ಗೂಗಲ್‌ಗೆ ಠಕ್ಕರ್: ಇನ್ಮುಂದೆ ಶಿಯೋಮಿ ಫೋನ್‌ಗಳಲ್ಲಿರಲಿದೆ ಭಾರತದ 'ಪ್ಲೇಸ್ಟೋರ್'

ಗೂಗಲ್‌ನ ಪ್ಲೇ ಸ್ಟೋರ್‌ಗೆ ಪರ್ಯಾಯವಾಗಿ ಬಂದಿದ್ದ ಭಾರತದ 'ಇಂಡಸ್ ಆಪ್‌ಸ್ಟೋರ್' (Indus Appstore) ಇನ್ಮುಂದೆ ಎಲ್ಲಾ ಶಿಯೋಮಿ ಸ್ಮಾರ್ಟ್‌ಫೋನ್‌ಗಳಲ್ಲಿ ಪ್ರೀ-ಇನ್‌ಸ್ಟಾಲ್ ಆಗಿ ಇರಲಿದೆ. ಇಂಡಸ್ ಆಪ್‌ಸ್ಟೋರ್ ಒಡೆತನವನ್ನು ಹೊಂದಿರುವ ಫೋನ್‌ಪೇ ಮತ್ತು ಶಿಯೋಮಿ ಇಂಡಿಯಾ ಗುರುವಾರ ಬಹು-ವರ್ಷಗಳ ಪಾಲುದಾರಿಕೆಯನ್ನು ಘೋಷಿಸಿದ್ದು, ಈ ಸಹಯೋಗದ ಮೂಲಕ, ಸ್ವದೇಶಿ ಆಂಡ್ರಾಯ್ಡ್ ಅಪ್ಲಿಕೇಶನ್ ಮಾರುಕಟ್ಟೆಯನ್ನು ಈಗ ಭಾರತದ ಎಲ್ಲಾ ಶಿಯೋಮಿ ಸಾಧನಗಳಲ್ಲಿ ಅಳವಡಿಸಲಾಗುತ್ತದೆ. ಇದರಿಂದ, ದೇಶದಲ್ಲಿ ಚೀನಾದ ಗ್ರಾಹಕ ತಂತ್ರಜ್ಞಾನ ಬ್ರ್ಯಾಂಡ್‌ನ ಸ್ವಂತ ಆಂಡ್ರಾಯ್ಡ್ ಮಾರುಕಟ್ಟೆ GetApps ಅನ್ನು ಈಗ ಎಲ್ಲಾ ಪ್ರಸ್ತುತ ಮತ್ತು ಭವಿಷ್ಯದ ಸಾಧನಗಳಲ್ಲಿ ಇಂಡಸ್ ಆಪ್‌ಸ್ಟೋರ್‌ನೊಂದಿಗೆ ಬದಲಾಯಿಸಲಾಗುತ್ತದೆ. Xiaomi ಬ್ರಾಂಡ್ ಸಾಧನಗಳು ಮಾತ್ರವಲ್ಲದೆ, Redmi ಮತ್ತು Poco ಸಾಧನಗಳು ಸಹ GetApps ಅನ್ನು PhonePe ಯ ಆಪ್ ಸ್ಟೋರ್‌ನೊಂದಿಗೆ ಬದಲಾಯಿಸುತ್ತವೆ ಎಂದು ತಿಳಿದುಬಂದಿದೆ.

