಿಗಾಗಿ ವಿನ್ಯಾಸಗೊಳಿಸಲ್ಪಟ್ಟಿದ್ದು, ಇದು ಅತ್ಯಾಧುನಿಕ ಮಾದರಿಗಳಿಗೆ ಮತ್ತು ಗ್ರಾಹಕೀಕರಣಕ್ಕೆ ಪ್ರವೇಶವನ್ನು ಒದಗಿಸುತ್ತದೆ.

ಇಲ್ಲಿ ಗಮನಿಸಬೇಕರುವ ಒಂದು ಪ್ರಮುಖ ಅಂಶವೆಂದರೆ, ಈ ChatGPT Go ಪ್ಲಾನ್‌ನಲ್ಲಿ ಓಪನ್‌ಎಐನ ವೀಡಿಯೋ-ಜನರೇಷನ್ ಮಾದರಿಯಾದ Sora ಅಥವಾ ಕೋಡ್‌ಬೇಸ್‌ಗಳ ಪ್ರಶ್ನೆಗಳಿಗೆ ಉತ್ತರಿಸುವ Codex ಏಜೆಂಟ್‌ನಂತಹ ಕೆಲವು ಸುಧಾರಿತ ವೈಶಿಷ್ಟ್ಯಗಳು ಲಭ್ಯವಿಲ್ಲ. ಈ ವೈಶಿಷ್ಟ್ಯಗಳು ChatGPT Plus ನಂತಹ ಉನ್ನತ ಹಂತದ ಚಂದಾದಾರಿಕೆಗಳಲ್ಲಿ ಮಾತ್ರ ಲಭ್ಯವಿವೆ.

ChatGPT Go ಗೆ ಸಬ್‌ಸ್ಕ್ರೈಬ್ ಮಾಡುವುದು ಹೇಗೆ?

1. ChatGPT Go ಪ್ಲಾನ್‌ಗೆ ಸಬ್‌ಸ್ಕ್ರೈಬ್ ಮಾಡುವುದು ಬಹಳ ಸುಲಭ. ನೀವು ಮಾಡಬೇಕಾದದ್ದು ಇಷ್ಟೇ:
2. ವೆಬ್‌ಸೈಟ್ ಅಥವಾ ಮೊಬೈಲ್ ಅಪ್ಲಿಕೇಶನ್‌ನಲ್ಲಿ ನಿಮ್ಮ ChatGPT ಖಾತೆಗೆ ಲಾಗಿನ್ ಮಾಡಿ.
3. ಡಿಸ್‌ಪ್ಲೇ ಕೆಳಭಾಗದಲ್ಲಿರುವ ನಿಮ್ಮ ಪ್ರೊಫೈಲ್ ಐಕಾನ್ ಅನ್ನು ಕ್ಲಿಕ್ ಮಾಡಿ.
4. ನಂತರ, 'ಅಪ್‌ಗ್ರೇಡ್ ಪ್ಲಾನ್' ಆಯ್ಕೆ ಮಾಡಿ.
5. ಅಲ್ಲಿ ಕಾಣುವ 'Try Go' ಆಯ್ಕೆ ಆರಿಸಿ ಮತ್ತು ಕ್ರೆಡಿಟ್ ಕಾರ್ಡ್ ಅಥವಾ UPI ಮೂಲಕ ಪಾವತಿ ಮಾಡಿ.

ಸದ್ಯಕ್ಕೆ ಈ ಯೋಜನೆಯನ್ನು ಭಾರತದಲ್ಲಿ ಮಾತ್ರ ಪರಿಚಯಿಸಲಾಗಿದೆ ಮತ್ತು ಬಳಕೆದಾರರ ಪ್ರತಿಕ್ರಿಯೆಯನ್ನು ಅವಲಂಬಿಸಿ ಇತರ ದೇಶಗಳಿಗೂ ವಿಸ್ತರಿಸಲಾಗುವುದು ಎಂದು ಓಪನ್‌ಎಐ ಹೇಳಿದೆ.