ಭಾರತದಲ್ಲಿ ಹೊಸ ಫೋನ್ ಬಿಡುಗಡೆಗೆ OPPO ಸಜ್ಜು: ಯಾವುದು ಗೊತ್ತಾ?

ಜನಪ್ರಿಯ ಮೊಬೈಲ್ ಬ್ರ್ಯಾಂಡ್ OPPO ಭಾರತದಲ್ಲಿ ತನ್ನ ಹೊಸ ಸ್ಮಾರ್ಟ್‌ಫೋನ್ ಬಿಡುಗಡೆ ಮಾಡಲು ಸಿದ್ಧತೆ ನಡೆಸುತ್ತಿರುವುದಾಗಿ ಅಧಿಕೃತವಾಗಿ ಘೋಷಿಸಿದೆ. ಆದರೆ, ಬಿಡುಗಡೆಯಾಗಲಿರುವ ಹೊಸ OPPO ಸಾಧನದ ಹೆಸರು, ಬಿಡುಗಡೆಯ ನಿಖರವಾದ ಸಮಯ ಯಾವುದನ್ನು ಘೋಷಿಸಿಲ್ಲ. OPPO ಇನ್ನೂ ಈ ಮಾಹಿತಿಯನ್ನು ಗೌಪ್ಯವಾಗಿಟ್ಟಿದ್ದರೂ ಸಹ, ಇದು ಬಹುನಿರೀಕ್ಷಿತ Reno14 ಸರಣಿಯಾಗಿರಬಹುದು ಎಂದು ಉದ್ಯಮದ ವರದಿಗಳು ಸೂಚಿಸುತ್ತಿವೆ. ಹಾಗಾದರೆ, OPPO ಕಂಪೆನಿಯ ಮುಂಬರುವ ಸ್ಮಾರ್ಟ್‌ಫೋನ್ ಕುರಿತಂತೆ ನಾವು ಏನನ್ನು ನಿರೀಕ್ಷಿಸಬಹುದು ಎಂಬುದನ್ನು ನೋಡೋಣ ಬನ್ನಿ.

OPPO ಭಾರತೀಯ ಮಾರುಕಟ್ಟೆಗೆ ತನ್ನ ಹೊಸ ಸ್ಮಾರ್ಟ್‌ಫೋನ್ ಆಗಮನದ ಬಗ್ಗೆ ಸುಳಿವು ನೀಡುವ ಟೀಸರ್ ಪ್ರಕಟಿಸಿದೆ. ಈ ಟೀಸರ್‌ನಲ್ಲಿ ಕಂಪನಿಯು ತನ್ನ ಮುಂಬರುವ ಸಾಧನದ ಬಗ್ಗೆ ಯಾವುದೇ ನಿರ್ದಿಷ್ಟ ವಿವರಗಳನ್ನು ಬಹಿರಂಗಪಡಿಸದಿದ್ದರೂ, "ಈ OPPO ಫೋನ್ ದಿಟ್ಟ ಪುನರಾಗಮನಕ್ಕೆ ಸಜ್ಜಾಗುತ್ತಿದೆ" ಮತ್ತು "ಇನ್ನೂ ಕಠಿಣ, ತೀಕ್ಷ್ಣ ಮತ್ತು ಬಾರ್ ಅನ್ನು ಹೆಚ್ಚಿಸಲು ನಿರ್ಮಿಸಲಾಗಿದೆ" ಎಂದು ಬಣ್ಣಿಸಿದೆ. ಟೀಸರ್ ಚಿತ್ರದಲ್ಲಿ, ಕವರ್ ಅಡಿಯಲ್ಲಿ ಮರೆಮಾಚಿರುವ ಫೋನ್‌ನ ಚಿತ್ರವನ್ನು ನೀಡಲಾಗಿದ್ದು, ಇದು ಗ್ರಾಹಕರಲ್ಲಿ ಕುತೂಹಲ ಕೆರಳಿಸಿದೆ. ಮೊಬೈಲ್ ಉದ್ಯಮವು ಇದನ್ನು Reno14 ಸರಣಿ ಎಂದುಕೊಂಡಿದೆ.