ಫೋನ್‌ಪೇ ಮತ್ತು ಶಿಯೋಮಿ ಇಂಡಿಯಾ ಎರಡು ಕಂಪೆನಿಗಳು ಇಂಡಸ್ ಆಪ್‌ಸ್ಟೋರ್ ನಡುವಿನ ಹೊಸ ಪಾಲುದಾರಿಕೆಯನ್ನು ಘೋಷಿಸುವ ಮೂಲಕ, ಭಾರತೀಯ ಗ್ರಾಹಕರಿಗೆ ಅನುಗುಣವಾಗಿ ಸ್ಥಳೀಯ ಡಿಜಿಟಲ್ ಪರಿಸರವನ್ನು ಬೆಳೆಸು ಪ್ರಯತ್ನ ಎಂದು ವಿವರಿಸಿವೆ. ಎಲ್ಲಾ ಶಿಯೋಮಿ ಸಾಧನಗಳು ಈಗ ಇಂಡಸ್ ಆಂಡ್ರಾಯ್ಡ್ ಮಾರುಕಟ್ಟೆಯನ್ನು ಒಳಗೊಂಡಿರುತ್ತವೆ ಎಂದು ಕಂಪನಿಯು ದೃಢಪಡಿಸಿದೆ. ಶಿಯೋಮಿ ಇಂಡಿಯಾ, ಇಂಡಸ್ ಆಪ್‌ಸ್ಟೋರ್ ವಿತರಣೆಯನ್ನು ಬೆಂಬಲಿಸಲು ತನ್ನ ಆಂತರಿಕ ಅಪ್ಲಿಕೇಶನ್ ಸ್ಟೋರ್ GetApps ಅನ್ನು ತ್ಯಜಿಸುತ್ತಿರುವುದರಿಂದ, ಈ ಕ್ರಮವು ವಿಶೇಷವಾಗಿದೆ. ಜಂಟಿ ಪ್ರಕಟಣೆಯಲ್ಲಿ, ಈ ಎರಡು ಘಟಕಗಳ ನಡುವಿನ ಯಾವುದೇ ಹಣಕಾಸಿನ ನಿಯಮಗಳನ್ನು ಉಲ್ಲೇಖಿಸಲಾಗಿಲ್ಲ.ಕಳೆದ ವರ್ಷದ ವರದಿಯ ಪ್ರಕಾರ, ಗೆಟ್‌ಆಪ್ಸ್ ತಂಡವು "ಇಂಡಸ್ ಸರ್ವೀಸಸ್ ಅಪ್ಲಿಕೇಶನ್" ಎಂಬ ಹೆಸರಿನಡಿಯಲ್ಲಿ ಇಂಡಸ್ ಆಪ್‌ಸ್ಟೋರ್ ತಂಡದೊಂದಿಗೆ ಕೆಲಸ ಮಾಡುವುದನ್ನು ಮುಂದುವರಿಸುತ್ತಿದೆ.

ಗೂಗಲ್ ಪ್ಲೇ ಸ್ಟೋರ್‌ಗೆ ಭಾರತೀಯ ಪರ್ಯಾಯವಾಗಿ ಇಂಡಸ್ ಆಪ್‌ಸ್ಟೋರ್ ಅನ್ನು ಫೆಬ್ರವರಿ 2024 ರಲ್ಲಿ ಪ್ರಾರಂಭಿಸಲಾಗಿತ್ತು. ಪ್ರಾರಂಭದಲ್ಲಿ, ಈ ಮಾರುಕಟ್ಟೆಯು ಸುಮಾರು 200,000 ಅಪ್ಲಿಕೇಶನ್‌ಗಳನ್ನು ಒಳಗೊಂಡಿತ್ತು. ವೇದಿಕೆಯು 12 ಭಾರತೀಯ ಭಾಷೆಗಳನ್ನು ಬೆಂಬಲಿಸುತ್ತದೆ, ಇದು ಪ್ರಾದೇಶಿಕ ಭಾಷೆ ಮಾತನಾಡುವವರಿಗೆ ಸುಲಭವಾಗಿ ನ್ಯಾವಿಗೇಟ್ ಮಾಡಲು ಮತ್ತು ಸಂಬಂಧಿತ ಅಪ್ಲಿಕೇಶನ್‌ಗಳನ್ನು ಅನ್ವೇಷಿಸಲು ಸಹಾಯ ಮಾಡುತ್ತದೆ. ಇದಲ್ಲದೆ, 10 ಭಾರತೀಯ ಭಾಷೆಗಳಲ್ಲಿ ಧ್ವನಿ ಆಜ್ಞೆಗಳನ್ನು ಸಹ ಬೆಂಬಲಿಸುತ್ತದೆ. ಇಂಡಸ್, ವೀಡಿಯೊ-ನೇತೃತ್ವದ ಅಪ್ಲಿಕೇಶನ್ ಅನ್ವೇಷಣಾ ವ್ಯವಸ್ಥೆಯನ್ನು ಒದಗಿಸುತ್ತದೆ, ಇದು ಬಳಕೆದಾರರಿಗೆ ಅಪ್ಲಿಕೇಶನ್‌ಗಳ ಕುರಿತು "ಟ್ರೇಲರ್" ಅನ್ನು ತೋರಿಸುತ್ತದೆ ಎಂದು ಫೋನ್‌ಪೇ ತಿಳಿಸಿದೆ. ಇದೀಗ ಇದು ಶಿಯೋಮಿಯ ಮೊದಲ ಪೂರ್ವ ಸ್ಥಾಪಿತ ಅಪ್ಲಿಕೇಶನ್‌ಗಳಿಗೆ ಮಾತ್ರವಲ್ಲದೆ, ಹೊಸ ಸ್ಥಾಪನೆಗೆ ಬೆಂಬಲ ಮತ್ತು ನವೀಕರಣಗಳನ್ನು ಒದಗಿಸುತ್ತದೆ.