OPPO ನ ಮುಂಬರುವ ಸ್ಮಾರ್ಟ್‌ಫೋನ್: ಏನನ್ನು ನಿರೀಕ್ಷಿಸಬಹುದು?
ಸದ್ಯಕ್ಕೆ ಸಾಧನದ ಹೆಸರು ಇನ್ನೂ ತಿಳಿದಿಲ್ಲವಾದರೂ, ಇದು ಮುಂದಿನ ತಿಂಗಳು ಭಾರತದಲ್ಲಿ ಬಿಡುಗಡೆಯಾಗಲಿದೆ ಎಂದು ವದಂತಿಗಳಿರುವ Reno14 ಸರಣಿಯ ಭಾಗವಾಗಿರಬಹುದು ಎಂದು ಹೆಚ್ಚು ನಿರೀಕ್ಷಿಸಲಾಗಿದೆ. Reno14 ಸರಣಿಯಲ್ಲಿ Reno14 ಮತ್ತು Reno14 Pro ಮಾದರಿಗಳು ಮೇ ತಿಂಗಳಲ್ಲಿ ಚೀನಾದಲ್ಲಿ ಈಗಾಗಲೇ ಬಿಡುಗಡೆಯಾಗಿವೆ. Reno14 ಸರಣಿಯು ತನ್ನ ಟ್ರಿಪಲ್ ಕ್ಯಾಮೆರಾ ಸೆಟಪ್‌ನೊಂದಿಗೆ ಗಮನ ಸೆಳೆಯುವ ಸಾಧ್ಯತೆಯಿದೆ. ಈ ಫೋನ್ ಮೂರು 50 ಮೆಗಾಪಿಕ್ಸೆಲ್ ಕ್ಯಾಮೆರಾಗಳನ್ನು ಹೊಂದಿರಬಹುದು. ಹಾಗೂ Android 15 ಆಧಾರಿತ ColorOS ನಲ್ಲಿ ಕಾರ್ಯನಿರ್ವಹಿಸಬಹುದು.

ಚೀನಾದಲ್ಲಿ ಲಭ್ಯವಿರುವ Reno14 ಮಾದರಿಯು ಡೈಮೆನ್ಸಿಟಿ 8350 ಪ್ರೊಸೆಸರ್ ಅನ್ನು ಒಳಗೊಂಡಿದೆ. ಇದರ ಪ್ರೊ ಮಾದರಿಯಾದ Reno14 Pro ಸಾಧನವು ಡೈಮೆನ್ಸಿಟಿ 8450 ಪ್ರೊಸೆಸರ್ ನಿಂದ ಚಾಲಿತವಾಗಿದೆ. ಈ ಎರಡೂ ಸ್ಮಾರ್ಟ್‌ಫೋನ್‌ಗಳು ಪ್ರಮುಖ ಕ್ಯಾಮೆರಾ ಆಗಿ ಸೋನಿ IMX882 ಸಂವೇದಕವನ್ನು ಹೊಂದಿರಬಹುದು. ಉತ್ತಮ ಜೂಮ್ ಸಾಮರ್ಥ್ಯಗಳಿಗಾಗಿ ISOCELL JN5 ಹೊಂದಿರುವ 3x ಪೆರಿಸ್ಕೋಪ್ ಟೆಲಿಫೋಟೋ ಲೆನ್ಸ್ ಮತ್ತು ಸ್ಯಾಮ್‌ಸಂಗ್ ISOCELL ಸಂವೇದಕವನ್ನು ಹೊಂದಿರಬಹುದು. ಜೊತೆಗೆ ನೆಟ್‌ವರ್ಕ್ ಗುಣಮಟ್ಟವನ್ನು ಸುಧಾರಿಸಲು X1 ಚಿಪ್ ಅನ್ನು ಒಳಗೊಂಡಿರುವ ಸಾಧ್ಯತೆ ಇದೆ.