ಈ ಪಾಲುದಾರಿಕೆ ಕುರಿತಂತೆ, "ನಮ್ಮ ಪರಿಸರ ವ್ಯವಸ್ಥೆಯೊಂದಿಗೆ ಇಂಡಸ್ ಆಪ್‌ಸ್ಟೋರ್ ಅನ್ನು ಸಂಯೋಜಿಸುವ ಮೂಲಕ, ಬಳಕೆದಾರರಿಗೆ ಸುಲಭ ಮತ್ತು ಸಮೃದ್ಧ ಅಪ್ಲಿಕೇಶನ್ ಅನ್ವೇಷಣೆಯ ಅನುಭವವನ್ನು ಒದಗಿಸುವ ಗುರಿಯನ್ನು ಹೊಂದಿದ್ದೇವೆ, ಜೊತೆಗೆ ಭಾರತೀಯ ಡೆವಲಪರ್‌ಗಳಿಗೆ ಹೆಚ್ಚಿನ ಪ್ರೇಕ್ಷಕರನ್ನು ತಲುಪಲು ಸಹಾಯ ಮಾಡುತ್ತೇವೆ" ಎಂದು ಶಿಯೋಮಿ ಇಂಡಿಯಾದ ಮುಖ್ಯ ಕಾರ್ಯಾಚರಣಾ ಅಧಿಕಾರಿ ಸುಧಿನ್ ಮಾಥುರ್ ಹೇಳಿದ್ದಾರೆ. ಇತ್ತ ಇಂಡಸ್ ಆಪ್‌ಸ್ಟೋರ್‌ನ ಮುಖ್ಯ ವ್ಯವಹಾರ ಅಧಿಕಾರಿ ಪ್ರಿಯಾ ಎಂ ನರಸಿಂಹನ್ ಅವರು ಈ ಪಾಲುದಾರಿಕೆಯನ್ನು "ಕಂಪನಿಯ ದೃಷ್ಟಿ ಹೊಸ ಆರಂಭ" ಎಂದು ಪರಿಗಣಿಸುವುದಾಗಿ ಮತ್ತು "ಶಿಯೋಮಿ ಇಂಡಿಯಾದೊಂದಿಗೆ ನಮ್ಮ ಪಾಲುದಾರಿಕೆಯನ್ನು ಭಾರತೀಯ ಮೊಬೈಲ್ ಬಳಕೆದಾರರು ಮತ್ತು ಡೆವಲಪರ್‌ಗಳಿಗೆ ಸಮತಲ ಅಪ್ಲಿಕೇಶನ್ ಸ್ಟೋರ್ ನಿರ್ಮಿಸುವ ನಮ್ಮ ಗುರಿಯತ್ತ ಮಹತ್ವದ ಮೈಲಿಗಲ್ಲಾಗಿ ಗುರುತಿಸುತ್ತೇವೆ" ಎಂದು ಹೇಳಿದ್ದಾರೆ.