ಮೊನ್ನೆಮೊನ್ನೆಯಷ್ಟೇ, Reno 14 5G ಅನ್ನು BIS (Bureau of Indian Standards) ನಲ್ಲಿ ಗುರುತಿಸಲಾಗಿದೆ. Reno 14 Pro 5G (ಮಾದರಿ ಸಂಖ್ಯೆ CPH2739) NBTC, IMDA ಮತ್ತು BIS ಡೇಟಾಬೇಸ್‌ಗಳಲ್ಲಿ ಕಾಣಿಸಿಕೊಂಡಿದೆ. Reno 14 Pro 5G ಗೀಕ್‌ಬೆಂಚ್‌ನಲ್ಲಿಯೂ ಕಾಣಿಸಿಕೊಂಡಿತು, ಅಲ್ಲಿ ಅದು ಸಿಂಗಲ್-ಕೋರ್‌ನಲ್ಲಿ 1581 ಮತ್ತು ಮಲ್ಟಿ-ಕೋರ್ ಪರೀಕ್ಷೆಗಳಲ್ಲಿ 6206 ಅಂಕಗಳನ್ನು ಗಳಿಸಿತು. ಇದು 2.10GHz, 3.00GHz ಮತ್ತು 3.25GHz ಗಡಿಯಾರದ ವೇಗದೊಂದಿಗೆ ಆಕ್ಟಾ-ಕೋರ್ ಪ್ರೊಸೆಸರ್‌ನಲ್ಲಿ ಕಾರ್ಯನಿರ್ವಹಿಸುತ್ತದೆ. ಇದರಿಂದ Reno14 ಮೇಲೆ ಭರವಸೆ ಹೆಚ್ಚಿದೆ.

ಒಂದು ವೇಳೆ Reno14 ಸರಣಿ ಆಗಿರದಿದ್ದರೆ, OPPO K13 ಟರ್ಬೊ ಅಥವಾ K13x ನಂತಹ ಹೊಸ OPPO K13 ಸರಣಿಯನ್ನು ಸಹ ಭಾರತಕ್ಕೆ ತರಬಹುದು ಎಂದು ಕೆಲವು ವರದಿಗಳು ಸೂಚಿಸುತ್ತವೆ. ಆದಾಗ್ಯೂ, ಇವೆಲ್ಲವೂ ಪ್ರಸ್ತುತ ಊಹಾಪೋಹಗಳಾಗಿವೆ. OPPO ತನ್ನ ಮುಂಬರುವ ಫೋನ್ ಕುರಿತು ಹೆಚ್ಚಿನ ಮಾಹಿತಿಗಳನ್ನು ಬಹಿರಂಗಪಡಿಸುವವರೆಗೂ ಕಾಯುವುದು ಸೂಕ್ತ. ಅಧಿಕೃತ ಬಿಡುಗಡೆ ಮತ್ತು ವೈಶಿಷ್ಟ್ಯಗಳ ಬಗ್ಗೆ ಇನ್ನಷ್ಟು ಮಾಹಿತಿಗಳನ್ನು OPPO ಶೀಘ್ರದಲ್ಲೇ ಪ್ರಕಟಿಸುವ ನಿರೀಕ್ಷೆಯಿದೆ. ಅಲ್ಲಿಯವರೆಗೂ ಈ ಸುದ್ದಿ ಭಾರತೀಯ ಮಾರುಕಟ್ಟೆಯಲ್ಲಿ ಯಾವ ರೀತಿಯ ಪರಿಣಾಮ ಬೀರಲಿದೆ ಎಂಬುದನ್ನು ಕಾದು ನೋಡಬೇಕು.